ᐃᖃᓗᐃᑦ, ᓄᓇᕗᑦ (ᐅᑐᐱᕆ 20, 2023) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐱᓇᔪᒃᓯᒪᕗᑦ ᐋᖅᑭᒋᐊᖅᓯᔪᒪᓪᓗᑎᒃ 2022-23−ᒧᑦ ᐆᒻᒪᖅᑯᑎᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᑦ ᑐᙵᕕᒋᔭᐅᔪᒧᑦ ᐆᒻᒪᖅᑯᒻᒧᑦ ᖃᔅᓯᑐᖅᑎᑕᐅᔪᓄᑦ ᐃᓚᓕᐅᔾᔨᔪᒪᓪᓗᑎᒃ ᖁᑦᑎᒃᑐᒦᓐᓂᖅᓴᓂᒃ ᐅᖅᓱᐊᓘᑉ ᐊᑭᖏᓐᓂᒃ. ᐱᓇᔫᑕᐅᔪᖅ ᑐᓐᓂᖅᑯᑕᐅᓚᐅᖅᐳᖅ ᐆᒻᒪᖅᑯᑎᓕᕆᔨᒃᑯᑦ ᒥᓂᔅᑕᖓᓐᓄᑦ, ᖃᐅᔨᓇᓱᒋᐊᖃᕐᓂᐊᖅᑐᖅ ᐆᒻᒪᖅᑯᑎᑦ ᐊᑭᖏᓐᓄᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᖃᓄᐃᓕᐅᖁᔭᐅᖕᒪᖔᖏᑦ.
"ᑖᓐᓇ ᐋᖅᑭᒋᐊᖅᑕᐅᖁᔭᐅᔪᖅ ᐊᒃᑐᐊᓂᖃᖅᐳᖅ ᐊᑭᑦᑐᕆᐊᖅᐸᓪᓕᐊᖏᓐᓇᖅᑐᓄᑦ ᓄᓇᕘᒥ ᐅᖅᓱᐊᓘᑉ ᐊᑭᖏᑦ ᑕᐃᒪᙵᑦ ᑭᖑᓪᓕᖅᐹᒥ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐆᒻᒪᖅᑯᑎᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᑦ," ᐅᖃᓚᐅᖅᐳᖅ ᔪᐃᓕ ᖃᐃᕐᓂᖅ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑐᒃᓯᕋᖅᐳᑦ ᐱᒋᐊᖅᑎᑦᑎᔪᒪᓪᓗᑎᒃ ᖃᖓᑦᑎᐊᖅ ᐅᖅᓱᐊᓘᑉ ᐊᑭᖓᓄᑦ ᐊᑭᑦᑐᕆᐊᖅᑐᓂᒃ ᐆᒻᒪᖅᑯᑎᑦ ᐊᑭᖏᓐᓂᒃ ᓄᖅᑲᖅᑎᑕᐅᓗᑎᒡᓗ ᐱᔭᐅᔭᕆᐊᓖᑦ ᐅᖅᓱᐊᓗᖕᒧᑦ ᐊᑭᖏᓐᓄᑦ ᓱᕐᕋᔾᔭᐃᒃᑯᑎᒧᑦ ᑮᓇᐅᔭᑦ. ᑕᒪᓐᓇ ᒪᓕᒃᐳᖅ ᐆᒻᒪᖅᑯᑏᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑕ 2023-02−ᒧᑦ ᐅᓂᒃᑲᐅᓯᕐᒥ ᑖᒃᑯᐊ ᐆᒻᒪᖅᑯᑎᑦ ᐊᑭᖏᓐᓄᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᐊᑐᖁᔨᓚᐅᖅᐳᑦ ᖁᓪᓕᖅ ᐊᐅᓚᔪᓐᓇᐅᑎᓕᕆᔨᒃᑯᑦ ᑎᒥᖁᑖ ᐱᓇᔪᖁᓪᓗᒋᑦ ᐊᓯᔾᔨᕆᐊᖅᑕᐅᔪᓄᑦ 2022/23−ᒧᑦ ᐆᒻᒪᖅᑯᑎᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᑦ ᑐᙵᕕᒋᔭᐅᔪᒧᑦ ᖃᔅᓯᑐᖅᑎᑕᐅᔪᓄᑦ ᐃᓚᓕᐅᔾᔨᔪᒪᓪᓗᑎᒃ ᖁᑦᑎᒃᑐᒦᓐᓂᖅᓴᓂᒃ ᐅᖅᓱᐊᓘᑉ ᐊᑭᖏᓐᓂᒃ, ᑕᒪᒃᑯᐊ ᐊᓯᔾᔨᕐᓂᕆᔭᖏᑦ ᐅᖅᓱᐊᓘᑉ ᐊᑭᖏᑦ ᐊᕗᖓᑲᓪᓚᐅᒃᐸᑕ.
"ᑖᓐᓇ ᐊᑐᖅᑕᐅᑎᓪᓗᒍ, ᓄᖅᑲᖅᑎᑕᐅᓗᓂ ᒫᓐᓇ ᐅᖅᓱᐊᓘᑉ ᐊᑭᖓᓄᑦ ᐊᖑᒻᒪᑎᔾᔪᑕᐅᓇᔭᖅᑐᒧᑦ ᐊᖑᒻᒪᑎᓕᖅᑎᓪᓗᒍᓗ ᒫᓐᓇ ᐊᖏᖅᑕᐅᓯᒪᔪᒧᑦ ᑐᙵᕕᒋᔭᐅᔪᓄᑦ ᖃᔅᓯᑐᖅᑎᑕᐅᔪᓄᑦ, ᑕᒪᓐᓇ ᐅᓄᖅᓯᒋᐊᕐᓂᕆᔭᐅᔪᖅ ᒫᓐᓇ ᐱᔭᐅᔪᓐᓇᖅᓯᕗᖅ ᓄᓇᕗᒻᒥ ᐆᒻᒪᖅᑯᒻᒧᑦ ᐃᑲᔪᖅᑕᐅᕙᖕᓂᕐᒧᑦ ᐱᓕᕆᐊᖑᕙᒃᑐᒥ ᒥᑭᒡᓕᒋᐊᖅᑎᑦᑎᓗᓂᓗ ᐊᑭᖓᓂᒃ ᐆᒻᒪᖅᑯᒻᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐊᑐᖅᑎᐅᕙᒃᑐᓄᑦ," ᑕᐃᒪᓐᓇ ᐱᐅᓪ ᓂᐹᑦ ᐅᖃᖅᖢᓂ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐊᖓᔪᖅᑳᖓᑦ ᐊᐅᓚᑦᑎᔨᓪᓗᐊᑕᕆᓚᐅᑲᒃᑕᖓᓗ.
ᑲᑎᖦᖢᒋᑦ ᐊᒃᑐᐃᔾᔪᑕᐅᔪᑦ ᓄᖅᑲᖅᑎᑕᐅᔪᒧᑦ ᒫᓐᓇ ᐅᖅᓱᐊᓗᖕᒧᑦ ᐅᑎᖅᑎᑕᐅᔪᒃᓴᑦ ᐊᑭᖏᓐᓄᑦ,
ᑮᓇᐅᔭᖅᑖᕆᔭᐅᕙᓪᓕᐊᔪᑦ ᐱᔭᐅᒋᐊᓕᑦ ᐊᑭᑦᑐᕆᐊᓚᐅᖅᐳᑦ ᐊᒻᒪ ᓄᓇᕗᒻᒥ ᐆᒻᒪᖅᑯᒻᒧᑦ ᐃᑲᔪᖅᑕᐅᕙᖕᓂᕐᒧᑦ ᐱᓕᕆᐊᖑᕙᒃᑐᒥ ᒥᑭᒡᓕᒋᐊᖅᑎᑦᑎᓗᓂᓗ ᐊᑭᖓᓂ ᒪᓕᒋᐊᓕᖏᑦ ᐃᒪᐃᓕᖓᓕᕈᑕᐅᕗᑦ ᑮᓇᐅᔭᓂᒃ ᐊᑐᙱᓐᓂᖅᓴᐅᓕᕐᓗᑎᒃ ᑮᓇᐅᔭᓕᐅᕋᓱᐊᕐᕕᖕᓄᑦ ᐊᒻᒪ ᓄᓇᓕᖕᓂ ᒐᕙᒪᒃᑯᓐᓂᙶᙱᑦᑐᓄᑦ ᐊᑭᓕᖅᓱᐃᔨᓄᑦ ᓄᓇᕘᓕᒫᒥ.
ᑐᑭᓯᒋᐊᒐᒃᓴᖅᑕᖃᒃᑲᓐᓂᖅᑐᖅ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᖕᒧᑦ ᐊᑭᖓᓂᒃ ᐅᕗᙵᕐᓗᓯ www.qec.nu.ca.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᐱᐱ ᐱᓗᑑ
ᑐᓴᐅᒪᔪᓕᕆᔨ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
bbilodeau@qec.nu.ca