IQALUIT, Nunavut (Qiqaiyalirvia 5, 2021) – Qulliq Auladjutiqhanut Kuapurainga (QEC mik naunaittut) takupkaqtittiyut nutaamik Maniliurviit Havagvikyuatlu Atutqiqtaaffaaqtunik Auladjutiqhanik (CIPP mik naunaittut) pivinga. Pivinga piliuqhimayuq pipkaiyaami aulahimayut huli maniliurviit havagvikyuanilu niuvikpaktunik (kavamait havagviit, hamalatkut, nanminiqaqtutlu) aulaviqhainnik auladjutiqhanut atutqiqtaaffaaqtunik auladjutihatigut niuvrutigiplugitlu QEC kunnut. CIPP ni ilauyut akiliqtauniaqtut auladjutiqhatigut atutqiqtaaffaaqtunik niuvgutigiplugitlu QEC kunnut akiliuhia aadjikkutaa kuapuraitkut uqhuqyuatigut ilipkaqhimayainnut.
“Quviahuktun’nga tunihiplugu nunavutim nutaangguqpia pivinga ihumagilluagiplugu halumayumik auladjutiqhat nunallaaptingnut,”uqaqtuq Maligaliuqti Jeannie Ehaloak, Minista munariyaqaqtuq QEC kunnut. “Una pivinga qaummaktittiniaqtuq nunani pivalliavikhainnut atutqiqtaaffaaqtunik ikayuutiqhat, havaktillutik imaa piyaami Nunavunmiunut, taapkuat akiliqtuivaktunik akitunnakyuanik akiliuhianggit auladjutiqhamik Kanatami, akiliffaaqyuayuittut piqaqtilluni halumayumik auladjutiqhamik.”
QEC kut hadja piliqtut uuktuutiqhanik CIPP pivingganut. Kuapurainga aqhutaqyuaq pitquyut kitut pitaaqtut ilauyumayut niuvgutinggillutik atutqiqtaaffaaqtunik auladjutihatigut talvainakmi kihimi uuktuutait ihivriuqtaugumi.
“Iliurangnirmik atutqiqtaaffaaqtunik auladjutiqhanik nunaptingnut ikayuutauniaqtuq ikiqliyuummiklugit Nunavut haatirnia uqhuqyuatigut, ikiqliyuummiklugitlu puyuit aqhuuqhailutiklu auladjutiqhamut -inmik ihuaqutiqhainnut,” uqaqtuq Rick Hunt, QEC kut Anggiyuqqaan’nga CEO ngiuplunilu. “QEC kut pidjutihimmaaqtut auladjutiqhatigut ikayuutigittaaqtunik halumayumik auladjutiqhanik nunavunmut.”
Naunaittiagumaguit QEC ngat CIPP pivinga qanuqlu uuktuqtaariami, talvunggaulutin www.qec.nu.ca.
###
Tuhaqtitauyuqhanut uqaqvigiyaqhaq
Renee Boucher
Atan’nguyaullaqtuq, Kuapuraitkut Tuhaqtipkaiyini
Qulliq Auladjutiqhanut Kuapurainga
(867) 979-7534