ᐃᖃᓗᐃᑦ, ᓄᓇᕗᑦ (ᐋᒌᓯ 15, 2019) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᓪᓗᒥ ᑐᓴᖅᑎᑦᑎᖅᑲᐅᕗᑦ ᒪᓕᒐᓕᐅᖅᑎᑦ ᑲᑎᒪᔨᖏᑦ ᑎᒃᑯᐊᖅᑕᐅᔪᓂᑦ ᐊᖏᓚᐅᕐᓂᖏᓐᓂᒃ ᐅᑯᓂᖓ ᐋᓐᑐᕈ ᓇᑲᓱᒃ, ᑮᑦ ᐲᑕᓴᓐ, ᐊᒻᒪ ᒫᑕ ᓕᓂᐅ ᐆᒻᒪᖅᑯᑎᓕᕆᔨᒃᑯᓐᓄᑦ ᑲᑎᒪᔨᐅᓂᐊᓕᖅᑐᓂᑦ. ᐊᒻᒪᓗᑦᑕᐅᖅ, ᒪᓕᒐᓕᐅᖅᑎᑦ ᑲᑎᒪᔨᖏᑦ ᐊᖏᓚᐅᕆᓪᓗᑎᒃ ᓯᒥᐅᓂ ᐊᒃᐸᓕᐊᓗᒃ ᐃᒃᓯᕙᐅᑕᕐᒧᑦ ᑎᒃᑯᐊᖅᑕᐅᓂᖓᓄᑦ ᐊᒻᒪ ᑮᑦ ᐲᑕᓴᓐ ᐃᒃᓯᕙᐅᑕᐅᑉ ᑐᒡᓕᐊᓄᑦ ᑲᑎᒪᔨᓄᑦ. ᐃᒃᓯᕙᐅᑕᒧᑦ ᑐᖓᓕᐊᓄᓪᓗ ᑎᒃᑯᐊᖅᑕᐅᓯᒪᓂᐊᖅᐳᑦ ᒪᐃ 2020-ᒧᑦ ᑎᑭᓪᓗᒍ ᐊᒻᒪ ᑲᑎᒪᔨᓄᑦ ᑎᒃᑯᐊᖅᑕᐅᔪᑦ ᐊᕐᕌᒍᓄᑦ ᐱᖓᓱᓄᑦ ᑲᑎᒪᔨᐅᓂᐊᖅᖢᑎᒃ.
“ᖁᔭᓐᓇᒦᕈᒪᔭᒃᑲ ᐴᑦ ᕉᔅ, ᕋᓂ ᑳᒻᐳᓪ, ᓂᐅᓪᓴᓐ ᐱᔅᑯ, ᐊᒻᒪ ᐱᓕᑉ ᑲᓚᒃ ᑲᑎᒪᔨᓄᑦ ᐃᑲᔪᕐᓂᖃᑦᑎᐊᓚᐅᕐᒪᑕ ᑲᑎᒪᕝᕕᖓ ᐃᓱᓕᓐᓇᓱᖕᓂᖓᓄᑦ," ᒪᓕᒐᓕᐅᖅᑎ ᔩᓂ ᐃᕼᐊᓗᐊᒃ ᐅᖃᖅᑐᖅ, ᒥᓂᔅᑕᕆᔭᐅᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. “ᐃᑲᔪᕐᓂᖃᑦᑎᐊᓚᐅᖅᐳᑦ ᐋᖅᑭᒃᓱᐃᑎᓪᓗᒋᑦ ᐆᒻᒪᖅᑯᑎᓕᕆᔨᒃᑯᑦ ᐊᑯᓂᐅᔪᒧᑦ ᐸᕐᓇᐅᑎᖏᓐᓂᒃ ᖃᐅᔨᒪᑦᑎᐊᖅᐳᖓᓗ ᓯᒥᐅᓂ ᐊᒃᐸᓕᐊᓗᒃ, ᑲᑐᔾᔨᖃᑎᖃᕐᓗᓂ, ᑲᑎᒪᔨᙳᓵᖅᑐᓂᑦ ᑲᑎᒪᔨᒋᔭᐅᖏᓐᓇᖅᑐᓂᓪᓗ, ᓱᓕ ᐱᕙᓪᓕᐊᑎᑦᑎᓂᐊᕐᓂᖏᓐᓂᒃ ᐆᒻᒪᖅᑯᑎᓕᕆᔨᒃᑯᑦ ᑲᑎᒪᔨᖏᑕ ᑕᐅᑐᖅᑰᖅᑕᖏᓐᓂᒃ.”
ᐴᑦ ᕉᔅ ᐃᒃᓯᕙᐅᑕᐅᓂᖓ ᐃᓱᓕᓚᐅᖅᑎᓪᓗᒍ ᒪᐃ 2019-ᒥ, ᓯᒥᐅᓂ ᐊᒃᐸᓕᐊᓗᒃ ᐃᒃᓯᕙᐅᑕᐅᑉ ᑐᒡᓕᐊᓄᑦ ᐃᓇᖐᓯᒪᓕᓚᐅᖅᐳᖅ. ᐃᒃᓯᕙᐅᑕᒧᑦ ᑐᒡᓕᕆᔭᐅᓯᒪᓕᖅᑐᖅ ᒪᐃ 2018−ᒥ ᐱᒋᐊᖅᖢᓂ ᑲᑎᒪᔨᐅᖃᑕᐅᓯᒪᓕᖅᖢᓂᓗ ᒪᐃ 2017−ᒥ ᐱᒋᐊᖅᖢᓂ. ᒪᓕᒐᓕᐅᖅᑎᑦ ᑲᑎᒪᔨᖏᑦ ᐊᖏᓚᐅᕆᕗᑦ ᔪᐊᓂ ᐸᓪᓗᖅ ᑲᑎᒪᔨᒧᑦ ᓄᖅᑲᕈᒪᓂᖓᓄᑦ ᐅᑐᐱᕆ 2018−ᒥ ᑎᒃᑯᐊᖅᑕᐅᓚᐅᖅᓯᒪᓪᓗᓂ, ᔪᓚᐃ 2019-ᒥᓗ ᓄᖅᑲᓚᐅᖅᖢᓂ.
ᓄᑖᓂᒃ ᑎᒃᑯᐊᖅᑕᐅᔪᖃᖅᑎᓪᓗᒍ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ 8−ᓂᒃ ᑲᑎᒪᔨᖃᕐᓂᐊᓕᖅᐳᑦ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑳᑦᕆᓐ ᕕᑎᑯ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ
(867) 979-7513
ᐱᓕᕆᐊᖑᓯᒪᔪᑦ
ᖁᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ ᓄᓇᕗᒻᒥ ᑎᒥᒋᔭᐅᕗᑦ ᐱᓇᓱᐊᒐᖃᖅᖢᑎᒡᓗ ᐆᒻᒪᖅᑯᑎᖃᖅᑎᑦᑎᕙᒡᓗᑎᒃ ᓄᓇᓕᖕᓂ ᓄᓇᕗᒻᒥ. ᐆᒻᒪᖅᑯᑎᓕᕆᔨᒃᑯᑦ ᓇᖕᒥᓂᖁᑎᒋᔭᐅᔪᖅ ᓄᓇᕗᑦ ᒐᕙᒪᒃᑯᖏᓐᓂ, ᐊᐅᓚᓪᓗᑎᒡᓗ ᓴᓂᐊᒍᑦ, ᐅᓂᒃᑳᓕᐅᖅᐸᒃᖢᑎᒃ ᒥᓂᔅᑕᒧᑦ ᐆᒻᒪᖅᑯᑎᓕᕆᔨᒃᑯᓐᓄᑦ. ᑖᓐᓇ ᑯᐊᐳᕇᓴᐅᔪᖅ ᐊᐅᓚᐅᑎᖃᖅᑐᑑᕗᖅ ᐊᒻᒪᓗ ᖃᐅᒻᒪᖅᑯᑎᑎᒍᑦ ᐊᐅᓪᓛᖅᑎᑦᑎᒍᓐᓇᖅᑐᑑᓪᓗᓂ ᓄᓇᕗᒻᒥ, ᐊᐅᓚᑦᑎᓪᓗᑎᒃ 25−ᓂᑦ ᐊᐅᓚᐅᑎᖃᕐᕕᖕᓂᑦ 25−ᓂᑦ ᓄᓇᓕᖕᓂ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑕ ᐱᖁᔭᖓᑕ ᐃᓗᐊᓂ, ᐃᒃᓯᕙᐅᑕᖓ ᑐᒡᓕᐊᓗ ᑲᑎᒪᔨᓂᑦ ᑎᓕᔭᐅᖃᑦᑕᕐᓂᐊᖅᐳᑦ ᒥᓂᔅᑕᒧᑦ ᑖᒃᑯᓇᙵᑦ ᑲᑎᒪᔨᓂᑦ. ᑲᑎᒪᔩᑦ ᑎᒃᑯᐊᖅᑕᐅᖃᑦᑕᖅᐳᑦ ᒥᓂᔅᑕᒧᑦ ᐊᕐᕌᒍᑦ ᐱᖓᓱᑦ ᐅᖓᑖᓅᙱᑦᑐᖅ, ᑲᑎᒪᔩᓪᓗ ᐊᕐᕕᓂᓖᑦ ᑐᙶᓃᔾᔮᙱᓚᑦ ᖁᓕᑦ ᐅᖓᑖᓃᔾᔮᓇᑎᒡᓗ.
ᑎᒃᑯᐊᖅᓯᓃᑦ
ᓯᒥᐅᓂ ᐊᒃᐸᓕᐊᓗᒃ
ᓯᒥᐅᓂ ᐊᒃᐸᓕᐊᓗᒃ ᒫᓐᓇ ᐃᖃᓗᖕᓂ ᓄᓇᖃᖅᑐᖅ ᓄᓇᑦᓯᐊᒥᐅᑕᐅᓚᐅᖅᓯᒪᓪᓗᓂᓗ, ᐋᓐᑎᐅᕆᐅᒥ ᐊᒻᒪ ᐳᕆᑎᔅ ᑲᓚᒻᐱᐊᒥ ᐃᖅᑲᓇᐃᔭᖅᑎᒻᒪᕆᐅᑎᓪᓗᒍ. ᖃᐅᔨᒃᑲᐃᔨᒋᔭᐅᓚᐅᖅᓯᒪᔪᖅ ᐸᓐᓂᖅᑑᒥ ᕼᐋᒻᒪᓚᑦᑯᖏᓐᓄᑦ, ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᓄᓇᕗᑦ ᒐᕙᒪᖓᓂ ᐊᒻᒪ ᓄᓇᓕᖕᓂ ᓇᖕᒥᓂᓕᕆᓂᕐᒧᓪᓗ. ᐱᔪᒃᓯᑦᑎᐊᖏᓐᓇᕐᓂᖓᓄᑦ ᐊᓯᐊᒍᑦ ᐆᒻᒪᖅᑯᑎᓕᐅᕐᓂᕐᒥᒃ ᐊᑑᑎᖃᓪᓚᕆᒃᓯᒪᕗᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᑎᒪᔨᖏᓐᓄᑦ. ᓯᒥᐅᓂ ᐊᒃᐸᓕᐊᓗᒃ ᓇᖕᒥᓂᖅ ᐊᐅᓚᑦᑎᔨᐅᓂᕐᒧᑦ ᐃᓕᑕᕆᔭᐅᔾᔪᑎᑖᖅᓯᒪᓪᓗᓂ ᐳᕆᑎᔅ ᑲᓚᒻᐱᐊᒥ ᓂᑯᓚ ᕚᓕ ᐱᓕᕆᕝᕕᖕᒥ ᓄᑖᙳᖅᐸᓪᓕᐊᔪᓂᑦ.
ᑮᔅ ᐲᑐᓴᓐ
ᑮ ᐲᑕᓴᓐ ᒥᓂᔅᑕᐅᓚᐅᖅᓯᒪᔪᖅ ᓄᓇᕗᑦ ᒐᕙᒪᖓᓂ ᒪᓕᒐᓕᐅᖅᑎᐅᖃᑕᐅᓪᓗᓂᓗ ᐃᖃᓗᒃᑑᑦᑎᐊᒥ ᑭᒡᒐᖅᑐᐃᓪᓗᓂ. ᑮᓇᐅᔭᓕᕆᔨᒃᑯᑦ, ᒪᓕᒐᓕᕆᔨᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓪᓗ ᐱᓕᕆᐊᒃᓴᖏᓐᓂᒃ ᑎᒍᒥᐊᖅᑎᐅᓚᐅᖅᑐᖅ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕᐅᓪᓗᓂ. ᑮ ᐲᑕᓴᓐ ᒪᐃᔭᐅᓚᐅᖅᓯᒪᔪᖅ ᐃᖃᓗᒃᑑᑦᑎᐊᒥ ᒪᕐᕈᐃᖅᓱᖅᖢᓂ, ᐊᔾᔨᒌᙱᑦᑐᓂᓪᓗ ᐃᖅᑲᓇᐃᔮᖃᖃᑦᑕᖅᓯᒪᓪᓗᓂ ᐊᓯᖏᓐᓂᒃ ᒐᕙᒪᒃᑯᓐᓂ ᐊᒻᒪ ᐃᒻᒥᒃᑰᖅᑐᓄᑦ ᑲᑎᒪᔨᐅᖃᑦᑕᖅᓯᒪᓪᓗᓂ. ᐱᓕᕆᖃᑦᑕᖅᓯᒪᓪᓚᕆᒃᑐᖅ ᒐᕙᒪᒃᑯᑦ ᐱᓕᕆᕝᕕᖏᓐᓂ ᓯᕗᓕᖅᑎᐅᓪᓗᓂ, ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ ᑎᒥᖁᑎᖏᓐᓂᒃ, ᑲᑎᒪᔨᑦ ᐊᐅᓚᑦᑎᕝᕕᖏᓐᓂ ᐊᒻᒪ ᓄᓇᓕᖕᓂ ᐱᓕᕆᖃᑎᒌᓂᑦ. ᐃᖃᓗᒃᑑᑦᑎᐊᒥ ᐊᖏᕐᕋᖃᖅᑐᖅ.
ᐋᓐᓄᕈ ᓇᑲᓱᒃ
ᐋᓐᑐᕈ ᓇᑲᓱᒃ ᑲᑎᒪᔨᕋᓛᓄᑦ, ᑲᑐᔾᔨᖃᑎᒌᓄᑦ ᐊᒻᒪ ᑲᑎᒪᔨᓄᑦ ᐃᓚᒋᔭᐅᖃᑦᑕᖅᓯᒪᒻᒪᕆᒃᑐᖅ ᐊᕐᕌᒍᓄᑦ ᐅᓄᖅᑐᓄᑦ ᐸᓐᓂᖅᑑᒥ ᕿᑭᖅᑖᓗᖕᒥᓗ. ᒫᓐᓇ ᓄᓇᕗᒻᒥ ᐸᕐᓇᐃᔨᑦ ᑲᑎᒪᔨᖏᓐᓄᑦ ᐃᒃᓯᕙᐅᑕᕆᔭᐅᔪᖅ. ᐋᓐᑐᕈ ᓇᑲᓱᒃ ᐱᓕᕆᖃᑦᑕᖅᓯᒪᒻᒪᕆᒃᑐᖅ ᓄᓇᒥ ᐆᒪᔪᕐᓂᐊᖅᑎᐅᓪᓗᓂ ᐊᒻᒪ ᐃᖃᓗᓕᕆᔨᐅᓪᓗᓂ, ᓇᓄᓕᕆᔨᐅᓪᓗᓂ ᐊᒻᒪ ᑐᑭᓯᒋᐊᖅᑎᑦᑎᔨᒋᔭᐅᓪᓗᓂ. ᐃᓕᓐᓂᐊᕌᓂᒃᓯᒪᔪᖅ ᐊᕙᑎᑦᑎᓐᓂ ᑐᐊᕕᕐᓇᖅᑐᓄᑦ ᖃᓄᐃᓕᐅᕆᐊᖃᕐᓂᕐᒥᒃ, ᐱᖏᖕᓇᖅᑐᓕᕆᔨᓂᑦ ᐊᐅᓚᑦᑎᓂᕐᒧᑦ ᐃᓕᓐᓂᐊᖅᓯᒪᓪᓗᓂ, ᐊᔾᔨᒌᙱᑦᑐᓂᓪᓗ ᐃᓕᓐᓂᐊᒐᒃᓴᓂᑦ ᐸᓖᓯᒃᑯᑎᒍᑦ. ᐋᓐᑐᕈ ᐸᓐᓂᖅᑑᒥᐅᑕᐅᔪᖅ.
ᒫᑕ ᓕᓂᐅ
ᒫᑕ ᓕᓂᐅ ᐃᓱᒪᒋᔭᒥᓂᒃ ᑐᓴᖅᑎᑦᑎᖃᑦᑕᖅᐳᖅ ᓄᓇᕐᔪᐊᕐᒥ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᑎᒪᔨᖏᓐᓄᑦ. ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓕᕆᔨᒻᒪᕆᐅᓪᓗᓂ ᓄᓇᕐᔪᐊᒥ ᓂᕐᔪᑎᓕᕆᓂᕐᒧᑦ ᑮᓇᐅᔭᓂᒃ ᑲᓇᑕᒥ, ᓘᒃᑖᖅ, ᓕᓂᐅ ᖃᐅᔨᒪᓂᖓ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᑦ ᐱᓕᕆᔾᔪᑎᖏᓐᓂᒃ ᐊᒻᒪ ᐆᒻᒪᖅᑯᑎᑦ ᐋᖅᑭᒋᐊᕈᑎᒃᓴᖏᓐᓂᒃ ᐃᓚᓕᐅᔾᔨᕗᖅ ᐅᑭᐅᖅᑕᖅᑑᑉ ᐊᕙᑎᖓᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᔨᑦᑎᕋᖅᐸᒃᑕᖏᓐᓂᒃ. ᐊᕐᕌᒍᓂᑦ ᖁᓕᓂᑦ ᓄᓇᕐᔪᐊᓕᒫᒥ ᐱᓕᕆᕐᔪᐊᖃᑦᑕᖅᓯᒪᓂᖓ ᓯᕿᓂᕐᒧᑦ ᐆᒻᒪᖅᑯᑎᓂᒃ ᐊᑐᖅᑎᑕᐅᓂᖓᓂ ᐃᑲᔪᕈᑕᐅᕗᖅ ᐱᔭᕇᖅᓯᒪᓂᖓᓄᑦ ᓄᑭᓪᓚᐅᑎᖃᖅᑎᑦᑎᓂᕐᒧᑦ ᐋᖅᑭᒃᓱᐃᓂᕐᒧᑦ ᓯᓚᑦᑐᖅᓴᕐᕕᒡᔪᐊᕐᒥ New South Wales-ᒥ, ᐊᒻᒪ ᖃᐅᔨᓴᖅᑐᓕᕆᓂᕐᒧᑦ ᐃᓕᑕᕆᔭᐅᔾᔪᑎᑖᕐᓂᕐᒧᑦ ᓯᓚᑦᑐᖅᓴᕐᕕᒡᔪᐊᕐᒥ ᐅᐊᑕᓘᒥ. ᓘᒃᑖᖅ ᓕᓂᐅ ᐃᖃᓗᖕᓂ ᓄᓇᖃᖅᑐᖅ.