ᐃᖃᓗᐃᑦ, ᓄᓇᕗᑦ (ᒪᐃ 26, 2020) − ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᓪᓗᒥ ᑐᓴᖅᑎᑦᑎᖅᑲᐅᕗᑦ ᒪᓕᒐᓕᐅᖅᑎᑦ ᑲᑎᒪᔨᓄᑦ ᐊᖏᖅᓯᖅᑲᐅᓂᖏᓐᓂᒃ ᑲᑎᒪᔨᙳᖅᑎᑕᐅᔪᓂᒃ ᐅᑯᓂᖓ ᓰᓇ ᐊᑯᒪᓕᒃ, ᐅᑲᓕᖅ ᐃᔨᑦᓯᐊᖅ, ᐊᒻᒪ ᒫᕕᓐ ᑎᐋᓐ ᐆᒻᒪᖅᑯᑎᓕᕆᔨᒃᑯᓐᓄᑦ ᑲᑎᒪᔨᓄᑦ. ᓂᑰᓪ ᔮᕕᓐ ᑲᑎᒪᔨᙳᖅᑎᑕᐅᒃᑲᓐᓂᖅᑐᖅ ᒪᓕᒐᓕᐅᖅᑎᑦ ᑲᑎᒪᔨᓄᑦ ᐱᖓᓱᓄᑦ ᐅᑭᐅᓄᑦ.
ᐊᒻᒪ, ᒪᓕᒐᓕᐅᖅᑎᑦ ᑲᑎᒪᔨᑦ ᐊᖏᖅᓯᓚᐅᕐᒥᔪᑦ ᑲᑎᒪᔨᙳᖅᑎᑕᐅᔪᓂᒃ ᑮᑦ ᐲᑕᓴᓐ ᑲᑎᒪᑎᑦᑎᔨᙳᖅᑎᑕᐅᓪᓗᓂ ᐊᒻᒪ ᐋᓐᓄᓘ ᓇᑲᓱᒃ ᑲᑎᒪᑎᑦᑎᔨᒧᑦ ᑐᒡᓕᕆᔭᐅᓕᖅᖢᓂ. ᑕᒪᕐᒥᒃ ᑲᑎᒪᔩᒃ ᑲᑎᒪᔨᙳᖅᑎᑕᐅᓚᐅᖅᓯᒪᔪᑦ ᐋᒡᒌᓯ 2019-ᒥ ᐅᑭᐅᓄᑦ ᐱᖓᓱᓄᑦ. ᐋᓐᓄᓘ ᓇᑲᓱᒃ ᑲᑎᒪᑎᑦᑎᔨᒧᑦ ᑐᒡᓕᖅᑖᕆᔭᐅᒃᑲᓐᓂᖅᑐᖅ ᑮᑦ ᐲᑕᓴᓐ ᑐᒡᓕᕆᔭᐅᓚᐅᖅᑑᒐᓗᐊᖅ.
"ᖁᔭᓕᔪᒪᔮᒃᑲᒃ ᑲᑎᒪᔨᐅᖃᑕᐅᖏᓐᓇᓵᖅᑑᒃ ᓯᒥᐅᓂ ᐊᒃᐸᓕᐊᓗᒃ ᐊᒻᒪ ᑭᒻᐳᓕ ᕕᐅᒪᓐ ᐃᑲᔪᑦᑎᐊᖃᑦᑕᓚᐅᕐᓂᖏᓐᓄᑦ ᐊᐅᓚᑦᑎᔨᑦᑎᐊᕙᐅᓚᐅᕐᓂᖏᓐᓄᓪᓗ ᓯᕗᓕᖅᑎᑦᑎᐊᕙᐅᓪᓗᑎᒡᓗ ᑲᑎᒪᔨᐅᖃᑕᐅᓂᕐᒥᓂᒃ," ᐅᖃᓚᐅᖅᐳᖅ ᔩᓂ ᐃᕼᐊᓗᐊᒃ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕ. "ᓇᓗᙱᑦᑎᐊᖅᐳᖓ ᑖᒃᑯᐊ ᓄᑖᑦ 9−ᖑᓪᓗᑎᒃ ᑲᑎᒪᔨᐅᓂᐊᓕᖅᑐᑦ ᑲᑎᖦᖢᒋᑦ ᐊᔪᙱᓐᓂᖏᓐᓂᒃ ᐃᓕᖅᑯᓯᑐᖃᕐᓄᓪᓗ ᐊᔪᙱᖦ"ᖢᑎᒃ ᖃᐅᔨᒪᔪᖃᕆᐊᖃᖅᑎᓪᓗᒍ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓯᕗᒻᒧᐊᒃᑎᑉᐸᓪᓕᐊᓗᒍ, ᓄᓇᕗᒻᒥᐅᓪᓗ ᑕᒪᕐᒥᑦᑎᐊᖅ ᐱᕚᓪᓕᖅᓯᒪᖁᓪᓗᒋᑦ."
ᓯᒥᐅᓂ ᐊᒃᐸᓕᐊᓗᒃ, ᑲᑎᒪᔨᙳᖅᑎᑕᐅᓚᐅᖅᓯᒪᔪᖅ ᒪᐃ 2017−ᒥ, ᐱᔭᒃᓴᖃᖃᑦᑕᖅᓯᒪᔪᖅ ᑲᑎᒪᑎᑦᑎᔨᐅᓂᑰᓪᓗᓂ ᒪᐃ 2019−ᒥ, ᑲᑎᒪᑎᑦᑎᔨᒧᑦ ᑐᒡᓕᕆᔭᐅᓚᐅᖅᖢᓂ ᑕᐃᒪᙵᑦ ᒪᐃ 2018−ᖑᓚᐅᖅᑎᓪᓗᒍ. ᑭᒻᐳᓕ ᕕᐅᒪᓐ ᑲᑎᒪᔨᙳᖅᑎᑕᐅᓚᐅᖅᓯᒪᔪᖅ ᒪᐃ 2017−ᒥ ᐅᑭᐅᓄᑦ ᐱᖓᓱᓄᑦ. ᑖᒃᑯᐊ ᑲᑎᒪᔨᙳᖅᑎᑕᐅᔪᑦ ᐃᑲᔪᖅᑐᐃᕗᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᐊᒃᓱᕉᑎᒌᓐᓇᖅᑕᖓᓄᑦ ᐱᕚᓪᓕᖅᑎᓐᓇᓱᒃᖢᒋᑦ ᓄᓇᕗᒻᒥ ᐃᓄᐃᑦ ᐊᒻᒪ ᐊᕕᒃᑐᖅᓯᒪᔪᓂᒃ ᑭᒡᒐᖅᑐᐃᔨᑦ, ᐱᕚᓪᓕᖅᑎᓪᓗᒋᓪᓗ ᐊᖑᑎᑦ/ᐊᕐᓇᐃᑦ ᑲᑎᒪᔨᐅᖃᑎᒌᑦ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕈᓃ ᐳᓲ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7524
rboucher@qec.nu.ca
ᐱᓕᕆᐊᖑᓯᒪᔪᑦ
ᖁᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓄᓇᕗᒻᒥ ᑎᒥᒋᔭᐅᕗᑦ ᐱᓇᓱᐊᒐᖃᖅᖢᑎᒡᓗ ᐆᒻᒪᖅᑯᑎᖃᖅᑎᑦᑎᕙᒡᓗᑎᒃ ᓄᓇᓕᖕᓂ ᓄᓇᕗᒻᒥ. ᐆᒻᒪᖅᑯᑎᓕᕆᔨᒃᑯᑦ ᓇᖕᒥᓂᖁᑎᒋᔭᐅᔪᖅ ᓄᓇᕗᑦ ᒐᕙᒪᒃᑯᓐᓂ, ᐊᐅᓚᓪᓗᑎᒡᓗ ᓴᓂᐊᒍᑦ, ᐅᓂᒃᑳᓕᐅᖅᐸᒃᖢᑎᒃ ᒥᓂᔅᑕᒧᑦ ᐆᒻᒪᖅᑯᑎᓕᕆᔨᒃᑯᓐᓄᑦ. ᖁᓪᓕᒃᑯᑦ ᑎᒥᖁᑖ ᐊᐅᓚᐅᑎᖃᖅᑐᑑᕗᖅ ᐊᒻᒪᓗ ᖃᐅᒻᒪᖅᑯᑎᖃᖅᑎᑦᑎᔨᐅᓪᓗᑎᒡᓗ ᓄᓇᕗᒻᒥ, ᐊᐅᓚᑦᑎᓪᓗᑎᒃ 25−ᓂᑦ ᐊᐅᓚᐅᑎᖃᕐᕕᖕᓂᑦ 25−ᓂᑦ ᓄᓇᓕᖕᓂ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐱᖁᔭᒃᑯᑦ, ᑲᑎᒪᑎᑦᑎᔨ ᐊᒻᒪ ᑐᒡᓕᐊ ᑲᑎᒪᔨᓂᑦ ᑎᓕᔭᐅᖃᑦᑕᕐᓂᐊᖅᐳᑦ ᒥᓂᔅᑕᒧᑦ ᑖᒃᑯᓇᙵᑦ ᑲᑎᒪᔨᓂᑦ. ᑲᑎᒪᔩᑦ ᑲᑎᒪᔨᙳᖅᑎᑕᐅᖃᑦᑕᖅᐳᑦ ᒥᓂᔅᑕᒧᑦ ᐊᕐᕌᒍᑦ ᐅᑭᐅᓄᑦ ᐱᖓᓱᓄᑦ ᐅᖓᑖᓅᙱᑦᑐᖅ, ᑲᑎᒪᔩᓪᓗ ᐊᕐᕕᓂᓖᑦ ᑐᙶᓃᔾᔮᙱᓚᑦ ᖁᓕᑦ ᐅᖓᑖᓃᔾᔮᓇᑎᒡᓗ.
ᓰᓇ ᐊᑯᒪᓕᒃ
ᓰᓇ ᐊᑯᒪᓕᒃ 15 ᐅᖓᑖᓄᑦ ᐅᑭᐅᓄᑦ ᐱᓕᕆᖃᑦᑕᖅᓯᒪᕗᖅ ᓄᓇᕗᑦ ᒐᕙᒪᒃᑯᓐᓂ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ. ᐱᓕᕆᐊᖃᓪᓗᐊᑕᖅᓯᒪᓂᕐᒥᓄᑦ ᐅᖅᓱᐊᓗᓕᕆᔨᒃᑯᓐᓄᑦ, ᖃᐅᔨᒪᑦᑎᐊᕐᒪᑦ ᓯᕗᓪᓕᖅᐸᐅᖃᑕᐅᕙᖅᖢᓂᓗ ᐱᓕᕆᖃᑦᑕᖅᓯᒪᓂᑰᖕᒪᑦ ᐅᖅᓱᐊᓗᓕᕆᔾᔪᓯᕐᓂᒃ, ᐆᒻᒪᖅᑯᑎᖃᖅᑎᑦᑎᕙᒃᑐᓂᒃ ᐅᑭᐅᖅᑕᖅᑐᒥ. ᖃᖓᑦᑎᐊᓵᖅ, ᓂᕈᐊᖅᑕᐅᓯᒪᓪᓗᓂ ᑲᑎᒪᔨᐅᖃᑕᐅᓚᐅᖅᐳᖅ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᓄᓇᒥᓂ ᒥᑦᑎᒪᑕᓕᖕᒥ.
ᓵᓚᑲᐅᓯᐊᖅᓯᒪᓪᓗᓂ ᖁᙱᐊᖅᑕᐅᕙᒃᑐᓄᑦ ᖁᙱᐊᖅᑎᑦᑎᔨᐅᓪᓗᓂ, ᓰᓇ ᐱᒋᐊᖅᑎᑦᑎᓚᐅᖅᓯᒪᕗᖅ ᐊᐅᓚᑦᑎᔨᒋᔭᐅᓪᓗᓂᓗ ᑐᓄᓂᕐᒥᐅᑦ ᖁᙱᐊᖅᑎᑦᑎᔨᓂᒃ, ᑕᑯᒃᓴᐅᑎᑦᑎᓯᒪᓪᓗᓂ ᐃᓕᖅᑯᓯᑐᖃᒃᑯᑦ ᐱᓕᕆᔾᔪᓯᐅᕙᒃᑐᓂᒃ ᐳᓚᕋᖅᑎᓄᑦ ᓇᑭᕈᓘᔭᖅ ᓄᓇᕐᔪᐊᕐᒥᙶᖅᑐᓄᑦ. ᐊᖏᔪᑲᓪᓚᖕᒥᒃ ᖃᐅᔨᒪᓂᖃᖅᓂᕐᒥᓄᑦ ᐃᓄᐃᑦ ᐊᑐᖅᐸᒃᑕᑐᖃᖏᓐᓂᒃ, ᐃᓕᖅᑯᓯᑐᖃᖏᓐᓂᒃ ᐅᖃᐅᓯᖏᓐᓂᒡᓗ, ᓰᓇ ᑕᕝᕗᙵᐅᔾᔨᕗᖅ ᓴᙱᔪᒥᒃ ᓄᓇᓕᖕᓄᑦ−ᑕᐅᑐᒐᖃᓪᓗᐊᑕᖅᑐᓂᒃ ᐊᔪᕈᓐᓃᖅᓯᒪᔭᒥᓂᒃ ᑖᒃᑯᓄᖓ ᑲᑎᒪᔨᓄᑦ.
ᐅᑲᓕᖅ ᐃᔨᑦᓯᐊᖅ
ᐅᑲᓕᖅ ᐃᔨᑦᓯᐊᖅ ᖃᐅᔨᒪᖅᑎᐊᖅᐳᖅ ᑐᑭᓯᐊᑦᑎᐊᖅᖢᓂᓗ ᐃᓄᐃᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ ᑲᓇᑕᒥ ᓄᓇᕐᔪᐊᕐᒥᓗ. ᖃᖓᑦᑎᐊᒡᓴᖅ, ᐅᑲᓕᖅ ᑲᑎᒪᑎᑦᑎᔨᐅᓚᐅᖅᐳᖅ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᕐᔪᐊᖏᓐᓄᑦ, ᐊᒻᒪᓗ, ᑖᔅᓱᒪ ᑭᖑᓂᐊᓂ, ᐊᖓᔪᖅᑳᕆᔭᐅᓚᐅᖅᓯᒪᕗᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ. ᐃᖅᑲᓇᐃᔭᖃᑦᑕᖅᑎᓪᓗᒍ, ᐅᑲᓕᖅ ᐱᒻᒪᕆᖕᓂᒃ ᐃᖅᖃᓇᐃᔮᖃᖃᑦᑕᖅᓯᒪᕗᖅ ᐅᑯᓇᓂ, ᐃᓄᐃᑦ ᑕᐱᕇᑦ ᑲᓇᑕᒥ, ᓄᓇᕗᑦ ᑐᙵᕕᒃᑯᓐᓂ, ᐊᒻᒪᓗ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑐᓕᕆᔨᒃᑯᖏᓐᓂ. ᒫᓐᓇ ᑖᓐᓇ ᐃᖃᓗᖕᒥᐅᑕᐅᕗᖅ.
ᑭᖑᓂᑦᑎᓐᓂ ᒫᓐᓇᓗ ᐃᓚᔭᐅᓪᓗᓂ ᐊᒥᓱᓄᑦ ᐊᑭᓕᖅᓱᖅᑕᐅᓇᑎᒃ ᑲᑐᔾᔨᖃᑎᒌᓂ ᑲᑎᒪᔨᓂᓗ, ᒫᓐᓇ ᐃᓚᒋᔭᐅᒋᕗᖅ ᐅᑯᓄᖓ, ᐅᑭᐅᖅᑕᖅᑐᒥ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑐᙵᕕᒋᔭᐅᔪᒧᑦ, ᐃᓄᐃᑦ ᑐᓴᐅᒪᑎᑦᑎᓂᕐᒧᑦ ᐊᑐᖅᐸᒃᑕᖏᓐᓄᑦ, ᐊᒻᒪᓗ ᑲᑎᒪᑎᑦᑎᔨᐅᒋᓪᓗᓂ ᓄᓇᕐᔪᐊᕐᒥᐅᓄᑦ Pikialasorsuaq ᑲᒥᓴᒋᔭᐅᔪᒧᑦ. ᒪᕐᕉᖕᓂᒃ ᐅᖃᐅᓰᖕᓂᒃ ᐅᖃᓪᓚᒍᓐᓇᖅᖢᓂ, ᐃᒃᐱᒋᔭᖃᑦᑎᐊᖅᖢᓂᓗ ᐃᓕᖅᑯᓯᑐᖃᖅᑎᒍᑦ ᐊᔾᔨᒌᙱᓐᓂᐅᔪᓂᒃ, ᐅᑲᓕᖅ ᐊᖓᔪᖅᑳᕆᔭᐅᕗᖅ Makibi Consulting, ᐃᖃᓗᖕᓂ.
ᒫᕕᓐ ᑎᐋᓐ
40−ᓂᒃ ᐅᑭᐅᓂᒃ ᐱᓕᕆᖃᑦᑕᖅᓯᒪᓂᑰᓪᓗᓂ ᐆᒻᒪᖅᑯᑎᓕᕆᕝᕕᖕᒥ ᐊᖓᔪᖅᑳᖑᓯᒪᓪᓗᓂ ᑕᒪᐃᓐᓂᒃ ᓄᓇᕗᒻᒥ ᓄᓇᑦᑎᐊᒥᓗ, ᒫᕐᕕᓐ ᑎᐋᓐ ᑐᑭᓯᐊᑦᑎᐊᖅᐳᖅ ᐆᒻᒪᖅᑯᑎᓕᕆᔾᔪᑎᓂᒃ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᑲᑎᒪᔨᖏᓐᓄᑦ. ᒫᓐᓇ, ᐃᖅᑲᓇᐃᔭᖅᑐᖅ ᓴᓇᔪᓂ ᐃᓱᒪᑕᕆᔭᐅᓪᓗᓂ ᐅᑯᓄᖓ, Sarliaq Holdings, ᑲᖏᖅᖠᓂᕐᒥ.
ᒥᔅᑕ ᑎᐋᓐ ᓂᕈᐊᖅᑕᐅᓚᐅᖅᓯᒪᔪᖅ ᒪᐃᔭᒋᔭᐅᓪᓗᓂ ᓴᓪᓕᕐᒥᐅᓄᑦ, ᐊᒻᒪᐃᓛᒃ ᑭᖑᓂᒃᑲᓐᓂᐊᒍᑦ ᒪᐃᔭᐅᑉ ᑐᒡᓕᕆᓚᐅᖅᓯᒪᒋᓪᓗᓂᐅᒃ. ᐅᑎᑭᐅᒐᓴᖕᓂ, ᐃᓚᐅᖃᑦᑕᖅᓯᒪᒋᕗᖅ ᐊᒥᓱᓂ ᑭᕙᓪᓕᕐᒥ, ᑭᕙᓪᓕᕐᒥᐅᓄᓪᓗ ᐊᕕᒃᓯᒪᓂᕆᔭᐅᔪᒧᑦ ᑲᑎᒪᔨᒋᔭᐅᔪᓄᑦ, ᐃᑲᔪᖅᑐᐃᕙᒃᖢᓂᓗ ᐊᒥᓱᓄᑦ ᓄᓇᓕᖕᓂ ᑲᑐᔾᔨᖃᑎᒌᓄᑦ.
ᑮᑦ ᐲᑕᓴᓐ
ᑮᑦ ᐲᑕᓴᓐ ᒥᓂᔅᑕᐅᓚᐅᖅᓯᒪᔪᖅ ᓄᓇᕗᑦ ᒐᕙᒪᖓᓂ ᒪᓕᒐᓕᐅᖅᑎᐅᖃᑕᐅᓪᓗᓂᓗ ᐃᖃᓗᒃᑑᑦᑎᐊᒥ ᑭᒡᒐᖅᑐᐃᓪᓗᓂ. ᑮᓇᐅᔭᓕᕆᔨᒃᑯᑦ, ᒪᓕᒐᓕᕆᔨᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓪᓗ ᐱᓕᕆᐊᒃᓴᖏᓐᓂᒃ ᑎᒍᒥᐊᖅᑎᐅᓚᐅᖅᑐᖅ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕᐅᓪᓗᓂ. ᑮᑦ ᐲᑕᓴᓐ ᒪᐃᔭᐅᓚᐅᖅᓯᒪᔪᖅ ᐃᖃᓗᒃᑑᑦᑎᐊᒥ ᒪᕐᕈᐃᖅᓱᖅᖢᓂ, ᐊᔾᔨᒌᙱᑦᑐᓂᓪᓗ ᐃᖅᑲᓇᐃᔮᖃᖃᑦᑕᖅᓯᒪᓪᓗᓂ ᐊᓯᖏᓐᓂᒃ ᒐᕙᒪᒃᑯᓐᓂ ᐊᒻᒪ ᐃᒻᒥᒃᑰᖅᑐᓄᑦ ᑲᑎᒪᔨᐅᖃᑦᑕᖅᓯᒪᓪᓗᓂ. ᐱᓕᕆᖃᑦᑕᖅᓯᒪᓪᓚᕆᒃᑐᖅ ᒐᕙᒪᒃᑯᑦ ᐱᓕᕆᕝᕕᖏᓐᓂ ᓯᕗᓕᖅᑎᐅᓪᓗᓂ, ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ ᑎᒥᖁᑎᖏᓐᓂᒃ, ᑲᑎᒪᔨᑦ ᐊᐅᓚᑦᑎᕝᕕᖏᓐᓂ ᐊᒻᒪ ᓄᓇᓕᖕᓂ ᐱᓕᕆᖃᑎᒌᓂᑦ. ᐃᖃᓗᒃᑑᑦᑎᐊᒥ ᐊᖏᕐᕋᖃᖅᑐᖅ.
ᐋᓐᓄᓘ ᓇᑲᓱᒃ
ᐋᓐᓄᓘ ᓇᑲᓱᒃ ᑲᑎᒪᔨᐅᖃᑕᐅᖃᑦᑕᖅᓯᒪᔪᖅ, ᑲᑐᔾᔨᖃᑎᒌᓄᑦ ᐊᒻᒪ ᑲᑎᒪᔨᓄᑦ ᐅᑭᐅᒐᓴᖕᓄᑦ ᐸᖕᓂᖅᑑᒥ, ᕿᑭᖅᑖᓗᖕᒥ, ᓄᓇᕘᓕᒫᒥᓗ. ᒫᓐᓇ ᑲᑎᒪᑎᑦᑎᔨᐅᔪᖅ ᓄᓇᕗᑦ ᐸᕐᓇᐃᔨᖏᑕ ᑲᑎᒪᔨᖏᓐᓄᑦ, ᓄᓇᓕᖕᓂ ᑐᓴᐅᒪᑎᑦᑎᕙᒃᖢᓂ, ᐸᕐᓇᐃᕙᒃᖢᓂᓗ ᑲᑎᒪᓂᒃᓴᓂᒃ. ᐋᓐᓄᓘ ᓇᑲᓱᒃ ᐱᓕᕆᖃᑦᑕᖅᓯᒪᔪᖅ ᓄᓇᒥ ᐆᒪᔪᕐᓂᐊᖅᑎᐅᓪᓗᓂ ᐊᒻᒪ ᐃᖃᓗᓕᕆᔨᐅᓪᓗᓂ, ᓇᓄᓕᕆᔨᐅᓪᓗᓂ ᐊᒻᒪ ᑐᑭᓯᒋᐊᖅᑎᑦᑎᔨᒋᔭᐅᓪᓗᓂ. ᐃᓕᓐᓂᐊᕌᓂᒃᓯᒪᔪᖅ ᐊᕙᑎᑦᑎᓐᓂ ᑐᐊᕕᕐᓇᖅᑐᓄᑦ ᖃᓄᐃᓕᐅᕆᐊᖃᕐᓂᕐᒥᒃ, ᐱᖏᖕᓇᖅᑐᓕᕆᔨᓂᑦ ᐊᐅᓚᑦᑎᓂᕐᒧᑦ ᐃᓕᓐᓂᐊᖅᓯᒪᓪᓗᓂ, ᐊᔾᔨᒌᙱᑦᑐᓂᓪᓗ ᐃᓕᓐᓂᐊᒐᒃᓴᓂᑦ ᐸᓖᓯᒃᑯᑎᒍᑦ. ᐋᓐᓄᓘ ᐸᖕᓂᖅᑑᒥᐅᑕᐅᔪᖅ.
ᓂᑰᓪ ᔮᕕᓐ
ᓂᑰᓪ ᔮᕕᓐ ᐃᖅᑲᓇᐃᔭᕈᓐᓃᓚᐅᖅᑐᖅ ᒥᓂᔅᑕᐅᑉ ᑐᒡᓕᕆᓪᓗᓂᐅᒃ ᑲᓇᑕᒥᐅᓂ ᐅᑭᐅᖅᑕᖅᑐᒥ ᐱᕙᓪᓕᐊᑎᑦᑎᓂᕐᒧᑦ ᑐᑦᑕᕐᕕᒋᔭᐅᔪᒥᑦ 2011−ᒥ. ᐱᓕᕆᕝᕕᖃᖃᑦᑕᑦᑎᐊᖅᓯᒪᕗᖅ ᒐᕙᒪᒃᑯᓐᓂᒃ, ᓄᓇᓕᖕᓂᒃ ᐃᓄᖕᓂᒡᓗ ᑲᔪᓯᑎᑉᐸᓪᓕᐊᔪᒪᓪᓗᒍ ᐱᕙᓪᓕᐊᔪᓕᕆᓂᖅ ᐅᑭᐅᖅᑕᖅᑐᒥ ᓄᓇᕗᒻᒥᓗ ᓇᒧᙵᕈᓘᔭᖃᑦᑕᖅᓯᒪᓪᓗᓂ. ᑲᑎᒪᔨᐅᖃᑕᐅᕗᖅ Gwich'in ᐱᕙᓪᓕᐊᓂᕐᒧᑦ ᑯᐊᐳᕇᓴᒋᔭᐅᔪᒧᑦ ᐃᓅᕕᖕᒥ, ᖃᐅᔨᓴᖅᑐᓕᕆᓂᕐᒧᑦ, ᐃᓂᒋᔭᐅᔪᒥ ᓄᑕᖅᑲᑦ ᐋᓐᓂᐊᕕᖓᓄᑦ ᐅᐊᖕᓇᖓᓂ ᐊᓐᑎᐅᕆᐅᒥᐅᑦ, ᐊᒻᒪᓗ ᐅᑯᓄᖓ, Five Lakes Club ᑯᐸᐃᖕᒥ. ᒥᔅ ᔮᕕᓐ ᐃᓕᑕᕆᔭᐅᔾᔪᑎᑖᖅᓯᒪᔪᖅ ᒪᓕᒐᓕᕆᓂᕐᒧᑦ, LL.L. Magna cum Laude, ᓇᓗᓇᐃᒃᑯᑕᖃᖅᖢᓂ ᓄᓇᕐᔪᐊᒥ ᑲᑐᔾᔨᐊᑎᒌᓂᒃ ᐊᒻᒪᓗ, Bachelor of Arts−ᖃᖅᖢᓂ ᑐᓴᐅᒪᑎᑦᑎᓂᕐᒧᑦ ᓯᓚᑦᑐᖅᓴᕐᕕᒡᔪᐊᕐᒥᑦ ᐋᑐᕚᒥ. ᐃᓚᒋᔭᐅᓚᐅᖅᓯᒪᕗᖅ ᑯᐸᐃᖕᒥ ᐱᖁᔭᓕᕆᔨᓄᑦ ᒫᓐᓇᓗ ᓄᓇᖃᖅᖢᓂ ᐋᑐᕚᒥ.