ᐃᖃᓗᐃᑦ, ᓄᓇᕗᑦ (ᑎᓯᑉᐱᕆ 24, 2021) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᐊᓂᒃᐳᑦ ᓴᓇᔭᐅᔪᒥᒃ ᖃᐅᔨᓴᖅᑕᐅᔪᒥᓪᓗ ᐊᐅᓚᐅᑎᖃᕐᕕᒃᑖᓵᕐᒥᒃ ᐃᒃᐱᐊᕐᔪᖕᒥ. ᐊᑭᑐᔫᑎᑦ ᐱᓕᕆᐊᒃᓴᑦ ᐱᐊᓂᒡᕕᒃᓴᖓᑕ ᑐᖔᓂ ᐱᐊᓂᒃᑕᐅᓚᐅᖅᐳᖅ ᒫᓐᓇᓗ ᓴᖅᑭᑎᑕᐅᓯᒪᓕᖅᖢᓂ ᐊᑐᑐᐃᓐᓇᕆᐊᖃᓕᖅᖢᓂᓗ.
"ᓄᑖᖅ ᐆᒻᒪᖅᑯᑎᑐᓗᐊᙱᑦᑐᖅ ᒫᓐᓇ ᐆᒻᒪᖅᑯᑎᖃᖅᑎᑦᑎᑦᑎᐊᓕᖅᖢᓂ ᓄᓇᓕᖕᓂ ᐊᑯᓂᐊᓗᒃ ᐃᑲᔫᑕᐅᓂᐊᖅᐳᖅ ᐃᒃᐱᐊᕐᔪᖕᒥᐅᓄᑦ," ᒪᓕᒐᓕᐅᖅᑎ ᔪᐊᓇ ᖁᐊᓴ ᐅᖃᖅᑐᖅ ᒥᓂᔅᑕ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. "ᖁᓪᓕᒃᑯᑦ ᓱᓕ ᓯᕗᓪᓕᐅᔾᔨᔪᒪᕗᑦ ᓄᑕᐅᔪᓐᓃᖅᐸᓪᓕᐊᔪᓂᒃ ᐊᓯᔾᔩᔪᒪᓪᓗᑎᒃ ᐊᐅᓚᔪᓐᓇᐅᑎᖃᕆᐊᓕᖕᓂᑦ ᐊᙳᒻᒪᑎᔪᒪᓪᓗᑎᒃ ᑕᒪᐃᓐᓂᒃ ᓄᓇᓕᖕᓂ ᓄᓇᕗᒻᒥ."
ᐊᐅᓚᐅᑎᖃᕐᕕᒃᑖᓵᖅ ᓄᑕᐅᙱᓐᓂᖅᐹᖑᖃᑕᐅᔪᒥᒃ ᐃᓇᖐᕗᖅ ᐆᒻᒪᖅᑯᑎᖃᕐᕕᖕᒥ ᓄᓇᕗᒻᒥ ᐊᑐᕆᐊᖃᖅᑕᖓᓄᑦ ᐅᖓᑖᓄᑦ ᐊᑐᖅᓯᒪᓪᓗᓂ. ᓄᑖᓂᒃ ᐱᓕᕆᔾᔪᑎᖃᖅᖢᓂ ᐆᒻᒪᖅᑯᑎᑐᓗᐊᙱᑦᑐᖅ ᐊᐅᓚᐅᑎᑦ ᐊᔾᔨᒌᖏᑦᑐᑦ, ᐊᐅᓚᐅᑎᖃᕐᕕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᐊᑐᓗᐊᙱᓐᓂᖅᓴᐅᑎᑦᑎᒃᑲᓐᓂᕐᓂᐊᖅᐳᖅ ᐅᖅᓱᐊᓗᖕᒥᒃ.
"ᐱᓕᕆᖃᑎᖃᖅᖢᑎᒃ ᕼᐋᒪᓚᒃᑯᓐᓂ, ᐊᐅᓚᐅᑎᖃᕐᕕᒃᑖᓵᖅ ᐊᓯᐊᓄᐊᖅᑕᐅᓚᐅᖅᐳᖅ ᓄᓇᓕᐅᑉ ᓯᓚᑖᓄᑦ," ᕆᒃ ᕼᐊᓐᑦ ᐅᖃᖅᑐᖅ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳᖓ ᐊᒻᒪ ᐊᐅᓚᑦᑎᔨᒻᒪᕆᖓ. “ᐊᐅᓚᐅᑎᖃᕐᕕᒃ ᐱᖃᕐᒥᔪᑦ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓄᑦ ᐃᓚᓕᐅᑎᕙᓪᓕᐊᔪᓐᓇᖅᑐᓂᒃ, ᐱᕕᖃᖅᑎᑦᑎᓂᐊᕐᖢᓂᓗ ᐃᖏᕐᕋᑎᓪᓗᒍ ᓄᓇᕗᑦ ᓴᓗᒪᔪᒧᑦ ᖃᕆᓴᐅᔭᓕᕆᔾᔪᑎᓄᑦ ᑮᓇᐅᔭᑦ ᐊᑐᐃᓐᓇᕈᕋᔭᖅᐸᑦ.”
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐸᕐᓇᐃᓯᒪᔪᑦ ᓄᓇᓕᖕᓂ ᓂᕆᕕᒡᔪᐊᖅᑎᑦᑎᔪᒪᓪᓗᑎᒃ ᐊᐅᓚᐅᑎᖃᕐᕕᒃᑖᓵᕐᓗ ᐅᒃᑯᐃᖅᑕᐅᓗᓂ ᐃᒃᐱᐊᕐᔪᖕᒥ ᖁᕕᐊᓲᑕᐅᓗᓂ ᐅᐱᕐᙶᖑᓕᖅᐸᑦ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᓴᐃᕋ ᐋᕐᓯᓅ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ
(867) 979-7571
sarsenault2@qec.nu.ca