ᐃᖃᓗᐃᑦ, ᓄᓇᕗᑦ (ᐊᐃᕐᕆᓕ 13, 2017) – ᒪᓕᒐᓕᐅᖅᑎ ᔮᓂ ᒪᐃᒃ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ ᒥᓂᔅᑕ (QEC) ᐅᓪᓗᒥ ᑐᓴᖅᑕᐅᑎᑦᑎᖅᑲᐅᕗᖅ ᓂᑰᓪ ᔫᕕᓐ ᑎᒃᑯᐊᖅᑕᐅᓂᖓᓂᒃ ᐆᒻᒪᖅᑯᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᐱᒋᐊᕐᕕᒃᓴᖃᖅᖢᓂ ᒫᔾᔨ 23, 2017-ᒥ.
ᒥᓂᔅᑕ ᒪᐃᒃ ᐃᓚᐃᔾᔭ ᐃᕙᓗᐊᕐᔪᖕᒥ ᑎᒃᑯᐊᖅᓯᒃᑲᓐᓂᓚᐅᖅᐳᖅ ᑲᑎᒪᔨᐅᖃᑕᐅᒃᑲᓐᓂᖁᓪᓗᓂᐅᒃ ᔭᓄᐊᕆ 7, 2017−ᖑᑎᓪᓗᒍ ᐊᐃᑉᐸᖓᓂ ᐅᑭᐅᓄᑦ ᐱᖓᓱᒃᑲᓐᓂᕐᓄᑦ ᑲᑎᒪᔨᐅᖃᑕᐅᒃᑲᓐᓂᕐᓂᐊᖅᖢᓂ. ᐃᓚᐃᔾᔭ ᐃᕙᓗᐊᕐᔪᒃ ᑎᒃᑯᐊᖅᑕᐅᓚᐅᖅᓯᒪᒋᓪᓗᓂ ᑲᑎᒪᑎᑦᑎᔨᙳᖅᑎᑕᐅᓪᓗᓂ ᑲᑎᒪᔨᓄᑦ ᔫᓂ 2016−ᒥ ᑲᑎᒪᑎᑦᑎᔨᐅᓚᐅᖅᐳᖅ.
“ᖁᔭᒋᔪᒪᔭᕋ ᐃᓚᐃᔾᔭ ᐃᕙᓗᐊᕐᔪᒃ ᐃᑲᔪᑦᑎᐊᖅᓯᒪᓂᖓᓄᑦ ᐆᒻᒪᖅᑯᑎᓕᕆᔨᒃᑯᓐᓄᑦ ᒫᓐᓇᒧᑦ ᑎᑭᖦᖢᒍ ᑎᒃᑯᐊᖅᑕᐅᒃᑲᓐᓂᕐᒪᓪᓗ ᐊᖏᓚᐅᕐᓂᖓᓄᑦ. ᐅᐱᒍᓱᑦᑎᐊᖅᐳᖓ ᓂᑰᓪ ᔫᕕᓐ ᑲᑎᒪᔨᙳᖃᑕᐅᖕᒪᑦ. ᒐᕙᒪᑐᖃᒃᑯᓐᓂ ᐃᖅᑲᓇᐃᔮᖓ ᐊᒻᒪ ᐅᑭᐅᖅᑕᖅᑐᒥ ᐱᓕᕆᕈᓘᔭᖃᑦᑕᕐᓂᖓ ᑯᐊᐳᕇᓴᒃᑯᓐᓄᑦ ᐃᑲᔫᑎᖃᑦᑎᐊᓕᒑᖕᒪᑦ,” ᒥᓂᔅᑕ ᒪᐃᒃ ᐅᖃᓚᐅᖅᐳᖅ. “ᑖᒃᑯᐊ ᑎᒃᑯᐊᖅᑕᐅᔪᑦ ᐃᖏᕐᕋᑦᑎᐊᕈᑕᐅᖏᓐᓇᖅᐳᑦ ᑯᐊᐳᕇᓴᒃᑯᑦ ᓯᕗᓕᖅᑎᐅᔾᔪᑎᖓᓐᓄᑦ ᐱᐅᓯᒋᐊᕈᑕᐅᓪᓗᓂᓗ ᐊᔪᖅᑕᐅᙱᑦᑐᓄᑦ ᖃᐅᔨᒪᔭᐅᔪᓄᓪᓗ ᑲᑎᒪᔨᒋᔭᐅᔪᓄᑦ.”
ᐆᒻᒪᖅᑯᑎᓕᕆᔨᒃᑯᑦ ᑲᑎᒪᔨᖏᑦ ᐊᕐᕕᓂᓕᖕᓂ (6) ᑲᑎᒪᔨᖃᖅᐳᑦ ᐅᑭᐅᓄᑦ ᐱᖓᓱᓄᑦ ᑲᑎᒪᔨᐅᖃᑕᐅᕙᒃᖢᑎᒃ ᑎᒃᑯᐊᖅᑕᐅᓯᒪᓂᖏᑦ ᒪᓕᒃᖢᒋᑦ. ᐆᒻᒪᖅᑯᑎᓕᕆᔨᒃᑯᑦ ᐱᖁᔭᖓ ᒪᓕᒃᖢᒍ, ᑲᑎᒪᔨᖃᕆᐊᖃᖅᐳᑦ ᐊᕐᕕᓂᓕᑦ (6) ᑐᖔᓂᐅᙱᑦᑐᖅ, ᐊᒻᒪ ᖁᓕᑦ ᐅᖓᑖᓂᐅᙱᑦᑐᖅ.
File Attachment