ᐆᒻᒪᖅᑎᒋᐊᒃᑲᓐᓂᕈᒃ ᐃᖃᓇᐃᔮᖅ ᐅᑭᐅᖅᑕᖅᑐᒥᑦ!
ᖃᐅᔨᒋᐊᕈᒃ ᐃᓕᖕᓄᑦ ᐱᓕᕆᐊᒃᓴᑦᑎᐊᕙᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ! ᐃᓚᐅᕝᕕᒋᒃᑭᑦ ᐱᓇᔪᒍᒪᑦᑎᐊᖅᑐᑦ ᐱᓕᕆᔨᕗᑦ ᐱᓕᕆᖃᑦᑕᖅᓯᒪᑦᑎᐊᖅᑐᑦ ᓴᓇᕝᕕᖕᒥ ᐱᓕᕆᔨᓪᓚᕇᑦ ᐊᑦᑕᕐᓇᙱᑦᑐᒥᒃ, ᐊᑐᑦᑎᐊᖏᓐᓇᕈᓐᓇᖅᑐᒥᒃ, ᐊᑭᑐᓗᐊᙱᑦᑐᒥᒡᓗ ᐆᒻᒪᖅᑯᑎᖃᖅᑎᑦᑎᕙᒃᖢᑎᒃ ᓄᓇᕗᓕᒫᒥ.
ᓄᓇᕗᒻᒥ ᐱᓕᕆᓂᖅ
ᓄᓇᕗᑦ ᑲᓇᑕᒥ ᓄᑖᖑᓛᖑᔪᖅ ᐊᖏᓛᖑᓪᓗᓂᓗ ᐱᕈᖅᐸᓪᓕᐊᓛᒥᓪᓗ ᑮᓇᐅᔭᓕᐅᕈᑎᖃᖅᖢᓂ ᑲᓇᑕᒥ. ᑲᔾᔮᕐᓇᖅᑐᓂᒃ ᓄᓇᖓ ᑕᐅᑦᑐᖃᖅᖢᓂ ᐱᕕᒃᓴᑦᑎᐊᕆᒃᖢᓂᓗ, ᐊᓕᐊᓇᐃᒋᑦᑎᐊᕐᓂᐊᖅᐸᐃᑦ ᐃᖅᑲᓇᐃᔭᕐᕕᒋᔭᕐᓂᑐᐊᖑᙱᑦᑐᖅ, ᐱᓕᕆᓐᓇᐅᙱᑦᑐᒃᑯᓪᓘᓐᓃᑦ. ᕿᒧᒃᓯᕈᒪᓐᓂᕈᕕᑦ, ᓯᑭᑑᑲᑕᒡᓗᑎᑦ, ᖃᔭᖅᑐᕐᓗᑎᑦ, ᐃᖃᓪᓕᐊᕐᓗᑎᑦ, ᕿᒥᕐᕈᔪᒪᓐᓂᕈᕕᓪᓘᓐᓃᑦ ᐃᓕᖅᑯᓯᕐᒥᓂ ᐊᑐᓪᓚᕆᒃᑐᓂᑦ ᓴᓇᙳᐊᖅᑎᓂᑦ ᓂᔾᔭᐅᓯᔭᖅᑎᓂᒡᓗ, ᓄᓇᕗᑦ ᐃᓕᖕᓄᑦ ᐃᓂᒃᓴᑦᑎᐊᕙᐅᕗᖅ.
ᖁᓪᓕᒃᑯ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᒪᒋᔭᒃᓴᖃᖅᑐᑦ ᐊᑐᐃᓐᓇᐅᑎᑦᑎᓗᑎᒃ ᐊᑦᑕᕐᓇᙱᑦᑐᒥᑦ, ᐊᑐᑦᑎᐊᖏᓐᓇᕈᓐᓇᖅᑐᒥᒃ ᐆᒻᒪᖁᑎᒥᒃ ᐊᑭᓕᖅᓱᐃᕙᒃᑐᓕᒫᓄᑦ ᓄᓇᕗᒻᒥ. ᓇᖕᒥᓂᕆᔭᐅᔪᖅ ᓄᓇᕗᑦ ᒐᕙᒪᒃᑯᓐᓂ ᐊᐅᓚᑕᐅᓪᓗᓂᓗ ᐃᓛᒃᑰᖅᖢᑎᒃ ᓄᓇᕗᒻᒥ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᑐᐃᓐᓇᐅᑎᑦᑎᓲᖑᔪᑦ ᐆᒻᒪᖁᑎᓂᒃ ᐅᖅᑰᓴᐅᑎᓂᒡᓗ ᓄᓇᕗᒻᒥ. ᐊᓯᓕᒫᖏᑦ ᐆᒻᒪᖅᑯᑎᖃᕐᕖᑦ ᑲᓇᑕᒥ ᑕᐅᑐᒃᖢᒋᑦ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᒃᓱᕈᕐᓇᖅᑐᖅᓯᐅᖃᑦᑕᖅᐳᑦ ᐊᐅᓚᑦᑎᓪᓗᑎᒡᓗ ᐊᕙᑎᓪᓗ ᑕᓪᓕᒪᓂᒃ ᐃᓛᒃᑰᖅᑐᓂᒃ ᐊᐅᓚᐅᑎᖃᕐᕕᐊᓗᖕᓂᒃ ᐆᒻᒪᖅᑯᑎᖃᖅᑎᑦᑎᓪᓗᑎᒡᓗ ᓄᓇᓕᓕᒫᓂᒃ ᓄᓇᕗᒻᒥ.
ᐃᒡᓗᕐᔪᐊᓄᑦ ᐊᐅᓚᑦᑎᔨ ᕿᔪᓕᕆᔨᒧᑦ (ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖ 23-026)
ᐃᖃᓗᐃᑦ, ᓄᓇᕗᑦ
ᐃᒡᓗᕐᔪᐊᓄᑦ ᑲᒪᔨ ᐊᑐᐃᓐᓇᐅᑎᑦᑎᕙᒃᑐᖅ ᓇᖕᒥᓂᖁᑎᒋᔭᐅᔪ ᐊᐅᓚᑦᑎᓂᕐᒧᑦ ᐱᔨᑦᑎᕋᕐᓂᖅ ᑎᒥᐅᔪᒧᑦ ᐊᐅᓚᑦᑎᔨᐅ ᐊᒻᒪ ᐋᕿᐅᒪᑎᑦᑎᓂᕐᒧᑦ ᑎᒥᖁᑎᐅᔪ ᐃᒡᓗᕐᔪᐊᖓᓄᑦ, ᐊᐅᓚᐅᑎᖃᕐᕕᖏᓐᓂᑦ, ᒥᖅᓲᑕᐅᔭᙳᐊᑦ ᐃᒡᓗᕋᓛᖏᓐᓂᑦ,ᓯᕐᓗᐊᖏᓐᓂᑦ. ᑎᑎᕋᕐᕕᖏᓐᓂᑦ ᐱᖃᓯᐅᑎᓗᒋᑦ ᐃᖃᓇᐃᔭᑎᑦ ᐊᒻᒪᓗ ᐃᖃᓇᐃᔭᕆᐊᓚᐅᑲᒃᑐᓄᑦ ᐃᒡᓗᖁᑎᖏᓐᓂᑦ.
ᐱᓕᕆᐊᒃᓴᖏᑦ ᑲᒪᒋᔭᒃᓴᖏᓪᓗ:
- ᖃᐅᔨᓴᖅᐸᒡᓗᓂ, ᓇᓗᓇᐃᖅᓯᕙᒡᓗᓂ, ᐋᖅᑭᒃᓱᐃᕙᒡᓗᓂ, ᐱᓕᕆᕙᒡᓗᓂ ᐊᒻᒪ/ᐅᕝᕙᓘᓐᓃᑦ ᐋᖅᑭᐅᒪᑎᑦᑎᕙᒡᓗᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᖁᑎᖏᓐᓂᒃ.
- ᐋᖅᑭᒃᑕᐅᓯᒪᙱᑦᑐᓂᑦ ᐱᔭᐅᔪᒪᔪᒥᑦ ᐅᖃᐅᓯᐅᔪᖃᕌᖓᑦ ᑭᐅᕙᒡᓗᓂ ᐊᒻᒪ ᐋᖅᑭᒃᓯᓇᓱᒃᐸᒡᓗᓂ ᐋᖅᑭᒃᓱᖅᑕᐅᓯᒪᓂᖓᓂ/ᐃᒡᓘᑉ ᖄᖓᓂ ᓱᕋᖅᓯᒪᔪᒥᑦ, ᐊᐅᓚᐅᑎᖓᓂᒃ ᐊᒻᒪ ᓄᑭᓪᓚᐅᑎᖓᓂᒃ ᐊᔪᓕᖅᑐᖃᖅᐸᑦ, ᑐᐊᕕᕐᓇᖅᑐᖅᑕᖃᖅᐸᓪᓗ ᖃᐅᑕᒫ ᐊᐅᓚᓂᕆᕙᒃᑕᖓᓂᑦ ᐊᒃᑐᐃᓗᓂ.
- ᐱᕙᓪᓕᐊᑎᑦᑎᕙᒡᓗᓂ ᑐᕌᒐᐅᔪᓂ, ᐊᒻᒪ ᐱᓕᕆᔾᔪᓰᑦ ᓂᐅᕕᐊᒃᓴᓄᑦ ᐱᔨᑦᑎᕋᕈᑎᓄᓪᓗ ᑐᒃᓯᕋᐅᑎᓂᒃ ᐱᔪᒪᔾᔪᑏᑦ/ᑐᒃᓯᕋᐅᑦ ᐊᑭᒃᓴᓄᑦ ᐊᓯᖏᓐᓂᓗ, ᒪᓕᒡᓗᒋᑦ ᐱᓇᓱᐊᖅᑕᐅᔪᑦ ᒪᓕᒋᐊᓖᑦ ᐊᑐᕆᐊᓖᓪᓗ ᑲᔪᓯᑎᑦᑎᓂᕐᒧᑦ ᐅᕝᕙᓘᓃᑦ ᐋᑭᐅᒪᑎᑦᑎᓂᕐᒧᑦ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᒃᑯᑦ ᐱᖁᑎᖏᓐᓂᑦ.
- ᐸᕐᓇᐅᑎᑦ ᐊᒻᒪ ᕿᔪᓕᕆᓂᕐᒧᑦ ᐊᒻᒪᓗ ᐱᖁᑎᓂ ᐋᕿᐅᒪᑎᑦᑎᓂᕐᒧᑦ ᐱᓕᕆᐊᒃᓴᑦ ᐱᖃᓯᐅᑎᔪᑦ ᐱᓯᒪᓂᕐᒥᒃ ᖃᔅᓯᑐᕐᓂᐊᕐᓂᖏᓐᓂᒃ ᐱᖁᑎᓄᑦ ᐊᒻᒪᓗ ᐊᖏᕈᑎᒧᑦ ᐱᔨᑦᑎᕋᕐᓂᖅ, ᐱᕙᒌᔭᐃᓂᖅ ᑎᑎᕋᐅᔭᖅᓯᒪᔪᓂ, ᓇᓚᐅᑦᑖᖅᑕᐅᓯᒪᔪᓂ ᐊᒻᒪᓗ ᑐᒃᓯᕋᐅᑎᓂ ᐱᓕᕆᐊᒃᓴᐅᒧᒫᖅᑐᓄᑦ.
- ᓴᓇᕝᕖᑦ ᐊᑐᕈᒥᓇᓛᖏᓐᓂᒃ ᐊᑐᖅᑕᐅᔭᕆᐊᓕᖕᓂᓪᓗ ᒪᓕᒃᐸᒡᓗᓂ ᐊᒻᒪ ᑕᒪᐃᓐᓂᒃ ᐊᑐᖅᑐᐊᖅᑎᑦ ᒪᓕᒐᖏᓐᓂᒃ ᒪᓕᒃᐸᒡᓗᓂ ᐃᖅᑲᓇᐃᔭᖅᑎᑦ ᐃᒡᓗᖁᑎᖏᑕ ᐊᑐᖅᑐᐊᖅᑎᖏᓐᓂᒃ, ᐊᑭᑦᑐᕋᐅᑕᐅᔪᑦ ᒪᓕᒐᖏᓐᓂᒃ, ᑲᓇᑕᒥ ᐃᒡᓗᕐᔪᐊᑦ ᒪᓕᒐᖏᓐᓂᒃ, ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒻᒪ ᒪᓕᒋᐊᓕᖏᓐᓂᒃ ᐊᑐᐊᒐᕐᓂᓗ ᐱᓕᕆᐊᖃᓕᕌᖓᒥ, ᐊᒻᒪ ᓱᓕ ᐆᒻᒪᖅᑯᑎᓕᕆᔨᒃᑯᑦ ᓄᓇᕗᑦ ᒐᕙᒪᒃᑯᓪᓗ ᑮᓇᐅᔭᖏᓐᓂᒃ ᐊᐅᓚᑦᑎᕙᒡᓗᓂ, ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐊᒻᒪ ᐱᑖᕆᔭᐅᔪᓪᓗ ᐊᑐᐊᒐᖏᓐᓂᒃ ᐊᒻᒪ ᐱᓕᕆᔾᔪᑎᖏᓐᓂᒃ.
- ᖃᖓᑐᐃᓐᓇᖅ ᐊᑐᐃᓐᓇᐅᕙᒡᓗᓂ ᓇᐅᑦᑎᐅᒪᕙᒡᓗᓂᓗ ᐃᖅᑲᓇᐃᔮᖃᖅᑐᒧᑦ ᐱᓕᕆᐊᖑᔭᕆᐊᖃᓪᓚᕆᒃᑐᖅ ᐊᒻᒪ ᐋᖅᑭᒃᑕᐅᓯᒪᕙᒌᖅᑐᓂᒃ ᐱᓕᕆᐊᒃᓴᓂᒃ ᑐᙵᕕᖃᕐᓗᓂ ᐱᓕᕆᐊᒃᓴᕆᔭᐅᓪᓗᓂ ᑲᑐᔾᔨᖃᑎᒌᑦ ᐱᔭᕆᐊᓕᖏᓐᓂᒃ ᐃᑲᔫᑎᒃᓴᑦ ᖃᔅᓯᐅᓂᖏᑦ ᐊᑐᐃᓐᓇᐅᔪᑦ ᐱᔾᔪᑎᒋᓪᓗᒋᑦ, ᐊᑐᕈᓐᓇᖅᑐᑦ ᐃᖅᑲᓇᐃᔭᕐᓂᕐᒧᑦ ᐊᖏᖃᑎᒌᒍᑎᑦ ᐊᒻᒪ ᐊᑐᐊᒐᐃᑦ.
ᐅᑯᓂᖓ ᐊᔪᙱᓐᓂᖃᕆᐊᓕᒃ:
- ᑲᓇᑕᒥ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᐊᐅᐸᖅᑐᒥᑦ ᓇᕿᑕᐅᓯᒪᔪᒥᑦ ᓇᓗᓇᐃᒃᑯᑕᖃᕐᓗᓂ ᕿᔪᓕᕆᔨᐅᓂᕐᒥᑦ.
- ᐊᕐᕌᒍᓄᑦ ᑎᓴᒪᓄᑦ (4) ᐱᓕᕆᖃᑦᑕᖅᓯᒪᓂᑰᓗᓂ ᕿᔪᓕᕆᓂᕐᒥᒃ ᐊᒻᒪ ᐃᒡᓗᓂᒃ ᐋᖅᑭᐅᒪᑎᑦᑎᓂᕐᒥᒃ;
- ᐊᑐᕈᓐᓇᖅᑐᒥᒃ ᐊᖁᑦᑐᓐᓇᐅᑎᖃᕐᓗᓂ ᓈᓴᐅᑎᓕᖕᒥᑦ 5−ᒥᑦ ᓈᒻᒪᒋᔭᐅᔪᒥᓪᓗ ᐊᖁᑦᑐᓐᓇᕐᓗᓂ.
ᐃᑲᔪᕐᓂᖃᕋᔭᖅᑐᑦ:
- ᑲᓇᑕᒥ ᐊᕕᒃᑐᖅᓯᒪᔪᓂ ᐊᐅᐸᖅᑐᒥᑦ ᓇᕿᑕᐅᓯᒪᔪᒥᑦ ᓇᓗᓇᐃᒃᑯᑕᖃᕐᓗᓂ ᕿᔪᓕᕆᔨᐅᓂᕐᒥᑦ.
- ᐱᓕᕆᐊᑦᓴᓄᑦ ᐊᐅᓚᑦᑎᓂᑰᖃᑦᑕᖅᓯᒪᓂᖅ ᐊᑲᐅᓇᔭᖅᑐᖅ.
- ᖃᐅᔨᒪᓗᓂ ᓄᓇᕗᒻᒥ, ᓄᓇᖓᓂ, ᐅᖃᐅᓯᖏᓐᓂ ᐊᒻᒪ ᐃᓕᖅᑯᓯᖓᓂ
- ᐅᖃᕈᓐᓇᕐᓗᓂ ᐃᓄᒃᑎᑐᑦ, ᐃᓄᐃᓐᓇᖅᑐᓐ ᐊᒻᒪ/ᐅᕝᕙᓘᓐᓃᑦ ᐅᐃᕖᑐᑦ.
ᐊᔾᔨᐸᓗᖏᓐᓂᓪᓘᓐᓃᑦ ᐃᓕᓐᓂᐊᖅᓯᒪᓗᓂ ᐊᔾᔨᒌᙱᑦᑐᓂᑦ ᑖᒃᑯᓂᖓ ᑕᐃᔭᐅᔪᓂᑦ ᐃᓱᒪᒋᔭᐅᓂᐊᖅᑐᑦ.
ᑮᓇᐅᔾᔭᒃᓴᑦᑎᐊᕋᔭᖅᑐᖅ ᐱᒋᐊᕐᕕᖃᕐᓗᓂ $93,017.60−ᒥ $115,294.40-ᒧ ᐅᑭᐅᖅᑕᖅᑐᒥᐅᑕᓂᕐᒧᓪᓗ ᐃᑲᔫᓯᐊᖅᑖᖅᐸᓪᓗᓂ $16,008.00−ᒥ ᐊᕐᕌᒍᒧᑦ. ᐊᑐᐃᓐᓇᐅᑎᑦᓯᖕᒥᔪᒍᑦ ᓈᒪᔪᒥᑦ ᐃᑲᔫᓯᐊᖅᑖᖅᑎᑦᑎᕙᒃᑐᑦ ᐅᑯᓂᖓᓗ ᓇᓗᓇᐃᖅᓯᒪᔪᓂᒃ ᐃᑲᔫᓯᐊᒃᓴᓂᒃ ᐃᓐᓇᖅᓯᐅᑎᒃᓴᓄᑦ. ᓱᓕᒃᑲᓐᓂᖅ, ᐃᖅᑲᓇᐃᔭᖅᑎᐅᑉ ᐃᒡᓗᒃᓴᖓᓄᑦ ᐃᑲᔪᖅᑕᐅᔾᔪᑎᖃᖅᑐᖅ ᑖᔅᓱᒧᖓ ᐃᖅᑲᓇᐃᔮᒧᑦ. ᑖᓐᓇ ᐃᖅᑲᓇᐃᔮᒃᓴᖅ ᐃᓚᓕᐅᔾᔭᐅᓯᒪᕗᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ.
ᓄᓇᕗᒻᒥᐅᑉ ᐃᓄᐃᑦ ᓯᕗᓪᓕᖅᐸᐅᔾᔭᐅᓂᐊᖅᑐᑦ.
ᐱᓇᔪᒍᒪᒍᕕᑦ ᓇᒃᓯᐅᑎᓗᒍ ᐱᓇᔪᒍᑎᒋᔭᐃᑦ ᖃᕆᑕᐅᔭᒃᑯᑦ ᑎᑎᕋᖃᑦᑕᐅᑎᕝᕕᒃᑯᑦ ᐅᕗᖓ careers@qec.nu.ca.
ᑎᑎᖅᑲᑦᑯᑦ ᐱᓇᓱᐊᕐᓗᑎ ᔫᓂ 23, 2023 ᑐᖔᓂ
ᐱᓇᔪᒃᑐᑦ ᑖᔅᓱᒧᖓ ᐃᖅᑲᓇᐃᔮᒃᓴᒧᑦ ᐃᓱᒪᒋᔭᐅᑐᐃᓐᓇᕆᐊᓖᑦ ᓯᕗᓂᒃᓴᒥ ᐃᖅᑲᓇᐃᔭᖅᑎᒃᓴᓄᑦ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᑦ.
ᖁᔭᓕᔭᕗᑦ ᑕᒪᐃᓐᓂᒃ ᐱᓇᓱᖃᑕᐅᔪᒪᔪᓕᒫᑦ. ᑭᓯᐊᓂᑦᑕᐅᖅ, ᐱᓇᔪᒃᑐᑦ ᓂᕈᐊᖅᑕᐅᔪᑐᐊᑦ ᑐᓴᖅᑎᑕᐅᓂᐊᕐᒪᑕ.