ᐃᖃᓗᐃᑦ, ᓄᓇᕗᑦ (ᔫᓂ 24, 2016) – ᒪᓕᒐᓕᐅᖅᑎ ᔪᐊᔾ Hᐃᒃᔅ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖᓂ (ᖁᓪᓕᒃᑯᑦ) ᐅᓪᓗᒥ ᓇᓗᓇᐃᕆᕗᖅ ᑲᑎᒪᑎᑦᓯᔨ ᔫᓕ-ᐋᓐ ᒥᓘᑉ ᓄᖅᑲᕐᓂᕆᔭᖓᓂ ᖁᓪᓕᒃᑯᑦ ᑲᑎᒪᔨᖏᓐᓂᒃ ᔫᓂ 20, 2016-ᒥ.
ᐃᓚᐃᔾᔭ ᐃᕙᓗᐊᕐᔪᒃ ᑎᓕᔭᐅᓯᒪᔪᖅ ᑲᑎᒪᑎᑦᓯᔨᐅᓂᕐᒧᑦ ᔫᓂ 20, 2016-ᒥ. ᐃᕙᓗᐊᕐᔪᒃ ᐃᒡᓗᓕᖕᒥᐅᑕᐅᓪᓗᓂ ᑲᑎᒪᔨᐅᓂᑰᔪᖅ ᔮᓐᓄᐊᓕ 2014-ᒥᓂ, ᑲᑎᒪᑎᑦᓯᔨᒧᑦ ᑐᓪᓕᒋᔭᐅᓂᑰᓪᓗᓂ ᑕᐃᒪᙵᓂ ᕖᕝᕗᐊᓕ 2015-ᒥ. ᖃᐅᔨᒪᓂᖃᒻᒪᕆᑦᑐᖅ ᐊᐅᓚᑦᓯᕐᔪᐊᕐᓂᕐᒥᑦ ᑎᒥᐅᔪᒥᑦ ᓄᓇᕘᒥ, ᑲᑎᒪᔨᐅᖃᐅᑕᐅᒋᓪᓗᓂ ᕿᑭᖅᑖᓗᒻᒥᑦ ᐱᓕᕆᕝᕖᑦ ᐱᕙᓪᓕᐊᑎᑕᐅᓂᖏᓐᓄᑦ ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪ ᓄᓇᕗᒻᒥ ᓇᒻᒥᓂᖃᖅᑐᓄᑦ ᑮᓇᐅᔭᖅᑖᕐᕕᐅᑉ ᑲᑐᔾᔨᖃᑎᒌᒃᑯᖏᓐᓄᑦ.
ᑖᓐᓇᑦᑕᐅ, ᕌᓂ ᑳᒻᐱᐅᓪ ᑲᑎᒪᔨᑖᕆᔭᐅᒻᒥᔪᖅ, ᐱᒋᐊᖅᑐᓂ ᔫᓂ 20, 2016-ᒥ ᐊᕐᕌᒍᓄᑦ ᐱᖓᓱᓄᑦ. ᑳᒻᐱᐅᓪ ᓄᓇᕗᒻᒥᐅᑕᐅᓚᐅᖅᓯᒪᓪᓗᓂ, ᖃᐅᔨᒪᓂᖃᒻᒪᕆᑦᑐᖅ ᓇᒻᒥᓂᖃᖅᑎᐅᓂᕐᒥᑦ ᑐᑭᓯᐅᒪᓂᖃᒻᒪᕆᑦᑐᓂᓗ ᐅᑭᐅᖅᑕᖅᑐᒥ ᖃᓄᐃᓕᐅᕈᑕᐅᖃᑦᑕᖅᑐᓂ. ᑳᒻᐱᐅᓪ ᐃᑲᔪᖅᑎᒋᔭᐅᓚᐅᖅᑐᖅ ᖃᐅᔨᓴᖅᑎᒻᒪᕆᒻᒧᑦ ᑲᓇᑕᒥ 2003-ᒥᑦ 2015-ᒧᑦ ᐃᖅᑲᓇᐅᔭᖅᑐᓂ ᐱᖓᓲᓕᖅᑲᖓᔪᓂ ᐅᑭᐅᖅᑕᖅᑑᑉ ᐊᕕᑦᑐᖅᓯᒪᓂᖏᓐᓂ ᐊᒻᒪ ᑲᓇᑕᐅᑉ ᒐᕙᒪᒃᑯᖏᑕ ᐱᓕᕆᕝᕕᖏᓐᓂᒃ ᓲᕐᓗ ᑖᒃᑯᐊ ᐃᓄᓕᕆᔨᑐᖃᒃᑯᑦ ᑲᓇᑕᒥ.
“ᖁᔭᓐᓇᒦᕈᒪᔭᕋ ᔫᓕ-ᐋᓐ ᒥᓗ ᐱᔨᑦᓯᕋᕐᓂᕆᓚᐅᖅᑕᒥᓄᑦ ᐃᑲᔫᑎᖃᓚᐅᕐᓂᖓᓄᓪᓗ ᖁᓪᓕᒃᑯᓐᓄᑦ, ᓯᕗᓂᒃᓴᒥᓗ ᐱᓕᕆᓂᐊᖅᑕᖏᓐᓂᒃ ᑲᔪᓯᑦᑎᐊᖁᓇᐅᕗᖅ”, ᐅᖃᖅᑐᖅ ᒥᓂᔅᑕ ᕼᐃᒃᔅ. “ᑕᒪᒃᑯᐊ ᐊᓯᔾᔨᕐᓂᐅᔪᑦ ᓴᖅᑮᕗᑦ ᑖᒃᑯᐊ ᖁᓪᓕᒃᑯᑦ ᑲᔪᓯᑎᑦᓰᓐᓇᖅᑐᑦ ᓄᑖᓂᑦ ᑲᑎᒪᔨᑖᖃᑦᑕᕐᓂᕐᒥᑦ ᐱᓕᕆᓂᑰᑦᓯᐊᖅᑐᓂᑦ ᖃᐅᔨᒪᓂᖃᑦᓯᐊᖅᑐᓂᓪᓗ ᐱᒻᒪᕆᐅᖃᑕᐅᔪᑦ ᐋᖅᑭᑦᓱᐃᕙᓪᓕᐊᓂᕐᒥᑦ ᖁᓪᓕᒃᑯᑦ ᓯᕗᓂᒃᓴᖓᓂ, ᐃᑲᔪᖅᓱᓯᓐᓈᑦ ᓴᙱᔪᒥᑦ, ᐊᔾᔨᒌᙱᑦᑑᖃᑎᒌᓂᑦ, ᐱᓕᕆᑦᓯᐊᕐᓂᑰᔪᓂᑦ ᑲᑎᒪᔨᓂᑦ, ᐃᓚᒋᐊᒃᑲᓐᓂᖅᑕᖓ ᒥᓂᔅᑕ ᕼᐃᒃᔅ.