ᐃᓄᒐᓴᖕᓄᑦ ᐅᖃᐅᓯᖅᑖᒃ “ᐆᒻᒪᖅᑯᑎᑐᕈᓯᖅ ᐊᑐᖅᑕᐅᖔᕈᓐᓇᖅᑐᖅ” ᐊᒻᒪ “ᓄᓇᒥᙶᖅᑐᑦ ᐆᒻᒪᖅᑯᑎᑐᕈᓯᑦ” ᑭᐳᒃᑎᖔᖅᖢᒋᒃ ᐅᖃᐅᓯᐅᒐᔪᖕᒪᑎᒃ. ᑖᒃᑯᐊ ᐱᔮᖅᑯᒨᙱᑦᑐᖅ ᑭᐳᒃᑎᑕᐅᒐᔪᖕᒪᑎᒃ ᐆᒻᒪᖅᑯᑎᓕᕆᕝᕕᖕᒥ ᑐᓴᖅᑕᐅᒐᔪᒃᖢᑎᒃ ᑐᑭᖏᒃ ᐊᔾᔨᒌᙱᕐᔪᐊᕋᓗᐊᖅᑎᓪᓗᒋᒃ. ᓄᓇᒥᙶᖅᓯᒪᔪᑦ ᐆᒻᒪᖅᑯᑎᑐᕈᓰᑦ ᓴᖅᑭᓲᖑᕗᑦ ᓯᓚᒥᙶᖅᑐᓂᒃ ᓲᕐᓗ ᐃᒪᕐᒥ, ᓯᕿᓂᕐᒥ ᐊᒻᒪ ᐊᓄᕆᒥ. ᐆᒻᒪᖅᑯᑎᑐᕈᓯᖅ ᐊᑐᖅᑕᐅᖔᕈᓐᓇᖅᑐᖅ, ᐃᓚᓕᐅᑎᔭᐅᓗᑎᒃ ᐆᒻᒪᖅᑯᑎᑐᕈᓰᑦ ᓄᓇᒥᙶᖅᑐᑦ, ᒪᑯᐊᖑᓪᓗᑎᒃ ᓄᓇᒥᙶᖅᑐᑦ ᐅᖅᓱᐊᓗᒃᓴᐃᑦ, ᐳᓪᓚᕐᓂ ᐅᕿᓐᓂᖅᐹᑦ ᐅᖅᓱᒃᓴᐃᑦ, ᐱᕈᖅᑐᓂᙶᖅᑐᑦ ᐅᖅᓱᐊᓗᒃᓴᐃᑦ, ᐊᒻᒪ ᐃᒥᐊᓗᖕᒥᙶᖅᑐᑦ. ᑕᒪᕐᒥᒃ ᐆᒻᒪᖅᑯᑎᑐᕈᓰᑦ ᐊᑐᖅᑕᐅᖔᕈᓐᓇᖅᑐᑦ ᐊᒻᒪ ᓄᓇᒥᙶᖅᑐᑦ ᐆᒻᒪᖅᑯᑎᑐᕈᓰᑦ ᐃᓯᐊᕿᒃᑲᐅᙱᓐᓂᖅᓴᐅᓪᓗᑎᒃ ᑕᒪᒃᑯᓂᖓᓕ ᐊᑐᒐᔪᒃᑕᑦᑎᓐᓂ ᐆᒻᒪᖅᑯᑎᑐᕈᓯᕐᓂᒃ. ᑖᒃᑯᐊ ᐊᕙᑎᑦᑎᓐᓂᙶᖅᑐᑦ ᐆᒻᒪᖅᑯᑎᒋᔪᓐᓇᑦᑎᐊᖅᑕᕗᑦ ᓇᓂᔭᐅᕈᓘᔭᖃᑦᑕᖅᓯᒪᔪᑦ ᓄᓇᕐᔪᐊᕐᒥ ᓯᓚ ᓱᕈᖅᐸᓪᓕᐊᔪᒧᑦ ᒥᒃᖠᒋᐊᕈᑕᐅᔪᓐᓇᖅᑐᑦ ᐅᔾᔨᕐᓇᖅᑐᒥᒡᓗ ᒥᒃᖠᒋᐊᕈᑕᐅᔪᓐᓇᖅᖢᑎᒃ ᐳᔪᕐᓗᖕᒥ ᐊᑐᔅᓲᔭᖃᑦᑕᖅᓯᒪᔭᑦᑎᓐᓂ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ ᒫᓐᓇ ᐱᓕᕆᖃᑎᖃᖅᑐᑦ ᑲᓇᑕᒥ ᑐᑦᑕᕐᕕᒋᔭᐅᔪᓂᒃ ᑮᓇᐅᔭᑎᒍᑦ ᐃᑲᔪᖅᑕᐅᔪᒪᓪᓗᑎᒃ ᐊᓯᖔᖏᓐᓂᒃ ᐆᒻᒪᖅᑯᑎᑐᕈᓯᕐᓄᑦ ᐱᒋᐊᖅᑕᐅᔪᓐᓇᖅᑐᓂᒃ ᓄᓇᕗᒻᒥ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦᑕ ᐊᕕᒃᓯᒪᓂᐅᔪᒥᒃ ᐅᖅᑰᓴᐅᑎᓕᕆᔾᔪᓯᖓᓐᓂᒃ, ᖃᐅᔨᒪᔭᐅᖃᑕᐅᒋᓪᓗᓂ ᐊᒥᐊᒃᑯᑦ ᐅᖅᑰᓴᐅᑎᑦ, ᐆᒻᒪᖅᑯᑎᑐᕈᑕᐅᓯᒪᓕᖅᑐᖅ ᐊᕐᕌᒍᓄᑦ 15 ᖃᔅᓯᑲᓪᓚᖕᓄᑦ ᓄᓇᓕᖕᓂ ᐅᑭᐅᖅᑕᖅᑐᓕᒫᒥ. ᐊᑐᖅᑕᐅᖔᕈᓐᓇᖅᖢᓂ ᐆᒻᒪᖅᑯᑎᑐᕈᓯᐅᖕᒪᑦ ᐱᕕᖃᕈᑎᒋᔪᓐᓇᖅᑕᕗᑦ ᐅᖅᑰᓴᐅᑎ ᐊᑐᑦᑎᐊᕈᓐᓇᖅᖢᑎᒍᑦ ᓄᑭᓪᓚᐅᑎᓂᒃ ᐊᐅᓚᔪᓐᓇᖅᑎᑕᐅᓪᓗᓂ ᐊᐅᓚᐅᑎᖃᕐᕕᖕᓂ ᐊᐅᓚᑎᑕᐅᓪᓗᓂ. ᐅᖅᑰᓴᐅᑎ ᐊᐅᓚᐅᑎᖃᕐᕕᐊᓗᖕᒥᙶᖅᑐᖅ ᐃᖏᕐᕋᐃᓐᓇᖅᑎᑕᐅᓪᓗᓂ ᐊᑐᓲᕆᕙᕗᑦ ᐊᖅᑯᑎᖃᖅᑎᑕᐅᓪᓗᑎᒃ ᖃᔅᓯᑲᓪᓚᖕᓄᑦ ᐃᒡᓗᐊᓗᖕᓄᑦ ᓲᕐᓗ ᐃᓕᓐᓂᐊᕐᕕᖕᓄᑦ, ᐋᓐᓂᐊᕕᐊᓗᖕᓄᑦ ᐊᒻᒪ ᐊᒡᓚᕝᕕᖕᓄᑦ/ᑎᑎᕋᕐᕕᖕᓄᑦ.
ᖃᐅᔨᒃᑲᓐᓂᕈᒪᒍᔅᓯ DHS-ᖁᑎᑦᑕ ᐱᓕᕆᔾᔪᓯᕐᓂᒃ ᓄᓇᕘᒥ, ᐅᓇ ᓇᕿᓪᓗᒍ.