IQALUIT, Nunavut (Qitiqqauyaqvia 13, 2017) – Tamna Nangariyauyuq Johnny Mike, Ministauyuq munagiyuq Qulliq Alruyaqtuqtunik Ikumadjutiit (QEC) ublumi tuhaqtitiyuq tikuaktauhimayuq Nicole Jauvin Katimayiimun talvani QEC-kutnun, aulaliqtuq Qiqaiyaqvia 23, 2017.
Minista Mike tikuaktauffaaqmiya Elijah Evaluarjuk katimayiimun talvuuna Ubluqtuhirvia 7, 2017mi taima malruiqtukhimayumik pingahunik ukiunganik ilauyukharnik. Mista Evaluarjuk tikuaktauffaaqmiyuqlu lIkhivautauniaqtuq Katimayiimun taima ikhivautavakhimayuq talvanga Imaruqtiqvia 2016mi.
"Quyagiumayaga Mista Evaluarjuk aituihimaarpakami QEC-kutnun talvuuna angirutigivakhimagamilu tikuaktauffaarnikkut. Quviahuktungalu taima Ms. Jauvin ilauliqman katimayiimun. Havaagigaluangit talvnai kanatam kavamatkuni havakpagaingitlu Tunnganirmi aituiniaqtun pidjutikharnik kuapuraisimun," uqalaktuq Minista Mike. "Ukuat tikkuaqtauhimayut aituiniaqtun aulahimaaqtukharnik kuapuraisimun hivulliqtikharnik ihuaqtunik ayuittiarutikhanik ilihimayainiklu aulayut katimayiinun."
Tamna QEC-kut Katimayiit piqaliktun siksinik ilauyukharnik ilauniaqtun pingahunik tikuaktauyukharnik. Ataani Qulliq Alruyaktuqtunik Ikumadjutiit Maligaq, Katimayiingit katimayikhat ikitqiyaungittumik 6-nit katimayikhanik amigaitqiyaungittumiklu 10nik katimayikhanik.