ᐃᖃᓗᐃᑦ, ᓄᓇᕗᑦ (ᑎᓯᐱᕆ 5, 2018) - ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐱᓇᔪᒃᓯᒪᓕᖅᑐᑦ ᐅᖅᓱᐊᓗᒃᑖᖅᐸᒃᑐᑦ ᐊᑭᓕᖅᓱᖁᓪᓗᒋᑦ ᐅᖅᓱᐊᓗᖕᒧᑦ ᐊᑭᓕᖅᓱᐃᓕᕐᓗᑎᒃ $1.25 per kilowat-ᐃᑲᕐᕋᒧᑦ ᓄᕕᐱᕆ 1, 2018-ᒥ, ᒫᔾᔨ 31, 2019-ᒧᑦ. ᐱᓇᔫᑕᐅᔪᖅ ᑐᓐᓂᖅᑯᑕᐅᓚᐅᖅᐳᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᒥᓂᔅᑕᖓᓐᓄᑦ, ᐱᖁᔨᕗᖔᓕᐊᕆᔭᐅᔪᓂᒃ ᖃᐅᔨᓇᓱᒋᐊᖃᕐᓂᐊᖅᑐᖅ ᐆᒻᒪᖅᑯᑎᑦ ᐊᑭᖏᓐᓄᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ.
"ᑐᒃᓯᕋᐅᑕᐅᔪᖅ ᐅᖅᓱᐊᓗᖕᒧᑦ ᐊᑭᓕᖅᓱᖅᑕᐅᔪᒃᓴᖅ ᑕᐃᒪᓐᓇ ᐋᖅᑭᒃᑕᐅᓚᐅᖅᐳᖅ ᖃᖓᑦᑎᐊᖅ ᓄᓇᕘᒥ ᐅᖅᓱᐊᓗᒃ ᐊᑭᖓ ᐊᑭᑦᑐᕆᐊᓚᐅᖅᑎᓪᓗᒍ," ᐅᖃᓚᐅᖅᐳᖅ ᒪᓕᒐᓕᐅᖅᑎ ᔩᓂ ᐃᕼᐊᓗᐊᒃ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕ. "ᑕᐃᒪᙵᑦ 2013-ᖑᓚᐅᖅᑎᓪᓗᒍ ᐅᖅᓱᐊᓗᖕᒧᑦ ᐊᑭᖓ ᐊᑭᑦᑐᕆᐊᑕᐃᓐᓇᖅᑐᖅ."
ᐅᖅᓱᐊᓗᖕᒧᑦ ᐊᑭᖓ ᐊᑭᓕᒃᑲᓐᓂᕆᐊᖃᓲᖑᕗᖅ ᐅᕝᕙᓘᓐᓃᑦ ᐊᑭᓕᖅᓱᖅᑕᐅᔪᓄᑦ ᐅᑎᖅᑎᒐᒃᓴᐅᓲᖑᕗᖅ ᐊᑭᓕᖅᓱᐃᔨᑦ ᐊᑭᓕᒐᒃᓴᖏᓐᓂᒃ ᑕᑯᒃᓴᐅᑎᑦᑎᔭᕆᐊᖃᖅᑐᖅ ᐊᔾᔨᒌᙱᓐᓂᖓᓂ ᐅᖅᓱᐊᓘᑉ ᐊᑭᖓ ᐆᒻᒪᖅᑯᑎᑐᕈᓯᑦ ᐊᑭᖏᓐᓂᒃ ᐊᑭᓪᓚᑦᑖᖓᓗ ᐊᑭᓕᖅᓱᖅᑕᐅᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ.
"ᐆᒻᒪᖅᑯᑎᓕᕆᔨᒃᑯᓐᓄᑦ ᐊᑭᓕᖅᓱᐃᔪᓄᑦ ᐊᑭᓕᒐᒃᓴᖅ ᐋᖅᑭᒃᑕᐅᓯᒪᕙᒌᖅᑐᒧᑦ ᐃᓚᓕᐅᔾᔭᐅᖃᑦᑕᕐᓂᐊᖅᑐᖅ ᑕᖅᑭᑕᒫᑦ ᐊᑭᓕᖅᓱᖅᑕᖏᓐᓄᑦ, ᐱᒋᐊᕐᓗᒍ ᓄᕕᐱᕆᒥ ᐊᑭᓕᒐᒃᓴᐅᓂᐊᖅᑐᑦ, ᑭᑭᑕᐅᓗᑎᒃ ᐃᒡᓗᓕᕆᔨᒃᑯᓐᓂ ᐊᑐᖅᑐᐊᖅᑎᑦ ᐃᑲᔫᓯᐊᖅᑖᖅᐸᒃᑐᑦ ᐊᑐᖅᑐᐊᖅᑎᒃᑯᓐᓄᑦ ᐱᓕᕆᐊᕆᔭᐅᔪᒃᑯᑦ," ᐅᖃᓚᐅᖅᐳᖅ ᐳᕉᓅ ᐱᕆᐅᕋ, ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳ ᐊᒻᒪ ᐊᐅᓚᑦᑎᔨᒻᒪᕆᖓᑦ.
ᐊᑭᓕᖅᓱᐃᔨᑦ ᐆᒻᒪᖅᑯᑎᑐᖅᑎᒋᔪᑦ 500 kilowat-hours ᑕᖅᑭᑕᒫᑦ $6.25 ᐊᑭᑦᑐᕆᐊᖅᓯᒪᔪᒥᒃ ᓂᕆᐅᒋᐊᖃᕐᓂᐊᖅᐳᑦ (GST ᐃᓚᓕᐅᑎᙱᖦᖢᒍ) ᑕᖅᑭᑕᒫᑦ ᐊᑭᓕᖅᓱᒐᒃᓴᓂᒃ.
ᑐᑭᓯᒋᐊᒐᒃᓴᖅᑕᖃᒃᑲᓐᓂᖅᑐᖅ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᖕᒧᑦ ᐊᑭᖓᓂᒃ ᐅᕗᙵᕐᓗᓯ www.qec.nu.ca.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕈᓃ ᐳᓯᐊᐃ
ᐊᐅᓚᑦᑎᔨᐅᑲᐃᓐᓇᖅᑐᖅ, ᐊᖓᔪᖅᑲᐅᑎᓄᑦ ᑐᓴᐅᒪᖃᑦᑕᐅᑎᓕᕆᔨ
ᖁᓪᓕᖅ ᐆᒻᒪᖅᑯᑎᓕᕆᔨᖏᑕ ᑎᒥᖁᑖ
(867) 979-7524
rboucher@qec.nu.ca