ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ (QEC) ᑐᔅᓯᕋᖅᓯᒪᕗᑦ ᒥᓂᔅᑕᖓᓐᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑲᒪᔪᒥᑦ ᓄᑖᒥᑦ ᐅᖅᓱᐊᓗᖕᒧᑦ ᐊᑭᖏᑦ ᓱᕐᕋᔾᔭᐃᒃᑯᑎᓄᑦ (FSR) ᐅᑎᖅᑎᕝᕕᐅᓂᕐᒧᑦ ᐃᖏᕐᕋᓂᖓ 8.23 ᓴᓐᓰᑦ ᑭᓗᕚᑦ ᐃᑲᕐᕋᒧᑦ (Kwh) ᑐᔅᓯᕋᐅᑕᐅᔪᖅ ᐊᑐᕋᔭᖅᑐᖅ ᐅᓪᓗᖏᓐᓄᑦ ᐱᒋᐊᕐᕕᖃᕐᓗᓂ ᐊᐃᕆᓕ 1, 2017ᒥᑦ ᓰᑏᐱᕆ 30, 2017ᒧᑦ ᑭᓪᓕᖃᕐᓗᓂ.
ᑎᓴᒪᒋᓕᖅᑕᖓᓐᓂᑦ ᑕᕝᕙᓂ ᐊᕐᕌᒍᒥᑦ ᐊᕐᕌᒍᑕᒫᑦ ᑕᒪᓐᓇ ᐊᑐᖅᑕᐅᖃᑦᑕᖅᑐᖅ ᐅᕐᓱᐊᓗᖕᒧᑦ ᐊᑭᖏᑦ ᓱᕐᕋᔾᔭᐃᒃᑯᑎᓄᑦ ᐊᑭᖓᓐᓂᑦ ᐅᑎᖅᑎᑦᑎᕕᐅᓂᕐᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᔅᓯᕋᐅᑎᒋᓯᒪᔭᖏᓐᓂᑦ ᓅᕖᕝᕙ 2015ᒥᑦ. ᑕᐃᒫᑦᑕᐅᖅ, ᑐᓴᕆᐊᕐᕕᖃᕐᓂᐊᖅᒥᔪᖓ ᓄᓇᕗᒻᒥᑦ ᐆᒻᒪᖅᑯᑏᑦ ᐊᑭᖏᓐᓂᑦ ᕿᒥᕐᕈᔩᑦ ᑲᑎᒪᔨᖏᓐᓂᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑐᔅᓯᕋᐅᑎᖓ ᐱᓪᓗᒍ, "ᐅᖃᖅᑐᖅ ᒪᓕᒐᓕᐅᖅᑎᑦ ᒥᓂᔅᑕ ᔮᓂ ᒪᐃᒃ, ᑲᒪᒋᔭᓕᒃ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖᓂᒃ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᒫᓐᓇ ᐅᕐᓱᐊᓗᖕᒧᑦ ᐊᑭᖏᑦ ᓱᕐᕋᔭᐃᒃᑯᑎᓄᑦ ᐅᑎᕐᕕᐅᑎᑦᑎᖃᑦᑕᑐᑦ ᐃᖏᕐᕋᓂᖓ 5.26 ᓴᓐᓰᑦ ᑭᓗᕚᑦ ᐃᑲᕐᕋᕐᒧᑦ (Kwh) ᐃᓱᓕᕕᔅᓴᖃᖅᑐᖅ ᒫᑦᓯ 31, 2017ᒥᑦ. ᑕᒪᕐᒥᑦ ᐆᒻᒪᖅᑯᑎᖃᖅᑎᓕᒫᑦ ᑐᓂᔭᐅᒐᔭᖅᑐᑦ ᐅᕐᓱᐊᓗᖕᒧᑦ ᐊᑭᖏᑦ ᓱᕐᕋᔭᐃᒃᑯᑎᒧᑦ ᐅᑎᖅᑎᑕᐅᔪᓄᑦ ᑭᓯᐊᓂ ᐱᖃᓯᐅᑎᓯᒪᓐᖏᑦᑐᑦ ᐃᓪᓗᖃᖅᑏᑦ ᐃᓪᓗᓕᕆᔨᒃᑯᑎᒍᑦ ᑭᒃᑯᑐᐃᓐᓇᕐᓄᑦ ᑐᕌᖓᔪᓂᑦ ᑖᒃᑯᐊ ᐊᑭᑭᓪᓕᒋᐊᖅᑕᐅᓯᒪᒌᕐᖓᑕ ᖃᐅᒪᓯᐅᑎᖏᑦ ᐊᑐᖅᑏᑦ ᐊᑭᓕᐅᑎᖏᓐᓄᑦ ᐱᓕᕆᐊᖓᑎᒍᑦ.
"ᐃᖅᑲᐃᑎᑦᑎᒋᐊᒃᑲᓐᓂᕈᒪᔪᒍᑦ ᐆᒻᒪᖅᑯᑎᑦᑎᓐᓂᑦ ᐊᑐᖃᑦᑕᖅᑐᓂᑦ ᑖᒃᑯᐊ ᖃᐅᒪᓯᐅᑎᓄᑦ ᑕᖅᑭᑕᒫᖅᓯᐅᑎᖏᓐᓄᑦ ᐊᑭᓕᕆᐊᓕᓐᓄᑦ ᐊᑭᓕᐅᑕᐅᑐᐃᓐᓇᕋᔭᕐᖓᑕ. ᐆᒻᒪᖅᑯᑎᓂᑦ ᐊᑐᖅᑎᐅᔪᑦ ᑎᑎᕋᕐᕕᔅᓴᒥᑦ ᐱᔪᒪᔾᔪᑎᒥᑦ ᐊᑐᕆᐊᔾᔮᖏᑦᑐᑦ ᐅᑎᕐᕕᐅᔪᒪᔾᔪᑎᒥᑦ", ᐅᖃᖅᑐᖅ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᐊᖏᔪᖅᑳᖓ ᐊᒻᒪ ᐊᐅᓚᑦᑎᔨᒻᒪᕆᖓ, ᐳᕉᓅ ᐱᕋᐃᕋ.
ᓄᑖᖅ ᐅᕐᓱᐊᓗᖕᒧᑦ ᐊᑭᖏᑦ ᓱᕐᕋᔭᐃᒃᑯᑎᒧᑦ ᑐᔅᓯᕋᐅᑎᖓ ᐱᒋᐊᖅᓯᒪᔪᖅ ᑲᔪᓰᓐᓇᖅᓯᒪᔪᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐅᕐᓱᐊᓗᖕᒧᑦ ᑮᓇᐅᔭᖁᑎᖏᑦ ᐊᒥᐊᒃᑯᖃᖃᑦᑕᖅᓯᒪᓂᖏᓐᓄᑦ ᑖᒃᑯᓄᖓ ᑐᕌᖓᑎᑕᐅᓯᒪᔪᓄᑦ ᑎᒥᐅᔫᑉ ᐅᕐᓱᐊᓗᖕᒧᑦ ᐊᑭᖏᑦ ᓱᕐᕋᔾᔭᐃᒃᑯᑎᖓᑕ ᑮᓇᐅᔭᖁᑎᖏᑦ. ᑮᓇᐅᔭᖁᑎᖏᑦᑕ ᐊᒥᐊᒃᑯᖏᑦ ᐊᔾᔨᒌᓐᖏᓐᓂᖃᖅᑐᑦ ᐅᕐᓱᐊᓘᑦ ᐊᑭᖏᑦ ᓴᖅᑭᔮᖅᑐᑦ ᐆᒻᒪᖅᑯᑎᓄᑦ ᐊᑭᖏᑦ ᐋᖅᑭᑦᑕᐅᓯᒪᔪᑦ ᐊᒻᒪ ᐊᑭᓪᓚᑦᑖᖓ ᐊᑭᓕᐅᑕᐅᓯᒪᔪᖅ ᐅᕐᓱᐊᓗᒻᒧᑦ ᖁᓪᓕᖅ ᐆᒻᒪᖁᑎᓕᕆᔨᒃᑯᓐᓂᑦ.