ᐃᖃᓗᐃᑦ, ᓄᓇᕗᑦ (ᓄᕕᐱᕆ 9, 2017) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ (QEC) ᑐᓂᓯᓯᒪᓕᖅᑐᑦ ᐊᑐᖅᑕᐅᓪᓗᐊᑕᓱᖅ ᐊᑭᖓᓄᑦ ᐊᑐᓕᖅᑎᑦᑎᔪᑎᒥ (GRA) ᒥᓂᔅᑕᕆᔭᐅᔪᒧᑦ ᑲᒪᒋᔭᖃᖅᑐᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ ᐆᒻᒪᖅᑯᑏᑦ ᐊᑭᖏᓐᓂᒃ ᐊᔾᔨᔩᓂᕐᒧᑦ ᐱᒋᐊᕐᓗᒍ ᐄᐳᓗ 1, 2018. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ ᑭᖑᓪᓕᐹᒥᑦ ᐊᑭᖏᑕ ᐊᓯᔾᔨᕆᐊᕈᑎᖏᑦ ᐊᑐᓕᖅᑎᑕᐅᓚᐅᖅᑐᑦ ᒪᐃ 1, 2014-ᒥᑦ.
ᐊᑎᓕᖅᑎᑦᑎᔾᔪᑎ ᑐᒃᓯᕋᖅᓯᒪᕗᖅ 7.6 ᐳᓴᓐᑎᒥᑦ ᐊᑭᑦᑐᕆᐊᕈᑎᒥᑦ ᑎᑭᐅᒪᑦᑎᐊᕈᒪᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ 2018-2019-ᒥᑦ ᑮᓇᐅᔭᓕᐅᕈᑎᒋᔭᕆᐊᓕᖏᓐᓂᒃ. ᐱᔾᔪᑎᒋᓪᓗᒍ ᐊᔾᔨᒌᙱᓐᓂᖏᓐᓂᒃ ᐱᔨᑦᑎᕋᖅᑕᐅᔪᑦ ᐊᒻᒪ ᐃᑲᔪᕈᑎᒃᓴᑦ ᐊᑭᑭᓪᓕᒋᐊᕈᑎᒃᓴᐅᔪᑦ ᐊᑐᐃᓐᓇᐅᔪᑦ ᓄᓇᕗᒻᒥᐅᓄᑦ, ᐊᒃᑐᐃᓂᐅᔪᑦ ᓄᑖᖑᔪᒧᑦ ᐆᒻᒪᖅᑯᑎᓄᑦ ᐊᑭᖏᓐᓄᑦ ᐱᔨᑦᑎᕋᖅᑕᐅᔪᑦ ᐊᑭᓕᒃᓴᖏᓐᓂᒃ ᐊᔾᔨᒌᔾᔮᙱᑦᑐᑦ.
“ᐱᔭᒃᓴᕆᔭᕗᑦ ᐱᔨᑦᑎᕋᕐᓂᕐᒥᑦ ᓈᒻᒪᓪᓚᕆᒃᑐᒥᑦ ᐊᒻᒪ ᐊᑕᐅᓐᓇᕐᓂᐊᖅᑐᒥᑦ ᐆᒻᒪᖅᑯᑎᓂᑦ”, ᐅᖃᖅᑐᖅ ᐳᕉᓅ ᐱᕋᐃᕋ, ᐊᖓᔪᖅᑳᖅ ᐊᒻᒪ ᑐᑭᒧᐊᒃᑎᑦᑎᔨᒻᒪᕆᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ. “ᓄᑖᖑᔪᑦ ᐊᑭᒃᓴᑦ ᐃᑲᔪᕈᑎᖃᕐᓂᐊᖅᑐᑦ ᐊᑭᓕᕆᐊᓕᖕᓄᑦ ᓄᑖᙳᖅᑎᐅᕙᓪᓕᐊᔪᓄᑦ ᐊᒻᒪ ᐃᓇᖏᖅᓯᓂᕐᒥᑦ ᐱᑐᖃᐅᓗᐊᖅᑐᓂᑦ ᐆᒻᒪᖅᑯᑎᓄᑦ ᒪᑭᒪᔾᔪᑎᒃᓴᓂᑦ ᑎᑭᐅᒪᑦᑎᐊᕈᒪᒧᑦ ᐆᒻᒪᖅᑯᑎᓄᑦ ᐱᔭᐅᔭᕆᐊᓕᖕᓂᒃ ᓄᓇᕗᒻᒥ”.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ ᐊᑐᓕᖅᑎᑦᑎᔪᑎᖓᑕ ᑐᒃᓯᕋᕐᒥᔪᑦ ᒫᓐᓇᐅᔪᖅ ᐊᑐᖅᑕᐅᓲᒥᑦ ᓄᓇᓕᖕᓂ−ᑐᙵᕕᖃᖅᖢᑎᒃ ᐊᑭᒃᓴᓂᑦ ᐋᖅᑭᒃᓯᒪᔪᒥ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ ᐊᑐᐃᓐᓇᓚᐅᖅᑕᖓ ᓄᓇᑦᓯᐊᖑᑎᓪᓗᒋᑦ, ᓄᓇᕘᓕᒫᒧᑦ−ᑐᕌᖓᔪᒥᑦ ᐋᖅᑭᒃᓯᒪᔪᒧᑦ. ᐊᖏᖅᑕᐅᒍᓂ, ᐊᓯᔾᔨᕈᑕᐅᔪᖅ ᓄᓇᕘᓕᒫᒧᑦ−ᑐᕌᖓᔪᒥᑦ ᐊᑭᒃᓴᐅᔪᓄᑦ ᐊᕕᒃᑐᖅᓯᒪᒐᔭᖅᑐᖅ−ᐃᓚᔭᐅᕙᓪᓕᐊᓗᓂ ᐊᕐᕌᒍᓄᑦ ᐱᖓᓲᔪᖅᑐᓄᑦ.
“ᐸᕐᓇᒍᑎᒋᓯᒪᔭᕗᑦ ᐊᑕᐅᓯᕐᒥᑦ ᐊᑭᓕᐅᑎᖃᕈᒪᓪᓗᑕ ᐊᑐᓂ ᐱᔨᑦᑎᕋᖅᑕᐅᕙᒃᑐᓄᑦ ᓄᓇᕘᓕᒫᒥ. ᑕᒪᓐᓇ
ᑐᑭᖃᖅᐳᖅ ᐃᒡᓗᒋᔭᐅᔪᓂ ᐱᔨᑦᑎᕋᖅᑕᐅᔪᑦ ᐊᔾᔨᒌᒃᑐᒥ ᐊᑭᓖᖃᑦᑕᕋᔭᖅᑐᑦ ᐊᔾᔨᒌᑦᑐᒥ ᐆᒻᒪᖅᑯᑎᓂ ᐊᑐᖅᐸᑕ ᓇᒥᕐᒥᐅᑕᐅᒐᓗᐊᖅᐸᑕ ᓄᓇᕘᒥ,” ᐅᖃᖅᑐᖅ ᐱᕋᐃᕋ.
ᓄᓇᕗᒻᒥ ᓈᒪᔪᑎᑦ ᐊᑭᖏᓐᓂᑦ ᕿᒥᕐᕈᔨᑦ ᑲᑎᒪᔨᖏᑦ (URRC), ᐃᓛᒃᑰᖓᔪᑦ ᐅᖃᐅᔾᔨᒋᐊᖅᑎᐅᓪᓗᑎ ᑎᒥᐅᓪᓗᑎ, ᕿᒥᕐᕈᓂᐊᖅᑐᑦ ᑖᔅᓱᒥᖓ ᐊᑐᖅᑕᐅᓪᓗᐊᑕᓱᖅ ᐊᑭᖓᓄᑦ ᐊᑐᓕᖅᑎᑦᑎᔪᑎᒥ ᐅᖃᐅᔾᔨᒋᐊᕐᓗᑎᓗ ᒥᓂᔅᑕᕆᔭᐅᔪᒧᑦ ᑲᒪᒋᔭᖃᖅᑐᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ ᑲᔪᖏᖅᓴᐃᕗᑦ ᐱᔨᑦᑎᕋᖅᑕᐅᕙᒃᑐᑦ ᐃᓚᐅᓗᑎ ᐊᑐᖅᑕᐅᓪᓗᐊᑕᓱᖅ ᐊᑭᖓᓄᑦ ᐊᑐᓕᖅᑎᑦᑎᔪᑎ ᕿᒥᕐᕈᓂᐅᖓᓂ ᐃᕐᖐᓐᓈᖅᑕᐅᑎᒃᑯᑦ ᑎᑎᕋᖃᑦᑕᕐᓗᑎ ᐅᖃᐅᓯᒃᓴᒥᓂᒃ ᐅᕗᖓ URRC@gov.nu.ca 5 ᐅᓄᒃᑯᑦ ᕕᕝᕗᐊᕆ 2, 2018-ᒧᑦ.
ᐊᑐᖅᑕᐅᓪᓗᐊᑕᓱᖅ ᐊᑭᖓᓄᑦ ᐊᑐᓕᖅᑎᑦᑎᔪᑎ ᑎᑎᕋᖅᓯᒪᔪᑦ ᐊᒻᒪ ᑐᑭᓯᒋᐊᕈᑎᒃᓴᒃᑲᓐᓃᑦ ᐊᑐᐃᓐᓇᐅᔪᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ ᐃᑭᐊᖅᑭᕕᖓᓂ www.qec.nu.ca.
###
ᓯᐊᒻᒪᖅᑎᑦᑎᒧᑦ ᖃᐅᔨᒋᐊᕐᕕᒃᓴᖅ:
ᓰᓚ ᐸᐸ
ᐊᐅᓚᑦᑎᔨ, ᑎᒥᖁᑎᐅᔪᓄᑦ ᐋᔩᖃᑎᒌᖕᓂᕐᒧᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ
(867) 979-7534