ᐅᑭᐅᖅᑕᖅᑐᕐᒥᐅᑕᐅᓪᓗᓂ ᑖᖅᑐᒥᐅᑕᐅᓗᓂ ᑭᓯᐊᓂᐅᒻᒪᑦ, ᐅᑭᐅᒃᑯᑦ ᓂᒡᓚᓱᑦᑐᐊᓘᓲᖅ ᐅᖅᑰᓴᕆᐊᖃᕐᓇᕐᒪᑦ ᖃᐅᒻᒪᖁᑎᖃᕆᐊᖃᖅᖢᑕᓪᓗ ᐊᖏᕐᕋᕆᔭᐅᔪᑦ. ᑲᙳᓇᖏᒻᒪᑦ ᐅᖃᐅᓯᕆᔭᕆᐊᖓ ᐱᔨᑦᑎᕋᖅᑕᕗᑦ ᐊᐅᓚᔪᓐᓇᐅᑎᓄᑦ ᐊᑐᕐᓂᖅᓴᐅᕙᒻᒪᑕ ᐊᖏᕐᕋᒥᓂᑦ, ᐊᑭᓕᖅᓱᐃᓂᖅᓴᐅᕙᒻᒪᑕ ᑕᖅᑭᑕᒫᑦ ᐊᑭᓕᕆᐊᓕᒻᒥᓂᑦ. ᖁᓪᓕᖅ ᐊᐅᓚᔪᓐᓇᐅᑎᓄᑦ ᑎᒥᐅᔪᖅ ᐊᑭᖓᓂᑦ ᐊᓯᔾᔩᔪᓐᓇᖏᒻᒪᑕ ᓄᓇᕗᒻᒥ (ᐊᐅᓚᔪᓐᓇᐅᑎᓄᑦ ᐊᒻᒪᓗ ᓯᐊᒻᒪᖅᑕᐅᓂᖓᓄᑦ ᐊᑦᑐᐊᒪᑦ ᐊᑭᖓ), ᑭᓯᐊᓂ ᐱᔨᑦᑎᕋᖅᑕᐅᔪᑦ ᐃᑲᔪᕈᓐᓇᖅᑕᕗᑦ ᓄᑭᓪᓚᐅᑎᓂᑦ ᐊᑐᓗᐊᖅᑕᐃᓕᒪᓂᕐᒧᑦ ᐊᖏᕐᕋᓐᓂᑦ.
ᐊᒥᓱᑲᓪᓚᐅᒪᑕ ᐱᔨᑦᑎᕋᖅᑕᐅᔪᑦ ᓄᑭᓪᓚᐅᑎᓂᑦ ᐊᑐᓗᐊᕈᓐᓃᕈᓐᓇᖅᑐᑦ. ᓄᑭᓪᓚᐅᑎᓂᑦ ᐊᑐᓗᐊᖅᑕᐃᓕᒪᓂᖅ ᐊᒻᒪᓗ ᓄᑭᓪᓚᐅᑎᓂᑦ ᐊᑐᑦᑎᐊᕐᓂᖅ ᓲᕐᓗ ᖃᐅᒻᒪᖅᑯᑏᑦ ᖃᒥᖃᑦᑕᕐᓗᒋᑦ ᐊᑐᕐᓂᐊᖏᑦᑕᖓᑕ ᐋᕿᑦᓯᓗᓂᓗ ᐅᖅᑯᓴᐅᑎᒧᑦ ᐊᑐᓗᐊᖅᑕᐃᓕᒪᔾᔪᑎᒥᒃ ᐊᖏᕐᕋᒥᑦ ᓇᒻᒥᓂᖁᑎᒥᓪᓗᓃᑦ. ᑕᐃᒪᐃᓕᐅᕈᕕᑦ, ᐱᔨᑦᑎᕋᖅᑕᐅᔪᑦ ᐊᐅᓚᔪᓐᓇᐅᑎᓄ ᐊᑭᓕᐅᑎᕙᑦᑕᑎᑦ ᖃᑦᓰᓇᐅᓂᖅᓴᐅᒐᔭᖅᑐᑦ ᐊᒻᒪᓗ ᐊᕙᑎᑦᑎᓐᓂᑦ ᓴᐳᔾᔨᓯᒪᓂᖅᓴᐅᒐᔭᖅᑐᖅ.
ᐅᑯᐊ ᑕᕝᕙ ᖃᑦᓰᓇᐅᒐᓗᐊᑦ ᐃᑲᔫᑎᔪᓐᓇᖅᑐᑦ ᐊᐅᓚᔪᓐᓇᐅᑎᓂᑦ ᐊᑐᓗᐊᖅᑕᐃᓕᒪᓗᓂ ᒪᓕᖔᑦᓴᑦ ᓄᓇᕗᒻᒥ:
- ᑮᓇᐅᔭᓂᑦ ᐊᑐᓗᐊᖅᑕᐃᓕᒪᓂᖅ − ᐊᑭᑭᓪᓕᒋᐊᕈᓐᓇᖅᑕᑎᑦ ᐅᖅᑰᓴᐅᑎᓐᓄᑦ, ᓄᑭᓪᓚᐅᑎᓄᑦ ᐅᖅᓱᐊᓗᒻᒧᓪᓗ ᐊᑭᓕᐅᑎᕙᑦᑕᑎᑦ. ᓴᓇᔭᐅᔾᔪᑎᖏᓐᓄᔾᓗ ᐃᓇᖏᖅᑕᐅᔪᑎᖏᓐᓄᓪᓗ ᐊᑭᑭᓐᓂᖅᓴᐅᒐᔭᖅᑐᖅ ᓄᑭᓪᓚᐅᑎᓂᒃ ᐊᑐᖏᓐᓂᖅᓴᐅᒍᓂ.
- ᓄᓇᒧᑦ ᐊᕙᑎᑦᑎᓐᓄᓪᓗ ᐊᑦᑑᑎᖃᓗᐊᕋᔭᖏᑦᑐᖅ − ᐊᐅᓚᔪᓐᓇᐅᑎᓂᑦ ᐊᑐᓗᐊᖏᓐᓂᖅᓴᐅᒍᓂ ᐊᕙᑎᑦᑎᓐᓂᑦ ᓱᕈᖅᓴᐃᖏᓐᓂᖅᓴᐅᒐᔭᖅᑐᖅ. ᐅᖅᓱᐊᓗᕐᓘᑎᓪᓗ ᐊᓯᖏᓪᓗ ᓱᕈᕐᓇᖅᑐᑦ ᐱᑕᖃᖏᓐᓂᖅᓴᐅᒐᔭᖅᑐᑦ ᓯᓚᒧᑦ ᐊᓂᖅᑎᕆᔭᑦᑎᓅᖏᓐᓂᖅᓴᐅᒐᔭᖅᑐᑦ ᐅᖅᓱᐊᓗᐃᑦ ᐃᑭᑕᐅᓲᖑᒻᒪᑕ ᐊᐅᓚᔾᔪᑎᒋᔭᐅᓪᓗᑎᒃ. ᓄᓇᕗᑦ, ᐃᒪᕕᒃ ᓯᓚᓗ ᓴᓗᒪᓂᖅᓴᐅᓗᓂ ᖃᓂᒻᒪᓯᖃᓐᓇᖏᓐᓂᖅᓴᐅᓗᓂᓗ.
- ᓯᓚᐅᑉ ᐊᓯᔾᔨᖅᐸᓪᓕᐊᓂᖓ − ᐊᐅᓚᔪᓐᓇᐅᑎᓂᑦ ᐊᑐᓗᐊᕈᑦᑕ, ᐅᖅᓱᐊᓗᒻᒥ ᐊᖏᓂᖅᓴᒥᑦ ᐃᑭᑦᑎᒐᔭᕋᑦᑕ. ᐅᖅᓱᐊᓗᒃ ᓄᓇᕐᔪᐊᓕᒫᑦ ᐊᓯᔾᔨᖅᐸᓪᓕᐊᓂᖓᓄᑦ ᐊᑦᑐᐊᓂᖃᕐᒪᑦ, ᐊᑦᑐᖅᓯᓯᒪᓕᕆᖅᑐᖅ ᓄᓇᕗᒻᒥᐅᓂᑦ. ᐊᑕᖏᑦᑎᐊᕐᓗᑕ ᐃᑲᔪᕈᓐᓇᖅᑐᒍᑦ ᐳᔪᕐᓗᒃ ᒑᓯᒦᖔᖅᑐᖅ ᐱᑕᖃᖏᓐᓂᖅᓴᐅᓕᖅᑎᓐᓇᓱᓪᓗᒍ ᐊᐅᓚᔪᓐᓇᐅᑎᓂᑦ ᐊᑐᖏᓐᓂᖅᓴᐅᒍᑦᑕ.
- ᑮᓇᐅᔭᖃᕐᓂᖅᓴᐅᒐᔭᖅᑐᑦ − ᐊᐅᓚᔪᓐᓇᐅᑎᓂᑦ ᐊᑐᖏᓐᓂᖅᓴᐅᒍᕕᑦ ᑮᓇᐅᔭᐃᑦ ᐊᑐᖏᑕᑎᑦ ᐊᓯᖔᖏᓐᓄᑦ ᐊᑑᑎᖃᕈᓐᓇᖅᑐᑦ ᐊᒻᒪᓗ ᐱᓕᕆᔭᐃᓪᓗ ᖁᕝᕙᓯᓐᓂᖅᓴᐅᓕᕐᓗᓂ. ᒐᕙᒪᒃᑯᑦ ᑮᓇᐅᔭᓂᑦ ᐊᑐᖏᓐᓂᖅᓴᐅᒍᑎᒃ ᐊᐅᓚᔪᓐᓇᐅᑎᓄᑦ ᐊᒻᒪᓗ ᐊᐅᓚᔪᓐᓇᐅᑎᓄᑦ ᐃᑲᔫᓯᐊᖑᕙᑦᑐᓄᑦ, ᑮᓇᐅᔭᓂᑦ ᐊᑐᐃᓐᓇᖅᑕᖃᕐᓂᖅᓴᐅᓕᕋᔭᖅᑐᖅ ᐊᓯᖏᓐᓄᑦ ᐱᓕᕆᐊᖑᔭᕆᐊᓕᓐᓄᑦ ᐱᔨᑦᑎᕈᑎᒋᔭᐅᔪᓄᓪᓗ.
- ᓴᓇᔭᐅᔭᕆᐊᓖᑦ ᓄᓇᓖᑦ ᒪᑭᒪᔪᓐᓇᐅᑎᖏᓐᓄᑦ ᓴᓇᔭᕆᐊᖃᖏᓐᓂᖅᓴᐅᓕᕋᔭᖅᑐᑦ − ᓄᓇᕗᒻᒥᐅᑦ ᐃᓄᒋᐊᑦᓯᕙᓪᓕᐊᑐᐃᓐᓇᖅᑎᓪᓗᒋᑦ, ᐊᐅᓚᔪᓐᓇᐅᑎᓂᑦ ᓄᓇᓖᑦ ᒪᑭᔭᔾᔪᑎᖏᓐᓂᑦ ᑭᙴᒪᓇᖅᓯᕙᓪᓕᐊᑎᓪᓗᒍ, ᓴᓇᔭᐅᔭᕆᐊᓖᓐᓗ ᓴᖅᑭᑉᐸᓪᓕᐊᑎᓪᓗᒋᑦ. ᑭᙴᒪᒋᔭᐅᔪᑦ ᓄᓇᓖᑦ ᒪᑭᔭᔾᔪᑎᖏᓐᓅᖓᔪᑦ, ᓴᓇᔭᐅᔾᔪᑎᒋᔭᐅᔭᕆᐊᓖᓪᓗ ᐊᐅᓚᑦᑎᐊᖁᓪᓗᒋᑦ. ᑭᓯᐊᓂ ᑭᒃᑯᓕᒫᑦ ᐃᑲᔪᕈᓐᓇᕐᒥᔪᑦ ᐊᐅᓚᔪᓐᓇᐅᑎᓂᒃ ᐱᐅᖅᓱᐊᕈᑎ, ᑕᐃᒫᒃ ᓴᓇᔭᕆᐊᑐᖏᓐᓂᖅᓴᐅᒐᔭᖅᑐᑦ ᐊᐅᐃᓚᔪᓐᓇᐳᑎᕗᑦ.
- ᓄᑖᓂᑦ ᐊᐅᓚᔪᓐᓇᐅᑎᑖᕐᓂᖅ ᐊᑭᑭᓐᓂᖅᓴᐅᓗᑎ ᓄᑭᓪᓚᐅᑎᓂᓪᓗᑦ ᐊᑐᖏᓐᓂᖅᓴᐅᓗᑎᒃ − ᓄᓇᕗᒻᒥᐅᑦ ᐊᑐᕐᓂᖅᐹᖑᕙᒻᒪᑕ ᐊᐅᓚᔪᓐᓇᐅᑎᓂᑦ, ᐊᐅᓚᔪᓐᓇᐅᑏᓪᓗ ᐱᕈᑉᐸᓪᓕᐊᔭᐱᐊᖃᖅᓘᑎᒃ ᓄᓇᓖᑦ ᒪᑭᒪᔪᓐᓇᐅᑎᖏᓐᓄᑦ ᑭᙴᒪᒋᔭᐅᓂᖏᑦ ᒪᓕᓪᓗᒋᑦ. ᐱᐅᖅᓱᐊᑦᑎᐊᕈᑦᑕ, ᐊᑯᓂᐅᓂᖅᓴᖅ ᐊᑐᕈᓐᓇᕋᔭᖅᑕᕗᑦ ᓄᓇᓕᓐᓄᑦ ᒪᑭᒪᔾᔪᑏᑦ ᐊᖏᓪᓕᒋᐊᖏᖔᕐᓗᒋᑦ.
Inuktitut