ᐃᖃᓗᐃᑦ, ᓄᓇᕗᑦ (ᓯᑦᑎᒻᕙ 12, 2019) - ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ (QEC) ᖁᕕᐊᒋᔭᖃᖅᑐᑦ ᐅᖃᐅᓯᖃᕐᓂᕐᒥᑦ ᐋᓐᓴᓖᓇ ᒪᓐᑎᐅᓪ ᐃᖃᓗᒻᒥᐅᖅ ᓂᕈᐊᖅᑕᐅᓯᒪᒻᒪᑦ ᑕᕝᕙᓂ ᐊᕐᕌᒍᒻᒥᑦ ᐱᓂᐊᖅᑎᓪᓗᒍ ᓘᕋ ᐅᓪᓗᕆᐊᖅ ᒎᑕᐃ ᐃᓕᓐᓂᐊᕆᐊᕈᑎᒃᓴᑦ ᐃᑲᔫᓯᐊᕐᒥᑦ. ᐋᓐᓴᓖᓇ ᓘᒃᑖᖅ ᐃᓗᐊᖅᓴᐅᑎᓕᕆᓂᕐᒧᑦ ᐃᓕᓐᓂᐊᖅᑎ ᑯᐃᓐ ᓯᓚᑦᑐᓴᕐᕕᔾᔪᐊᖓᓂᑦ ᓱᑲᑦᑎᒋᐊᖅᓯᒪᔪᒃᑯᑦ ᐊᖅᑯᑎᒃᑯᑦ ᐋᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᕐᓂᕐᒧᑦ ᐱᓕᕆᐊᒥ ᐱᕙᓪᓕᐊᖏᓐᓇᖅᓱᓂᓗ ᐊᔪᙱᓐᓂᖃᕐᓂᕐᒧᑦ ᐃᓄᒃᑎᑐᑦ ᑲᓲᑎᑦᓯᐊᓂᖅᓴᐅᓂᕐᒧᑦ ᓯᕗᓂᑦᓴᕐᒥᑦ ᐋᓐᓂᐊᕕᓕᐊᖅᑐᓄᑦ.
"ᒪᓐᑎᐅᓪ ᐃᓱᒪᓕᕆᓂᕐᒧᑦ ᑭᒡᒐᖅᑐᐃᔨ, ᐊᖏᖅᓯᒪᓂᖃᖅᑐᖅ ᓄᓇᓕᓐᓂᒥᐅᑕᖅ, ᐱᔭᕇᖅᓯᒪᑦᓱᓂᓗ ᓂᑦᔭᐅᓯᔭᖅᑎ. ᖁᕕᐊᓇᖅᑐᖅ ᑐᓂᓗᒍ ᓘᕋ ᐅᓪᓗᕆᐊᖅ ᒎᑕᐃ ᐃᓕᓐᓂᐊᕈᓯᐊᖅ," ᐅᖃᖅᑐᖅ ᒪᓕᒐᓕᐅᖅᑎ ᔩᓂ ᐃHᐊᓗᐊᒃ, ᒥᓂᔅᑕ ᑲᒪᒋᔭᓕᒃ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᑦ. "ᖁᕕᐊᒋᔭᖃᕐᓂᖅ ᐃᓕᓐᓂᐊᓂᕐᒥᑦ, ᐱᔪᒪᓂᖃᕐᓂᖓ ᑐᓴᐅᒪᑎᑦᓯᓂᕐᒧᑦ ᐃᓕᓐᓂᐊᖅᑎᐊᖅᓯᒪᑦᑎᐊᕐᓂᕐᒧᑦ ᐃᓕᖅᑯᓯᕐᒥᓂᓪᓗ ᖃᐅᔨᒪᔭᖏᓐᓂᑦ ᐊᓯᖏᓐᓄᑦ, ᑲᔪᖏᖅᓴᐃᓂᐅᕗᖅ."
ᑖᒃᑯᐊ ᐃᑲᔫᓯᐊᖑᖃᑦᑕᖅᑐᑦ ᐃᖅᑲᐅᒪᓪᓗᒍ ᐃᓕᓴᖅᓯᔾᔪᑕᐅᔪᖅ ᒎᑕᐃ ᐱᓇᓱᐊᕐᓂᕆᓚᐅᖅᓯᒪᔭᖏᑦ ᐃᖅᑲᓇᐃᔮᕆᓪᓗᒍ ᑖᒃᑯᐊ ᓴᖅᑭᖅᑕᐅᔪᓐᓇᖁᓪᓗᒋᑦ ᐃᒻᒥᒃᑰᖓᓗᑎᑦ ᐆᒻᒪᖅᑯᑎᓕᕆᔩᑦ ᑎᒥᖓ ᓄᓇᕗᒻᒥ ᐃᓅᔪᓐᓃᑲᓪᓚᐅᖅᑎᓐᓇᒍ 2000ᖑᑎᓪᓗᒍ. ᐱᒋᐊᖅᑎᑕᐅᓯᒪᔪᖅ 2001ᖑᑎᓪᓗᒍ, $5000 ᑮᓇᐅᔭᑦ ᐃᑲᔫᑏᑦ ᐊᕐᕌᒍᑕᒫᖅ ᑐᓂᔭᐅᖃᑦᑕᖅᑐᑦ ᐃᓕᓐᓂᐊᖅᑎᒧᑦ ᐱᓇᓱᐊᓂᖃᑦᑎᐊᖅᑐᒧᑦ ᓯᓚᑦᑐᓴᕐᕕᓐᓂᑦ ᐃᓕᓐᓂᐊᕈᑎᖏᓐᓂᑦ.
"ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐅᐱᒍᓱᑦᑐᖅ ᒪᓐᑎᐅᓪ ᐊᓂᒍᐃᖃᑦᑕᖅᓯᒪᓂᖓᓄᑦ ᑲᔪᓯᖏᓐᓇᖁᑦᓱᒍᓪᓗ ᐊᕐᕌᒍᓐᓄᑦ ᐱᖓᓱᓄᑦ ᑯᐄᓐ ᓯᓚᑦᑐᓴᕐᕕᔾᔪᐊᕐᒦᓕᖅᑎᓪᓗᒍ," ᐅᖃᖅᑐᖅ ᐳᓘᓅ ᐳᕐᕆᐅᕋ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ ᐊᖓᔪᖅᑳᖅ ᐊᐅᓚᑦᑎᔨᒻᒪᕆᐅᑦᓱᓂᓗ. "ᐊᖏᖅᓯᒪᓂᖃᕐᓂᖓ ᖁᑦᓯᓂᖅᓴᒥᑦ ᐃᓕᓐᓂᐊᕐᓂᕐᒧᑦ ᐅᐱᓐᓇᖅᑐᖅ. ᐋᖅᑭᑦᓱᐃᕙᓪᓕᐊᔪᖅ ᓇᒻᒥᓂᖅ ᐊᓂᒍᐃᓂᕐᒥᑦ ᐱᐅᔪᒻᒪᕆᓐᓂᑦ ᓱᓇᑐᐃᓐᓇᕐᓂᑦ."
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕆᓂ ᐳᓲ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ
(867) 979-7524
rboucher@qec.nu.ca