ᐊᐅᓚᑦᑎᔨ, ᐆᒻᒪᖅᑯᑎᓕᕆᔨᒃᑯᑦ ᐊᐅᓚᐅᓯᕆᔨᓄᑦ ᐸᕐᓇᐃᔨᓄᑦ

ᐆᒻᒪᖅᑎᒋᐊᒃᑲᓐᓂᕈᒃ ᐃᖅᑲᓇᐃᔮᑦ ᐅᑭᐅᖅᑕᖅᑐᒥ!

ᖃᐅᔨᒋᐊᕈᒃ ᐃᓕᖕᓄᑦ ᐱᓕᕆᐊᒃᓴᑦᑎᐊᕙᒃ ᑲᓇᑕᐅᑉ ᐅᑭᐅᖅᑕᖅᑐᐊᓂ! ᐃᓚᐅᕝᕕᒋᒃᑭᑦ ᐱᓇᔪᒍᒪᑦᑎᐊᖅᑐᑦ ᐱᓕᕆᔨᕗᑦ ᐱᓕᕆᖃᑦᑕᖅᓯᒪᑦᑎᐊᖅᑐᑦ ᓴᓇᕝᕕᖕᒥ ᐱᓕᕆᔨᓪᓚᕇᑦ ᐊᑦᑕᕐᓇᙱᑦᑐᒥᒃ, ᑕᑎᒋᔭᒃᓴᐅᔪᒥᒃ, ᐊᑭᑐᓗᐊᙱᑦᑐᒥᒡᓗ ᐆᒻᒪᖅᑯᑎᖃᖅᑎᑦᑎᕙᒃᖢᑎᒃ ᓄᓇᕗᓕᒫᒥ.

ᓄᓇᕗᒻᒥ ᐃᖅᑲᓇᐃᔭᕐᓂᖅ

ᓄᓇᕗᑦ ᑲᓇᑕᒥ ᓄᑖᖑᓛᖑᔪᖅ ᐊᖏᓛᖑᓪᓗᓂᓗ ᐱᕈᖅᐸᓪᓕᐊᓛᒥᓪᓗ ᑮᓇᐅᔭᓕᐅᕈᑎᖃᖅᖢᓂ ᑲᓇᑕᒥ. ᑲᔾᔮᕐᓇᖅᖢᓂᒃ ᓄᓇᖓ ᑕᐅᑦᑐᖃᖅᖢᓂ ᐱᕕᒃᓴᑦᑎᐊᕆᒃᖢᓂᓗ, ᐊᓕᐊᓇᐃᒋᑦᑎᐊᕐᓂᐊᖅᐸᐃᑦ ᐃᖅᑲᓇᐃᔭᕐᕕᒋᔭᕐᓂᑐᐊᖑᙱᑦᑐᖅ, ᐱᓕᕆᓐᓇᐅᙱᑦᑐᒃᑯᓪᓘᓐᓃᑦ. ᕿᒧᒃᓯᕈᒪᓐᓂᕈᕕᑦ, ᓯᑭᑑᑲᑕᒡᓗᑎᑦ, ᖃᔭᖅᑐᕐᓗᑎᑦ, ᐃᖃᓪᓕᐊᕐᓗᑎᑦ, ᕿᒥᕐᕈᔪᒪᓐᓂᕈᕕᓪᓘᓐᓃᑦ ᐃᓕᖅᑯᓯᕐᒥᓂ ᐊᑐᓪᓚᕆᒃᑐᓂᑦ ᓴᓇᙳᐊᖅᑎᓂᑦ ᓂᔾᔭᐅᓯᔭᖅᑎᓂᒡᓗ, ᓄᓇᕗᑦ ᐃᓕᖕᓄᑦ ᐃᓂᒃᓴᑦᑎᐊᕙᐅᕗᖅ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᒪᒋᔭᒃᓴᖃᖅᑐᑦ ᐊᑐᐃᓐᓇᐅᑎᑦᑎᓪᓗᑎᒃ ᐊᑦᑕᕐᓇᙱᑦᑐᒥᑦ, ᑕᑎᒋᔭᒃᓴᐅᔪᒥᒃ ᐆᒻᒪᖁᑎᒥᒃ ᐊᑭᓕᖅᓱᐃᕙᒃᑐᓕᒫᓄᑦ ᓄᓇᕗᒻᒥ. ᓇᖕᒥᓂᕆᔭᐅᔪᖅ ᓄᓇᕗᑦ ᒐᕙᒪᒃᑯᓐᓂ ᐊᐅᓚᑕᐅᓪᓗᓂᓗ ᐃᓛᒃᑰᖅᖢᑎᒃ ᓄᓇᕗᒻᒥ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᑐᐃᓐᓇᐅᑎᑦᑎᓲᖑᔪᑦ ᐆᒻᒪᖁᑎᓂᒃ ᐅᖅᑰᓴᐅᑎᓂᓪᓗ ᓄᓇᕗᒻᒥ. ᐊᓯᓕᒫᖏᑦ ᐆᒻᒪᖅᑯᑎᖃᕐᕖᑦ ᑲᓇᑕᒥ ᒥᒃᓴᐅᖦᖢᒋᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᒃᓱᕈᕐᓇᖅᑐᖅᓯᐅᖃᑦᑕᖅᐳᑦ ᐊᐅᓚᑦᑎᓪᓗᑎᒡᓗ ᐊᕙᑎᓪᓗ ᑕᓪᓕᒪᓂᒃ (25) ᐃᓛᒃᑰᖅᑐᓂᒃ ᐊᐅᓚᐅᑎᖃᕐᕕᐊᓗᖕᓂᒃ ᐆᒻᒪᖅᑯᑎᖃᖅᑎᑦᑎᓪᓗᑎᒡᓗ ᓄᓇᓕᓕᒫᓂᒃ ᓄᓇᕗᒻᒥ.

ᐊᐅᓚᑦᑎᔨ, ᐆᒻᒪᖅᑯᑎᓕᕆᔨᒃᑯᑦ ᐊᐅᓚᐅᓯᕆᔨᓄᑦ ᐸᕐᓇᐃᔨᓄᑦ (QEC-24-014)

ᖃᒪᓂ'ᑐᐊᖅ, ᓄᓇᕗᑦ

ᐅᓂᒃᑳᖅᐸᒡᓗᓂ ᑐᑭᒧᐊᒃᑎᑦᑎᔨᒧᑦ, ᐊᐅᓚᐅᓯᕆᔨᒃᑯᓐᓄᑦ, ᐊᐅᓚᐅᓯᕆᔨᒃᑯ ᑲᒪᒋᔭᒃᓴᖃᖅᐳᑦ ᖃᐅᔨᓴᖅᑕᐅᒋᐊᓕᖕᓂᒃ, ᐸᕐᓇᒃᑕᐅᒋᐊᓕᖕᓂᒃ, ᐊᒻᒪ ᐃᓕᑕᕆᔭᐅᔾᔪᑎᑖᖅᐸᒃᖢᑎᒃ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᐅᓚᐅᓯᕆᔨᑦ ᐱᓕᕆᔨᖏᑦ, ᐋᖅᑭᒃᓯᒪᓂᕆᔭᖏᑦ, ᐊᒻᒪ ᒪᓕᒃᑕᐅᒋᐊᖃᖅᑐᖁᑎᖏᑦ. ᐃᖅᑲᓇᐃᔮᒃᓴᖅ ᐃᑲᔪᖅᓱᐃᔾᔪᑕᐅᕗᖅ ᓴᒃᑯᑕᐅᔪᓂᒃ ᐊᐅᓚᐅᓯᕆᓂᕐᒧᑦ ᐱᓕᕆᐊᓂᒃ ᐊᑐᐃᓐᓇᐅᑎᑉᐸᒃᖢᒋᑦ ᐊᐅᓚᐅᓯᕆᔨᓄᑦ ᐃᑲᔫᑎᒃᓴᑦ ᓲᕐᓗ ᐆᒻᒪᖅᑯᑎᓕᕆᓂᕐᒧᑦ ᐸᕐᓇᐅᑎᑦ, ᐋᖅᑭᒃᓯᒪᓂᒃᓴᖓᓐᓂᑦ ᐱᔨᑦᑎᕋᖅᑎᑦ, ᖃᕆᑕᐅᔭᓕᕆᔾᔪᑎᑦ ᖃᐅᔨᓴᖅᐸᒡᓗᒋᑦ, ᖃᓄᕈᓘᔭᕐᓗ ᖃᐅᔨᓴᖅᐸᒡᓗᑎᒃ. ᐃᖅᑲᓇᐃᔮᒃᓴᖅ ᐊᑐᐃᓐᓇᐅᑎᑦᑎᖃᑦᑕᕐᓂᐊᕐᒥᔪᖅ ᖃᕆᑕᐅᔭᓕᕆᓂᕐᒧᑦ ᐅᖃᐅᔾᔪᐃᕙᒡᓗᓂ, ᐃᑲᔪᖅᓱᐃᕙᒡᓗᓂ, ᐊᒻᒪ ᐊᑐᓕᖅᑕᐅᖁᔨᕙᒡᓗᓂ ᐱᑖᖃᑕᐅᓯᒪᔪᓄᑦ ᑕᐃᒪᐃᑦᑕᕆᖃᕌᖓᑦ.

ᐱᔭᒃᓴᐃᑦ ᑲᒪᒋᔭᒃᓴᐃᓪᓗ:

• ᐸᕐᓇᐅᑎᑦ ᐊᒻᒪ ᓄᑖᑦ ᐋᖅᑭᒃᓯᒪᓂᒃᓴᖓᓄᑦ ᐃᓕᐅᖅᑲᖅᑕᐅᔪᑦ, ᐊᓯᔾᔨᖅᑕᐅᔪᑦ, ᓄᑖᙳᖅᑎᖅᑕᐅᔪᓪᓗ ᐆᒻᒪᖅᑯᑎᓕᕆᔨᒃᑯᑦ ᐆᒻᒪᖅᑯᑎᖃᖅᑎᑦᑎᔾᔪᓯᖓᓐᓄᑦ ᐊᑐᖅᑕᐅᖃᑦᑕᖅᑐᑦ ᓇᓗᓇᐃᖅᓯᔾᔪᑕᐅᖃᑦᑕᖅᑐᓪᓗ ᐋᖅᑭᒃᓯᒪᓂᓕᒫᖏᑦ ᓈᒻᒪᒡᓗᑎᒃ ᖄᖏᐅᑎᓗᑎᒡᓘᓐᓃᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᑦ ᐆᒻᒪᖅᑯᑎᖃᖅᑎᑦᑎᓂᕐᒧᑦ ᒪᓕᒋᐊᖃᖅᑕᖏᓐᓄᑦ ᐊᓯᖏᓐᓄᓪᓗ ᐊᑐᕈᓐᓇᖅᑐᓄᑦ ᓇᓗᓇᐃᒃᑯᑕᓄᑦ, ᒪᓕᒋᐊᖃᖅᑕᖏᓐᓄᑦ ᒪᓕᒐᖏᓐᓄᓪᓗ.
• ᑐᓂᓯᕙᒡᓗᓂ ᐊᑭᑦᑐᕋᐅᑎᖁᔨᔪᓂᒃ ᐊᑭᑐᔫᑎᓄᑦ ᐱᓕᕆᐊᓄᑦ ᓲᕐᓗ ᐊᐅᓚᐅᑎᑦ, ᑐᐊᕕᕐᓇᖅᑐᖅᓯᐅᑎᑦ ᐊᐅᓚᐅᑎᑦ, ᐃᑭᑦᑕᐅᑎᑦ, ᐊᒻᒪ ᐊᐅᓚᐅᑎᖃᕐᕕᖕᒥ ᐱᐅᓯᒋᐊᕈᑎᑦ, ᐊᓯᔾᔨᖅᑕᐅᒋᐊᓕᑦ, ᐃᓕᐅᖅᑲᖅᑕᐅᒋᐊᓖᓪᓗ, ᐊᓯᖏᓪᓗ ᖃᐅᔨᒪᓗᓂᒋᓪᓗ ᐊᑭᑐᔫᑎᑦ ᐊᒻᒪ ᐅᑎᖅᑎᒐᒃᓴᐅᔪᑦ ᐱᓕᕆᐊᑦ ᓈᒻᒪᖅᑰᑦᑎᕙᒡᓗᑎᒃ ᐊᒻᒪ ᑮᓇᐅᔭᑦ ᐊᑐᖅᑐᒃᓴᓄᑦ ᓈᒻᒪᒃᑎᑉᐸᒡᓗᒋᑦ.
• ᐱᓕᕆᕙᒡᓗᒋᑦ ᐊᒻᒪ ᐊᐅᓚᑉᐸᒡᓗᒋᑦ ᖃᐅᔨᓴᕈᑎᑦ, ᖃᐅᔨᓴᖅᑕᐅᒋᐊᓕᑦ, ᐊᒻᒪ ᐋᖅᑭᒃᓯᒪᓂᕆᔭᐅᔪᑦ ᐊᒃᑐᐊᓂᓖᑦ ᐃᓚᓕᐅᑎᔭᐅᒋᐊᓕᖕᓄᑦ ᐊᓯᐊᒍᖔᖅ ᐆᒻᒪᖅᑯᑎᓕᕆᔾᔪᑎᓂᒃ, ᐊᐅᓚᐅᑎᐅᑉ ᐊᖏᓕᕇᑦ ᑲᒪᒋᓗᒋᑦ, ᐅᖅᓱᐊᓗᖃᐅᑏᑦ, ᐊᓯᖏᓪᓗ.
• ᐊᐅᓚᑦᑎᔨᐅᕝᕕᒋᕙᒡᓗᒋᑦ ᐃᑲᔪᖅᐸᒡᓗᓂᓗ ᐋᖅᑭᒃᓯᒪᓂᖓᓂᒃ ᐱᕙᓪᓕᐊᑎᑦᑎᕙᒡᓗᓂᓗ ᓄᑖᓂᒃ ᐊᒻᒪ ᐱᑕᖃᖅᐸᒌᖅᑐᓂᒃ ᐊᐅᓚᐅᑎᓄᑦ ᒪᓕᒃᑕᐅᕙᒃᑐᓂᒃ ᐊᒻᒪ ᐱᓕᕆᐊᖑᓯᒪᔪᓂᒃ, ᐃᓚᓕᐅᔾᔭᐅᓗᑎᒃ ᓇᕿᑦᑕᐅᑎᓄᑦ ᐋᖅᑭᒃᓱᖅᓯᒪᔪᑦ.

• ᐃᒃᓯᕙᐅᑕᐅᓲᖅ ᐆᒻᒪᖅᑯᑎᖃᖅᑎᑦᑎᓂᕐᒧᑦ ᒪᓕᒃᑕᐅᔪᓕᕆᔨᒃᑯᑦ ᑲᑎᒪᔨᓄᑦ ᑭᒡᒐᖅᑐᐃᔨᑦ ᐊᐅᓚᐅᓯᕆᔨᒃᑯᓐᓂ ᐊᐅᓚᑦᑎᔩᓪᓗ ᐱᓕᕆᕝᕕᖏᓐᓂᑦ.

ᐱᔪᓐᓇᐅᑎᒋᔭᐅᔭᕆᐊᓖᑦ ᐅᑯᐊᖑᕗᑦ: 

• ᐱᔭᕇᕈᓯᐊᖅᓯᒪᓗᓂ ᐅᐊᔭᓕᕆᔨᐅᓂᕐᒧᑦ.
• ᐊᑎᖃᕆᐊᖃᖅᑐᖅ ᐅᐊᔭᓕᕆᔨᒻᒪᕆᐅᓂᕐᒧᑦ ᐃᓚᒋᔭᐅᓕᕈᓐᓇᑲᐅᑎᒋᓗᓂ ᐊᐅᓚᐅᓯᕆᔨᒻᒪᕆᖕᓄᑦ ᖃᐅᔨᓴᖅᑎᓄᑦ.
• ᐅᑭᐅᓄᑦ 7−ᓄᑦ ᐊᐅᓚᑦᑎᖃᑦᑕᖅᓯᒪᓂᑰᓗᓂ ᐆᒻᒪᖅᑯᑎᖃᕐᕕᖕᒥ ᐱᓕᕆᔾᔪᓯᖏᓐᓂᒃ ᐆᒻᒪᖅᑯᑎᓕᕆᕝᕕᖕᒥ, ᐅᑯᐊᓗ.
• ᐃᒻᒪᖄ ᐅᑭᐅᖕᓄᑦ ᒪᕐᕉᖕᓄᑦ ᐊᖓᔪᖅᑳᖑᖃᑦᑕᕐᓂᑰᓗᓂ ᐃᖅᑲᓇᐃᔭᖅᑎᓂᒡᓗ ᐱᕙᓪᓕᐊᑎᑦᑎᖃᑦᑕᕐᓂᑰᓗᓂ.
• ᐅᖅᓱᒃᓴᒥᑦ ᐊᐅᓚᐅᓯᕆᓕᒪᒋᐊᓕᒃ.
• ᐱᓕᕆᖃᑦᑕᖅᓯᒪᓂᑰᓗᓂ ᑕᒪᐃᓐᓂᒃ ᓇᓃᓐᓂᖓᓂᒃ ᐱᓕᕆᐊᒃᓴᒧᑦ ᐊᐅᓚᑦᑎᓂᕐᒥᒃ ᐱᓕᕆᐊᒃᓴᓕᐊᖑᔪᒥᒃ ᐊᐅᓚᑦᑎᓂᕐᒥᒃ.

ᐱᒻᒪᕆᐅᓂᖏᑦ:

• ᐱᓕᕆᐊᒃᓴᓂ ᐊᐅᓚᑦᑎᔨᒻᒪᕆᐅᓂᕐᒧᑦ ᐱᓕᕆᔪᓐᓇᖅᓯᑎᑕᐅᓂᖅ ᐱᒻᒪᕆᐅᕗᖅ.
• ᐅᖅᓱᐊᓗᖕᒨᖅᑐᒥᑦ ᐊᐅᓚᐅᓯᕆᔨᐅᒃᐸᑦ ᐱᒻᒪᕆᐅᕗᖅ.
• ᐱᓕᕆᐊᒃᓴᒥᑦ ᐊᐅᓚᑦᑎᓕᒪᒋᐊᓕᒃ ᐸᕐᓇᖃᑦᑕᕐᓗᓂ ᐋᖅᑭᒃᓱᐃᕙᒡᓗᓂᓗ, ᐊᑐᖅᑕᐅᔪᒃᓴᓂᒃ ᐊᐅᓚᑦᑎᕙᒡᓗᓂ, ᓇᓚᐅᑦᑖᖅᐸᒡᓗᓂ ᐱᕙᓪᓕᐊᔪᓂᒡᓗ ᐅᓂᒃᑳᓕᐅᖅᐸᒡᓗᓂ ᐊᔪᙱᑉᐸᑦ ᐱᒻᒪᕆᐅᕗᖅ.

ᐊᔾᔨᐸᓗᖏᓐᓂᓪᓘᓐᓃᑦ ᐃᓕᓐᓂᐊᕐᓂᑰᔪᑦ ᐊᔾᔨᐸᓗᐊᓂᒡᓘᓐᓃᑦ ᐱᓕᕆᖃᑦᑕᕐᓂᑰᔪᑦ ᐃᓱᒪᒋᔭᐅᑐᐃᓐᓇᕆᐊᓕᑦ.

ᑮᓇᐅᔾᔭᒃᓴᑦᑎᐊᕋᔭᖅᑐᖅ ᐱᒋᐊᕐᕕᖃᕐᓗᓂ $133,155.90−ᒥᑦ $160,177.60-ᒧᑦ ᐅᑭᐅᖅᑕᖅᑐᒥᐅᑕᐅᓂᕐᒧᓪᓗ ᐃᑲᔫᓯᐊᖅᑖᖅᐸᒡᓗᓂ $16,008.00−ᒥᑦ ᐊᕐᕌᒍᒧᑦ. ᓈᒻᒪᑦᑎᐊᖅᑐᓂᒃ ᐃᑲᔫᓯᐊᖅᑖᖅᑎᑦᑎᕙᒃᑭᕗᒍᑦ ᑲᑎᖅᓱᖅᓯᒪᔪᓂᒃ, ᐱᖃᓯᐅᑎᓪᓗᒋᑦ ᓇᓗᓇᐃᔭᖅᓯᒪᔪᑦ−ᐃᑲᔫᑎᓄᑦ ᐃᓐᓇᖅᓯᐅᑎᑖᕈᑎᑦ. ᓱᓕᒃᑲᓐᓂᖅ, ᐃᖅᑲᓇᐃᔭᖅᑎᐅᑉ ᐃᒡᓗᒃᓴᖓᓄᑦ ᐃᑲᔪᖅᑕᐅᔾᔪᑎᖃᖅᑐᖅ ᑖᔅᓱᒧᖓ ᐃᖅᑲᓇᐃᔮᒧᑦ. ᑖᓐᓇ ᐃᖅᑲᓇᐃᔮᒃᓴᖅ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᓄᑦ ᐃᓚᓕᐅᔾᔭᐅᓯᒪᙱᑦᑐᖅ.

ᓄᓇᕗᒻᒥᐅᑉ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ.  

ᐱᓇᔪᒍᒪᒍᕕᑦ, ᓇᒃᓯᐅᑎᓗᒍ ᐱᓇᔫᑎᑦ ᐊᐅᓪᓚᖅᑎᓪᓗᒍᓗ ᐃᕐᖐᓐᓈᖅᑕᐅᒃᑯᑦ ᐅᕗᖓ: https://qeccareers.prevueaps.ca/jobs/

ᑎᑎᖅᑲᒃᑯᑦ ᐱᓇᓱᐊᕐᓗᑎᑦ ᒫᑦᓯ 29, 2024 ᑐᖔᓂ.

ᐱᓇᔪᒃᑐᑦ ᑖᔅᓱᒧᖓ ᐃᖅᑲᓇᐃᔮᒃᓴᒧᑦ ᐃᓱᒪᒋᔭᐅᑐᐃᓐᓇᕆᐊᓖᑦ ᓯᕗᓂᒃᓴᒥ ᐃᖅᑲᓇᐃᔭᖅᑎᒃᓴᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᑦ.

ᖁᔭᓕᔭᕗᑦ ᑕᒪᕐᒥᑦᑎᐊᖅ ᐱᓇᔪᓚᐅᖅᑐᓕᒫᑦ. ᑭᓯᐊᓂᑦᑕᐅᖅ, ᐱᓇᔪᒃᑐᓂᑦ ᓂᕈᐊᖅᑕᐅᔪᑐᐊᑦ ᖃᐅᔨᒋᐊᕐᕕᐅᔪᑑᓂᐊᖅᑐᑦ.