ᐃᖃᓗᐃᑦ, ᓄᓇᕗᑦ (ᓯᑎᐱᕆ XX, 2017) – ᖁᓪᓕᒃᑯᑦ ᐆᒻᒪᖅᑯᑎᔨᓕᕆᔨᖏᑕ ᑎᒥᖁᑖ (QEC−ᑯᑦ) ᒥᓂᔅᑕᒧᑦ QEC−ᑯᓐᓄᑦ ᑲᒪᒋᔭᖃᖅᐸᒃᑐᒧᑦ ᐱᓇᔪᒃᐳᑦ ᓄᑖᒧᑦ ᐅᖅᓱᐊᓘᑉ ᐊᑭᖓᓄᑦ ᓱᕐᕋᔾᔭᐃᒃᑯᑎᒥᒃ (FSR−ᒥᒃ) ᐅᑎᖅᑎᑦᑎᕝᕕᐅᔪᓐᓇᕐᓂᕐᒥᒃ 5.41−ᓂᒃ ᓴᔅᓯᓂᒃ ᐊᑕᐅᓯᕐᒧᑦ ᑭᓗᕚᑦ ᐃᑲᕐᕋᒧᑦ. ᐊᑐᖅᑕᐅᔪᒪᔪᖅ ᐅᑎᖅᑎᑦᑎᕝᕕᐅᔪᒪᓪᓗᓂ ᐅᑐᐱᕆ 1, 2017−ᒥᑦ ᒫᑦᓯ 31, 2018−ᒨᖓᕗᖅ.
“ᑖᓐᓇ ᑕᓪᓕᒪᒋᕙᐅᒃ ᑭᖑᓕᕇᓂ FSR−ᒋᔭᐅᔪᖅ QEC−ᑯᓐᓂ ᐱᓇᔪᒍᑎᒋᔭᖓᑕ ᓄᕕᐱᕆ 2015−ᖑᓚᐅᕐᓂᖓᓂᑦ. ᓂᕆᐅᒋᔭᖃᑦᑎᐊᖅᐳᖓ ᐅᖃᖃᑎᖃᕐᓂᐊᕐᓂᕐᒥᒃ ᐆᒻᒪᑯᑏᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᓐᓂᒃ, ᐱᔾᔪᑎᖃᕐᓗᑕ QEC−ᑯᑦ ᐱᓇᔪᒍᑎᒋᔭᖓᓂᒃ,” ᑕᐃᒪᓐᓇ ᒪᓕᒐᓕᕆᔭᐅᔪᖅ ᔮᓂ ᒪᐃᒃ, QEC−ᑯᓐᓄᑦ ᒥᓂᔅᑕᙳᖅᑎᑕᐅᓯᒪᔪᖅ ᐅᖃᖅᖢᓂ.
QEC−ᑯᑦ ᒫᓐᓇ FSR−ᒧᑦ ᐅᑎᖅᑎᑦᑎᕝᕕᐅᔪᓐᓇᕐᓂᖓ 8.23−ᓂᒃ ᓴᔅᓯᓂᒃ ᐊᑕᐅᓯᕐᒧᑦ ᑭᓗᕚᑦᒧᑦ ᐃᑲᕐᕋᒧᑦ ᑲᔪᓯᓂᐊᖅᐳᖅ ᓯᑎᐱᕆ 30, 2017−ᖑᕋᓱᖕᓂᖓᓂ. ᑕᒪᕐᒥᑦᑎᐊᖅ ᐊᑐᖅᑎᐅᕙᒃᑐᑦ ᐅᒻᒪᖅᑯᒻᒥᒃ ᐱᑎᑕᐅᓂᐊᖅᐳᑦ FSR−ᒧᑦ ᐅᑎᖅᑎᑦᑎᕝᕕᐅᓂᕐᒥᒃ, ᑭᓯᐊᓂ ᑭᑭᑕᐅᓂᐊᖅᑐᑦ ᑕᒪᒃᑯᐊ ᐃᒡᓗᓕᕆᔨᒃᑯᓐᓂᑦ ᐊᑐᖅᑐᐊᖅᑏᑦ ᑕᒪᒃᑯᐊ ᐃᑲᔪᖅᑐᖅᑕᐅᕙᖕᓂᖏᓐᓄᑦ ᐊᑐᖅᑐᐊᖅᑏᑦ ᐊᑭᓕᕈᑕᐅᕙᖕᓂᖏᓐᓄᑦ ᐊᑐᖅᑐᐊᖅᑏᑦ ᐱᓕᕆᕝᕕᐅᕙᖕᓂᖏᓐᓄᑦ.
“ᐃᖅᑲᐃᑎᑦᑐᒪᕙᕗᑦ ᐊᑐᖅᑐᐊᖅᑎᖁᑎᕗᑦ ᑖᓐᓇ ᐅᑎᖅᑎᑦᑎᕝᕕᐅᓂᖅ ᐱᓕᕆᐊᖑᔭᕆᐊᖃᙱᑦᑎᐊᕐᓗᓂ ᐊᑐᓕᖅᑎᑕᐅᓂᐊᕐᓂᖓᓂᒃ ᑕᖅᑭᑕᒫᑦ ᐆᒻᒪᖅᑯᑎᖃᕐᓂᕐᒧᑦ ᐊᑭᓕᕆᐊᖃᖅᐸᒃᑕᖏᓐᓄᑦ. ᑕᒪᑐᒥᖓ ᐊᑐᖅᑏᑦ ᑎᑎᕋᖅᓯᔭᕆᐊᖃᕋᔭᙱᑦᑐᑦ ᐱᓇᔪᒍᑎᒥᒃ ᐱᓂᐊᕐᓗᑎᒃ ᐅᑎᖅᑎᑦᑎᕝᕕᐅᓂᕐᒥᒃ,” ᑕᐃᒪᓐᓇ ᐳᕉᓅ ᐱᕆᐅᕋ, QEC−ᑯᑦ ᐊᖓᔪᖅᑳᖓᑦ ᐊᐅᓚᑦᑎᔨᓪᓗᐊᑕᖓᓪᓗ ᐅᖃᖅᖢᓂ.
ᑖᓐᓇ ᓄᑖᖅ FSR−ᒥᒃ ᐅᑎᖅᑎᑦᑎᕝᕕᐅᓂᕐᒧᑦ ᐱᓇᔪᒍᑎᒋᔭᐅᔪᖅ ᑕᐃᒪᐃᔾᔪᑎᖃᖅᐳᖅ ᑲᔪᓯᐊᖏᓐᓇᖅᑐᒥᒃ ᒥᑭᒡᓕᕙᓪᓕᐊᓂᕆᔭᖓᓂᒃ QEC−ᑯᑦ ᐅᖅᓱᐊᓗᖕᒧᑦ ᐊᑭᓕᖅᓱᕆᐊᖃᖅᑕᖓᓄᑦ ᐱᑕᖃᓕᖅᑎᑦᑎᓪᓗᓂ ᖄᖏᐅᑎᔾᔪᓯᐊᓂᒃ ᑖᔅᓱᒪ ᐱᓕᕆᕝᕕᒋᔭᐅᔫᑉ FSR−ᒧᑦ ᑮᓇᐅᔭᖁᑎᒋᔭᖏᓐᓂᒃ. ᑕᒪᓐᓇ ᖄᖏᐅᑎᔾᔪᑎᒋᔭᐅᔪᖅ ᑮᓇᐅᔭᓄᑦ ᐅᑯᓇᙶᖅᐳᖅ, ᐊᒥᐊᒃᑯᒋᔭᐅᓪᓗᓂ ᐅᖅᓱᐊᓘᑉ ᐊᑭᖏᓐᓂᑦ ᐊᒃᑐᐊᓂᓕᖕᓂᒃ ᐆᒻᒪᖅᑯᑎᖃᕐᓂᕐᒧᑦ ᐊᑭᒋᑎᑕᐅᕙᒃᑐᓂᑦ ᐊᑭᓪᓚᑦᑖᕆᓚᐅᖅᑕᖓᓄᓪᓗ ᐅᖅᓱᐊᓘᑦ ᐊᑭᓕᖅᑕᐅᓚᐅᖅᑑᑉ QEC−ᑯᓐᓂᑦ.
ᐅᖃᖅᓯᒪᑦᑎᐊᒃᑲᓐᓂᕐᓂᖏᑦ FSR−ᒧᑦ ᐅᑎᖅᑎᕝᕕᐅᔪᓐᓇᕐᓂᕐᒧᑦ ᐱᓇᔪᒍᑎᒋᔭᐅᕙᒃᑑᑉ ᒪᓂᒪᑎᑕᐅᕗᑦ ᐅᕙᓂ, www.qec.nu.ca.
###
ᑐᓴᖅᑕᐅᔪᒃᓴᓄᑦ ᖃᐅᔨᒋᐊᕐᕕᒃᓴᖅ:
ᓰᓚ ᐸᐸ
ᐊᐅᓚᑦᑎᔨ, ᐱᓕᕆᕝᕕᓪᓗᐊᑕᐅᑦ ᑐᓴᐅᒪᑎᑦᑎᓂᕆᕙᒃᑕᖓᓄᑦ
ᖁᓪᓕᒃᑯᑦ ᐆᒻᒪᖅᑯᑎᔨᓕᕆᔨᖏᑕ ᑎᒥᖁᑖ
(867) 979-7534