QILAMIK TUHAQTITAURARHAQ: Taaqhivalliavia 5, 2017 – Iqaluit, NU – – Tikiutiyuugaluit anggiqatigiiplutik kihimi iniqhimalluanggittuq anggirut Nunavunmi Havaktunut Ikayuqtiit (NEU mik taivagaat) Qulliq Auladjutinut Kuapuraisingalu (QEC mik taivagaat) pidjutigiplugit 160 nik avatkuttut ikayuqtiqaqtut havaktiit havakpakhutik aulavikhanik inungnut tamainnut Nunavunmi.
“NEU kut quviahuktut tikiutiyuugaluit nakuuyumik naammagiyauyumik QEC nut iniktiqhimayuugaluit ihumagiyainnik pittiagiplugut tamainnik”, uqaqtuq Bill Fennell, Anggiyuqqaaq NEU kunni. “Hadja piliqtugut havaagiyakhanik Ilauyut uvaptingni vuutiriamingnik iniktigutikhamik anggirutimik. Ihumayugut anggirut pidjutiyuq ihumaguyauyainnik Ilauqatauyunit uvaptingni ihumagiplutiklu havaktip atuqpagaannik iharigiyainnik.
Ilauyut niruagutait iniktiqniagungnaqhiyuq iniktinnani Niqiliqiviup tatkiqhiutaa. Hivitunia pipkainiaqtuq aktuqtauyut NEU ni Ilauyut niruariamingnik Titiraqvigiyauyumik Anggiktauhimaliqtumun tamaita pitquyut naammagiyaat tamainnit NEU kut QEC kutnitlu.
Hamna hivunikhaliugutigiyauyuq QEC kunnut, ilitariyumayatkalu aivaqatigiiktut havakpiangmatta tikiutiplutik naammagiyauyumik ikayuutigilluaqtauyukhamut iniqhimalluanggittumik anggirunmik havangmatta”, uqaqtuq Minista Johnny Mike, Minista munariyaqaqtuq QEC kunnut.
Anggiktauqpat NEU kunni Ilauyut niruaqtillutik Ilauyunit, anggirut pidjutihimmaangniaqtuq taimunga Upluiqtirivia 31, 2020 mut.
“Quviahuktun’nga NEU kut QEC kutlu tikiutingmatta iniqhimalluanggittumik anggirunmik. Akhuuqpiaqpangmatta tamaita havakpiaqpakhutik ilitturiyauyumayatka,” uqaqtuq Minista Keith Peterson, Minista munariyalik Havaktunut Maligaannut.