ᓯᕗᓕᖅᑎᒃᓴᑦ ᐃᖅᑲᓇᐃᔭᖅᑎᕈᖅᓴᓂᕐᒧᑦ ᐱᓕᕆᐊᖑᕙᒃᑐᖅ ᐊᔾᔨᒋᔭᐅᙱᑉᐳᖅ ᐃᖅᑲᓇᐃᔭᖅᓯᓐᓈ ᐃᓕᓐᓂᐊᖅᓯᓐᓈ ᐃᓄᖕᓄᑦ ᑐᕌᖓᓪᓗᓂ ᐊᐅᓚᑦᑎᔨᙳᕐᓂᕐᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ. ᐃᖅᑲᓇᐃᔭᖅᑎᕈᖅᓴᓂᕐᒧᑦ ᐱᓕᕆᐊᖑᕙᒃᑐᖅ ᐃᖅᑲᓇᐃᔮᒧᑦ ᐱᕙᓪᓕᐊᔾᔪᑎᒃᓴᓂᒃ ᐊᑐᐃᓐᓇᐅᑎᑦᑎᖃᑦᑕᖅᐳᑦ ᑲᔪᖏᖅᓴᐃᓂᒃᑯᑦ, ᐊᒻᒪ ᐃᓕᓐᓂᐊᕐᕕᐊᕈᓯᖏᓐᓂᒃ ᐃᓕᓐᓂᐊᖅᑎᑕᐅᓪᓗᑎᒃ. ᑐᑭᓯᒋᐊᒃᑲᓐᓂᕈᒪᒍᕕᑦ ᐱᓕᕆᐊᖅ ᒥᔅᓵᓄᑦ ᖃᐅᔨᒋᐊᕐᕕᒋᒍᒃ ᐅᓇ:
https://www.gov.nu.ca/eia/information/sivuliqtiksat-internship-program
ᐃᓄᐃᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᖅ ᐅᓂᒃᑳᕆᐊᖃᖃᑦᑕᕐᓂᐊᖅᑐᖅ ᑐᑭᒧᐊᒃᑎᑦᑎᔨᒧᑦ, ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐱᓕᒻᒪᒃᓴᕐᓂᕐᒥᓂ ᐃᓕᓐᓂᐊᕐᓂᒃᑯᑦ. ᐃᖅᑲᓇᐃᔮᖅᑖᖅᑐᖅ ᑕᒪᑐᒥᖓ ᐊᔪᕈᓐᓃᖅᐸᓪᓕᐊᓂᐊᖅᑐᖅ ᐱᓕᕆᖃᑎᖃᖅᐸᒡᓗᓂᑦ ᐊᐅᓚᑦᑎᔨᒥᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᕐᕌᒍᑦ ᐱᖓᓱᓄᑦ. ᐃᓕᓐᓂᐊᕐᓂᕐᓂᒃ, ᐱᓕᕆᖃᑕᐅᖃᑦᑕᕐᓂᐊᖅᑐᑎᑦ ᐃᓄᐃᑦ ᐃᖅᑲᓇᐃᔭᖅᑐᓕᕆᔨᒃᑯᑦ ᐱᓕᕆᕝᕕᖓᓂ ᐃᖅᑲᓇᐃᔭᖅᑐᓕᕆᔨᒃᑯᑎᒍᑦ. ᐱᓕᕆᐊᒃᓴᕐᓄᑐᐊᖅ ᐃᓕᓐᓂᐊᒐᖃᕐᓂᐊᖅᐳᑎᑦ ᑐᙵᕕᒃᑖᑦᑎᐊᖁᓪᓗᑎᑦ ᐱᓕᕆᔪᓐᓇᖅᓯᓂᕐᒧᑦ ᐃᖅᑲᓇᐃᔭᖅᑐᓕᕆᓂᕐᒥᒃ, ᐃᖅᑲᓇᐃᔭᖅᑎᑦᑏᓐᓇᕐᓂᕐᒥᒃ, ᐃᓕᓐᓂᐊᖅᑎᑦᑎᓂᕐᒥᒃ, ᐱᓕᕆᐊᕆᓛᕈᒪᔭᒧᑦ ᑐᑭᒧᐊᒃᑎᑦᑎᓂᕐᒥᒃ, ᐱᓕᕆᐊᒃᓴᐅᕙᒃᑐᑦ ᐱᕈᖅᑎᑕᐅᔾᔪᑎᖏᓐᓂᒃ, ᐊᒻᒪᓗ ᐊᓯᖏᓐᓂ ᑎᑎᖅᑲᓕᕆᔭᕆᐊᓕᖕᓂᒃ. ᑕᐃᒪ ᐱᐊᓂᒃᐸᓪᓕᐊᑎᓪᓗᑎᑦ ᐃᓕᓐᓂᐊᒐᕆᔭᕐᓂᒃ, ᐊᔪᙱᔾᔪᑎᑎᑦ ᐱᕈᖅᓴᔭᐅᖏᓐᓇᕐᓂᐊᖅᐳᑦ ᐱᓕᕆᐊᒃᓴᑎᑦ ᐃᓚᕙᓪᓕᐊᖏᓐᓇᕐᓗᑎᒃ ᐱᓕᕆᐊᒃᓴᓕᒫᑎᑦ ᐱᔪᓐᓇᖅᓯᓚᐅᙱᓐᓂᕐᓂ.
ᑖᓐᓇ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᒧᑦ ᐱᕕᒃᓴᖅ ᒪᑐᐃᙶᖅᐳᖅ ᑕᒪᐃᓐᓄᑦᑎᐊᖅ ᓄᓇᕗᒻᒥ ᐃᓄᖕᓄᑦ (ᓇᓂᕐᒥᐅᑕᐅᓂᖓ ᐃᓱᒪᒋᙱᓪᓗᒍ).