ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐃᖅᑲᐃᓯᒋᐊᕈᒪᕗᑦ ᓄᓇᕗᒻᒥᐅᓂᑦ ᐅᔾᔨᖅᓱᑦᑎᐊᖃᑦᑕᖁᔨᓪᓗᑎᒃ ᓇᑉᐸᖅᑯᑏᑦ ᓴᕕᒐᐅᔭᓪᓗ ᖃᓂᒋᔮᒍᑦ, ᐱᓗᐊᖅᑐᒥ ᐃᖏᕐᕋᔾᔪᑎᖕᒨᖅᐸᒃᑐᓄᑦ (ᑎᓴᒪᓕᖕᓄᑦ ᖃᒧᑕᐅᔭᓄᓪᓗ). ᐅᑯᐊ ᐳᐃᒍᖅᑕᐃᓕᓗᒋᑦ ᖃᒥᑦᑐᖃᖁᓇᒍ, ᐋᓐᓂᕐᔪᐊᖅᑐᖃᖁᓇᒍ, ᐃᓅᔪᓐᓃᖅᑐᖃᖁᓇᒍᓘᓐᓃᑦ:
· ᐳᐃᒍᖅᑕᐃᓕᒋᑦ ᐱᖓᓱᑦ ᒦᑕᓂᒃ ᐅᖓᓯᒋᔭᕆᐊᖃᕋᕕᒋᑦ ᓴᕕᒐᐅᔭᐃᑦ.
· ᐱᖁᑎᑦ ᐊᑐᖅᑕᐅᔪᑦ ᓇᑉᐸᖅᑯᑎᓄᑦ ᓲᕐᓗ ᓴᕕᒐᐅᔭᑦ ᑭᓱᓪᓘᓐᓃᑦ ᐊᐳᑎᒧᑦ ᓴᐅᓯᒪᑐᐃᓐᓇᕆᐊᖃᕐᒪᑕ. ᓇᑉᐸᖅᑯᑎᑦ ᐅᖓᓯᒋᓗᒋᑦ ᐃᖏᕐᕋᕙᒡᓗᓯ. ᐊᖁᑉᐸᒃᑐᓄᑦ ᑕᑯᔭᐅᔪᓐᓇᖁᓪᓗᒋᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᓕᐅᖅᑲᐃᓚᐅᖅᐳᑦ ᑕᖅᓵᖅᑐᓂᑦ ᓴᕕᒐᐅᔭᕐᓄᑦ ᐊᑐᖅᑕᐅᒐᔪᒃᑐᑎᒍᑦ ᐊᖅᑯᑎᒃᑯᑦ.
· ᐊᐳᑕᐃᔭᐃᕙᙱᓪᓗᑎᒃ ᓇᑉᐸᖅᑯᑎᓄᑦ ᐳᖅᑐᓯᑎᑦᑎᕙᙱᓪᓗᑎᓪᓘᓐᓃᑦ ᐊᐳᒻᒥᒃ ᓴᕕᒐᐅᔭᑦ ᖃᓂᒋᔮᒍᑦ. ᐃᓄᒃ ᐊᖁᑦᑐᕐᓘᓐᓃᑦ ᓴᕕᒐᐅᔭᒧᑦ ᐊᐳᖅᐸᑦ, ᐋᓐᓂᕈᓐᓇᒻᒪᕆᖕᒪᑦ ᐃᓅᔪᓐᓃᕐᓗᓂᓘᓐᓃᑦ.
ᐆᒻᒪᖅᑯᑎᑦ ᒥᒃᓵᓄᑦ ᑐᐊᕕᕐᓇᖅᑐᒥᑦ ᐅᖃᐅᓯᖃᕈᒪᒍᕕᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐅᖃᓗᒍᓐᓇᖅᐳᑎᑦ ᖃᖓᑐᐃᓐᓇᖅ ᐅᕗᖓ 1-867-222-3807.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖁᔭᓕᔪᒪᕗᑦ ᓄᓇᕗᒻᒥᐅᓂᑦ ᐃᑲᔪᐃᓐᓇᖅᐸᖕᓂᖏᓐᓄᑦ ᐅᔾᔨᖅᓱᑦᑎᐊᖃᑦᑕᖅᖢᑎᒃ ᓇᑉᐸᖅᑯᑎᓂᒃ ᓴᕕᒐᐅᔭᓪᓗ ᖃᓂᒋᔮᒍᑦ.
###
ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:
ᕈᓃ ᐳᓲᕐ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7524