ᐃᖃᓗᐃᑦ, ᓄᓇᕗᑦ (ᒫᔾᔨ 22, 2017) – ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖ ᐊᓕᐊᓇᐃᒍᓱᑦᑐᑦ ᐊᓯᔾᔨᖅᓯᓛᓕᕐᒪᑕ ᐊᖅᑯᑎᓃᑦᑐᓂ ᖃᐅᒻᒪᖅᑯᑎᓂ ᐃᖃᓗᓐᓂ, ᐃᖃᓗᒃᑑᑦᑎᐊᕐᒥ ᖁᕐᓗᖅᑑᕐᒥᓗ ᓄᑖᖑᓂᖅᓴᐅᔪᓂᒃ ᐆᒻᒪᖅᑯᑎᓂ ᐊᑐᖏᓐᓂᖅᓴᐅᔪᓂ (LED) ᐊᖅᑯᑎᓄᑦ ᖃᐅᒻᒪᖅᑯᑎᓂᑦ 2017 ᐃᓱᓕᓚᐅᙱᓐᓂᖓᓂ.
ᐃᓱᒪᓕᐅᕐᓂᐅᔪᖅ ᐊᑐᖔᕐᓂᕐᒥᑦ ᐆᒻᒪᖅᑯᑎᓂ ᐊᑐᖏᓐᓂᖅᓴᐅᔪᓂ ᖃᐅᒻᒪᖅᑯᑎᓂ ᑕᐃᒪᐃᓕᖓᓕᓚᐅᖅᑐᖅ ᐆᑦᑐᖅᑳᓚᐅᖅᑐᑎ ᐱᓕᕆᐊᒥᑦ 2015ᒥ ᖃᐅᔨᓴᖅᑳᓚᐅᕐᒪᑕ ᖃᓄᑎᒋ ᐆᒻᒪᖅᑯᑎᓂ ᐊᑐᖏᓐᓂᖅᓴᐅᒐᔭᕐᒪᖔᑦ ᐊᖅᑯᑎᒦᑦᑐᑦ ᖃᐅᒻᒪᖅᑯᑎᓂ.
“ᖁᕕᐊᓱᓪᓚᕆᑦᑐᖓ ᖁᓪᓕᒃᑯᑦ ᐊᑐᓕᖅᑎᑦᑎᖕᒪᑕ ᑖᔅᓱᒥᖓ ᐊᕙᑎᒧᑦ ᐊᒃᑐᐃᓂᖃᓗᐊᙱᑦᑐᒥᑦ ᑕᐃᒃᑯᐊ ᐆᒻᒪᖅᑯᑎᓂ ᐊᑐᓗᐊᙱᑦᑐᑦ ᖃᐅᒻᒪᖅᑯᑏᑦ ᑮᓇᐅᔭᐃᔭᕐᕕᐅᙱᓐᓂᖅᓴᐅᑐᐃᓐᓇᔾᔮᖏᑦᑐᑦ ᐅᖓᓯᑦᑐᒨᖓᔪᒥ, ᐃᓯᐊᕿᓗᐊᖅᑎᑦᑎᖏᑦᑐᑦ ᐊᒻᒪ ᐊᖅᑯᑎᕗᑦ ᐊᑦᑕᕐᓇᙱᓐᓂᖅᓴᐅᓂᐊᕐᒪᑕ,” ᐅᖃᖅᑐᖅ ᒪᓕᒐᓕᐅᖅᑐᖅ ᔮᓂ ᒪᐃᒃ, ᒥᓂᔅᑕ ᑲᒪᒋᔭᖃᖅᑐᖅ ᖁᓪᓕᒃᑯᓐᓂ. “ᐃᓕᓴᕆᔪᒪᒻᒥᔭᒃᑲ ᐃᓄᓕᕆᔨᑐᖃᒃᑯᑦ ᑲᓇᑕᒥ ᐃᑲᔪᖅᓱᕐᓂᖏᓐᓂ ᖁᓪᓕᒃᑯᑦ ᐆᒻᒪᖅᑯᑎᓂ ᐱᐅᖅᓱᐊᕐᔫᒥᓇᓱᒃᑎᓪᓗᒋᑦ ᐊᒻᒪ ᐃᑲᔪᖅᓱᕐᓂᕆᔭᖏᓐᓂᒃ ᓄᓇᕘᑉ ᐊᖅᑯᑎᖏᓐᓂ ᖃᐅᒪᖅᑯᑎᐅᕙᑦᑐᓂ.”
ᐆᒻᒪᖅᑯᑎᓂ ᐊᑐᖏᓐᓂᖅᓴᐅᔪᑦ ᐊᖅᑯᑎᓃᑦᑐᑦ ᖃᐅᒻᒪᖅᑯᑏᑦ ᐱᐅᔪᒻᒪᕆᐅᔪᑦ ᑕᐃᒃᑯᓇᙵᑦ ᐱᑐᖃᐅᓂᖅᓴᐅᔪᓂ. ᐆᒻᒪᖅᑯᑎᓂ ᐊᑐᖏᓐᓂᖅᓴᐅᓪᓗᑎ, ᑕᓪᓕᒪᐃᖅᓱᕐᓗᑎ ᐃᓕᓯᒪᑯᑖᕈᓐᓇᖅᑐᑦ ᑕᐃᒃᑯᐊ ᐱᑐᖃᐅᓐᓂᖅᓴᐅᔪᓂ, ᐊᑐᖏᓐᓂᖅᓴᐅᓇᖅᑐᖅ ᐊᐅᓚᑦᑎᔾᔪᑎᒃᓴᓄᑦ ᐋᖅᑭᐅᒪᔾᔪᑎᒃᓴᓄᓪᓗ. ᐆᒻᒪᖅᑯᑎᓂ ᐊᑐᖏᓐᓂᖅᓴᐅᔪᑦ ᖃᐅᒻᒪᖅᑯᑏᑦ ᖃᐅᒪᓂᖅᓴᐅᖕᒥᔪᑦ ᑕᐅᑐᑦᑎᐊᕐᓇᕐᓂᖅᓴᐅᓪᓗᑎ ᐊᖅᑯᑎᓂ ᐅᑭᐅᒃᑯᑦ.
“ᐆᒻᒪᖅᑯᑎᓂ ᐱᐅᖅᓱᐊᕐᓂᖅ ᐱᓕᕆᐊᕆᔭᐅᔪᒪᒻᒪᕆᑦᑐᖅ ᖁᓪᓕᒃᑯᑦ ᐱᓇᓱᐊᖅᑕᖏᓐᓂ ᐃᑲᔪᕈᒪᓪᓗᑎ ᓄᓇᕗᒻᒥ ᐆᒻᒪᖅᑯᑎᓂ ᐊᑐᖏᓐᓂᖅᓴᐅᓕᖅᑎᑦᑎᓂᕐᒧᑦ ᐃᓯᐊᕿᓗᐊᖅᑎᑦᑎᑦᑕᐃᓕᒪᓂᕐᒧᓪᓗ. ᖁᕕᐊᓱᒻᒪᕆᑦᑐᒍᑦ ᓄᓇᓖᑦ ᐊᓯᖏᓐᓄᑦ ᐃᓕᔭᐅᓂᐊᕐᒥᖕᒪᑕ ᐸᕐᓇᓯᒪᒻᒥᔪᒍᑦ ᑖᓐᓇ ᐱᓕᕆᐊᕆᔭᐅᔪᖅ ᓄᓇᕘᓕᒫᒥ ᐊᑐᖅᑕᐅᖃᓯᐅᑎᓗᓂ,” ᐅᖃᖅᑐᖅ ᐳᕉᓄ ᐱᕋᐃᕋ, ᐊᖓᔪᖅᑳᖅ ᐊᒻᒪ ᐊᐅᓚᑦᓯᔨᒻᒪᕆᒃ ᖁᓪᓕᒃᑯᓐᓂ.
ᖁᓪᓕᒃᑯᑦ ᑲᔪᓰᓐᓇᖅᑐᑦ ᖃᐅᔨᓇᓱᐊᕐᓂᕐᒥᑦ ᖃᓄᖅ ᐆᒻᒪᖅᑯᑎᓂ ᐊᑐᖏᓐᓂᖅᓴᐅᔪᓐᓇᕐᒪᖔᑦ ᐊᐅᓚᔾᔪᓯᖏᓐᓄᑦ ᐊᑭᑭᓐᓂᖅᓴᐅᖁᓪᓗᒍᓗ ᐆᒻᒪᖅᑯᑎᖃᖅᑎᑦᑏᓐᓇᓂᕐᒧᑦ ᓄᓇᕗᒻᒥ.