ᐃᖃᓗᐃᑦ, ᓄᓇᕗᑦ (ᐊᐅᒍᓯ 9, 2017) – ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖ (QEC) ᑐᓂᓯᓚᐅᖅᑐᑦ ᐱᓕᕆᐊᒃᓴᕐᔪᐊᒥᒃ ᐱᔪᓐᓇᐅᑎᒧᑦ ᐱᓇᔪᒍᑎᒥᒃ (MPPA) ᓂᕈᐊᖅᑕᐅᓯᒪᔪᒧᑦ ᔮᓂ ᒪᐃᒃ, ᒥᓂᔅᑕ ᑲᒪᒋᔭᖃᖅᑐᖅ ᖁᓪᓕᒃᑯᓐᓂᑦ, ᑐᒃᓯᕋᕐᖢᑎᒃ ᐊᖏᖅᑕᐅᓂᕐᒥᒃ ᓇᑉᐸᖅᑎᑦᑎᓗᑎᒃ ᑭᖑᕝᕕᕐᓗᒍ ᐆᒻᒪᖅᑯᑎᖃᕐᕕᒃ ᖁᕐᓗᖅᑐᕐᒥ.
ᑐᒃᓯᕋᖅᑕᖅ ᐱᓕᕆᐊᒃᓴᖅ ᐃᓚᖃᖅᑐᖅ ᓄᑖᒥᒃ ᐅᖅᓱᐊᓗᖕᒧᑦ ᐊᐅᓚᐅᑎᑦ ᐱᖁᑎᖏᓐᓂ ᓄᑖᖑᕆᐊᖅᓯᒪᔪᓂᒃᓗ ᖃᕋᓴᐅᔭᓕᕆᔾᔪᑎᓂᒃ ᐃᑲᔪᖁᓪᓗᒍ ᐊᑐᓗᐊᙱᓐᓂᕐᓂ ᓂᐱᖃᓗᐊᖅᑐᓂᒃᓗ ᓱᕈᖅᑎᕆᓐᓇᓂᒃ. ᖁᕐᓗᖅᑑᑉ ᓄᑖᖅ ᐆᒻᒪᖅᑯᑎᖃᕐᕕᒃᓴᖓᑕ ᓴᓇᔭᐅᓂᒃᓴᖓ ᓇᓚᐅᑦᑖᖅᑕᐅᔪᖅ ᐊᑭᖃᕐᓂᐊᕐᓂᖓᓂᒃ $31.4 ᒥᓕᐊᓐ ᐃᓚᐅᑎᑦᑎᓪᓗᓂ ᓴᓇᔭᐅᓂᖓ ᓄᑖᖅ ᐆᒻᒪᖅᑯᑎᖃᕐᕕᕐᒥ ᐱᑎᑦᑎᓇᔭᕈᑎᖏᓐᓂ ᐅᐊᔭᖏᓐᓂ ᓄᓇᓕᖓᓂ. ᐱᓯᒪᐃᓐᓇᕐᓗᒍ ᖁᓪᓕᒃᑯᑦ ᑕᐅᑐᙳᐊᖅᑕᖓᓐᓂ ᐆᒻᒪᖅᑯᑎᑦᑎᐊᕙᖕᓂᒃ ᐱᖁᑎᖏᓐᓂ, ᐱᓕᕆᐊᒃᓴᖅ ᐱᕕᖃᖅᑎᑦᑎᖕᒥᔪᖅ ᐃᓚᓕᐅᔾᔨᓂᕐᒥᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓄᑦ ᐊᑐᖃᑦᑕᖅᑐᓂ ᐃᑯᒻᒪᖅᑯᑎᓄᑦ ᖃᕋᓴᐅᔭᒃᑯᑦ.
“ᒪᑭᑎᑦᑎᒃᑲᓐᓂᕐᓂᖅ ᓄᓇᕘᑉ ᐆᒻᒪᖅᑯᑎᓄᑦ ᓴᓇᔭᐅᓂᖏᓐᓂ ᑎᒥᖁᑎᐅᑉ ᖁᓪᓕᖅᐹᖑᓪᓗᓂ ᓯᕗᓪᓕᐅᔾᔭᐅᔭᕆᐊᖃᖅᑐᖁᑎᒋᔭᖓ ᐱᖁᓪᓗᒍ ᐊᑦᑕᕐᓇᙱᓐᓂᖅ, ᑕᑎᒋᔭᒃᓴᐅᓂᖅ, ᐊᑭᓕᒐᒃᓴᐅᓗᓂᓗ ᐆᒻᒪᖅᑯᑎᓂᒃ ᐱᑎᑦᑎᓂᖅ, ᑲᑎᒍᑎᖁᓪᓗᒍ ᓄᓇᕘᑉ ᐱᕈᖅᐸᓪᓕᐊᔫᑉ ᐆᒻᒪᖅᑯᑎᓄᑦ ᐱᔭᕆᐊᖃᖅᑕᖏᓐᓂ ᐃᑲᔪᕐᓗᒍᓗ ᒪᑭᒪᓇᓱᐊᕐᓂᕐᒧᑦ ᐱᕙᓪᓕᐊᑎᑦᑎᓂᕐᒧᑦ,” ᐅᖃᖅᑐᖅ ᓂᕈᐊᖅᑕᐅᓯᒪᔪᖅ ᔮᓂ ᒪᐃᒃ, ᒥᓂᔅᑕ ᑲᒪᒋᔭᖃᖅᑐᖅ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖᑕ ᐱᓇᔪᒃᑕᖓᓂᒃ ᐅᖃᖃᑎᖃᖅᓯᒪᓪᓗᓂᓗ ᖃᐅᒻᒪᖅᑯᑎᑦ ᐊᑭᖏᓐᓄᑦ ᕿᒥᕐᕈᔨᑦ ᑲᑎᒪᔨᕋᓛᖏᓐᓄᑦ.”
ᐱᓕᕆᐊᒃᓴᕐᔪᐊᒥᒃ ᐱᔪᓐᓇᐅᑎᒧᑦ ᐱᓇᔪᒍᑎ ᐊᖏᖅᑕᐅᒃᐸᑦ, ᓴᓇᓕᕐᓂᖅ ᐱᒋᐊᕋᔭᖅᑐᖅ 2019−ᒥ ᓂᕆᐅᒋᔭᐅᓪᓗᓂᓗ ᐱᔭᕇᖅᑕᐅᕝᕕᒃᓴᖓ 2021−ᒥ. ᑐᓴᕆᐊᒃᑲᓐᓂᕈᑎᓄᑦ ᐱᓕᕆᐊᒃᓴᕐᔪᐊᒥᒃ ᐱᔪᓐᓇᐅᑎᒧᑦ ᐱᓇᔪᒍᑎ ᖁᕐᓗᖅᑑᑉ ᓄᑖᖅ ᐆᒻᒪᖅᑯᑎᖃᕐᕕᒃᓴᖓᓄᑦ, ᐅᐸᒃᓗᒍ www.qec.nu.ca.