ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑎᓕᐅᕆᕗᑦ ᐃᓄᖕᓂᒃ ᑭᐅᑲᑕᖁᓪᓗᒋᑦ ᐆᒻᒪᖅᑯᑎᓕᕆᔨᒃᑯᑦ ᐆᒻᒪᖅᑯᑎᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᑖᓄᑦ. ᐆᒻᒪᖅᑯᑎᓕᕆᔨᒃᑯᑦ ᑐᒃᓯᕋᐅᒻᒥᒃ ᑐᓂᓯᓚᐅᖅᓯᒪᕗᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᒥᓂᔅᑕᖓᓐᓄᑦ ᐆᒻᒪᖅᑯᑎᓄᑦ ᐊᑭᓕᖅᓱᕆᐊᓕᑦ ᐊᓯᔾᔨᖅᑕᐅᖁᓪᓗᒋᑦ ᐱᒋᐊᕐᓗᒍ ᐅᑐᐱᕆ 1, 2022−ᒥ.
ᑐᒃᓯᕋᐅᑦ ᐊᖏᖅᑕᐅᒋᐊᖃᖃᑦᑕᕐᒪᑦ ᐊᓯᔾᔨᕐᓂᐊᓕᕌᖓᑦ ᒫᓐᓇᓕᓴᕐᒥᒃ ᓄᓇᓕᖕᓂ−ᑐᙵᕕᓕᖕᓂᒃ ᐊᑭᖓᓄᑦ ᐋᖅᑭᒃᓯᒪᓂᕆᔭᖓᓄᑦ ᓄᓇᕘᓕᒫᒧᑦ ᐆᒻᒪᖅᑯᑎᓄᑦ ᐊᑭᖓ ᐊᔾᔨᒌᒃᑎᑕᐅᔾᔫᒥᔪᖅ ᐊᑭᓕᖅᓱᐃᔨᓄᑦ. ᑖᒃᑯᐊ ᐋᖅᑭᒃᓯᒪᓂᖓ ᒪᓕᒃᖢᒍ, ᐊᑭᓕᖅᓱᐃᔨᓕᒫᑦ ᐊᔾᔨᒌᒥᒃ ᐊᑭᓕᖅᓱᐃᑎᑕᐅᔪᑦ ᐊᑭᓖᖃᑦᑕᕋᔭᖅᐳᑦ ᐊᔾᔨᒌᒥᒃ ᐆᒻᒪᖅᑯᑎᓄᑦ ᐊᑭᒋᑎᑕᓄᑦ ᓇᓂᒥᐅᑕᐅᖦᖤᕋᓗᐊᖅᐸᑕ ᓄᓇᕗᒻᒥ.
ᑐᒃᓯᕋᐅᒻᒧᑦ ᐱᓕᕆᔾᔪᓯᖅ ᐊᑐᓲᖑᖕᒪᑕ ᐊᔾᔨᒋᙱᑕᖓᓂᒃ ᑭᖑᓂᖔᑦᑎᓐᓂ ᑐᒃᓯᕋᐅᑕᐅᕙᓚᐅᖅᑐᓂᒃ ᓄᓇᕘᓕᒫᒧᑦ ᐊᑭᓕᖅᓱᖅᑕᐅᔪᖅ ᐊᓯᔾᔨᖅᑕᐅᖁᓪᓗᒍ. ᒥᒃᖠᒋᐊᖅᑎᓪᓗᒋᑦ ᑮᓇᐅᔭᑎᒍᑦ ᐊᒃᑐᐃᔾᔪᑕᐅᓲᑦ ᐆᒻᒪᖅᑯᑎᓄᑦ ᐊᑭᓕᖅᓱᐃᔨᓄᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᒪᓐᓇᐅᖁᔨᖕᒪᑕ ᒐᕙᒪᒃᑯᓐᓂ ᐊᑭᓕᖅᓱᖅᑕᐅᔪᑦ ᐊᑭᒃᖠᒋᐊᖅᑕᐅᖁᓪᓗᒋᑦ ᒐᕙᒪᐅᙱᑦᑐᓄᑦ ᐊᑭᓕᖅᑐᐃᔨᓄᑦ.
ᓄᓇᕗᒻᒥ ᐆᒻᒪᖅᑯᑎᑦ ᐊᑭᖏᓐᓂᒃ ᕿᒥᕐᕈᔩᑦ, ᐃᓛᒃᑰᖅᖢᑎᒃ ᐅᖃᐅᔾᔪᐃᔨᑦ, ᕿᒥᕐᕈᓂᐊᖅᐳᑦ ᑭᒃᑯᑐᐃᓐᓇᑦ ᐃᓱᒪᒋᔭᖏᓐᓂᒃ ᑐᓴᖅᑕᐅᔪᓂᒃ ᐊᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᒥᓂᔅᑕᖓᓄᑦ ᐅᖃᐅᔾᔨᓗᑎᒃ ᐱᓇᔫᑎᒋᔭᐅᔪᒥᒃ. ᐃᓄᓕᒫᑦ ᐅᖃᐅᓯᔅᓴᖃᕈᓐᓇᕐᒥᔪᑦ ᖃᕆᓴᐅᔭᒃᑯᑦ ᑎᑎᕋᕐᓗᑎᑦ URRC@gov.nu.ca 5−ᒧᐊᕋᓱᓐᓂᖓᓂ ᐅᓐᓄᓴ ᔪᓂ 17, 2022 ᑎᑭᓐᓇᓱᓐᓂᖓᓂ. ᑐᓴᒃᑲᓐᓂᕈᒪᒍᕕᑦ ᑖᔅᓱᒧᖓ ᐱᓇᓱᐊᕐᓂᕐᒧᑦ, ᐅᕗᖓ ᑕᑯᒋᐊᕐᓗᑎᑦ, www.qec.nu.ca.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕈᓃ ᐴᓱ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ
(867) 979-7524
rboucher@qec.nu.ca