ᐃᖃᓗᐃᑦ, ᓄᓇᕗᑦ (ᒫᑦᓯ 16, 2018) − ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᓕᕆᐊᒃᓴᕐᔪᐊᓕᕆᔪᒪᔾᔪᑎᖓ ᐊᓯᔾᔩᓂᐊᕐᓗᑎᑦ ᐊᐅᓚᐅᑎᖃᕐᕕᖕᒥᑦ ᖁᕐᓗᖅᑐᒥᑦ ᐊᖏᖅᑕᐅᓚᐅᖅᐳᖅ ᒥᓂᔅᑕᒧᑦ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ.
"ᑖᓐᓇ ᐊᐅᓚᐅᑎᖃᕐᕕᐊ ᐊᑦᑕᖕᓇᙱᑦᑐᓂᑦ ᓈᒻᒪᒃᑐᓂᒡᓗ ᓄᑭᓪᓚᐅᑎᖃᖅᑎᑦᑎᕙᒃᑲᓗᐊᖅᖢᓂ ᓄᓇᓕᖕᓄᑦ ᐊᕐᕌᒍᑦ 50−ᑲᓴᖕᓄᑦ, ᐊᑑᑎᖓ ᐃᓱᓕᓕᖕᒪᑦ ᐊᓯᔾᔨᖅᑕᐅᔭᕆᐊᖃᓕᖅᖢᓂᓗ," ᐅᖃᖅᑐᕕᓂᖅ ᒪᓕᒐᓕᐅᖅᑎ ᔩᓂ ᐃᕼᐊᓗᐊᒃ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. "ᐊᓯᔾᔨᖅᑕᐅᓂᖓ ᐊᐅᓚᐅᑎᖃᕐᕕᐊ ᓴᓇᔭᐅᓯᒋᐊᓛᖅᑐᑦ ᑲᓱᕈᓐᓇᕐᓗᓂ ᐊᓯᖏᓐᓄᑦ ᐆᒻᒪᒃᑯᑎᓄᑦ ᐱᓕᕆᐊᖑᔪᓄᑦ, ᓄᓇᕗᑦ ᐊᑐᓗᐊᕈᓐᓃᖅᐸᓪᓕᐊᓕᕐᓗᑎᑦ ᐅᖅᓱᐊᓗᖕᒥᑦ."
ᐊᑭᖃᓪᓗᐊᖅᖢᓂ ᒫᓂ $31.4−ᒥᓕᐊᓐᓂᒃ, ᐊᖏᔪᓄᑦ ᐊᑭᑐᔪᓄᑦ ᐱᓕᕆᐊᒃᓴᖅ ᐱᒋᐊᖅᑕᐅᓛᕋᓱᒋᔭᖅ 2019-ᒥᑦ ᐱᐊᓂᒃᑕᐅᓛᕋᓱᒋᓪᓗᓂᔾᔪᑦ 2021-ᒥᑦ. ᓄᑖᖅ ᐊᐅᓚᐅᑎᖃᕐᕕᒃ ᓴᓇᔭᐅᓛᖅᑐᖅ ᓄᑖᓂᑦ ᐅᖅᓱᑦᑎᐊᕙᖕᓄᑦ ᐊᐅᓚᐅᑎᖃᕐᓗᓂ ᐃᓯᐊᕿᓗᐊᕈᓐᓃᕈᑕᐅᓇᔭᖅᑐᑦ ᓂᐱᖃᓗᐊᕈᓐᓃᕐᓗᓂᓗ.
"ᐱᔭᕆᐊᖃᒻᒪᕆᒃᑐᑦ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᖏᑦ ᑖᓐᓇ ᐊᐅᓚᐅᑎᖃᕐᕕᓂᑦ ᓴᓇᕙᓪᓕᐊᕙᒡᓗᑎᒃ ᐊᑦᑕᖕᓇᙱᑦᑐᓂᑦ ᓈᒻᒪᒃᑐᓂᒡᓗ ᓄᑭᓪᓚᐅᑎᖃᖁᓪᓗᒋᑦ ᓄᓇᕗᒻᒥᐅᑦ," ᐅᖃᖅᑐᕕᓂᖅ ᑉᕉᓅ ᐳᕋᐅᕋ, ᐊᖓᔪᖅᑳᕆᔭᖅ ᑐᑭᒧᐊᒃᑎᑦᑎᔨᓗ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᖏᓐᓄᑦ. "ᒪᓕᒃᖢᑎᒃ ᐆᒻᒪᖅᑯᑎᓕᕆᔨᒃᑯᑦ ᑕᐅᑐᖅᑰᖅᑕᖏᓐᓂᑦ ᓴᖅᑭᑦᑎᔪᒪᓪᓗᑎᒃ ᓴᓗᒪᔪᒥᑦ ᐆᒻᒪᖅᑯᑎᖃᐅᑎᒥᑦ, ᓯᕗᓪᓕᐅᑎᓯᒪᕙᕗᑦ ᐊᑐᒃᑲᓐᓂᕈᓐᓇᖅᑐᓂᑦ ᐆᒻᒪᖅᑯᑎᓕᕆᔾᔪᑎᓂᑦ ᓄᑖᓂ ᐊᐅᓚᐅᑎᖃᕐᕕᖕᓄᑦ ᐊᓯᔾᔩᔾᔪᑎᑦᑎᓐᓂᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ ᖁᓪᓗᖅᑑᑉ ᓄᑖᒥᑦ ᐊᐅᓚᐅᑎᖃᕐᕕᒃᓴᖓᓂᑦ, ᐅᕗᙵᐅᓗᑎᑦ www.qec.nu.ca.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕇᓂ ᐳᓯᐊᐃᕐ
ᐊᐅᓚᑦᑎᔨᐅᑲᐃᓐᓇᖅᑐᖅ, ᐊᖓᔪᖅᑲᐅᑎᓄᑦ ᑐᓴᐅᒪᖃᑦᑕᐅᑎᓕᕆᔨ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ
(867) 979-7524
rboucher@qec.nu.ca