ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᓴᖅᑎᑦᑎᔪᒪᕗᑦ ᑲᖏᖅᖠᓂᕐᒥᐅᓂᒃ ᐊᕙᑎᕗᑦ ᖃᐅᔨᓴᖅᑕᐅᓂᐊᖓ ᑭᕙᓪᓕᖅ ᐊᖅᑯᑖᓂ ᐱᐊᓂᒃᑕᐅᓯᒪᓕᕐᓂᖓᓂᒃ. ᖁᐊᕈᓐᓇᙱᑦᑐᖅ ᐅᖅᑰᓴᐅᑎᑉ ᐃᒪᖓ ᖃᐅᔨᓴᕐᕕᖕᒥ ᖃᐅᔨᔾᔪᑎᒃᓴᐅᑉ ᑐᖔᓃᓚᐅᕐᒪᑦ ᐃᔾᔪᕐᒦᑦᑐᖅ, ᐃᒪᖅᓱᕐᒦᑦᑐᖅ ᐊᒻᒪ ᓄᓇᐅᑉ ᖄᖓᓃᑦᑐᖅ ᐃᒪᖅ ᖃᐅᔨᓴᖅᑕᐅᓚᐅᖅᑐᓂᒃ.
ᐊᕙᑎᕗᑦ ᖃᐅᔨᓴᖅᑕᐅᓂᖓ ᐱᐊᓂᒃᑕᐅᓚᐅᖅᐳᖅ ᐃᕐᖓᖅᑐᖄᓪᓚᓚᐅᖅᑎᓪᓗᒍ ᐆᒻᒪᖅᑯᑎᓕᕆᔨᒃᑯᑦ ᐅᖅᑰᓴᐅᑎᖃᕐᕕᖓᓐᓂᒃ 2019-ᒥ ᐅᑭᐊᒃᓵᒃᑯᑦ. ᐃᒻᒪᖄ 30,000-ᒥ 40,000−ᒧᑦ ᓖᑕᓂᒃ ᖁᐊᕈᓐᓇᙱᑦᑐᖅ ᐅᖅᑰᓴᐅᑎᑉ ᐃᒪᖓ ᐊᒻᒪ ᐃᒪᕐᒥᒃ ᐃᓚᓯᒪᔪᖅ ᐃᕐᖓᓕᓚᐅᕐᒪᑦ ᓱᓪᓗᓕᐅᑉ ᐃᓚᖓᓐᓂᒃ ᐊᒃᑐᐊᔪᒧᑦ ᑭᕙᓪᓕᕐᒥ ᐋᓐᓂᐊᕕᖕᒧᑦ ᐱᖁᑎᒥᒃ ᓱᕋᒃᑐᖄᓪᓚᓚᐅᖅᑎᓪᓗᒍ. ᓄᓇ ᖁᐊᖑᓚᐅᕐᓂᖓᓄᑦ ᖃᐅᔨᓴᖅᑕᐅᔪᓐᓇᓚᐅᙱᓚᖅ ᑭᓯᐊᓂ ᐊᐅᔭᙳᖅᑎᓪᓗᒍ 2020−ᒥ.
ᖃᓄᐃᓕᖓᓕᕐᓂᕆᓚᐅᖅᑕᖏᑦ ᒪᓕᒃᖢᒋᑦ ᐊᕙᑎᕗᑦ ᖃᐅᔨᓴᖅᑕᐅᔪᖅ, ᖁᐊᕈᓐᓇᙱᑦᑐᖅ ᐅᖅᑰᓴᐅᑎᑉ ᐃᒪᖓ ᐊᒥᐊᒃᑯᕐᓗᑯᐊᓄᑦ ᐊᒃᑑᑎᔪᖃᖅᑰᔨᙱᑦᑐᖅ ᐱᓕᕆᔪᖃᖁᔨᓚᐅᙱᑦᑐᕐᓗ ᑳᓐᑐᓛᒃᑎᑦᑎᔨᒧᑦ. ᖁᐊᕈᓐᓇᙱᑦᑐᖅ ᐅᖅᑰᓴᐅᑎᑉ ᐃᒪᖓ ᐃᓄᖕᓄᑦ ᐆᒪᔪᕐᓄᓪᓗ ᐊᑦᑕᕐᓇᙱᑦᑑᒐᓗᐊᖅ, ᐊᑐᖅᑕᐅᓲᖑᓪᓗᓂᓗ ᐅᖅᑰᓴᐅᑎᓂᒃ ᐅᖅᑰᓴᐅᑕᐅᔪᓐᓇᕐᓂᖓᓄᑦ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᑐᐃᓐᓇᕈᖅᑎᑦᑎᕗᑦ ᖃᓄᐃᓕᖓᓕᕐᓂᕆᓚᐅᖅᑕᖏᓐᓂᒃ ᖃᐅᔨᓴᖅᑕᐅᔪᑦ ᓈᒻᒪᒃᑐᓄᑦ ᐱᔪᓐᓇᐅᑎᓕᖕᓄᑦ ᕿᒥᕐᕈᔭᐅᖁᓪᓗᒋᑦ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐲᖅᓯᑦᑎᐊᓚᐅᖅᐳᑦ ᐋᓐᓂᐊᕕᖕᒥ ᐅᖅᑰᓴᐅᑎᖓᓐᓂᒃ ᓄᖅᑲᖅᑎᓯᒪᓚᐅᖅᖢᒍ ᐃᕐᖓᓂᖓᓂᒃ ᖃᐅᔨᔭᐅᑎᓪᓗᒍ. ᐆᒻᒪᖅᑯᑎᓕᕆᔨᒃᑯᑦ ᖃᐅᔨᓴᕐᓂᐊᕐᒥᔪᑦ ᓱᓪᓗᓕᖕᒥᒃ ᐃᓱᒪᓕᐅᕆᓂᐊᖅᐳᓪᓗ ᓄᖅᑲᖅᑎᒋᐊᖃᕐᒪᖔᑦ ᐅᕝᕙᓘᓐᓃᑦ ᓴᓇᔭᐅᒃᑲᓐᓂᕆᐊᖃᕐᒪᖔᑦ ᐅᖅᑰᓴᐅᑎᖓ. ᐆᒻᒪᖅᑯᑎᓕᕆᔨᒃᑯᑦ ᐱᓇᔪᐃᓐᓇᖃᑦᑕᖅᐳᑦ ᑭᒡᓕᖃᖅᑎᖦᖢᒋᑦ ᐊᕙᑎᕗᑦ ᖃᐅᔨᓴᖅᑕᐅᓂᖓᓂᒃ ᐅᖃᐅᓯᕆᑦᑎᐊᕐᓗᒋᓪᓗ ᓄᓇᕗᒻᒥ ᓄᓇᓕᖕᓄᑦ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕈᓃ ᐳᓲ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7524
rboucher@qec.nu.ca