“ᐊᓕᐊᓇᐃᒍᓱᒻᒪᕆᒃᐳᖓ ᑐᓴᖅᑎᑦᑎᔭᕆᐊᒃᓴᖅ ᐱᐊᓂᒃᑕᐅᓂᖏᓐᓂᒃ ᑕᒪᖕᒥᒃ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖᑕ ᐊᑭᑐᔫᑎᓄᑦ ᐱᓕᕆᐊᖏᓐᓂᑦ. ᑕᒪᓐᓇ ᒪᑭᒪᔾᔪᑎ ᐱᒻᒪᕆᐅᖕᒪᑦ ᐱᕙᓪᓕᐊᓂᒃᓴᖓᓄᑦ ᕿᑭᕐᑕᕐᔪᐊᖅ ᓄᓇᕗᓪᓗ,” ᐅᖃᖅᑐᕕᓂᖅ ᒪᓕᒐᓕᐅᖅᑎ ᔮᓂ ᒪᐃᒃ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖ.
ᓄᑖᖅ ᐊᐅᓚᐅᑎᖃᕐᕕᒃ ᑎᓴᒪᓂᑦ ᐅᖅᓱᓅᖅᑐᓂᑦ ᐊᐅᓚᐅᑎᖃᖅᐳᑦ ᐆᒻᒪᖅᑯᑎᖃᖅᑎᑦᑎᔪᓐᓇᖅᖢᓂ 1.8 ᓴᙱᓂᓕᖕᓂᑦ (megawatts). ᓈᒻᒪᒃᑐᓂᑦ ᐆᒻᒪᖅᑯᑎᖃᖅᑎᑦᑎᔪᓐᓇᖅᖢᓂ ᐊᕐᕌᒍᑦ 40 ᐅᖓᑖᓄᑦ, ᓄᑖᖅ ᐊᐅᓚᐅᑎᖃᕐᕕᖅ ᐋᓐᓂᐊᕕᒃᑎᑑᖓᔪᒥᑦ ᓂᐱᖃᔾᔭᐃᒃᑯᑎᖃᖅᐳᖅ ᓂᐱᖃᓗᐊᖅᑕᐃᓕᒪᔾᔪᑎᒥᑦ, ᐊᑐᒃᑲᓐᓂᕈᓐᓇᖅᖢᓂᓗ ᐊᑐᒃᑲᓐᓂᒐᒃᓴᓂᑦ ᐆᒻᒪᖅᑯᑎᓂᑦ.
“ᐱᕈᖅᑎᒃᑲᓐᓂᕐᓗᒍ ᐆᒻᒪᖅᑯᑎᖃᐅᑎᕗᑦ ᑖᒃᑯᐊ ᓄᓇᕗᒻᒥᐅᑦ ᓈᒻᒪᒃᑐᓂᑦ ᐆᒻᒪᖅᑯᑎᖃᖁᓪᓗᒋᑦ ᓯᕗᓪᓕᐅᑎᒋᕙᕗᑦ. ᐱᐊᓂᒐᓱᒡᓗᒍ ᕿᑭᖅᑕᕐᔪᐊᑉ ᐊᐅᓚᐅᑎᖃᕐᕕᐊ ᐃᓚᒋᔭᐅᕗᖅ ᑎᑭᓐᓇᓱᐊᖅᑕᑦᑎᓐᓂᑦ ᐊᕐᕌᒎᔪᒥᑦ, ᐱᒃᑯᒋᓪᓗᒋᓪᓗ ᖁᓪᓕᖅ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖᑕ ᐱᓕᕆᔨᖏᑦ ᐱᐊᓂᒃᓯᒃᑯᓐᓂᖕᓂᖕᒥᓂᒃ,” ᐅᖃᖅᑐᕕᓂᖅ ᑉᕉᓄ ᐳᕆᐅᕋ, ᐊᖓᔪᖅᑳᖅ ᑐᑭᒧᐊᒃᑎᑦᑎᔨᒻᒪᕆᒡᓗ ᖁᓪᓕᖅ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖᓄ.
ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖ ᐱᕙᒌᔭᖅᓯᒪᔪᑦ ᐅᒃᑯᐃᕐᑕᐅᕕᒃᓴᖓᓂᑦ ᓄᑖᖅ ᐆᒻᒪᖅᑯᑎᖃᕐᕕᐅᑉ ᓇᑲᑦᑎᓂᒃᑯᑦ ᖁᕕᐊᓲᑎᖃᕐᓗᑎᒃ ᓄᓇᓕᖕᓂᓪᓗ ᓂᕆᕕᒡᔪᐊᕐᓗᑎᒃ ᕿᑭᖅᑕᕐᔪᐊᑉ ᐱᙳᐊᕐᕕᐊᓂᑦ.