ᐱᔪᒥᓇᒃᑲᓐᓂᖅᑐᒥᒃ ᐃᖅᑲᓇᐃᔮᖃᕆᑦ ᐅᑭᐅᖅᑕᖅᑐᒥ!
ᖃᐅᔨᒋᐊᕈᒃ ᐱᓕᕆᐊᒃᓴᑦᑎᐊᕙᒃ ᐃᓕᖕᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ! ᐃᓚᐅᕝᕕᒋᒃᑭᑦ ᐱᓇᔪᒍᒪᑦᑎᐊᖅᑐᑦ ᐱᓕᕆᔨᕗᑦ ᐱᓕᕆᖃᑦᑕᖅᓯᒪᑦᑎᐊᖅᑐᑦ ᓴᓇᕝᕕᖕᒥ ᐱᓕᕆᔨᓪᓚᕇᑦ ᐊᑦᑕᕐᓇᙱᑦᑐᒥᒃ, ᐊᑐᕈᓐᓇᑦᑎᐊᖅᑐᒥᒃ, ᐊᑭᑐᓗᐊᙱᑦᑐᒥᒡᓗ ᐆᒻᒪᖅᑯᑎᖃᖅᑎᑦᑎᕙᒃᖢᑎᒃ ᓄᓇᕗᓕᒫᒥ.
ᐱᓕᕆᖃᑎᒌᖕᓂᖅ ᓄᓇᕗᒻᒥ
ᓄᓇᕗᑦ ᑲᓇᑕᒥ ᓄᑖᖑᓛᖑᔪᖅ ᐊᖏᓛᖑᓪᓗᓂᓗ ᐱᕈᖅᐸᓪᓕᐊᓛᕐᒥᒡᓗ ᑮᓇᐅᔭᓕᐅᕈᑎᖃᖅᖢᓂ ᑲᓇᑕᒥ. ᑲᔾᔮᕐᓇᖅᑐᓂᒃ ᓄᓇᖓ ᑕᐅᑦᑐᖃᖅᖢᓂ ᐱᕕᒃᓴᑦᑎᐊᕆᒃᖢᓂᓗ, ᐊᓕᐊᓇᐃᒍᓱᑦᑎᐊᕐᓂᐊᖅᐳᑎᑦ ᐃᖅᑲᓇᐃᔭᕐᕕᒋᔭᕐᓂᑐᐊᖑᙱᑦᑐᖅ, ᐱᓕᕆᓐᓇᐅᙱᑦᑐᒃᑯᓪᓘᓐᓃᑦ. ᕿᒧᒃᓯᕈᒪᓐᓂᕈᕕᑦ, ᓯᑭᑑᑲᑕᒡᓗᑎᑦ, ᖃᔭᖅᑐᕐᓗᑎᑦ, ᐃᖃᓪᓕᐊᕐᓗᑎᑦ, ᕿᒥᕐᕈᔪᒪᓐᓂᕈᕕᓪᓘᓐᓃᑦ ᐃᓕᖅᑯᓯᕐᒥᓂ ᐊᑐᓪᓚᕆᒃᑐᓂᑦ ᓴᓇᙳᐊᖅᑕᐅᔪᓂᑦ ᓂᔾᔭᐅᓯᔭᖅᑎᓂᒡᓗ, ᓄᓇᕗᑦ ᐃᓕᖕᓄᑦ ᐃᓂᒃᓴᑦᑎᐊᕙᐅᕗᖅ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᒪᒋᔭᒃᓴᖃᖅᑐᑦ ᐊᑐᐃᓐᓇᐅᑎᑦᑎᓗᑎᒃ ᐊᑦᑕᕐᓇᖏᑦᑐᒥᑦ, ᑕᑎᒋᔭᒃᓴᐅᔪᓐᓇᖅᑐᒥ ᐆᒻᒪᖁᑎᒥ ᑕᒪᐃᓐᓄᑦ ᐊᑭᓕᖅᓱᐃᕙᒃᑐᓄᑦ ᓄᓇᕗᒻᒥ. ᓇᖕᒥᓂᕆᔭᐅᔪᖅ ᓄᓇᕗᑦ ᒐᕙᒪᒃᑯᓐᓂ ᐊᐅᓚᑕᐅᓪᓗᓂᓗ ᐃᓛᒃᑰᖅᖢᑎᒃ ᓄᓇᕗᒻᒥ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᑐᐃᓐᓇᐅᑎᑦᑎᓲᖑᔪᑦ ᐆᒻᒪᖁᑎᓂᒃ ᐅᖅᑰᓴᐅᑎᓂᒡᓗ ᓄᓇᕗᒻᒥ. ᐊᓯᖏᑦ ᐆᒻᒪᖅᑯᑎᖃᖅᑎᑦᑎᕙᒃᑐᑦ ᑲᓇᑕᒥ ᑕᐅᑐᒃᖢᒋᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᔾᔨᒋᔭᐅᙱᑦᑐᒥᒃ ᐊᒃᓱᕉᑎᖃᕆᐊᖃᓲᖑᕗᑦ 25-ᓂᒃ ᐃᓛᒃᑯᑦ ᐊᐅᓚᐅᑎᖃᕐᕕᖕᓂ ᐊᒻᒪ ᖃᐅᒻᒪᖅᑯᑎᖃᖅᑎᑦᑎᔾᔪᑎᓂᒃ ᐊᐅᓚᑦᑎᕙᒃᖢᑎᒃ ᐊᑐᓂ ᓄᓇᓕᖕᓃᑦᑐᓂᒃ ᓄᓇᕗᒻᒥ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ-20-021 ᑮᓇᐅᔭᒃᓴᓕᕆᔨᑦ ᐃᑲᔫᓯᐊᒃᓴᓕᕆᔨᓪᓗ ᑲᒪᔨᖓ
ᑮᓇᐅᔭᒃᓴᓕᕆᔨᑦ, ᐃᓐᓇᖅᓯᐅᑎᓕᕆᔨᑦ ᐃᑲᔫᓯᐊᒃᓴᓕᕆᔨᓪᓗ ᐊᐅᓚᑦᑎᔨᖓᓄᑦ ᐅᓂᒃᑳᖅᐸᒡᓗᓂ, ᑮᓇᐅᔭᒃᓴᓕᕆᔨᑦ ᐃᑲᔫᓯᐊᒃᓴᓕᕆᔨᓪᓗ ᑲᒪᔨᖓ ᑐᙵᕕᖃᖅᑐᖅ ᖃᒪᓂ'ᑐᐊᕐᒥ ᐱᓕᕆᐊᒃᓴᖃᖅᐳᖅ ᐃᑲᔪᖅᐸᒡᓗᓂ ᑖᒃᑯᓂᖓᑦᑕᐃᓐᓇᖅ ᓴᖅᑭᑎᑦᑎᕙᒡᓗᑎᒃ ᐱᓇᓱᐊᕈᓰ ᒪᕐᕉᒃ ᑮᓇᐅᔭᒃᓴᖅᑖᖅᐸᒃᑐᓂᑦ ᐊᐅᓚᑦᑎᕙᒡᓗᑎᒡᓗ ᐆᒻᒪᖅᑯᑎᓕᕆᔨᒃᑯᑦ ᑲᑎᙵᔪᑦ ᐃᑲᔫᓯᐊᖏᓐᓂᒃ ᐊᒻᒪ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑕ ᐃᓐᓇᖅᓯᐅᑎᒃᓴᖏᓐᓂᒃ. ᑮᓇᐅᔭᒃᓴᓕᕆᔨᑦ ᐃᑲᔫᓯᐊᒃᓴᓕᕆᔨᓪᓗ ᑲᒪᔨᖓ ᑕᒻᒪᖅᓯᒪᔪᖅᓯᐅᖃᑦᑕᕐᓂᐊᖅᐳᖅ, ᐋᖅᑭᒃᓱᖅᐸᒡᓗᒋᑦ ᐃᑲᔫᑎᑦ ᐲᔭᐃᕝᕕᐅᕙᒃᑐᑦ, ᐊᒻᒪ ᑐᓐᓂᖅᑯᑕᐅᓂᐊᖅᑐᑦ ᐱᓕᕆᕙᓪᓕᐊᕙᒡᓗᒋᑦ ᑕᖅᑭᑕᒫ ᐃᓐᓇᖅᓯᐅᑎᒃᓴᑦ ᐊᒻᒪ ᐃᑲᔫᑎᒃᓴᓄᑦ ᐊᑭᓕᐅᑕᐅᔪᕕᓃᑦ
ᐱᓕᕆᐊᒃᓴᐃᑦ ᑲᒪᒋᔭᒃᓴᐃᓪᓗ:
• ᐃᑲᔪᖅᐸᒡᓗᓂ ᑖᒃᑯᓂᖓᑦᑕᐃᓐᓇᖅ ᐱᓇᓱᐊᕈᓰ ᒪᕐᕉᒃ ᑮᓇᐅᔭᒃᓴᖅᑖᖅᐸᒃᑐᓂᑦ 300-ᒧᑦ ᑎᑭᖦᖢᒍ ᑲᑐᔾᔨᖃᑎᒌᓂᑦ ᐃᓚᒋᔭᐅᙱᑦᑐᓪᓗ ᐃᖅᑲᓇᐃᔭᖅᑎᑦ; ᐅᑯᐊᓗ ᐃᑲᕐᕋᓕᐅᕈᑎᑦ ᖃᐅᔨᓴᖅᐸᒡᓗᒋᑦ, ᑎᑎᕋᖅᓯᒪᔪᑦ ᓇᓗᓇᐃᖅᐸᒡᓗᒋᑦ, ᐊᔾᔨᒌᓕᖅᑎᑉᐸᒡᓗᒋᑦ ᐋᖅᑭᒋᐊᖅᐸᒡᓗᒋᓪᓗ ᑎᑎᕋᖅᐸᓪᓕᐊᔪᑦ ᖃᕆᓴᐅᔭᒥᙶᖅᑐᑦ ᐊᒻᒪ ᐃᑲᕐᕋᓕᐅᕈᑎᒥᑦ ᑮᓇᐅᔭᒃᓴᓕᐅᖅᑕᐅᔪᑦ.
• ᓇᓗᓇᐃᖅᓯᕙᒡᓗᓂ ᑮᓇᐅᔭᓕᐅᖅᑕᐅᔪᓂᑦ ᐊᒻᒪ ᐲᔭᐃᕝᕕᐅᓪᓗᑎᒃ ᑲᑎᑕᐅᕙᒃᑐᓂᒃ ᐊᑭᓕᖅᑕᐅᔾᔪᑎᒋᕙᒃᑕᒥᓂᒃ, ᐊᔾᔨᐅᙱᑦᑐᑦ ᐊᑭᓕᐅᑎᑦ (ᑭᖑᓂᑦᑎᓐᓂ ᐊᑭᓕᐅᑕᐅᓪᓗᐊᖅᑐᑦ, ᓄᖅᑲᖅᑐᓄᑦ ᐊᑭᓕᐅᑎᑦ, ᐃᖅᑲᓇᐃᔭᕐᕕᖕᒥ ᐊᑭᓕᖅᑕᐅᓂᖅ, ᐊᓯᖏᓪᓗ) ᐊᒻᒪ ᓄᖅᑲᖓᔾᔪᑎᑖᖑᕙᓪᓕᐊᔪᑦ ᐋᖅᑭᒋᐊᖅᐸᒡᓗᒋᑦ ᐃᓕᕙᒡᓗᒋᓪᓗ ᐊᑭᓕᖅᑕᐅᕝᕕᖏᓐᓂ.
• ᐊᐅᓚᑦᑎᕙᒡᓗᓂ ᑕᒪᐃᓐᓂᒃ ᐊᕐᕌᒎᑉ ᓄᙳᐊᓂ ᐱᓕᕆᐊᖑᓯᒪᔪᓂᑦ ᑮᓇᐅᔭᒃᓴᓕᕆᓂᕐᒧᑦ ᐃᑲᔫᓯᐊᓄᓪᓗ ᐅᑯᓂᖓᓗ ᑎᑎᕋᖅᐸᓪᓕᐊᓗᒋᑦ ᑕᒪᕐᒥᒃ ᐊᕐᕌᒎᑉ ᓄᙳᐊᓂ ᑖᒃᓰᔭᕈᑎᑦ ᑎᑎᕋᕆᐊᓕᑦ ᐊᒻᒪ ᓇᓗᓇᐃᔭᖅᓯᒪᔪᑦ ᐊᐅᓚᑦᑎᔨᒥᒃ ᑲᒪᔨᖃᕐᓗᑎᒃ.
• ᐃᖅᑲᓇᐃᔭᖅᑏᑦ ᑐᓴᖅᑎᑉᐸᒡᓗᒋᑦ ᐃᓐᓇᖅᓯᐅᑎᒃᓴᑦ ᐃᑲᔫᓯᐊᒃᓴᓪᓗ ᒥᒃᓵᓄᑦ ᑐᑭᓯᒋᐊᕈᑎᒃᓴᓂᒃ ᓲᕐᓗ ᐊᖏᕈᑎᓕᐊᖑᓯᒪᔪᑦ ᐃᓐᓇᖅᓯᐅᑎᒃᓴᓄᑦ, ᐊᔪᕈᑎᓕᖕᓄᑦ ᐊᑐᖅᑕᐅᔪᓐᓇᖅᑐᑦ ᐊᒻᒪ ᐃᒡᓗᒥᐅᖃᑎᒥᓄᑦ ᓇᓪᓕᐅᒃᑯᒫᕆᔭᐅᔪᑦ.
• ᑲᒪᒋᕙᒡᓗᒋᑦ ᓴᓇᔪᓕᕆᔨᒃᑯᑦ ᐊᒻᒪ ᒐᕙᒪᒃᑯᑦ ᐱᔨᑦᑎᕋᖅᑎᒃᑯᑦ ᑲᓇᑕᒥ ᑎᑎᕋᖅᓯᒪᔪᓄᑦ ᑲᑎᖅᓱᐃᕕᒃ ᐊᒻᒪ ᑲᓇᑕᒥ ᐃᓅᓯᕐᒥ GroupNet ᐃᑲᔫᑎᒃᓴᐃᑦ.
• ᐊᕐᕌᒎ ᓄᙳᐊᓂ ᑮᓇᐅᔭᓕᐊᖑᓂᑯᑦ ᐊᒻᒪ ᓈᓴᖅᑕᐅᕙᒃᑐᑦ ᐱᐊᓂᒃᐸᒡᓗᒋᑦ ᐃᓐᓇᖅᓯᐅᑎᒃᓴᓄᑦ ᐋᖅᑭᒋᐊᕆᐊᓖᑦ/ᐅᑎᕆᐊᖅᑎᑕᐅᔪᑦ ᐊᓯᖏᓪᓗ ᐊᒃᑐᐊᓂᓖᑦ ᐱᓕᕆᐊᒃᓴᑦ ᐆᒻᒪᖅᑯᑎᓕᕆᔨᒃᑯᓐᓂ ᐱᓕᕆᐊᖑᖁᔭᐅᔪᑦ.
ᐊᔪᙱᑕᕆᐊᖃᖅᑕᖏᑦ ᐅᑯᐊᖑᕗᑦ:
• ᐊᕐᕌᒍᓂ ᒪᕐᕉᖕᓂᒃ ᓯᓚᑦᑐᖅᓴᕐᕕᖕᒥ ᐱᔭᕇᕈᓯᐊᖅᑖᖅᓯᒪᓗᓂ ᓇᖕᒥᓂᖅ ᐊᐅᓚᑦᑎᔨᐅᓂᕐᒧᑦ, ᑮᓇᐅᔭᓕᕆᓂᕐᒧᑦ, ᑮᓇᐅᔭᐃᑦ ᐊᐅᓚᓂᖏᓐᓄᑦ ᐊᒃᑐᐊᓂᓕᖕᓂᓪᓗ ᐋᖅᑭᒋᐊᖅᓯᒪᑎᑦᑎᓂᕐᒧᑦ.
• ᑮᓇᐅᔭᒃᓴᓕᕆᔨᑦ ᒪᓕᑦᑎᐊᕐᓗᒋᑦ ᐱᓕᕆᔨᒧᑦ ᓇᓗᓇᐃᖅᑕᐅᓯᒪᔪᑦ.
• ᐊᕐᕌᒍᓂ ᐱᖓᓱᓂᒃ ᑖᒃᑯᓂᖓᑦᑕᐃᓐᓇᖅ ᑮᓇᐅᔭᒃᓴᓕᕆᔨᐅᖃᑦᑕᖅᓯᒪᓗᓂ.
• ᐱᓕᕆᖃᑦᑕᖅᓯᒪᓗᓂ ᑲᑐᔾᔨᖃᑎᒌᓄᑦ ᐊᖏᖃᑎᒌᒍᑎᑦ ᐊᑭᓕᖅᑕᐅᓂᕐᒧᑦ ᒪᓕᒋᐊᓕᑦ ᐊᑐᖅᑎᑕᐅᓂᖓᓂ.
• ᑕᑯᑎᑦᑎᓗᓂ ᐊᔪᙱᓐᓂᖓᓂᒃ ᖃᕆᓴᐅᔭᓕᕆᔾᔪᑎᓂᒃ ᑐᖅᑯᖅᑐᐃᕕᖕᓂ, ᖃᕆᓴᐅᔭᒃᑯᑦ ᐃᑲᕐᕋᓕᐅᕐᕕᖕᓂ ᐊᒻᒪ ᐊᑭᓕᖅᓱᐃᔾᔪᑎᓂᒃ ᐊᒻᒪᓗ ᐃᑭᐊᖅᑭᕕᒃᑯᑦ ᐊᑐᖅᐸᒃᑐᓂᑦ.
ᐃᑲᔪᕐᓂᖃᕋᔭᖅᑐᑦ:
• ᓇᓗᓇᐃᒃᑯᑕᖃᕐᓗᓂ ᐃᖅᑲᓇᐃᔭᖅᑎᑦ ᐃᑲᔫᓯᐊᖏᓐᓄᑦ ᖃᐅᔨᒪᔨᑕᕐᒧᑦ, ᑲᑎᙵᔪᑦ ᐃᑲᔫᓯᐊᖏᓐᓄᑦ ᐃᓚᒋᔭᐅᔪᓄᑦ, ᐃᓐᓇᐅᓕᕈᓂ ᐃᖅᑲᓇᐃᔭᕈᓐᓃᖅᑐᓄᑦ ᐃᓚᒋᔭᐅᔪᓄᑦ ᐅᕝᕙᓘᓐᓃᑦ ᓇᓗᓇᐃᒃᑯᑕᖃᕐᓗᓂ ᑮᓇᐅᔭᒃᓴᓕᕆᔨᑦ ᐊᐅᓚᑦᑎᔨᖓᓄᑦ ᐃᑲᔪᕐᓂᖃᕋᔭᖅᐳᖅ.
• ᖃᐅᔨᒪᓗᓂ ᓄᓇᕗᒻᒥ, ᓄᓇᖓᓂ, ᐅᖃᐅᓯᖏᓐᓂ ᐊᒻᒪ ᐱᖅᑯᓯᖏᓐᓂ.
• ᐃᓄᒃᑐ/ᐃᓄᐃᓐᓇᖅᑐᓐ ᐅᖃᕈᓐᓇᕐᓗᓂ ᐊᒻᒪ/ᐅᕝᕙᓘᓐᓃᑦ ᐅᐃᕖᑎᑐᑦ.
ᐊᔾᔨᖏᓪᓗ ᐊᒻᒪ ᑲᑎᓪᓗᒋᑦ ᐃᓕᓐᓂᐊᖅᓯᒪᔭᖏᑦ ᐃᖅᑲᓇᐃᔭᖃᑦᑕᖅᓯᒪᓂᖏᓪᓗ ᐃᓱᒪᒋᔭᐅᓂᐊᖅᑐᑦ.
ᐊᑭᓕᖅᓱᐃᑦᑎᐊᖃᑦᑕᖅᐳᒍᑦ $87,204.00−ᒥᑦ $101,146.50−ᒧᑦ, ᐅᑭᐅᖅᑕᖅᑐᒥᐅᑕᐅᓂᕐᒧᓪᓗ ᐃᑲᔫᓯᐊᖅᑖᖅᑎᑦᑎᕙᒃᖢᑕ $24,381−ᓂᒃ ᐊᕐᕌᒍᒧᑦ, ᐃᖅᑲᓇᐃᔭᕐᓇᐅᙱᑦᑐᒃᑯᑦ ᐃᑲᕐᕋᓕᐅᕈᓐᓇᖅᑎᑕᐅᓪᓗᓂ, ᓈᒻᒪᔪᒥᑦ ᐃᑲᔫᓯᐊᖅᑖᖅᑎᑦᑎᕙᒃᑐᑦ ᐅᑯᓂᖓᓗ ᓇᓗᓇᐃᖅᓯᒪᔪᒥᑦ ᐃᑲᔫᓯᐊᒃᓴᓂᒃ ᐃᓐᓇᖅᓯᐅᑎᒃᓴᓄᑦ ᐊᒻᒪᓗ ᐃᖅᑲᓇᐃᔭᖅᑎᐅᑉ ᐃᒡᓗᒃᓴᖓᓄᑦ ᐃᑲᔪᖅᑕᐅᔾᔪᑎᑕᖃᖅᖢᓂ. ᑖᓐᓇ ᐃᖅᑲᓇᐃᔮᒃᓴᖅ ᐃᓚᓕᐅᔾᔭᐅᓯᒪᕗᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ.
ᓄᓇᕗᒻᒥᐅᑉ ᐃᓄᐃᑦ ᓯᕗᓪᓕᖅᐸᐅᔾᔭᐅᓂᐊᖅᑐᑦ.
ᐱᓇᔪᒍᒪᒍᕕᑦ ᓇᒃᓯᐅᑎᓗᒍ ᐱᓇᔪᒍᑎᒋᔭᐃᑦ ᖃᕆᑕᐅᔭᒃᑯᑦ ᑎᑎᕋᖃᑦᑕᐅᑎᕝᕕᒃᑯᑦ ᐅᕗᖓ careers@qec.nu.ca ᑎᑎᖅᑲᑎᒍᓪᓘᓐᓃᑦ ᐅᕗᖓ: ᐃᖅᑲᓇᐃᔭᖅᑐᓕᕆᔨᒃᑯᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ, ᑎᑎᖅᑲᒃᑯᕕᒃ. Box 420, Baker Lake, NU X0C 0A0
ᑎᑎᖅᑲᑦᑯᑦ ᐱᓇᓱᐊᕐᓗᑎ, ᒪᐃ 28, 2021 ᑐᖔᓂ.
ᐱᓇᔪᒃᑐᑦ ᑖᔅᓱᒧᖓ ᐃᖅᑲᓇᐃᔮᒃᓴᒧᑦ ᐃᓱᒪᒋᔭᐅᑐᐃᓐᓇᕆᐊᓖᑦ ᓯᕗᓂᒃᓴᒥ ᐃᖅᑲᓇᐃᔭᖅᑎᒃᓴᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ.
ᖁᔭᓕᕗᒍᑦ ᐃᖅᑲᓇᐃᔮᖅᑖᕋᓱᒃᑐᓕᒫᓂᒃ; ᑭᓯᐊᓂ, ᓂᕈᐊᖅᑕᐅᔪᑐᐊᑦ ᐃᓱᒪᒃᓴᖅᓯᐅᕈᑕᐅᒃᑲᓐᓂᕐᓂᐊᖅᑐᓄᑦ ᑐᓴᖅᑎᑕᐅᓂᐊᖅᐳᑦ.