ᐃᖃᓗᐃᑦ, ᓄᓇᕗᑦ (ᐄᑉᐳ 1, 2020) - ᐆᒻᒪᖅᑯᑎᓕᕆᔨᒃᑯᑦ ᐱᓇᔪᒃᓯᒪᓕᖅᑐᑦ ᐅᖅᓱᐊᓗᒃᑖᖅᐸᒃᑐᑦ ᐊᑭᓕᖅᓱᖁᓪᓗᒋᑦ ᐅᖅᓱᐊᓗᒃᑖᖅᑐᑦ ᐊᑭᓕᖅᓱᐃᔭᕆᐊᖃᓕᕐᓗᑎᒃ $2.76 per kilowat-ᐃᑲᕐᕋᒧᑦ ᐊᐃᕆᓕ 1-ᒥ, ᓯᑎᐱᕆ 30, 2020-ᒧᑦ. ᐱᓇᔫᑕᐅᔪᖅ ᑐᓐᓂᖅᑯᑕᐅᓚᐅᖅᐳᖅ ᐆᒻᒪᖅᑯᑎᓕᕆᔨᒃᑯᑦ ᒥᓂᔅᑕᖓᓐᓄᑦ, ᐱᖁᔨᕗᖔᓕᐊᕆᔭᐅᔪᓂᒃ ᖃᐅᔨᓇᓱᒋᐊᖃᕐᓂᐊᖅᑐᖅ ᐆᒻᒪᖅᑯᑎᑦ ᐊᑭᖏᓐᓄᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ.
"ᑐᒃᓯᕋᐅᑕᐅᔪᖅ ᐅᖅᓱᐊᓗᖕᒧᑦ ᐊᑭᓕᖅᓱᖅᑕᐅᔪᒃᓴᖅ ᑕᐃᒪᓐᓇ ᐋᖅᑭᒃᑕᐅᓕᓚᐅᖅᐳᖅ ᖃᖓᑦᑎᐊᖅ ᓄᓇᕘᒥ ᐅᖅᓱᐊᓗᒃ ᐊᑭᖓ ᐊᑭᒃᖠᒋᐊᓚᐅᖅᑎᓪᓗᒋᑦ," ᐅᖃᓚᐅᖅᐳᖅ ᒪᓕᒐᓕᐅᖅᑎ ᔩᓂ ᐃᕼᐊᓗᐊᒃ, ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕ. “ᐊᑭᒃᖠᒋᐊᖅᑐᑦ ᐅᖅᓱᐊᓗᖕᒧᑦ ᐊᑭᖓᓐᓄᑦ ᐃᑲᔫᑕᐅᕗᖅ ᐊᑭᓕᖅᓱᐃᔨᓄᑦ ᐊᑭᓕᐅᑎᒋᓚᐅᖅᑕᖏᓪᓗ ᐅᑎᖅᑎᑕᐅᓂᐊᖅᐳᑦ ᓄᓇᕗᒥᐅᓄᑦ.”
ᐅᖅᓱᐊᓗᖕᒧᑦ ᐊᑭᖓ ᐊᑭᓕᒃᑲᓐᓂᕆᐊᖃᓲᖑᕗᖅ ᐅᕝᕙᓘᓐᓃᑦ ᐊᑭᓕᖅᓱᖅᑕᐅᔪᓄᑦ ᐅᑎᖅᑎᒐᒃᓴᐅᓲᖑᕗᖅ ᐊᑭᓕᖅᓱᐃᔨᑦ ᐊᑭᓕᒐᒃᓴᖏᓐᓂᒃ ᑕᑯᒃᓴᐅᑎᑦᑎᔭᕆᐊᖃᖅᑐᖅ ᐊᔾᔨᒌᙱᓐᓂᖓᓂ ᐅᖅᓱᐊᓘᑉ ᐊᑭᖓ ᐆᒻᒪᖅᑯᑎᑐᕈᓯᑦ ᐊᑭᖏᓐᓂᒃ ᐊᑭᓪᓚᑦᑖᖓᓗ ᐊᑭᓕᖅᓱᖅᑕᐅᔪᖅ ᐆᒻᒪᖅᑯᑎᓕᕆᔨᒃᑯᓐᓄᑦ.
"ᐆᒻᒪᖅᑯᑎᓕᕆᔨᒃᑯᓐᓄᑦ ᐊᑭᓕᖅᓱᐃᔪᑦ ᓂᕆᐅᒍᓐᓇᓛᖅᐳᑦ ᐅᑎᖅᑎᑕᐅᔪᒃᓴᓂᒃ ᐋᖅᑭᒃᑕᐅᓯᒪᕙᒌᖅᑐᒧᑦ ᐃᓚᓕᐅᔾᔭᐅᖃᑦᑕᕐᓂᐊᖅᑐᖅ ᑕᖅᑭᑕᒫᑦ ᐊᑭᓕᖅᓱᖅᑕᖏᓐᓄᑦ, ᐱᒋᐊᕐᓗᒍ ᐊᐃᕆᓕᒥ ᐆᒻᒪᖅᑯᑎᓕᕆᔨᒃᑯᓐᓂ ᐊᑭᓕᒐᒃᓴᖅᑖᖅᐸᑕ, ᑭᑭᑕᐅᓗᑎᒃ ᐃᒡᓗᓕᕆᔨᒃᑯᓐᓂ ᐊᑐᖅᑐᐊᖅᑎᑦ ᐃᑲᔫᓯᐊᖅᑖᖅᐸᒃᑐᑦ ᐊᑐᖅᑐᐊᖅᑎᒃᑯᓐᓄᑦ ᐱᓕᕆᐊᕆᔭᐅᔪᒃᑯᑦ," ᐅᖃᓚᐅᖅᐳᖅ ᐳᕉᓅ ᐱᕆᐅᕋ, ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳᖓ ᐊᒻᒪ ᐊᐅᓚᑦᑎᔨᒻᒪᕆᖓ.
ᐊᑭᓕᖅᓱᐃᔨᑦ ᐆᒻᒪᖅᑯᑎᑐᖅᑎᒋᔪᑦ 500 kilowat-hours ᑕᖅᑭᑕᒫᑦ $14.50 ᐊᑭᒃᖠᒋᐊᖅᓯᒪᔪᒥᒃ ᓂᕆᐅᒋᐊᖃᕐᓂᐊᖅᐳᑦ (GST ᐃᓚᓕᐅᑎᓗᒍ) ᑕᖅᑭᑕᒫᑦ ᐊᑭᓕᖅᓱᒐᒃᓴᓂᒃ.
ᑐᑭᓯᒋᐊᒐᒃᓴᖅᑕᖃᒃᑲᓐᓂᖅᑐᖅ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᖕᒧᑦ ᐊᑭᖓᓂᒃ ᐅᕗᙵᕐᓗᓯ www.qec.nu.ca.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕈᓃ ᐳᓱ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7534
rboucher@qec.nu.ca