ᐃᖃᓗᐃᑦ, ᓄᓇᕗᑦ (ᔪᓚᐃ 13, 2017) – ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑖ (QEC) ᑐᒃᓯᕋᐅᑎᓕᐅᖅᓯᒪᓕᕐᒪᑦ ᒪᓕᒐᓕᐅᖅᑎ ᔮᓂ ᒪᐃᒃᒧᑦ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖑᖅᑎᑕᐅᓯᒪᔪᖁᑖᓂᑦ, ᐊᖏᖅᑕᐅᖁᓪᓗᒋᑦ ᐱᖃᓯᐅᔾᔭᐅᓗᑎᒡᓗ ᑎᒥᖑᖅᑎᑕᐅᓯᒪᔪᑉ ᓱᑲᓐᓇᖅᑐᖅ ᓯᕿᙳᔭᐅᔭᒃᑰᖅᑎᑕᐅᓂᖓᓄᑦ ᐱᓕᕆᔪᑎ ᐅᖃᒃᓯᒪᓂᖏᑦ ᒪᓕᒃᑕᐅᖁᔭᐅᔪᓪᓗ ᐱᔨᑦᓯᕈᑎᖏᑕ.
ᓄᑖᖅ ᐱᓕᕆᔪᑎ ᐃᒪᓐᓇᐅᔪᓐᓇᖅᓯᑎᑦᑎᓂᐊᕐᒪᑦ ᐃᒡᓗᖃᒃᑎᓂᑦ ᐊᑭᓕᖅᓱᐃᕙᒃᑐᓂᑦ ᐊᒻᒪᓗ ᐊᑕᐅᓯᖅ ᓄᓇᓕᓕᕆᔨᒃᑯᑦ ᑎᒥᖑᖅᑎᑕᐅᓯᒪᔪᖁᑖᓂ ᐊᑭᓕᖅᓱᐃᔪᖅ ᐊᑐᓂ ᓄᓇᓕᖕᓂ ᓴᖅᑭᑎᑦᑎᖁᓗᒋᑦ ᓇᖕᒥᓂᖕᒥᖕᓂᒃ ᓱᑲᓐᓇᖅᑐᓂᑦ ᒪᑐᒨᓇ ᓄᑕᔨᖅᑕᖅᑐᒃᑯᑦ ᓴᖅᑭᑦᑎᔪᑎᒃᑯᑦ ᐱᓕᕆᔪᑎᑎᒍ, ᐱᔭᐅᑎᑦᑎᖃᑦᑕᕐᓗᑎᒃ ᐊᖏᓗᐊᕈᑎᓂᑯᓂᒃ ᐆᒪᖁᑎᓂᒃ ᓴᕿᑎᑕᐅᒥᖕᓂᒃ ᖁᓪᓕᖅ ᐆᒪᖁᑎᓕᕆᔨᒃᑯᓐᓄᐊᖅᑕᐅᕙᒡᓗᑎᒃ ᓱᑲᓐᓇᖅᑐᖃᒃᑎᑦᑎᔪᑎᖏᓐᓄᑦ ᐊᒻᒪᓗ ᐊᑭᓖᔭᕆᐊᖃᖏᔪᑎᑖᖅᐸᒡᓗᑎᒃ ᓯᕗᓂᒃᓴᒥ ᓴᑲᓐᓇᖅᑐᓂᒃ ᐊᑐᖅᑕᒥᓂᕋᓗᐊᒥᖕᓄᑦ. ᐋᖅᑭᒃᑕᐅᓯᒪᔪᑦ ᓄᑕᔾᔨᖅᑕᖅᑐᒧᑦ ᐆᒻᒪᖁᑎᓕᐅᕈᑎ ᐱᓕᕆᔪᑎᖓ ᐊᖏᓂᖅᓴᐅᔭᕆᐊᖃᔾᔮᖏᑦᑐᖅ 10 kW ᓱᑲᓐᓇᖅᑐᖃᕈᑎᒥᑦ ᓱᑲᓐᓇᖅᑐᓕᐅᕈᓐᓇᕐᓗᓂ.
“ᐊᑐᕋᒃᓴᐅᓕᖅᑎᑦᑎᓂᖅ ᓇᔪᖅᑕᑦᑎᓐᓃᑦᑐᒥᑦ ᐆᒪᖁᑎᒥᑦ ᐱᔭᒃᓴᐅᔪᒥᑦ ᓇᓕᐊᖕᓄᑐᐃᓐᓈᕈᓐᓈᕈᓐᓇᕐ`ᒪᑦ ᒥᑭᒡᓕᒋᐊᖅᓯᔪᑕᐅᔪᓐᓇᕐᓗᓂ ᐊᒃᑐᐃᓂᕆᔭᑦᑎᓐᓂᑦ ᐊᕙᑎᑦᑎᓐᓂᑦ ᐊᒻᒪᓗ ᑎᖑᓯᔾᔪᑕᐅᓪᓗᓂ ᓄᓇᕗᑉ ᐆᒪᖁᑎᓕᕆᓂᕐᒥ ᐃᒻᒥᓂᖅᓱᓕᕐᓂᕐᒥᑦ ᓱᓕ ᐱᕕᒃᓴᖃᒃᑎᑦᑎᓪᓗᓂ ᐊᑯᓂ-ᑕᐅᕗᖓᑐᖃᒃ ᐱᕈᒃᐸᓪᓕᐊᓂᕐᒥᑦ ᐊᒻᒪᓗ ᐱᕙᓪᓕᐊᓂᕐᒥᑦ,” ᑕᐃᒪᓐᓇᐃᓕᓚᐅᕐᒪᑦ ᒥᓂᔅᑕ ᒪᐃᒃ. “ᖁᕕᐊᒋᒐᒃᑭᑦ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑖᑦ ᐱᕙᓪᓕᐊᑦᑎᐊᕐᓂᖏᓐᓂᑦ ᒪᑯᓇᓂ ᐊᔪᕈᓐᓃᖅᐸᓪᓕᐊᕐᓂᖏᓐᓂ ᓄᓇᓕᖃᕐᕕᐅᑉ ᓱᑲᓐᓇᖅᑐᖅ ᓯᕿᙳᔭᐅᔭᒃᑰᖅᑎᑕᐅᓂᖓᓄᑦ ᐱᓕᕆᔪᑎᖓᓂ ᐊᒻᒪᓗ ᓂᕆᐅᑦᑎᐊᖅᖢᑕ ᐅᖃᖃᑎᖃᕐᓂᐊᕐᓂᑦᑎᓐᓂᑦ ᓱᑲᓐᓇᖅᑐᖃᒃᑎᑦᑎᔪᑎᑦ ᐊᑭᖏᓐᓂᑦ ᕿᒥᕐᕈᔨᑦ ᑲᑎᒪᔨᖏᓐᓂᑦ (URRC) ᐅᑯᓂᖓ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᙳᖅᑎᑕᐅᓯᒪᔪᖁᑎᖓᑕ ᑐᒃᓯᕋᐅᑎᖏᓐᓂᑦ.”
ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑖ ᐃᒪᓐᓇᐅᓂᐊᕋᓱᒋᒃᓯᕐᒪᑦ ᑖᒃᑯᐊ ᓱᑲᓐᓇᖅᑐᖃᒃᑎᑦᑎᔪᑎᑦ ᐊᑭᖏᓐᓂᑦ ᕿᒥᕐᕈᔨᑦ ᑲᑎᒪᔨᖏᑦ (URRC) ᐱᔭᕇᒃᓯᓂᐊᕋᓱᒋᓪᓗᒋᑦ ᕿᒥᕐᕈᓂᕐᒥᖕᓂᑦ ᑐᒃᓯᕋᐅᑎᑦ ᐊᓯᔾᔨᕐᓂᖏᓐᓂᑦ ᐅᖃᒃᓯᒪᓂᖏᑕ ᒪᓕᒃᑕᐅᖁᔭᐅᔪᓪᓗ ᐱᓕᕆᔪᑎᖏᑕ, ᐊᒻᒪᓗ ᑐᓂᔭᐅᓗᑎᒃ ᐱᖁᔨᕗᖔᕈᑎᓕᐊᕆᓯᒪᔭᖏᑦ ᒥᓂᔅᑕᒧᑦ ᑲᒪᒋᔭᓕᖕᒧᑦ ᖁᓪᓗᖅ ᐆᒪᖁᑎᓕᕆᔨᒃᑯᑦ ᑎᒥᖁᑖᓂᑦ ᑕᐅᕙᓂ ᓯᑎᐱᕆ 2017 ᑎᑭᓯᒪᓕᖅᐸᑦ. ᑕᒪᒃᑮᔪᑦ ᐱᓕᕆᔪᑎᑦ ᑐᓴᐅᒪᔪᑎᒃᓴᖏᑦ ᐱᔭᐅᔪᓐᓇᖅᓯᓂᐊᖅᐳᑦ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᖓᑦᑕ ᐃᑭᐊᕿᕕᖓᒍᑦ ᐊᒻᒪᓗ ᑐᒃᓯᕋᐅᑎᑦ ᐊᖏᖅᑕᐅᖃᑦᑕᕈᓐᓇᖅᓯᓗᑎᒃ ᐱᔪᓐᓇᖅᑎᑕᐅᔪᓄᑦ ᐊᑭᓕᖅᓱᐊᕙᒃᑐᓄᑦ ᐱᒋᐊᕐᓗᓂ ᐅᑐᐱᕆ 2, 2017-ᒥ.
“ᐃᓕᓴᖅᓯᒐᑦᑕ ᐊᑭᓕᖅᓱᐃᔨᖁᑎᕗᑦ ᐱᔪᒪᓂᖏᓐᓂᑦ ᓄᑕᔾᔨᖅᑕᖅᑐᑦ ᐆᒻᒪᖁᑎᓂᑦ ᐱᔭᐅᖔᕈᓐᓇᕐᓂᖏᓐᓄᑦ ᐊᒃᓱᐊᓘᕈᓐᓃᖁᓗᒋᑦ ᐆᒻᒪᖁᑎᓂᒃ ᐊᑐᕐᓂᖏᑦ ᐊᒻᒪᓗ ᐃᑲᔪᖅᑕᐅᓗᑎᒃ ᒥᑭᒡᓕᒋᐊᖅᑕᐅᓂᖏᑎᒍᑦ ᐸᐅᕿᑎᑦᑎᓂᕐᒧᑦ ᑐᒥᖏᑦ. ᓱᑲᓐᓇᖅᑐᖅ ᓯᕿᙳᔭᐅᔭᒃᑰᖅᑎᑕᐅᓂᖓᓄᑦ ᐱᓕᕆᔪᑎ ᐱᒻᒪᕆᐊᓗᖕᒪᑦ ᐱᒋᐊᕈᑕᐅᓂᖓᓄᑦ ᐊᑭᓕᖅᓱᐃᔨᒋᕙᒃᑕᑦᑎᓐᓄᑦ ᐊᒻᒪᓗ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑖᓄᑦ ᓴᓗᒪᓗᓂ ᐆᒪᖂᑎᑦ ᓯᕗᓂᒃᓴᒥ”, ᐅᖃᓚᐅᕐᒪᑦ ᕗᕉᓄ ᐱᕆᐃᕋ, ᐊᖓᔪᖃᒃ ᐊᒻᒪᓗ ᓯᕗᓕᖅᑎ ᐊᖓᔪᖃᐅᑎᑦ ᐃᖃᓇᐃᔭᖅᑎᖓᑦ ᖁᓪᓕᖅ ᐆᒪᖁᑎᓕᕆᔨᒃᑯᑦ ᑎᒥᖁᑎᖓᓐᓂ.