ᐃᖃᓗᐃᑦ, ᓄᓇᕗᑦ (ᒫᑦᓯ 11, 2020) – ᓄᑖᖅ ᐃᒃᐱᐊᕐᔪᖕᒥᐅᓂ ᐆᒻᒪᖅᑯᑎᖃᕐᕕᐅᓂᐊᓕᖅᑐᖅ ᐱᓕᕆᐊᒃᓴᖅ ᐊᖏᖅᑕᐅᓯᒪᓕᖅᐳᖅ ᒪᓕᒐᓕᐅᖅᑎᒥᑦ ᔩᓂ ᐃᕼᐊᓗᐊᕐᒥᑦ, ᒥᓂᔅᑕ ᑲᒪᒋᔭᒃᓴᖃᖅᑎᑕᐅᓪᓗᓂ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ. ᐱᓇᔪᒍᑎᒋᔭᐅᔪᖅ ᐊᖏᔪᒧᑦ ᐱᓕᕆᐊᒃᓴᒧᑦ ᐱᔪᓐᓇᐅᑎᒋᔭᐅᔪᖅ ᑐᓐᓂᖅᑯᑕᐅᓚᐅᖅᐳᖅ ᓄᕕᐱᕆ 2019−ᒥ.
“ᕿᒥᕐᕈᐊᕌᓪᓚᓚᐅᖅᖢᒍ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐱᓇᔪᒍᑎᒋᔭᖓ ᐅᖃᖃᑎᒋᓪᓗᒋᓪᓗ ᐅᑯᐊ, ᐆᒻᒪᖅᑯᑎᓄᑦ ᐊᑭᓕᐅᑕᐅᕙᒃᑐᓄᑦ ᕿᒥᕐᕈᔨᑦ ᑲᑎᒪᔨᖏᑦ, ᖁᕕᐊᓱᒃᐳᖓ ᐊᖏᕈᓐᓇᕋᒪ ᐃᓇᖏᖅᓯᓂᕐᒧᑦ ᐱᓕᕆᐊᒃᓴᒧᑦ ᐱᔪᒪᔭᐅᔪᒧᑦ,” ᑕᐃᒪᓐᓇ ᒪᓕᒐᓕᐅᖅᑎ ᔩᓂ ᐃᕼᐊᓗᐊᒃ ᐅᖃᖅᑐᖅ, ᒥᓂᔅᑕᕆᔭᐅᓪᓗᓂ ᑲᒪᒋᔭᒃᓴᖃᖅᑎᑕᐅᓪᓗᓂ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᒃ. “ᓇᓗᙱᑦᑎᐊᖅᐳᖓ ᑖᓐᓇ ᐱᓕᕆᕝᕕᒋᔭᐅᔪᖅ ᑲᔪᓯᑎᑦᑎᔪᓐᓇᕐᓂᖓᓂᒃ ᐊᖏᔪᓂᒃ ᐱᓕᕆᐊᒃᓴᓂᒃ, ᑕᐃᒪᐃᓕᐅᕐᓂᕐᒥᓂᓗ ᓯᕗᓪᓕᖅᐸᐅᑦᑎᐅᔾᔨᕙᒡᓗᓂ ᐊᑐᖅᑐᑦ ᐱᐅᒋᔭᖏᓐᓂᒃ ᑲᒪᒋᔭᖃᑦᑎᐊᕐᓗᓂᓗ ᐊᐅᓚᑦᑎᓂᕐᒥᒃ ᑭᒃᑯᑐᐃᓐᓇᓄᑦ ᑮᓇᐅᔭᖁᑎᒋᔭᐅᔪᓄᑦ.”
ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓂᕆᐅᒃᐳᑦ ᓴᓇᔭᐅᓛᕐᓂᖓᓂᒃ ᓄᑖᖅ ᐆᒻᒪᖅᑯᑎᖃᕐᕕᐅᓂᐊᖅᑐᖅ 2020−ᒥᑦ 2023-ᒧᑦ ᐱᓇᔪᒃᓯᒪᓕᖅᖢᑎᒡᓗ ᑮᓇᐅᔭᖁᑎᒋᔭᐅᓂᐊᖅᑐᓂᒃ ᒐᕙᒪᑐᖃᒃᑯᑦ ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᓂᕐᒧᑦ ᑮᓇᐅᔭᖁᑎᒋᔭᖏᓐᓂ ᐃᑲᔪᕈᒪᓪᓗᑎᒃ ᓴᓇᔭᐅᔪᓄᑦ ᐊᑭᓕᕆᐊᓕᖕᓄᑦ.
“ᐱᓇᔪᒃᑕᕗᑦ ᑕᐅᑐᒐᖃᓪᓗᐊᑕᖅᐳᑦ ᑲᔪᓯᑎᑦᑎᓇᔭᕐᓂᕐᒥᒃ ᐊᑦᑕᕐᕐᓇᙱᑦᑐᒥᒃ, ᐊᑭᑐᓗᐊᖏᑦᑐᒥᒃ ᐆᒻᒪᖅᑯᑎᖃᖅᑎᑦᑎᓂᕐᒥᒃ ᐊᑭᓕᖅᓱᐃᔨᑦᑎᓐᓄᑦ ᐊᓯᔾᔨᖅᑐᐃᓗᑕ ᓇᑉᐸᖅᑎᖅᑕᐅᓯᒪᔪᓂᒃ ᑐᕋᕆᔭᐅᑎᑕᐅᔪᒧᑦ ᐊᑐᕈᓐᓇᕐᓂᕆᔭᖓᓄᑦ ᖄᖏᐅᑎᓯᒪᓕᖅᑐᓄᑦ,” ᑕᐃᒪᓐᓇ ᐳᕉᓅ ᐱᕇᕋ ᐅᖃᖅᐳᖅ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐊᖓᔪᖅᑳᖓᑦ ᐊᐅᓚᑦᑎᔨᓪᓗᐊᑕᐅᓪᓗᓂᓗ. "ᑲᔪᓰᓐᓇᖅᑐᒥᒃ ᑮᓇᐅᔭᖃᖅᑎᑕᐅᓂᒃᑯᑦ ᐃᑲᔪᖅᑐᖅᑕᐅᓗᑕ ᒐᕙᒪᑐᖃᒃᑯᓐᓂᑦ, ᖃᐅᔨᒪᑦᑎᐊᕐᓂᐊᖅᐳᒍᑦ ᓄᓇᕗᒻᒥᐅᑦ ᓄᓇᓕᖕᓂ ᐆᒻᒪᖅᑯᑎᖃᕆᐊᕐᓂᕐᒧᑦ ᑲᔪᓯᑎᑕᐅᒐᓗᐊᕐᒪᖔᑕ.”
ᑐᓴᒃᑲᓐᓂᕈᒪᒍᕕᑦ ᑖᔅᓱᒧᖓ ᐱᓇᔪᒍᑕᐅᔪᒧᑦ, ᐅᕗᖓ ᑕᑯᒋᐊᕐᓗᑎᑦ, www.qec.nu.ca.
###
ᑐᓴᒐᒃᓴᓕᕆᔨᑦ:
ᕆᓂ ᐳᓲ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7524
rboucher@qec.nu.ca