ᐃᖃᓗᐃᑦ, ᓄᓇᕗᑦ (ᐋᒍᔅᑎ 18, 2017) – ᓄᓇᕗᒻᒥ ᒐᕙᒪᒃᑯᑦ (GN) ᐊᒻᒪᓗ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᔫᓂᐊᓐ (NEU) ᐊᖏᕈᑎᖃᖅᑲᐅᕗᑦ ᓄᑖᒥ ᐊᕐᕌᒍᓄᑦ−ᑎᓴᒪᓄᑦ ᐃᓚᐅᖃᑕᐅᔪᓕᒫᓂᒃ ᐊᖏᕈᑕᐅᓯᒪᔪᒥ ᔫᓂᐊᖑᖃᑕᐅᔪᓂ ᐃᖅᑲᓇᐃᔭᖅᑎᐅᔪᓄᑦ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑎᖓᓐᓂ (QEC).
“ᑕᒪᓐᓇ ᐊᖏᔫᓪᓗᓂ ᑎᑭᐅᒪᓂᐅᔪᓐᓇᖅᓯᒪᕗᖅ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑎᖓᓐᓄᑦ ᐊᒻᒪᓗ ᐃᖅᑲᓇᐃᔭᖅᑎᖁᑎᖏᓐᓄᑦ,” ᐅᖃᓚᐅᖅᐳᖅ ᔮᓂ ᒪᐃᒃ, ᒥᓂᔅᑕ ᑲᒪᒋᔭᖃᕐᒃᖢᓂ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑎᖓᓐᓄᑦ. “ᑕᒪᓐᓇ ᐊᖏᕈᑕᐅᔪᖅ ᐃᓕᓴᖅᓯᓯᒪᕗᖅ ᐱᒻᒪᕆᐅᓂᖓᓂ ᐊᑐᕐᓂᖃᐅᑎᖓᓐᓂ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑎᖏᑦᑕ ᐃᖅᑲᓇᐃᔭᖅᑎᖏᑦ ᐱᓕᕆᕙᖕᓂᖏᓐᓂ ᑐᓂᓯᓂᕐᒧᑦ ᐊᑦᑕᓇᙱᑦᑐᒥ ᐊᒻᒪᓗ ᐆᒻᒪᖅᑯᑎᖃᐃᓐᓇᖅᑎᑦᑎᓂᕐᒧᑦ ᓄᓇᕗᒻᒥ, ᐱᔪᓐᓇᖅᑎᑦᑎᐅᔮᕐᔪᒃᑎᓪᓗᒋᑦ ᑎᒥᖁᑕᐅᔪᒥ ᑕᐅᑐᒃᑕᑐᐊᖃᑲᐃᓐᓇᕐᓂᕐᒧᑦ ᐊᑯᓂᐅᔪᒃᑯᑦ ᐱᕈᖅᐸᓪᓕᐊᓂᖓᓂ ᐊᒻᒪᓗ ᓇᓗᓇᐃᖅᓯᓂᖏᓐᓂ ᐊᐅᓚᑕᐅᖏᓐᓇᖅᑐᒥ ᑐᙵᓂᖃᖅᑎᐊᕐᓂᖓᓂ.” ᓄᑖᖅ ᐊᖏᕈᑕᐅᔪᖅ, ᑭᖑᓂᑦᑎᓐᓂ ᐊᑐᖅᑕᐅᔪᕕᓂᕐᓄᑦ ᔭᓄᐊᕆ 1, 2017−ᒥ, ᐊᒻᒪᓗ ᐃᓱᓕᓐᓂᐊᖅᖢᓂ ᑎᓯᐱᕆ 31, 2020−ᒥ, ᐃᓚᖃᖅᑐᒥ ᑮᓇᐅᔾᔭᒃᓴᓂᕐᒧᑦ ᐊᖏᒡᓕᒋᐊᕐᓂᐅᔪᒥ 2%−ᒥ 2017−ᒧᑦ, 1% 2018 ᐊᒻᒪᓗ 2019−ᒧᑦ, ᐊᒻᒪᓗ 2%−ᒥ 2020−ᒧᑦ.
“ᑕᒪᓐᓇ ᐊᕐᕌᒍᓄᑦ−ᑎᓴᒪᓄᑦ ᐊᖏᕈᑎ ᐱᐅᕗᖅ ᑕᒪᒃᑭᓄᑦ ᐊᒃᓱᕈᕐᔪᐊᓚᐅᖅᑐᓄᑦ ᐊᖏᖃᑎᒌᒐᓱᐊᕐᓂᕐᒥ ᓱᒃᑲᔪᒥ. ᐅᐱᑉᐳᖓ ᖃᓄᐃᓕᖓᓂᖓᓄᑦ,” ᐅᖃᓚᐅᖅᐳᖅ ᑮᑦ ᐲᑕᓴᓐ, ᒥᓂᔅᑕ ᑲᒪᒋᔭᖃᕐᒃᖢᓂ ᐃᓄᓕᒫᓄᑦ ᐱᔨᑦᑎᕋᕐᓂᕐᒧᑦ ᒪᓕᒐᖓᓐᓂ.
ᐊᓯᖏᑦ ᓇᓗᓇᐃᖅᑕᐅᓯᒪᔪᑦ ᐊᖏᕈᑕᐅᔪᒥ ᐃᓚᖃᖅᐳᖅ ᓄᑖᒥ ᑳᓐᑯᕌᒃᓄᑦ ᐃᓚᔭᐅᓂᐅᔪᓂ ᓲᕐᓗ ᐊᖏᒡᓕᒋᐊᕐᓂᐅᔪᒥ ᒪᐅᓇᑐᐃᓐᓇᖅ ᕿᑲᕐᓂᐅᔪᓄᑦ ᑲᑎᖅᓱᖅᐸᓪᓕᐊᓂᐅᔪᓄᑦ ᐅᓪᓗᓂ ᑎᓴᒪᓂ ᑕᓪᓕᒪᓄᑦ ᐊᕐᕌᒍᑕᒫᒥ, ᐃᓚᓕᐅᔾᔨᓂᖅ ᓄᑖᓂ ᐊᕕᒃᑐᖅᓯᒪᓂᐅᔪᓂ ᒪᐅᓇᑐᐃᓐᓇᖅ ᕿᑲᕐᓂᐅᔪᒥ ᐊᑭᓕᖅᓱᖅᑕᐅᓂᖏᓐᓂ ᐃᖅᑲᓇᐃᔭᖅᑎᓄᑦ ᐅᖃᖃᑎᒋᔭᐅᕙᒃᑐᓂ ᐅᖃᓘᑎᒃᑯᑦ ᖃᕋᓴᐅᔭᑎᒍᓪᓗ ᑎᑎᕋᕐᕕᐅᓲᓄᑦ ᐃᖅᑲᓇᐃᔭᕈᓐᓃᕐᓇᐅᑎᓪᓗᒍ ᐃᑲᕐᕋᖏᓐᓂ, ᐊᒻᒪᓗ ᑐᐊᕕᖅᓴᐃᓂᕐᒧᑦ ᓯᕗᓂᐊᓂ−ᐊᒃᓱᕈᕈᑎᖃᕐᓂᕐᒧᑦ ᓈᒻᒪᙱᓐᓂᐅᔪᓂᑦ ᐋᖅᑭᒃᓱᐃᓇᓱᐊᕐᓂᐅᔪᓂᑦ.
ᒪᓕᒃᑐᒥ ᑲᑐᔾᔨᓂᒃᑯᑦ ᐋᔩᖃᑎᒌᖕᓂᐅᔪᒥ ᐱᓕᕆᓂᐅᔪᒥ ᐅᑯᓇᓂ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪᓗ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᔫᓂᐊᖑᔪᓂ ᔫᓂ 2017−ᒥ, ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑎᖏᑦᑕ ᔫᓄᐊᒥ ᐃᓚᒋᔭᐅᔪᑦ ᓂᕈᐊᓚᐅᖅᐳᑦ ᐱᐅᖅᓴᕐᓂᖏᓐᓂ ᐊᖏᕈᑕᐅᔪᒥ.
ᐅᓂᒃᑳᖅᓯᒪᓂᐅᔪᑦ ᓄᑖᖑᔪᒥ ᐃᓚᐅᖃᑕᐅᔪᓕᒫᓂᒃ ᐊᖏᕈᑕᐅᓯᒪᔪᕐᒥᓴᖅᑭᑎᑕᐅᓂᐊᖅᐳᖅ ᐅᕙᓂ www.qec.nu.ca/about ᐊᒻᒪᓗ ᐅᕙᓂ www.gov.nu.ca/finance/information/collective-agreements ᐊᑐᐃᓐᓇᕈᑐᐊᖅᐸᑦ.