IQALUIT, Nunavut (July 13, 2017) – Qulliq Alruyaktuqtunik Ikumadjutiit (QEC) uuktuliqtuq Nan’ngariyauyumut Johnny Mike, Minista munariniqaqtuq QEC-kunnut, angirutikhamik ilaliutiyuq Kuapuriisiup nutaaq Amiakkungit Kititiqhugit Piliriakhaq uumani Atuqtauvaktunut Qanurittaakhainganinginnullu Havaamit.
Tamna nutaaq piliriakhaq pipkaidjutiniaqtuq inungnut pauwamik atuqtunut atauhiqmiklu Haamlatkut Kuapuriisingat pauwamik atuqtut atauhiqmut nunallaamut piliuriami nanminiq pauwamik ukunuuna atuffaaginnarialiknik piliurninnganik, tuyuqlugulu ilakungit aulayunnautingit atuqtangit QEC-tkut havaqutinginnik pigiamilu atuqtakhanginnik qakugu pauwaqtuutikhanganik. Iliuraqhimayut atuinnariaqariami aulayunnautingit angitqiyauyukhaungittut 10 kW.
“Munariplugit nunamikni aulayunnautinginnik ihariagiyauyuq ikikliyuumiriami pilaqutivut avatiptiknut pigiamilu Nunavuutim aulayunnautinik ihariagiyait pipkaidjutiliqtillugu akuniraalukmik angikliyuumiqniq piliurninngalu”, uqaqtuq Minista Mike. “Quviahuktunga QEC-tkut havaanganik hivumuuqtiriami nunavuutim Amiakkungit Kititiqhugit Piliriakhaq niriuktungalu uqaqatigiami ukununnga Uumaqutingit Akingit Ihivriurningit Katimayiingit (URRC) QEC-tkut uuktuutinganik”.
QEC ihumagiyut URRC-kut iniqtiqniaqtait ihivriuqtamiknik aadlangurniaruknaqhiunik ukununnga Atuqtauvaktunut Qanurittaakhainganinginnullu Havaanik, tunilugillu pitquyanginnik Ministamut munariniqaqtuq QEC-tkunnut Apitiliriviktinnagu 2017. Tamaat piliriakhaq naunaitkutinga takuinnarialik QEC-tkut qaritauyakkut pulaarvingani uuktuutingillu piinarialgit pauwaqtuutinik atuqtunit angiqtaukpata Tattiaqnaqviami 2, 2017.
“Ilitariyavut pauwaqtuutinik atuqtut ilauyumayullu atuinnarianginnariami aulayunnautinut kitunik piumayanginnik aadjikutaliriamikni aulayunnautinik atuqtamiknik ikayuriamiknilu ikikliyuumiriami atuqtauninnganik naunaitkutinga. Tamna Amiakkungit Kititiqhugit Piliriakhaq akhuurutauyuq hivumuuriamik pauwaqtuutinik atuqtunut QEC-tkullu halumayuq aulayunnautinga hivuniqmi”, uqaqtuq Bruno Pereira, Atan’nguyaq unalu Tukimuaqtiuyuqlu QEC-kunnut.