ᐃᖃᓗᐃᑦ, ᓄᓇᕗᑦ (ᐊᐃᕐᕆᓕ 16, 2019) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ (QEC−ᑯᑦ) ᐃᖅᑲᐃᑎᑦᑎᔪᒪᕗᑦ ᐊᑐᖅᑎᐅᕙᒃᑐᓂᒃ ᐱᖃᑖ ᐊᑐᖅᑕᐅᓂᐊᓕᕐᒥᔪᖅ ᖃᔅᓯᑐᕐᓂᖓᑕ ᐅᓐᓄᖅᓯᒋᐊᖅᑕᐅᓂᖓᑕ ᐊᖏᖅᑕᐅᓯᒪᔪᖅ ᒥᓂᔅᑕᒥᑦ ᑲᒪᒋᔭᒃᓴᖃᖅᑎᑕᐅᔪᒥᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᒃ ᐊᑐᓕᖅᓯᒪᓕᕐᓂᖓᓂᒃ ᐊᐃᕐᕆᓕ 1, 2019−ᒥ.
ᕿᒥᕐᕈᐊᕌᓪᓚᓚᐅᖅᖢᒍ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᑭᒃᑯᑐᐃᓐᓇᓄᑦ ᐊᑭᓕᖅᓱᖅᑕᐅᕙᒃᑐᒥᒃ ᐱᓇᔪᒍᑎᒋᔭᖓᓂᒃ ᑐᓐᓂᖅᑯᑎᒋᓚᐅᖅᑕᖓᓂᒃ 2017−ᖑᑎᓪᓗᒍ, ᒥᓂᔅᑕᕆᔭᐅᔪᖅ ᑲᒪᒋᔭᒃᓴᖃᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᒃ ᐊᖏᖅᓯᓚᐅᖅᐳᖅ 6.6%−ᒥᒃ ᐅᓄᖅᓯᒋᐊᖅᑕᐅᔪᓂᒃ ᓄᓇᕗᒻᒥᐅᑦ ᐆᒻᒪᖅᑯᒻᒧᑦ ᐊᑭᓕᖅᓱᕆᐊᖃᖅᐸᒃᑕᖏᓐᓄᑦ, ᑕᒪᓐᓇᓗ ᐊᑐᖅᑕᐅᓂᐊᖅᖢᓂ ᐊᑐᖅᑏᑦ ᐊᑭᓕᖅᓱᒐᒃᓴᖏᓐᓄᑦ ᐊᕐᕌᒍᖕᓄᑦ ᒪᕐᕉᖕᓄᑦ. ᓯᕗᓪᓕᖅᐹᖅ ᐅᓄᖅᓯᒋᐊᖅᑕᐅᓂᖓ 3.3%−ᖑᓪᓗᓂ ᐊᑐᓚᐅᖅᐳᖅ ᒪᐃ 1, 2018−ᒥᑦ, ᒫᑦᓯ 31, 2019−ᒧᑦ. ᐊᐃᑉᐸᖓ ᖃᔅᓯᑐᕐᓂᖓᑕ ᐅᓄᖅᓯᒋᐊᖅᑕᐅᓂᖓ 3.3%−ᖑᓪᓗᓂ ᒫᓐᓇ ᐊᑐᓕᖅᐳᖅ ᓴᖅᑭᖃᑦᑕᕐᓂᐊᓕᖅᖢᓂᓗ ᐊᑐᖅᑏᑦ ᐊᑭᓕᖅᓱᒐᒃᓴᖏᓐᓂ ᐊᑐᖅᑐᕕᓂᕐᓂᒃ ᑕᖅᑭᕆᔭᐅᔪᒧᒃ ᐊᐃᕐᕆᓕᒧᑦ.
“ᑖᒃᑯᐊ ᓄᑖᑦ ᖃᔅᓯᐅᓂᖏᑦ ᐃᑲᔪᕐᓂᐊᖅᐳᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᑮᓇᐅᔭᖅᑖᕆᕙᓪᓕᐊᔭᕆᐊᖃᖅᑕᖏᓐᓄᑦᓇᓗᙱᑦᑎᐊᕈᑕᐅ/ᓗᑎᒡᓗ ᐱᒻᒪᕆᐊᓗᐃᑦ ᓇᑉᐸᖅᑎᖅᑎᑕᐅᓯᒪᔪᓄᑦ ᓄᑖᙳᕆᐊᖅᑎᑕᐅᔪᑦ ᐱᔭᕇᖅᑕᐅᔪᓐᓴᕋᓗᐊᕐᒪᖔᑕ, “ᑕᐃᒪᓐᓇ ᐳᕉᓄ ᐱᕇᕋ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐊᖓᔪᖅᑳᖓ ᐊᐅᓚᑦᑎᔨᓪᓗᐊᑕᖓᓪᓗ ᐅᖃᖅᖢᓂ. “ᑕᒪᓐᓇ ᐅᓄᖅᓯᒋᐊᖅᑕᐅᓂᖓ ᐊᑐᓕᖅᑎᑕᐅᕙᓪᓕᐊᓚᐅᖅᐳᖅ ᐊᕐᕌᒎᖕᓂ ᒪᕐᕉᖕᓂ ᐃᑲᔪᕈᒪᓂᕐᒧᑦ ᒥᑭᒡᓕᒋᐊᖅᑎᑦᑎᓯᒪᓂᕐᒥᒃ ᐊᒃᑐᖅᓯᓂᕆᔭᖓᓂᒃ ᐊᑐᖅᑎᐅᕙᒃᑐᓂᒃ.”
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᒻᒪᑦᑕᐅᖅ ᐊᑐᖅᑎᓂᒃ ᑐᓴᖅᑎᑦᑎᔪᒪᕗᖅ ᑕᒪᓐᓇ ᐅᖅᓱᐊᓗᖕᒥᒃ ᐊᑭᑐᓗᐊᖅᑎᑦᑎᑦᑕᐃᓕᒪᓂᕐᒧᑦ ᐊᑐᖅᑕᐅᕙᒃᑐᖅ 1.25 ᓴᐅᓪᓗᓂ ᐊᑕᐅᓯᕐᒧᑦ ᑭᓗᕚᑦ ᐃᑲᕐᕋᒧᑦ, ᐊᑐᖅᑎᑕᐅᓚᐅᖅᑐᖅ ᐊᑐᖅᑏᑦ ᐊᑭᓕᖅᒧᒐᒃᓴᖏᓐᓄᑦ ᑕᖅᑭᓄᑦ 6 −ᓄᑦ ᐊᑭᓕᖅᓱᒐᒃᓴᓕᕆᔪᖃᓕᕌᖓᑦ ᓄᕕᐱᕆ 1, 2018−ᒥᑦ, ᒫᑦᓯ 31, 2019−ᒧᑦ, ᐃᓱᓕᓯᒪᓕᕐᓂᖓᓂᒃ.
ᐅᖅᓱᐊᓗᖕᒧᑦ ᐊᑭᑐᓗᐊᖅᑕᐃᓕᒪᔾᔪᑎᒥᒃ ᐱᔪᖃᕆᐊᖃᙱᓚᖅ ᑕᖅᑭᓄᑦ 6−ᓄᑦ ᐊᐃᕐᕆᓕ 1−ᒥᑦ ᓯᑎᐱᕆ 30, 2019−ᒧᑦ, ᑕᒪᓐᓇ ᑕᐃᒪᐃᔾᔪᑎᖃᓪᓚᕆᒃᖢᓂ ᖃᖓᑦᑎᐊᓵᖅ ᐅᖅᓱᐊᓘᑉ ᐊᑭᖓ ᐅᓄᕈᓐᓃᕆᐊᖅᑕᐅᓚᐅᖅᑎᓪᓗᒍ ᑕᒪᓐᓇᓗ ᐊᑐᓕᓚᐅᖅᓯᒪᓪᓗᓂ ᐊᐃᕐᕆᓕ 1, 2019−ᒥ. ᐅᖅᓱᐊᓘᑉ ᐊᑭᖓᓂ ᕿᒥᕐᕈᐊᖅᓯᒃᑲᓐᓂᕐᓂᖅ ᐅᑭᐊᒃᓵᖑᓕᖅᐸᑦ ᖃᐅᔨᒪᓕᕈᑕᐅᓂᐊᖅᐳᖅ ᐅᖅᓱᐊᓗᖕᒧᑦ ᐊᑭᑐᓗᐊᖅᑎᑦᑎᑦᑕᐃᓕᒪᔾᔪᑎᒥᒃ ᐱᔪᖃᕆᐊᖃᕐᓂᐊᕐᒪᖔᑦ ᑕᖅᑭᐅᓂᐊᓕᕐᒥᔪᓄᑦ 6−ᓄᑦ.
ᓄᑖᑦ ᐆᒻᒪᖅᑯᒻᒧᑦ ᐊᑭᒋᔭᐅᑎᑕᐅᓕᖅᑐᑦ, ᐊᑐᓕᓚᐅᖅᑐᑦ ᐊᐃᕐᕆᓕ 1, 2019−ᒥ, ᒪᓂᒪᕗᑦ ᐅᕙᓂ www.qec.nu.ca.
###
ᑐᓴᒐᒃᓴᓄᑦ ᖃᐅᔨᒋᐊᕐᕕᒃᓴᖅ
ᕆᓂ ᐳᓲ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7524
ᐱᓕᕆᐊᖑᓯᒪᔪᑦ
ᐊᒃᑐᖅᓯᓂᖓ ᐊᖏᕐᕋᕆᔭᐅᔪᓂ ᐊᑐᖅᑎᐅᕙᒃᑐᓄᑦ
ᑐᙵᕕᖃᖅᑎᑕᐅᓗᓂ ᓄᑖᓄᑦ ᖃᔅᓯᑐᖅᑎᑕᐅᔪᓄᑦ ᐊᑐᓕᖅᑐᓄᑦ ᐊᐃᕐᕆᓕ 1, 2019−ᒥ, ᐊᖏᕐᕋᕆᔭᐅᔪᓂ ᐊᑐᖅᑏᑦ ᑕᑯᔾᔮᙱᑦᑐᑦ ᐅᓄᖅᓯᒋᐊᖅᑐᓂᒃ ᑕᖅᑭᑕᒫᑦ ᐊᑭᓕᖅᓱᕆᐊᖃᖅᐸᒃᑕᒥᓂ ᐃᒪᓐᓇᐃᑐᐊᕐᓂᕈᑎᒃ, ᐱᓐᓂᕈᑎᒃ ᓄᓇᕗᒻᒧᑦ ᐆᒻᒪᖅᑯᒻᒧᑦ ᐃᑲᔫᓯᐊᖑᕙᒃᑐᒥᒃ, ᐊᑐᕐᓂᕈᑎᒃ ᐃᑲᔫᓯᐊᖑᕙᒃᑑᑉ ᐃᓗᐊᓃᑎᓪᓗᒍ ᖄᖏᐅᑎᑎᙱᓪᓗᒍ, ᐊᔾᔨᑲᓴᖏᓐᓂᒡᓗ ᑕᖅᑭᑕᒫᑦ ᐆᒻᒪᖅᑯᒻᒥᒃ ᐊᑐᖅᐸᒃᑯᑎᒃ. ᐊᑐᖅᑏᑦ ᖄᖏᐅᑎᔪᑦ ᐃᑲᔫᓯᐊᕆᕙᒃᑕᖓᑕ ᐅᖓᑖᓄᑦ ᐆᒻᒪᖅᑯᒻᒥᒃ ᐊᑐᖅᑕᕕᓂᕐᒥᓂᒃ ᑕᑯᓂᐊᖅᐳᑦ ᐅᓄᖅᓯᒋᐊᖅᑕᐅᔪᓂᒃ.
ᓂᕆᐅᓇᖅᑐᖅᑕᖃᙱᓚᖅ ᐊᓯᔾᔨᕋᔭᖅᑐᒥᒃ ᐊᑐᖅᑏᑦ ᐊᑭᓕᖅᓱᒐᒃᓴᖏᓐᓄᑦ ᐃᒪᐃᓐᓂᖓᓄᑦ, ᖃᔅᓯᑐᕐᓂᖓᑕ ᐅᓄᖅᓯᒋᐊᖅᑕᐅᓂᖓ ᐊᐃᕐᕆᓕ 1, 2019−ᒥ, ᐊᑭᓕᖅᑕᐅᓂᐊᕐᒪᑦ ᐅᖅᓱᐊᓗᖕᒧᑦ ᐊᑭᑐᓗᐊᖅᑎᑦᑎᑦᑕᐃᓕᒪᓂᕐᒧᑦ ᐊᑭᓕᕆᐊᓕᖕᒧᑦ ᐃᓱᓕᓚᐅᖅᑐᒧᑦ ᒫᑦᓯ 31, 2019−ᒥ.
ᑕᒪᓐᓇ ᐅᓄᖅᓯᒋᐊᖅᑕᐅᓂᖓ ᐊᒃᑐᖅᓯᙱᓚᖅ ᐊᑐᖅᑎᓂᒃ ᑭᒃᑯᑐᐃᓐᓇᓄᑦ ᐃᒡᓗᒋᔭᐅᕙᒃᑐᓃᑦᑐᓂᒃ.
ᐆᒻᒪᖅᑯᑎᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᑦ
ᐆᒻᒪᖅᑯᑎᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᑦ ᑐᒃᓯᕋᐅᑎᐅᕗᖅ ᐆᒻᒪᖅᑯᑎᑦ ᐊᑭᖏᓐᓂᒃ ᐊᓯᔾᔩᖁᔨᓂᕐᒧᑦ. QEC−ᑯᑦ ᑐᓂᓯᓚᐅᖅᐳᑦ GRA−ᒥᒃ ᒥᓂᔅᑕᒧᑦ ᑲᒪᒋᔭᒃᓴᖃᖅᑎᑕᐅᔪᒧᑦ ᐅᑐᐱᕆ 18, 2017-ᖑᑎᓐᓗᒍ. ᑭᖑᓪᓕᖅᐹᖅᓯᐅᑎ ᐋᖅᑭᒃᓯᒪᓕᖅᑎᑕᐅᔪᖅ ᐆᒻᒪᖅᑯᑏᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᑦ ᒪᓕᓚᐅᖅᐳᖅ ᐃᓚᑰᙱᑦᑎᐊᖅᑐᒥᒃ ᕿᒥᕐᕈᐊᖅᓯᓂᕐᒧᑦ ᑲᔪᓯᓂᐅᕙᒃᑐᒥ ᐅᑯᓄᖓ, ᐆᒻᒪᖅᑯᑏᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑕ ᑭᒃᑯᑐᐃᓐᓇᓂᒡᓗ ᐅᖃᖃᑎᖃᖃᑦᑕᕐᓂᕐᒧᑦ.
ᐅᖅᓱᐊᓗᕐᒧᑦ ᐊᑭᑐᓗᐊᖅᑕᐃᒪᔾᔪᑎ
ᐅᖅᓱᐊᓗᖕᒧᑦ ᐊᑭᖓ ᐊᑭᓕᒃᑲᓐᓂᕆᐊᖃᓲᖑᕗᖅ ᐅᕝᕙᓘᓐᓃᑦ ᐊᑭᓕᖅᓱᖅᑕᐅᔪᓄᑦ ᐅᑎᖅᑎᒐᒃᓴᐅᓲᖑᕗᖅ ᐊᑭᓕᖅᓱᐃᔨᑦ ᐊᑭᓕᒐᒃᓴᖏᓐᓂᒃ ᑕᑯᒃᓴᐅᑎᑦᑎᔭᕆᐊᖃᖅᑐᖅ ᐊᔾᔨᒌᙱᓐᓂᖓᓂ ᐅᖅᓱᐊᓘᑉ ᐊᑭᖓ ᐆᒻᒪᖅᑯᑎᑐᕈᓯᑦ ᐊᑭᖏᓐᓂᒃ ᐊᑭᓪᓚᑦᑖᖓᓗ ᐊᑭᓕᖅᓱᖅᑕᐅᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. ᑕᒪᓐᓇ ᖃᐅᔨᓴᖅᓯᓂᖅ ᐱᔭᕇᖅᑕᐅᕙᒃᐳᖅ ᑕᖅᑭᑦ 6 ᐱᔭᕇᑐᐊᕌᖓᑕ.