ᐊᔪᙱᓐᓂᖃᖅᐲᑦ ᕿᔪᓕᕆᔨᒻᒪᕆᐅᓂᕐᒥᒃ, ᐃᖢᐊᕆᔭᖃᖅᖢᓂ ᐱᓕᕆᖃᑎᖃᕆᐊᒃᓴᖅ ᐅᓄᖅᑐᓂᒃ ᓇᖕᒥᓂᖃᖃᑎᒌᒃᑐᓂ − ᐊᑐᖅᑐᐊᖅᑎᓂᒃ ᐊᒻᒪ ᐃᖅᑲᓇᐃᔭᖃᑎᒌᖕᓂᒃ ᐊᖏᖃᑎᒌᒍᑎᒃᑰᖅᓯᒪᔪᓂᒃ ᐊᒻᒪ ᐱᖁᑎᑖᖅᑎᑦᑎᔨᓂᒃ? ᑐᙵᓱᒃᑎᑦᑎᕖᑦ ᐊᒃᓱᕈᕐᓇᖅᑐᓂᒃ ᐃᑲᔪᕐᓂᕐᒥᒃ ᐱᖁᑎᓂᒃ ᐊᐅᓚᑦᑎᓂᕐᒧᑦ ᐱᔨᑦᑎᕋᐅᑎᓂᒃ ᓄᓇᕗᓕᒫᒧᑦ? ᐄᖑᒍᓂ, ᐱᕙᒌᔭᓕᕆᑦ ᐃᖅᑲᓇᐃᔮᖅᑖᕐᓂᐊᕐᓂᕐᒧᑦ ᐊᐅᓚᔾᔭᐃᓂᕐᒥᒃ.
ᖃᓄᐃᓕᐅᖁᔭᐅᕙᒡᓗᓂ ᐱᖁᑎᒋᔭᐅᔪᓂᑦ ᐊᐅᓚᑦᑎᔨᒧᑦ, ᐊᐅᓚᑦᑎᓂᐊᖅᐳᑎᑦ ᑲᔪᓯᑎᑦᑎᓗᑎᓪᓗ ᐅᓄᖅᑐᓂᒃ ᓇᖕᒥᓂᕆᔭᐅᔪᓂᒃ ᐊᒻᒪ ᐊᑐᖅᑐᐊᕐᓂᕐᒧᑦ ᐊᖏᖃᑎᒌᖕᓂᒃᑰᖅᓯᒪᔪᓂᒃ ᐊᒻᒪ ᓄᓇᓕᖕᓂ ᐃᒡᓗᖅᔪᐊᓂᒃ − ᐃᓚᒋᔭᐅᓗᑎᒃ ᐃᓂᒋᔭᐅᔪᑦ, ᑎᑎᕋᕐᕖᑦ ᐊᒻᒪ ᐃᒡᓗᓕᕆᓂᖅ − ᐊᔪᕐᓇᙱᓐᓂᖏᓐᓃᒃᑲᓗᐊᕐᒪᖔᑦ ᐊᒻᒪ ᐱᓕᕆᐊᕆᔭᐅᔪᓐᓇᕋᓗᐊᕐᒪᖔᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᐊᑐᖅᑐᐊᖅᑎᐅᔪᓄᑦ. ᐊᐅᓪᓚᖃᑦᑕᕐᓂᐊᖅᑐᑎᑦ ᐊᔾᔨᒌᙱᑦᑐᓄᑦ ᓄᓇᓕᖕᓄᑦ ᖃᐅᔨᓴᕆᐊᖅᑐᕐᓗᑎᑦ ᐊᒻᒪ ᓴᓇᔭᐅᔭᕆᐊᖃᖅᑐᓕᕆᕙᒡᓗᑎᑦ ᐅᕝᕙᓘᓐᓃᑦ ᐱᖁᑎᓂᒃ ᐋᖅᑭᐅᒪᑎᑦᑎᓂᖅ ᐱᓕᕆᐊᕆᖃᑦᑕᕐᓂᐊᖅᑕᕐᓃᓐᓂᐊᖅᑐᑦ. ᑕᒪᓐᓇ ᐱᕕᒃᓴᑦᑎᐊᕙᒻᒪᕆᐅᔪᖅ ᐃᓄᖕᒧᑦ ᐱᓕᕆᖃᑎᖃᑦᑎᐊᕈᓐᓇᖅᑐᓄᑦ ᐋᖅᑭᒃᓯᒪᓂᕆᔭᐅᔪᒥ, ᐱᕙᒌᔭᖅᓯᒪᓗᓂᓗ ᖃᓄᐃᓕᐅᖁᔭᐅᓂᕐᒥᒃ ᐅᖃᐅᔾᔪᖅᓱᖅᑕᐅᓂᕐᒥᒡᓗ ᐱᔭᕆᐊᖃᕌᖓᑦ, ᒪᓕᑲᑕᒍᓐᓇᑦᑎᐊᕐᓗᓂ ᐊᑐᖅᑕᐅᔭᕆᐊᓕᖕᓄᑦ ᓇᓗᓇᐃᒃᑯᑦᑎᖅᓯᓂᕐᒥᒃ ᐊᒻᒪ ᒪᓕᒃᑕᐅᕙᒃᑐᓂᒃ, ᐱᕙᒌᔭᖅᓯᓂᕐᒥ, ᖃᓄᐃᓕᐅᖅᑕᐅᕙᓪᓕᐊᔪᒪᔪᓂᒃ, ᐊᒻᒪ ᖃᓄᐃᓕᖓᓇᔭᕐᓂᖏᓐᓂᒡᓗ.