IQALUIT, Nunavut (Apitilirvia 20, 2017) – Qulliq Alruyaktuqtunik Ikumadjutiit (QEC) quviahuktut aittuutigivlugu una 2017 Laura Ulluriaq Gauthier Maningnik Ikayuutikhaq havattiarpaktumut Nunavunmi ilihaqtimut. Aullaqtirutigiyaat 2001-mi, $5,000 aittuutikhaq tuniyauvktuq ukiuq tamaat ilihaqtumut ilihaqnahuaqtumut ilihaqyuuminahuaqhuni ilihaudjutikhaminut.
Art Sateana Kangiqliniq-mit uumani ukiungani aittuqtauyuq uuminga QEC-kut maningnik ikayuutikhamik pihimayuq ilihaudjutiminut havattiarutigiyainut naunaitpiakhunilu nunallaami ilaudjutaanut. Art tadja ilihaqtuq Munarhiliqinikkut Havaariraakpaktakhanut Ilihaudjutikhainut iliharvikyuangani University of Manitoba, hivumuukyuarutikhani inmi tikittumayaminut taaktiliqinirmut Nunavunmi.
“Quviahuktunga taimaa QEC-kut manikhatigut ikayuqniaqtaat Art ilihaidjutikhariyainut,” uqaqtuq Nanngariyauyuq Johnny Mike, Ministangat QEC-kut. “Utaqqihimaittuni Art ikayurumainnaktuq nunallaaminut nanngaridjutigiyaa kavamatkut hivuliqtiuhimayumut kangaraalukmit taimaa maningnut ikayuutauhimayumut attiqtaudjutigihimayaa.”
Laura Ulluriaq Gauthier ikayuqhimmaarutaa naunaikhivluni piyakhariyauyanut nunallaami nanminiriyainut auladjutikhainullu pidjutikhainut. Maningnut ikayuutikhaq naunaitkutauvaktuq ikayuutigihimayaanut piliuqnirmut auladjutikhanut kuapaliisitkuni Nunavunmut qilamik huiqhimadjutaanut 2000-mi.
“QEC-kut quyagiyumayait Ms. Gauthier ilaqatigiigutainut, Stephane unalu Amanda Kilabuk, ikayuqhimmaakpakmata QEC-kunik tikkuaqhivlutik havattiarpaktumut ilihaqpaktumut,” uqaqtuq Angiyuqqaaq Angiyuqqaaluaq Ataniqarvingmi Havaktiuyuq, Bruno Pereira.
###
Tuhaqtidjutikhanut uqaqvigivikhaq:
Sheila Papa
Atannguyaq, Kiinauyaliqiyikkut Tuhagakhanut
Qulliq Alruyaktuqtunik Ikumadjutiit
(867) 979-7529
spapa@qec.nu.ca