ᐃᖃᓗᐃᑦ, ᓄᓇᕗᑦ (ᐊᐃᕆᓕ 5, 2016) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ ᑐᒃᓯᕋᓕᖅᐳᑦ ᐱᓇᔪᖁᔨᓪᓗᑎᒃ ᑐᒡᓕᐊᓂ ᐅᖅᓱᐊᓘᑉ ᐊᑭᖏᓐᓄᑦ ᓱᕐᕋᔾᔭᐃᒃᑯᑎᓄᑦ ᐅᑎᖅᑎᕕᐅᔾᔪᑎᒃᓴᓂᒃ 3.07¢ ᑭᓗᕚᑦ ᐃᑲᕐᕋᒧᑦ. ᐅᑎᖅᑎᕕᐅᔾᔪᑎᖃᓕᓚᐅᖅᐳᑦ ᐊᑭᒃᖠᕙᓪᓕᐊᖏᓐᓇᕐᓂᖓᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᖓᑕ ᐊᑭᖏᑦ.
“ᑐᒡᓕᐊᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎᒥᑦ ᐅᑎᖅᑎᕕᐅᔾᔪᑎᒃᓴᓄᑦ ᑐᒃᓯᕋᓕᖅᐳᑦ ᓄᕕᐱᕆ 2015-ᒥᑦ ᐱᒋᐊᖅᖢᓂ, ᓂᕆᐅᒃᐳᖓᓗ ᐆᒻᒪᖅᑯᑎᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᓐᓂᒃ ᐅᖃᓪᓚᖃᑎᖃᕈᒪᓪᓗᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᒃᓯᕋᐅᑎᖓ ᐱᔾᔪᑎᒋᓗᒍ,” ᒪᓕᒐᓕᐅᖅᑎ ᔪᐊᔾ ᕼᐃᒃᔅ ᐅᖃᖅᑐᖅ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ.
ᓯᕗᓪᓕᖅᐹᒥ ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎᒥᑦ ᐅᑎᖅᑎᕕᐅᔾᔪᑎᒃᓴᖅ ᐊᑐᓚᐅᖅᐳᖅ ᓄᕕᐱᕆ 2015-ᒥᑦ ᒫᔾᔨ 2016-ᒧᑦ. ᑐᒡᓕᐊᓂ ᐅᑎᖅᑎᑕᐅᔪᒪᔪᑦ 3.07¢ ᑭᓗᕚᑦ ᐃᑲᕐᕋᒧᑦ ᐄᐳᕈ 1, 2016-ᒥᑦ ᓯᑎᐱᕆ 30, 2016-ᒧᑦ ᐊᑐᕐᓂᐊᖅᐳᖅ. ᐊᑭᓕᖅᓱᐃᔨᓕᒫᓄᑦ ᐊᑐᖅᑕᐅᔪᓐᓇᖅᐳᖅ, ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓃᑦᑐᑦ ᐱᙱᖦᖢᒋᑦ ᐊᑭᑭᒡᓕᒋᐊᖅᓯᒫᓂᖕᓂᖏᓐᓄᑦ ᐊᑐᖅᐸᒃᑐᑦ ᐊᑭᓕᐅᑎᖏᑎᒍᑦ.
“ᐊᑭᓕᖅᓱᐃᕙᒃᑐᑦ ᑐᓴᖅᑎᑦᑐᒪᕙᕗᑦ ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎ ᐃᓕᔭᐅᑲᐅᑎᒋᖃᑦᑕᕐᒪᑕ ᑕᖅᑭᑕᒫ ᖃᐅᒻᒪᖅᑯᑎᓄᑦ ᐊᑭᓕᒃᓴᖅᑖᕆᕙᒃᑕᖏᓐᓄᑦ. ᐊᑭᓕᖅᓱᐃᕙᒃᑐᑦ ᑐᒃᓯᕋᐅᑎᒥᒃ ᑎᑎᕋᕆᐊᖃᔾᔮᙱᑦᑐᑦ,” ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳᕆᓚᐅᑲᒃᑕᖓ ᔭᐃᒥ ᕙᓚᐅᕋᑎ ᐅᖃᖅᑐᖅ.
ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎᒥᑦ ᐅᑎᖅᑎᕕᐅᔾᔪᑎᒃᓴᒧᑦ ᑐᒃᓯᕋᐅᑦ ᓴᖅᑭᑎᑕᐅᓚᐅᖅᐳᖅ ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎ ᓂᕆᐅᒋᔭᐅᓚᐅᖅᑐᖅ ᐊᒥᐊᒃᑯᓂᐊᕐᓂᖓᓂᒃ ᑮᓇᐅᔭᓂᒃ. ᐊᒥᐊᒃᑯᓕᓚᐅᖅᐳᑦ ᐊᔾᔨᒌᙱᓐᓂᖏᓐᓄᑦ ᐅᖅᓱᐊᓘᑉ ᐊᑭᖏᑦ ᐆᒻᒪᖅᑯᑎᑦ ᐊᑭᖏᓐᓂᒃ ᓇᓗᓇᐃᖅᓯᒪᔪᑦ ᐊᒻᒪ ᐊᑭᓪᓚᑦᑖᖓ ᐅᖅᓱᐊᓗᒃ ᐊᑭᓕᖅᑕᐅᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ.