ᐱᔪᒥᓇᒃᑲᓐᓂᖅᑐᒥᒃ ᐃᖅᑲᓇᐃᔮᖃᕆᑦ ᐅᑭᐅᖅᑕᖅᑐᒥ!
ᖃᐅᔨᒋᐊᕈᒃ ᐃᓕᖕᓄᑦ ᐱᓕᕆᐊᒃᓴᑦᑎᐊᕙᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ! ᐃᓚᐅᕝᕕᒋᒃᑭᑦ ᐱᓇᔪᒍᒪᑦᑎᐊᖅᑐᑦ ᐱᓕᕆᔨᕗᑦ ᐱᓕᕆᖃᑦᑕᖅᓯᒪᑦᑎᐊᖅᑐᑦ ᓴᓇᕝᕕᖕᒥ ᐱᓕᕆᔨᓪᓚᕇᑦ ᐊᑦᑕᕐᓇᙱᑦᑐᒥᒃ, ᐊᑐᑦᑎᐊᖏᓐᓇᕈᓐᓇᖅᑐᒥᒃ, ᐊᑭᑐᓗᐊᙱᑦᑐᒥᒡᓗ ᐆᒻᒪᖅᑯᑎᖃᖅᑎᑦᑎᕙᒃᖢᑎᒃ ᓄᓇᕗᓕᒫᒥ.
ᐱᓕᕆᖃᑎᒌᖕᓂᖅ ᓄᓇᕗᒻᒥ
ᓄᓇᕗᑦ ᑲᓇᑕᒥ ᓄᑖᖑᓛᖑᔪᖅ ᐊᖏᓛᖑᓪᓗᓂᓗ ᐱᕈᖅᐸᓪᓕᐊᓛᕐᒥᒡᓗ ᑮᓇᐅᔭᓕᐅᕈᑎᖃᖅᖢᓂ ᑲᓇᑕᒥ. ᑲᔾᔮᕐᓇᖅᑐᓂᒃ ᓄᓇᖓ ᑕᐅᑦᑐᖃᖅᖢᓂ ᐱᕕᒃᓴᑦᑎᐊᕆᒃᖢᓂᓗ, ᐊᓕᐊᓇᐃᒋᑦᑎᐊᕐᓂᐊᖅᐸᐃᑦ ᐃᖅᑲᓇᐃᔭᕐᕕᒋᔭᕐᓂᑐᐊᖑᙱᑦᑐᖅ, ᐱᓕᕆᓐᓇᐅᙱᑦᑐᒃᑯᓪᓘᓐᓃᑦ. ᕿᒧᒃᓯᕈᒪᓐᓂᕈᕕᑦ, ᓯᑭᑑᑲᑕᒡᓗᑎᑦ, ᖃᔭᖅᑐᕐᓗᑎᑦ, ᐃᖃᓪᓕᐊᕐᓗᑎᑦ, ᕿᒥᕐᕈᔪᒪᓐᓂᕈᕕᓪᓘᓐᓃᑦ ᐃᓕᖅᑯᓯᕐᒥᓂ ᐊᑐᓪᓚᕆᒃᑐᓂᑦ ᓴᓇᙳᐊᖅᑕᐅᔪᓂᑦ ᓂᔾᔭᐅᓯᔭᖅᑎᓂᒡᓗ, ᓄᓇᕗᑦ ᐃᓕᖕᓄᑦ ᐃᓂᒃᓴᑦᑎᐊᕙᐅᕗᖅ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᒪᒋᔭᒃᓴᖃᖅᑐᑦ ᐊᑐᐃᓐᓇᐅᑎᑦᑎᓪᓗᑎᒃ ᐊᑦᑕᕐᓇᙱᑦᑐᒥᒃ, ᐊᑐᑦᑎᐊᖏᓐᓇᕈᓐᓇᖅᑐᒥᒃ ᐆᒻᒪᖁᑎᒥᒃ ᐊᑭᓕᖅᓱᐃᕙᒃᑐᓕᒫᓄᑦ ᓄᓇᕗᒻᒥ. ᓇᖕᒥᓂᕆᔭᐅᔪᖅ ᓄᓇᕗᑦ ᒐᕙᒪᒃᑯᓐᓂ ᐊᐅᓚᑕᐅᓪᓗᓂᓗ ᐃᓛᒃᑰᖅᖢᑎᒃ ᓄᓇᕗᒻᒥ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᑐᐃᓐᓇᐅᑎᑦᑎᓲᖑᔪᑦ ᐆᒻᒪᖁᑎᓂᒃ ᐅᖅᑰᓴᐅᑎᓂᒡᓗ ᓄᓇᕗᒻᒥ. ᐊᓯᖏᑦ ᐆᒻᒪᖅᑯᑎᖃᖅᑎᑦᑎᕙᒃᑐᑦ ᑲᓇᑕᒥ ᑕᐅᑐᒃᖢᒋᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᔾᔨᖃᙱᑦᑐᒥᒃ ᐱᓇᔪᒋᐊᖃᖃᑦᑕᖅᐳᑦ 25−ᓂᒃ ᐃᓛᒃᑰᖅᑐᓂᒃ ᐅᖅᓱᐊᓗᒃᑐᖅᑐᓂᒃ ᐊᐅᓚᐅᑎᖃᕐᕕᖕᓂᒃ ᐊᐅᓚᑦᑎᖃᑦᑕᕐᒪᑕ ᖃᐅᒻᒪᖅᑯᑎᖃᖅᑎᑦᑎᕙᒃᖢᑎᒡᓗ ᑕᒪᐃᓐᓂ ᐅᑭᐅᖅᑕᖅᑐᒥ ᓄᓇᓕᖏᓐᓂ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ 21-022 ᐅᖁᒪᐃᑦᑐᓕᕆᔨᒻᒪᕆᒃ
ᐃᖃᓗᖕᓂ, ᓄᓇᕗᒻᒥ ᑐᖅᑲᖅᑕᕐᕕᖃᖅᖢᓂ ᐊᕕᒃᑐᖅᓯᒪᔪᓂ ᓱᕋᒃᓯᒪᔪᓕᕆᔨᑦ ᐊᖓᔪᖅᑳᖓᓄᑦ ᐅᓂᒃᑳᖅᐸᒡᓗᓂ, ᐅᖁᒪᐃᑦᑐᓕᕆᔨᒻᒪᕆᒃ ᐱᓕᕆᐊᒃᓴᖃᖅᐳᖅ ᐊᔪᓕᖅᓯᒪᔪᓂᒃ ᖃᐅᔨᓇᓱᒃᐸᒡᓗᓂ, ᐋᖅᑭᒋᐊᖅᓯᕙᒡᓗᓂ, ᐋᖅᑭᑦᑎᐊᖅᓯᒪᑎᑦᑎᕙᒡᓗᓂᓗ ᑎᒥᖁᑎᒋᔭᐅᔪᑦ ᐅᖅᓱᐊᓗᖕᒨᖅᑐᑦ ᐊᐅᓚᐅᑎᕐᔪᐊᖏᓐᓂᒃ ᐊᒃᑐᐊᓂᓕᖕᓂᓪᓗ ᐃᑲᔪᖅᑐᐃᔾᔪᑎᑦ ᐱᖁᑎᖏᓐᓂᒃ ᐅᑯᓂᖓᓗ ᐊᐅᓚᐅᑎᖏᑦ, ᒥᓪᓗᐊᕈᑎᖏᑦ, ᐳᓪᓚᓕᐅᕈᑎᖏᑦ, ᐅᖅᑰᓴᐅᑎᖏᑦ, ᐆᓇᖅᑐᖃᐅᑦ ᐊᓯᔾᔨᖅᑕᖅᑐᖅ, ᐊᐅᓚᐅᑎᓄᑦ ᐅᖅᓱᖅᑎᕈᑎᑦ, ᐅᖅᓲᓯᕝᕕᖕᒥᒃ, ᓂᒡᓕᓴᐅᑎᒥᒃ, ᐊᓯᖏᓐᓂᒡᓗ ᐊᒃᑐᐊᓂᓕᖕᓂᒃ ᓱᓇᒃᑯᑖᖏᓐᓂᒃ. ᑖᔅᓱᒥᖓ ᐃᖅᑲᓇᐃᔮᓕᒃ ᐱᓕᕆᖃᑎᖃᖃᑦᑕᕐᓂᐊᖅᐳᖅ ᐊᓯᖏᓐᓂᒃ ᐃᖅᑲᓇᐃᔮᓂᒃ ᐊᐅᓪᓚᒐᔪᖕᓂᐊᖅᖢᓂᓗ ᐅᖓᓯᒃᑐᓄᑦ ᓄᓇᓕᖕᓄᑦ ᐊᕕᒃᑐᖅᓯᒪᔪᓂ ᐊᐅᓚᐅᑎᓕᕆᔾᔪᑎᑦ ᐃᖏᕐᕋᑦᑎᐊᖁᓪᓗᒋᑦ.
ᐱᓕᕆᐊᒃᓴᖏᑦ ᑲᒪᒋᔭᒃᓴᖏᓪᓗ:
• ᖃᐅᔨᓴᖅᐸᒡᓗᓂ, ᐊᔪᓕᖅᓯᒪᔪᓂᒃ ᖃᐅᔨᓇᓱᒃᐸᒡᓗᓂ, ᓴᓇᔭᐅᒃᑲᓐᓂᕆᐊᓕᖕᓂᒃ ᐊᐅᓚᐅᑎᕐᔪᐊᓕᕆᔾᔪᑎᓂᒃ, ᓱᓇᒃᑯᑖᖏᓐᓂᒃ, ᐊᒻᒪ ᐱᖁᑎᖏᓐᓂᒃ ᐱᕙᓪᓕᐊᑦᑎᐊᖁᓪᓗᒋᑦ ᐊᒻᒪ ᐱᐅᓗᑎᒃ.
• ᖃᐅᔨᓴᖅᐸᒡᓗᓂ, ᐊᔪᓕᖅᓯᒪᔪᓂᒃ ᖃᐅᔨᓇᓱᒃᐸᒡᓗᓂ, ᓴᓇᔭᐅᔭᕆᐊᓕᖕᓂᓪᓗ ᑐᐊᕕᕐᓇᖅᑐᓂᒃ ᐊᐅᓚᐅᓯᕆᔾᔪᑎᖏᓐᓂᒃ, ᓱᓇᒃᑯᑖᖏᓐᓂᒃ, ᐊᒻᒪ ᐱᖁᑎᖏᑦ ᐊᓯᔾᔨᖅᐸᒡᓗᒋᑦ ᐱᔭᕆᐊᖃᖅᐸᑦ.
• ᓄᓇᓕᖕᓄᑦ ᐊᐅᓪᓚᖃᑦᑕᕐᓗᓂ ᖃᐅᔨᓴᕆᐊᕐᓗᓂ, ᐋᖅᑭᒃᓱᕆᐊᓕᖕᓂᒃ ᓴᓇᔭᖅᑐᕐᓗᓂ, ᐱᖁᑎᓂᒃ ᐃᓕᐅᖅᑲᐃᓗᓂ, ᐊᒻᒪ ᑭᓱᑐᐃᓐᓇᓂᒃ ᓱᕋᒃᓯᒪᔪᓂᒃ ᐋᖅᑭᒃᓱᐃᓗᓂ ᐊᐅᓚᐅᑎᖃᕐᕕᓕᕆᔾᔪᑎᖏᓐᓂᒃ.
• ᐱᓕᕆᖃᑎᖃᖅᐸᒡᓗᓂ ᐊᐅᓚᐅᑎᓕᕆᔨᑦ ᐱᓕᕆᕝᕕᖓᓂᒃ ᐋᖅᑭᒃᓯᒪᓂᒃᓴᖓᓂᒃ ᕿᒥᕐᕈᓗᑎᒃ ᐱᖁᑎᖏᓐᓂᒡᓗ ᓇᓗᓇᐃᔭᑦᑎᐊᖅᐸᒡᓗᓂ ᐱᓕᕆᐊᖑᔪᑦ ᒪᓕᒋᐊᖃᖅᑐᓕᒫᓂᒃ ᒪᓕᑦᑎᐊᖁᓪᓗᒋᑦ ᐊᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᒪᓕᒃᑕᐅᔭᕆᐊᓕᖕᓂᒃ.
• ᐱᓕᕆᖃᑎᖃᖅᐸᒡᓗᓂ ᑕᐃᒪᐃᑦᑐᓕᕆᔨᓂᑦ ᓴᓇᔨᓂᑦ ᐃᖅᑲᓇᐃᔭᖅᑎᓂᓪᓗ ᓈᒻᒪᖅᑯᑦᑎᓗᑎᒃ ᑮᓇᐅᔭᖅᑑᑎᖏᓪᓗ ᐊᑐᕐᓗᒋᑦ ᐱᐊᓂᒍᓐᓇᑦᑎᐊᖁᓪᓗᒋᑦ ᐊᑭᑐᔫᑎᑦ ᐊᒻᒪ ᐊᐅᓚᔾᔪᑎᑦ ᐋᖅᑭᐅᒪᐃᓐᓇᕈᑎᓪᓗ ᐱᓕᕆᐊᒃᓴᖏᑦ.
• ᓴᓇᔭᐅᔾᔪᑎᖏᑦ ᑎᑎᕋᖅᐸᓪᓕᐊᕙᒡᓗᒋᑦ ᐋᖅᑭᒃᓱᐃᖃᑎᖃᖅᐸᒡᓗᓂᓗ ᐊᐅᓚᐅᓯᕆᔨᓂᒃ, ᐊᐅᓚᑦᑎᔨᓂᒃ, ᓱᕋᒃᓯᒪᔪᓕᕆᔨᓂᒃ, ᑎᑎᕋᖅᑕᐅᓯᒪᔪᑦ ᐋᖅᑭᒋᐊᖅᑕᐅᓕᕌᖓᒥᒃ.
• ᓇᔪᖅᑕᐅᔪᒥᑦ ᐋᖅᑭᒋᐊᕈᑎᒃᓴᓂᒃ ᐊᑐᐃᓐᓇᐅᑎᑦᑎᕙᒡᓗᓂ ᐊᖅᑭᒋᐊᕈᑎᒃᓴᓂᓪᓘᓐᓃᑦ ᐱᓕᕆᔾᔪᑎᑦ ᖃᕆᓴᐅᔭᒃᑯᑦ ᐅᑎᖅᑎᑕᐅᑲᐅᑎᒋᖃᑦᑕᖁᓪᓗᒋᑦ ᖃᒥᙶᖅᑎᓪᓗᒋᑦ ᐱᖁᑎᖏᓪᓗ ᐊᑦᑕᕐᓇᖅᑐᒦᓗᐊᖅᑕᐃᓕᒪᑎᓪᓗᒋᑦ.
• ᓴᓗᒪᔪᒥᒃ, ᐊᑦᑕᕐᓇᙱᑦᑐᒥᒃ ᐱᓕᕆᕝᕕᖃᖅᑎᑦᑎᕙᒡᓗᓂ ᖃᖓᓕᒫᑦᑎᐊᖅ ᐊᒻᒪ ᐱᒋᐊᖅᑳᖅᐸᒡᓗᓂ, ᓈᒻᒪᒃᓯᔭᕌᖓᑦ ᐊᑐᓕᖁᔨᔾᔪᑎᓕᐅᖅᐸᒡᓗᓂ ᐋᖅᑭᒋᐊᖅᑕᐅᖏᓐᓇᕆᐊᓕᖕᓄᑦ ᑎᒥᒋᔭᐅᔪᑦ ᐊᐅᓚᓂᕆᔭᖏᓐᓂᒃ ᐊᒻᒪ ᐱᖁᑎᖏᓐᓂᒃ.
• ᐋᖅᑭᒃᓱᐃᖃᑎᖃᖅᐸᒡᓗᓂ ᓂᐅᕕᕐᕕᖕᓂᑦ ᐊᐅᓚᐅᑎᖏᑦ ᖃᐅᔨᓴᖅᑕᐅᑦᑎᐊᖃᑦᑕᖁᓪᓗᒋᑦ ᐃᓚᒃᓴᖏᓪᓗ ᓯᕗᓂᐊᒍᑦ ᑎᑭᓴᖅᑕᐅᕙᒡᓗᑎᒃ ᐊᕐᕌᒍᑕᒫ ᐅᒥᐊᕐᔪᐊᒃᑰᕐᓇᖅᓯᔭᕌᖓᑦ.
• ᐱᓕᕆᐊᖑᔪᑦ ᒪᓕᑦᑎᐊᖅᑎᑕᐅᕙᒡᓗᑎᒃ ᐆᒪᖅᑯᑎᓕᕆᔨᑦ ᐊᑐᐊᒐᓕᒫᖏᓐᓂᒃ ᐊᒻᒪ ᐱᓕᕆᔾᔪᓯᖏᓐᓂᒃ; ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᒥ, ᑲᓇᑕᒥ ᐊᕕᒃᑐᖅᓯᒪᔪᒥ, ᐊᒻᒪ ᑲᓇᑕᒥ ᒪᓕᒐᖏᓐᓂᒃ; ᒪᓕᑦᑎᐊᕐᓗᑎᒡᓗ ᑕᒪᐃᓐᓂᒃ ᐋᓐᓂᐊᖅᑐᓕᕆᓂᕐᒧᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒻᒪ ᐊᕙᑎᓕᕆᓂᕐᒧᑦ ᒪᓕᒐᖏᓐᓂᒃ.
• ᓄᓇᓕᖕᓂ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ ᒐᕙᒪᖓᓂᒃ ᑐᓴᐅᒪᖃᑎᖃᖅᐸᒡᓗᓂ ᖃᒥᑦᑐᖃᕌᖓᑦ ᐅᖃᐅᑎᕙᓪᓕᐊᕙᒡᓗᒋᑦ ᓄᓇᓕᖕᓂ ᐊᒃᑐᐃᓕᖅᐸᒃᑐᓂᒃ, ᐱᔭᕆᐊᖃᕈᓂ.
ᐅᑯᐊ ᐊᔪᙱᑦᑕᕆᐊᓖᑦ:
• ᐊᕕᒃᑐᖅᓯᒪᔪᓂᑦ ᐅᑭᐅᖅᑕᖅᑐᒥ ᓇᓗᓇᐃᒃᑯᑕᖃᕐᓗᓂ ᐅᖁᒪᐃᑦᑐᓕᕆᔨᒻᒪᕆᐅᓂᕐᒧᑦ.
ᐃᑲᔪᕐᓂᖃᕋᔭᖅᑐᑦ:
• ᑲᓇᑕᒥ ᐊᕕᒃᑐᖅᓯᒪᔪᓂᑦ ᓇᓗᓇᐃᒃᑯᑕᖃᕈᓂ ᐅᖁᒪᐃᑦᑐᓕᕆᔨᒻᒪᕆᐅᓂᕐᒧᑦ ᐃᑲᔪᕐᓂᖃᕋᔭᖅᐳᖅ
• ᐅᖅᓱᐊᓗᖕᒨᖅᑐᒧᑦ ᐊᐅᓚᐅᑎᖃᕐᕕᖕᒥ ᐱᓕᕆᖃᑦᑕᖅᓯᒪᓂᑰᓗᓂ ᐃᑲᔪᕐᓂᖃᕋᔭᖅᐳᖅ.
• ᖃᐅᔨᒪᓗᓂ ᓄᓇᕗᒻᒥ, ᓄᓇᖓᓂ, ᐅᖃᐅᓯᖏᓐᓂ ᐊᒻᒪ ᐱᖅᑯᓯᖏᓐᓂ.
• ᐃᓄᒃᑎᑐᑦ, ᐃᓄᐃᓐᓇᖅᑐᓐ ᐊᒻᒪ/ᐅᕝᕙᓘᓐᓃᑦ ᐅᐃᕖᑐᑦ ᑐᓴᐅᒪᑎᑦᑎᔪᓐᓇᕐᓗᓂ.
ᐊᑭᓕᖅᓱᐃᑦᑎᐊᖃᑦᑕᖅᐳᒍᑦ $93,017−ᒥᑦ $107,889−ᒧᑦ, ᐅᑭᐅᖅᑕᖅᑐᒥᐅᑕᐅᓂᕐᒧᓪᓗ ᐃᑲᔫᓯᐊᖅᑖᖅᑎᑦᑎᕙᓪᓗᑕ $15,016−ᓂᒃ ᐊᕐᕌᒍᒧᑦ, ᓈᒪᔪᒥᑦ ᐃᑲᔫᓯᐊᖅᑖᖅᑎᑦᑎᕙᒃᑐᑦ ᐅᑯᓂᖓᓗ ᓇᓗᓇᐃᖅᓯᒪᔪᓂᒃ ᐃᑲᔫᓯᐊᒃᓴᓂᒃ ᐃᓐᓇᖅᓯᐅᑎᒃᓴᓄᑦ ᐊᒻᒪᓗ ᐃᖅᑲᓇᐃᔭᖅᑎᐅᑉ ᐃᓪᓗᒃᓴᖓᓄᑦ ᐃᑲᔪᖅᑕᐅᔾᔪᑎᑕᖃᖅᓱᓂ. ᑖᓐᓇ ᐃᖅᑲᓇᐃᔮᒃᓴᖅ ᐃᓚᓕᐅᔾᔭᐅᓯᒪᕗᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ.
ᓄᓇᕗᒻᒥᐅᑉ ᐃᓄᐃᑦ ᓯᕗᓪᓕᖅᐸᐅᔾᔭᐅᓂᐊᖅᑐᑦ. ᐱᑕᖃᙱᑉᐸᑦ ᓄᓇᕗᒥᙶᖅᑐᒥ ᐃᓄᖕᒥᒃ, ᑖᓐᓇ ᐃᖅᑲᓇᐃᔮᒃᓴᖅ ᐊᑐᐃᓐᓇᐅᑎᑕᐅᓂᐊᖅᑐᖅ ᐊᕐᕌᒎᖕᓄᑦ ᐱᖓᓱᓄᑦ ᐃᖅᑲᓇᐃᔮᕆᔭᐅᓚᐅᑲᒡᓗᓂ.
ᐱᓇᔪᒍᒪᒍᕕᑦ ᓇᒃᓯᐅᑎᓗᒍ ᐱᓇᔪᒍᑎᒋᔭᐃᑦ ᖃᕆᑕᐅᔭᒃᑯᑦ ᑎᑎᕋᖃᑦᑕᐅᑎᕝᕕᒃᑯᑦ ᐅᕗᖓ careers@qec.nu.ca ᑎᑎᖅᑲᑎᒍᓪᓘᓐᓃᑦ ᐅᕗᖓ: Human Resources, Qulliq Energy Corporation, P.O. Box 420, Baker Lake, NU X0C 0A0
ᑎᑎᖅᑲᑦᑯᑦ ᐱᓇᓱᐊᕐᓗᑎ, ᒪᐃ 28, 2021 ᑐᖔᓂ.
ᐱᓇᔪᒃᑐᑦ ᑖᔅᓱᒧᖓ ᐃᖅᑲᓇᐃᔮᒃᓴᒧᑦ ᐃᓱᒪᒋᔭᐅᑐᐃᓐᓇᕆᐊᓖᑦ ᓯᕗᓂᒃᓴᒥ ᐃᖅᑲᓇᐃᔭᖅᑎᒃᓴᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ.
ᖁᔭᓕᕗᒍᑦ ᐃᖅᑲᓇᐃᔮᖅᑖᕋᓱᒃᑐᓕᒫᓂᒃ; ᑭᓯᐊᓂ, ᓂᕈᐊᖅᑕᐅᔪᑐᐊᑦ ᐃᓱᒪᒃᓴᖅᓯᐅᕈᑕᐅᒃᑲᓐᓂᕐᓂᐊᖅᑐᓄᑦ ᑐᓴᖅᑎᑕᐅᓂᐊᖅᐳᑦ.