ᐆᒻᒪᖅᑎᒋᐊᒃᑲᓐᓂᕈᒃ ᐃᖅᑲᓇᐃᔮᕆᔭᑦ ᐅᑭᐅᖅᑕᖅᑐᒥ!
ᖃᐅᔨᒋᐊᕈᒃ ᐃᓕᖕᓄᑦ ᐱᓕᕆᐊᒃᓴᑦᑎᐊᕙᒃ ᑲᓇᑕᐅᑉ ᐅᑭᐅᖅᑕᖅᑐᐊᓂ! ᐃᓚᐅᕝᕕᒋᒃᑭᑦ ᐱᓇᔪᒍᒪᑦᑎᐊᖅᑐᑦ ᐱᓕᕆᔨᕗᑦ ᐱᓕᕆᖃᑦᑕᖅᓯᒪᑦᑎᐊᖅᑐᑦ ᓴᓇᕝᕕᖕᒥ ᐱᓕᕆᔨᓪᓚᕇᑦ ᐊᑦᑕᕐᓇᙱᑦᑐᒥᒃ, ᑕᑎᒋᔭᒃᓴᐅᔪᒥᒃ, ᐊᑭᑐᓗᐊᙱᑦᑐᒥᒡᓗ ᐆᒻᒪᖅᑯᑎᖃᖅᑎᑦᑎᕙᒃᖢᑎᒃ ᓄᓇᕗᓕᒫᒥ.
ᓄᓇᕗᒻᒥ ᐃᖅᑲᓇᐃᔭᕐᓂᖅ
ᓄᓇᕗᑦ ᑲᓇᑕᒥ ᓄᑖᖑᓛᖑᔪᖅ ᐊᖏᓛᖑᓪᓗᓂᓗ ᐱᕈᖅᐸᓪᓕᐊᓛᒥᓪᓗ ᑮᓇᐅᔭᓕᐅᕈᑎᖃᖅᖢᓂ ᑲᓇᑕᒥ. ᑲᔾᔮᕐᓇᖅᑐᓂᒃ ᓄᓇᖓ ᑕᐅᑦᑐᖃᖅᖢᓂ ᐱᕕᒃᓴᑦᑎᐊᕆᒃᖢᓂᓗ, ᐊᓕᐊᓇᐃᒋᑦᑎᐊᕐᓂᐊᖅᐸᐃᑦ ᐃᖅᑲᓇᐃᔭᕐᕕᒋᔭᕐᓂᑐᐊᖑᙱᑦᑐᖅ, ᐱᓕᕆᓐᓇᐅᙱᑦᑐᒃᑯᓪᓘᓐᓃᑦ. ᕿᒧᒃᓯᕈᒪᓐᓂᕈᕕᑦ, ᓯᑭᑑᑲᑕᒡᓗᑎᑦ, ᖃᔭᖅᑐᕐᓗᑎᑦ, ᐃᖃᓪᓕᐊᕐᓗᑎᑦ, ᕿᒥᕐᕈᔪᒪᓐᓂᕈᕕᓪᓘᓐᓃᑦ ᐃᓕᖅᑯᓯᕐᒥᓂ ᐊᑐᓪᓚᕆᒃᑐᓂᑦ ᓴᓇᙳᐊᖅᑎᓂᑦ ᓂᔾᔭᐅᓯᔭᖅᑎᓂᒡᓗ, ᓄᓇᕗᑦ ᐃᓕᖕᓄᑦ ᐃᓂᒃᓴᑦᑎᐊᕙᐅᕗᖅ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ (QEC) ᑲᒪᒋᔭᒃᓴᖃᖅᑐᒃ ᐊᑐᐃᓐᓇᐅᑎᑦᑎᓗᑎᒃ ᐊᑦᑕᕐᓇᖏᑦᑐᒥᒃ, ᑕᑎᒋᔭᒃᓴᐅᔪᓐᓇᖅᑐᒥᒃ ᐆᒻᒪᖁᑎᒥᒃ ᐊᑭᓕᖅᓱᐃᕙᒃᑐᓕᒫᓄᑦ ᓄᓇᕗᒻᒥ. ᓇᖕᒥᓂᕆᔭᐅᔪᖅ ᓄᓇᕗᑦ ᒐᕙᒪᒃᑯᓐᓂ ᐊᐅᓚᑕᐅᓪᓗᓂᓗ ᐃᓛᒃᑰᖅᖢᑎᒃ ᓄᓇᕗᒻᒥ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᐊᑐᐃᓐᓇᐅᑎᑦᑎᓲᖑᔪᑦ ᐆᒻᒪᖁᑎᓂᒃ ᐅᖅᑰᓴᐅᑎᓂᒡᓗ ᓄᓇᕗᒻᒥ. ᐊᓯᓕᒫᖏᑦ ᐆᒻᒪᖅᑯᑎᖃᕐᕖᑦ ᑲᓇᑕᒥ ᑕᐅᑐᒃᖢᒋᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᒃᓱᕈᕐᓇᖅᑐᖅᓯᐅᖃᑦᑕᖅᐳᑦ ᐊᐅᓚᑦᑎᓪᓗᑎᒡᓗ ᐊᕙᑎᓪᓗ ᑕᓪᓕᒪᓂᒃ ᐃᓛᒃᑰᖅᑐᓂᒃ ᐊᐅᓚᐅᑎᖃᕐᕕᐊᓗᖕᓂᒃ ᐆᒻᒪᖅᑯᑎᖃᖅᑎᑦᑎᓪᓗᑎᒡᓗ ᓄᓇᓕᓕᒫᓂᒃ ᓄᓇᕗᒻᒥ.
ᐅᐊᔭᓕᕆᔨ (QEC-23-001)
ᐃᖃᓗᒃᑑᑦᑎᐊᖅ, ᓄᓇᕗᑦ
ᐊᖓᔪᖅᑳᓕᒃ ᐊᕕᒃᑐᖅᓯᒪᓂᒃᑯᑦ ᐅᐊᔭᓕᕆᔨᓄᑦ ᐊᖓᔪᖅᑳᕐᒥᑦ ᐅᐊᔭᓕᕆᔨ ᑲᒪᒋᔭᖃᕐᓂᐊᖅᑐᖅ ᐃᓕᐅᖅᑲᐃᖃᑦᑕᕐᓂᕐᒥᑦ, ᐋᖅᑭᐅᒪᑎᑦᑎᓂᕐᒥᑦ ᐋᖅᑭᒃᓱᐃᖃᑦᑕᕐᓂᕐᒥᒡᓗ ᖁᓛᒎᖓᔪᓂᑦ ᓄᓇᐅᓪᓗ ᐊᑖᒎᖓᔪᓂᑦ ᐆᒻᒪᖅᑯᑎᑦ ᐊᖅᑯᑎᖏᓐᓂᑦ. ᐃᖅᑲᓇᐃᔮᖅ ᑲᒪᒋᔭᒃᓴᖃᕆᕗᖅ ᓄᑖᕐᓂᒃ ᐆᒻᒪᖅᑯᑎᖃᓕᖅᑎᑦᑎᓂᕐᒥᑦ, ᐊᑐᖅᑕᐅᓚᐅᑲᖕᓂᐊᖅᑐᓂᒃ ᐃᓕᐅᖅᑲᐃᖃᑦᑕᕐᓂᕐᒥᑦ, ᖃᐅᔨᓴᐅᑎᖏᓐᓂᒃ ᕿᒥᕐᕈᖃᑕᐅᖃᑦᑕᕐᓂᕐᒥᑦ, ᖃᐅᔨᓴᖃᑦᑕᕐᓂᕐᒥᑦ ᐊᒻᒪᓗ ᐋᖅᑭᐅᒪᑎᑦᑎᓂᕐᒥᑦ ᓴᓇᕐᕈᑎᓂᒃ, ᐊᑐᒐᒃᓴᓂᑦ, ᓄᓇᓯᐅᑎᓂᒡᓗ ᐆᒻᒪᖅᑯᑎᓕᕆᔾᔪᑕᐅᕙᒃᑐᓂᑦ.
ᐱᔭᒃᓴᐃᑦ ᑲᒪᒋᔭᒃᓴᐃᓪᓗ:
• ᖃᐅᔨᓴᖅᐸᒡᓗᓂ, ᓇᐅᒃᑯᑦ ᓈᒻᒪᙱᓐᓂᖃᖅᑐᖅᓯᐅᖅᐸᒡᓗᓂ, ᐋᖅᑭᒃᓱᐃᕙᒡᓗᓂᓗ ᐅᐊᔭᓄᑦ ᐊᑐᖅᑕᐅᕙᒃᑐᓄᑦ, ᐊᑐᖅᑕᐅᒃᑲᓐᓂᖅᐸᒃᑐᓄᑦ, ᐱᖁᑎᓄᓪᓗ ᓇᓗᙱᑦᑎᐊᕈᒪᓂᕐᒧᑦ ᐊᔪᙱᓐᓂᓕᒫᖓᒍᑦ ᐱᓕᕆᐊᖑᒐᓗᐊᕐᒪᖔᑦ ᐱᐅᒐᓗᐊᕐᒪᖔᓪᓗ.
• ᖃᐅᔨᓴᖅᐸᒡᓗᓂ, ᐊᔪᓕᖅᓯᒪᔪᓂᒃ ᖃᐅᔨᓇᓱᒃᐸᒡᓗᓂ, ᓴᓇᔭᐅᔭᕆᐊᓕᖕᓂᓪᓗ ᑐᐊᕕᕐᓇᖅᑐᓂᒃ ᐅᐊᔭᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᓂᑦ, ᓱᓇᒃᑯᑖᖏᓐᓂᒃ, ᐊᒻᒪ ᐱᖁᑎᖏᑦ ᐊᓯᔾᔨᖅᐸᒡᓗᒋᑦ ᐱᔭᕆᐊᖃᖅᐸᑦ.
• ᓄᒃᑕᖅᐸᒡᓗᓂ ᐅᐸᒐᕐᓂᙱᑦᑐᓄᑦ ᓄᓇᓕᖕᓄᑦ ᐱᓕᕆᔭᖅᑐᕐᓗᓂ ᖃᐅᔨᓴᕆᐊᖃᖅᐸᒃᑐᓂᒃ ᖃᐅᔨᓴᖅᓯᓂᕐᒥᒃ, ᑲᔪᓯᑎᑦᑎᕙᒃᖢᓂ ᐱᑕᖃᖅᑎᑦᑎᑦᑕᐃᓕᒪᓂᕐᒧᑦ ᑲᒪᒋᔭᖃᕐᓂᕐᒥᒃ, ᐃᓕᐅᖅᑲᐃᕙᒡᓗᓂ ᐱᖁᑎᓂᒃ, ᐱᓕᕆᐊᖃᖅᐸᒡᓗᓂᓗ ᖃᓄᑐᐃᓐᓇᖅ ᓱᕋᒃᓯᒪᔪᓂᒃ ᐅᐊᔭᓄᑦ ᐊᑐᖅᑕᐅᕙᒃᑐᓄᓪᓗ.
• ᐱᓕᕆᖃᑎᖃᖅᐸᒡᓗᓂ ᐊᐅᓚᐅᑎᓕᕆᔨᑦ ᐱᓕᕆᕝᕕᖓᓂᒃ ᐋᖅᑭᒃᓯᒪᓂᒃᓴᖓᓂᒃ ᕿᒥᕐᕈᓗᑎᒃ ᐱᖁᑎᖏᓐᓂᒡᓗ ᓇᓗᓇᐃᔭᑦᑎᐊᖅᐸᒡᓗᓂ ᐱᓕᕆᐊᖑᔪᑦ ᒪᓕᒋᐊᖃᖅᑐᓕᒫᓂᒃ ᒪᓕᑦᑎᐊᖁᓪᓗᒋᑦ ᐊᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᒪᓕᒃᑕᐅᔭᕆᐊᓕᖕᓂᒃ.
• ᐱᓕᕆᖃᑎᖃᖅᐸᒡᓗᓂ ᑕᐃᒪᐃᑦᑐᓕᕆᔨᓂᑦ ᓴᓇᔨᓂᑦ ᐃᖅᑲᓇᐃᔭᖅᑎᓂᓪᓗ ᓈᒻᒪᖅᑯᑦᑎᓗᑎᒃ ᑮᓇᐅᔭᖅᑑᑎᖏᓪᓗ ᐊᑐᕐᓗᒋᑦ ᐱᐊᓂᒍᓐᓇᑦᑎᐊᖁᓪᓗᒋᑦ ᐊᑭᑐᔫᑎᑦ ᐊᒻᒪ ᐊᐅᓚᔾᔪᑎᑦ ᐋᖅᑭᐅᒪᐃᓐᓇᕈᑎᓪᓗ ᐱᓕᕆᐊᒃᓴᖏᑦ.
• ᓴᓇᔭᐅᔾᔪᑎᖏᑦ ᑎᑎᕋᖅᐸᓪᓕᐊᕙᒡᓗᒋᑦ ᐋᖅᑭᒃᓱᐃᖃᑎᖃᖅᐸᒡᓗᓂᓗ ᐊᐅᓚᐅᓯᕆᔨᓂᒃ, ᐊᐅᓚᑦᑎᔨᓂᒃ, ᓱᕋᒃᓯᒪᔪᓕᕆᔨᓂᒃ, ᑎᑎᕋᖅᑕᐅᓯᒪᔪᑦ ᐋᖅᑭᒋᐊᖅᑕᐅᓕᕌᖓᒥᒃ.
•ᓇᔪᖅᑕᐅᔪᒥᑦ ᐋᖅᑭᒋᐊᕈᑎᒃᓴᓂᒃ ᐊᑐᐃᓐᓇᐅᑎᑦᑎᕙᒡᓗᓂ ᐊᖅᑭᒋᐊᕈᑎᒃᓴᓂᓪᓘᓐᓃᑦ ᐱᓕᕆᔾᔪᑎᑦ ᖃᕆᓴᐅᔭᒃᑯᑦ ᐅᑎᖅᑎᑕᐅᑲᐅᑎᒋᖃᑦᑕᖁᓪᓗᒋᑦ ᖃᒥᙶᖅᑎᓪᓗᒋᑦ ᐱᖁᑎᖏᓪᓗ ᐊᑦᑕᕐᓇᖅᑐᒦᓗᐊᖅᑕᐃᓕᒪᑎᓪᓗᒋᑦ.
• ᓴᓗᒪᔪᒥᑦ ᐊᑦᑕᕐᓇᙱᑦᑐᒥᒡᓗ ᐱᓕᕆᕝᕕᖃᖅᑎᑦᑎᕙᒡᓗᓂ ᖃᖓᓕᒫᑦᑎᐊᖅ ᐊᒻᒪ ᐱᒋᐊᖅᑳᖅᐸᒡᓗᓂ, ᓈᒻᒪᒃᓯᔭᕌᖓᑦ ᐊᑐᓕᖁᔨᔾᔪᑎᓕᐅᖅᐸᒡᓗᓂ ᐋᖅᑭᒋᐊᖅᑕᐅᖏᓐᓇᕆᐊᓕᖕᓄᑦ ᑎᒥᒋᔭᐅᔪᑦ ᐊᐅᓚᓂᕆᔭᖏᓐᓂᒃ ᐊᒻᒪ ᐱᖁᑎᖏᓐᓂᒃ.
• ᐋᖅᑭᒃᓱᐃᖃᑎᖃᖅᐸᒡᓗᓂ ᓱᓇᒃᑯᑖᖃᕐᕕᓕᕆᔨᓂᑦ ᐅᐊᔭᐃᑦ ᖃᐅᔨᓴᖅᑕᐅᑦᑎᐊᖃᑦᑕᖁᓪᓗᒋᑦ ᐃᓚᒃᓴᖏᓪᓗ ᓯᕗᓂᐊᒍᑦ ᑎᑭᓴᖅᑕᐅᕙᒡᓗᑎᒃ ᐊᕐᕌᒍᑕᒫ ᐅᒥᐊᕐᔪᐊᒃᑰᕐᓇᖅᓯᔭᕌᖓᑦ.
• ᐱᓕᕆᐊᖑᔪᑦ ᒪᓕᑦᑎᐊᖅᑎᑕᐅᕙᒡᓗᑎᒃ ᐆᒪᖅᑯᑎᓕᕆᔨᑦ ᐊᑐᐊᒐᓕᒫᖏᓐᓂᒃ ᐊᒻᒪ ᐱᓕᕆᔾᔪᓯᖏᓐᓂᒃ; ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᒥ, ᑲᓇᑕᒥ ᐊᕕᒃᑐᖅᓯᒪᔪᒥ, ᐊᒻᒪ ᑲᓇᑕᒥ ᒪᓕᒐᖏᓐᓂᒃ; ᒪᓕᑦᑎᐊᕐᓗᑎᒡᓗ ᑕᒪᐃᓐᓂᒃ ᐋᓐᓂᐊᖅᑐᓕᕆᓂᕐᒧᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒻᒪ ᐊᕙᑎᓕᕆᓂᕐᒧᑦ ᒪᓕᒐᖏᓐᓂᒃ.
• ᓄᓇᓕᖕᓂ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ ᒐᕙᒪᖓᓂᒃ ᑐᓴᐅᒪᖃᑎᖃᖅᐸᒡᓗᓂ ᖃᒥᑦᑐᖃᕌᖓᑦ ᐅᖃᐅᑎᕙᓪᓕᐊᕙᒡᓗᒋᑦ ᓄᓇᓕᖕᓂ ᐊᒃᑐᐃᓕᖅᐸᒃᑐᓂᒃ, ᐱᔭᕆᐊᖃᕈᓂ.
ᐱᔭᐅᓯᒪᔭᕆᐊᓖᑦ ᐊᔪᙱᓐᓂᕆᔭᐅᔪᑦ ᐅᑯᓇᖓᑦ ᐃᓚᖃᖅᐳᑦ:
• ᐊᕕᒃᑐᖅᓯᒪᔪᓂ ᑲᓇᑕᒥ ᓇᓗᓇᐃᒃᑯᑕᖃᕐᓗᓂ ᐅᐊᔭᓕᕆᔨᐅᓂᕐᒧᑦ.
• ᐊᖁᑦᑐᓇᐅᑎᖃᕐᓗᑎᑦ ᓇᓗᓇᐃᒃᑯᑕᖅ 3−ᒥᑦ ᐳᓪᓚᕐᒨᖅᑐᖅ ᓄᖃᖅᑕᐅᑎᖃᖅᑐᖅ ᐃᖏᕐᕋᔪᑎᒥᒡᓗ ᓇᓪᓕᐅᒃᑯᒫᖅᑖᕈᓐᓇᕐᓗᑎᑦ ᐱᖁᔭᖓᑕ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ.
ᐃᑲᔫᑎᖃᕋᔭᖅᑐᑦ:
• ᑲᓇᑕᒥ ᐊᕕᒃᑐᖅᓯᒪᔪᓂᑦ ᓇᓗᓇᐃᒃᑯᑕᖃᕐᓗᓂ ᐅᐊᔭᓕᕆᔨᐅᓂᕐᒧᑦ.
• ᖃᐅᔨᒪᓗᓂ ᓄᓇᕗᒻᒥ, ᓄᓇᖓᓂ, ᐅᖃᐅᓯᖏᓐᓂᑦ ᐊᒻᒪ ᐱᖅᑯᓯᖏᓐᓂᑦ.
• ᐅᖃᕈᓐᓇᕐᓗᓂ ᐃᓄᒃᑎᑐᑦ, ᐃᓄᐃᓐᓇᖅᑐᓐ ᐊᒻᒪ/ᐅᕝᕙᓘᓐᓃᑦ ᐅᐃᕖᑐᑦ.
ᐊᑭᓕᖅᓱᐃᑦᑎᐊᖃᑦᑕᖅᐳᒍᑦ $104, 543.24−ᒥ $122,116.48−ᒧᑦ, ᐅᑭᐅᖅᑕᖅᑐᒥᐅᑕᐅᓂᕐᒧᓪᓗ ᐃᑲᔫᓯᐊᖅᑖᖅᑎᑦᑎᕙᒃᖢᑕ $20,891.00−ᓂᒃ ᓈᒪᔪᒥᑦ ᐃᑲᔫᓯᐊᖅᑖᖅᑎᑦᑎᕙᒃᑐᒍᑦ ᐅᑯᓂᖓᓗ ᓇᓗᓇᐃᖅᓯᒪᔪᓂᒃ ᐃᑲᔫᓯᐊᒃᓴᓂᒃ ᐃᓐᓇᖅᓯᐅᑎᒃᓴᓄᑦ ᐊᒻᒪᓗ ᐃᖅᑲᓇᐃᔭᖅᑎᐅᑉ ᐃᒡᓗᒃᓴᖓᓄᑦ ᐃᑲᔪᖅᑕᐅᔾᔪᑎᑕᖃᖅᖢᓂ. ᑖᓐᓇ ᐃᖅᑲᓇᐃᔮᒃᓴᖅ ᐃᓚᓕᐅᔾᔭᐅᓯᒪᕗᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ.
ᐱᓇᔪᒍᒪᒍᕕᑦ ᓇᒃᓯᐅᑎᓗᒍ ᐱᓇᔪᒍᑎᒋᔭᐃᑦ ᖃᕆᑕᐅᔭᒃᑯᑦ ᑎᑎᕋᖃᑦᑕᐅᑎᕝᕕᒃᑯᑦ ᐅᕗᖓ careers@qec.nu.ca ᑎᑎᖅᑲᑎᒍᓪᓘᓐᓃᑦ ᐅᕗᖓ: Human Resources, Qulliq Energy Corporation, P.O. Box 420, Baker Lake, NU X0C 0A0
ᐱᓇᔪᖕᓂᐊᖅᐳᑎᑦ ᐅᓪᓗᑐᐃᓐᓇᖅ, ᕕᕗᐊᕆ 17, 2023 ᑐᖔᓂ − ᐱᓇᔪᒃᑐᑦ ᑖᔅᓱᒧᖓ ᐃᖅᑲᓇᐃᔮᒃᓴᒧᑦ ᐃᓱᒪᒋᔭᐅᑐᐃᓐᓇᕆᐊᓖᑦ ᓯᕗᓂᒃᓴᒥ ᐃᖅᑲᓇᐃᔭᖅᑎᒃᓴᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᑦ. ᖁᔭᓕᕗᒍᑦ ᐃᖅᑲᓇᐃᔭᖅᑖᕋᓱᒃᑐᓕᒫᓄᑦ, ᑭᓯᐊᓂᑦᑕᐅᖅ, ᓂᕈᐊᖅᑕᐅᔪᑐᐊᑦ ᑐᓴᖅᑎᑕᐅᒐᔭᖅᑐᑦ.