ᐃᖃᓗᐃᑦ, ᓄᓇᕗᑦ (ᐊᐃᕐᕆᓕ 3, 2024) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐱᓇᔪᓚᐅᖅᐳᑦ ᐅᖅᓱᐊᓗᖕᒧᑦ ᐊᑭᓕᖅᓱᖅᑕᐅᓂᕐᒧᑦ 3.70 ᓴᓐᔅ-ᒧᑦ ᐊᑕᐅᓯᕐᒧᑦ ᑭᓗᕚᑦ ᐃᑲᕐᕋᒧᑦ ᐊᐃᕆᓕ 1-ᒥᑦ ᓯᑎᐱᕆ 30, 2024-ᒧᑦ. ᐱᓇᔫᑦ ᑐᓐᓂᖅᑯᑕᐅᓚᐅᖅᐳᖅ ᒪᓕᒐᓕᐅᖅᑎ ᔮᓐ ᒪᐃᓐᒧᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕ ᑲᒪᒋᔭᓕᒃ, ᐱᖁᔨᕗᖔᓕᐊᕆᔭᐅᔪᓂᒃ ᕿᓂᕐᓂᐊᖅᑐᖅ ᐆᒻᒪᖅᑯᑎᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᓐᓄᑦ.
"ᑐᒃᓯᕋᐅᑕᐅᔪᖅ ᐅᖅᓱᐊᓗᖕᒧᑦ ᐊᑭᖏᓐᓄᑦ ᐊᒃᑐᐊᓂᖃᖅᐳᖅ ᐊᑭᑦᑐᕆᐊᖅᑐᓄᑦ ᓄᓇᕘᒥ ᐅᖅᓱᐊᓗᖕᒧᑦ ᐊᑭᖏᓐᓄᑦ ᔭᓄᐊᕆᒥ ᐅᖃᐅᓯᐅᓚᐅᖅᑐᖅ," ᐅᖃᓚᐅᖅᐳᖅ ᒪᐃᓐ.
ᐅᖅᓱᐊᓗᖕᒧᑦ ᐊᑭᖓ ᐊᑭᓕᒃᑲᓐᓂᕆᐊᖃᓲᖑᕗᖅ ᐅᕝᕙᓘᓐᓃᑦ ᐊᑭᓕᖅᓱᖅᑕᐅᔪᓄᑦ ᐅᑎᖅᑎᒐᒃᓴᐅᓲᖑᕗᖅ ᐊᑭᓕᖅᓱᐃᔨᑦ ᐊᑭᓕᒐᒃᓴᖏᓐᓂᒃ ᑕᑯᒃᓴᐅᑎᑦᑎᔭᕆᐊᖃᖅᑐᖅ ᐊᔾᔨᒌᙱᓐᓂᖓᓂ ᐅᖅᓱᐊᓘᑉ ᐊᑭᖓ ᐆᒻᒪᖅᑯᑎᑐᕈᓯᑦ ᐊᑭᖏᓐᓂᒃ ᐊᑭᓪᓚᑦᑖᖓᓗ ᐊᑭᓕᖅᓱᖅᑕᐅᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ.
"ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ ᐊᑭᓕᖅᓱᐃᕙᒃᑐᑦ ᓂᕆᐅᒋᔭᖃᕈᓐᓇᖅᐳᑦ ᐊᑭᓕᒐᒃᓴᖅ ᐊᑐᖅᑕᐅᓯᑲᐅᑎᒋᖃᑦᑕᕐᓂᐊᕐᓂᖓᓂᒃ ᑕᖅᑭᑕᒫᑦ ᐊᑭᓕᖅᓱᒐᒃᓴᖏᓐᓄᑦ, ᑕᒪᓐᓇ ᐱᒋᐊᕐᓗᒍ ᐊᐃᕆᓕᒥ ᐃᒡᓗᒥ ᐊᑐᖅᑕᐅᕙᒃᑐᓄᑦ ᐊᑭᓕᒐᒃᓴᒥᒃ, ᑭᑭᑕᐅᓗᑎᒃ ᑭᒃᑯᑐᐃᓐᓇᓄᑦ ᐃᒡᓗᖃᖅᑎᑕᐅᕙᒃᑐᑦ ᐊᑐᖅᑐᐊᖅᑏᑦ ᐃᑲᔫᓯᐊᖅᑎᑕᐅᕙᒃᑐᑦ ᐅᑯᑎᒎᓇᖅ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᐊᕆᕙᒃᑕᖏᑎᒍᑦ," ᑕᐃᒪᓐᓇ ᔭᐃᒥᓯ ᐋᕆᐊᒃ ᐅᖃᖅᖢᓂ, ᐊᖓᔪᖅᑳᖑᓚᐅᑲᒃᑐᖅ ᐊᐅᓚᑦᑎᔨᓪᓗᐊᑕᐅᓚᐅᑲᒃᑐᕐᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ.
ᐊᑭᓕᖅᓱᐃᔨᑦ ᐆᒻᒪᖅᑯᑎᑐᖅᑎᒋᔪᑦ 500 kilowat-hours ᑕᖅᑭᑕᒫᑦ $19.41 ᐊᑭᑦᑐᕆᐊᖅᓯᒪᔪᒥᒃ ᓂᕆᐅᒍᓐᓇᖅᐳᓯ (GST ᐃᓚᓕᐅᑎᓗᒋᑦ) ᑕᖅᑭᑕᒫᑦ ᐊᑭᓕᖅᓱᒐᒃᓴᓂᒃ.
ᑐᑭᓯᒋᐊᒐᒃᓴᖅᑕᖃᒃᑲᓐᓂᖅᑐᖅ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᖕᒧᑦ ᐊᑭᖓᓂᒃ ᐅᕗᙵᕐᓗᓯ www.qec.nu.ca.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᓇᑖᓕᐊ ᑯᕈᑦᑯᕙ
ᐊᐅᓚᑦᑎᔨ, ᐆᒻᒪᖅᑯᑎᓕᕆᔨᒃᑯᑦ ᑐᓴᒐᒃᓴᓕᕆᔨᖏᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ
(867) 979-7524