ᓄᓇᕗᓕᒫᒥ (ᓄᕕᐱᕆ 1, 2022) − ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᓴᖅᑎᑦᑎᕗᑦ ᓄᓇᕗᓕᒫᒥ ᐆᒻᒪᖅᑯᑎᑦ ᐊᑭᒋᓂᐊᓕᖅᑕᖏᓐᓂᒃ ᐊᑭᓕᖅᓱᐃᔨᓄᑦ. ᒪᓕᒐᓕᐅᖅᑎ ᑯᕋᐃᒡ ᓯᒪᐃᓚᒃ, ᒥᓂᔅᑕ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ, ᐊᖏᓚᐅᖅᐳᖅ ᐅᑯᓄᖓ ᓄᑖᓄᑦ ᐊᑭᒋᓂᐊᓕᖅᑕᖏᓐᓄᑦ ᐊᑐᓯᒋᐊᖁᔭᐅᓪᓗᓂ ᐅᑐᐱᕆ 1, 2022-ᒥ:
-
ᒐᕙᒪᐅᙱᑦᑐᓂᑦ ᐊᖏᕐᕋᖃᖅᑐᓄᑦ ᐊᑭᓕᖅᓱᖅᑕᐅᔪᑦ 62 ᓴᓐᔅ ᑕᒪᐃᓐᓄᑦ ᑭᓗᕚᑦ ᐃᑲᕐᕋᒧᑦ
- ᓄᓇᕗᒻᒥ ᐅᒻᒪᖅᑯᑎᓄᑦ ᐃᑲᔫᓯᐊᖓᑦ ᒪᓕᒃᖢᒍ, ᒐᕙᒪᐅᙱᑦᑐᑦ ᐊᖏᕐᕋᖃᖅᑐᓕᒫᑦᑎᐊᑦ ᐊᑭᓕᖅᓱᐃᔨᑦ ᐃᖃᓗᐃᑦ ᐊᑭᓕᖅᓱᖅᑕᖓᑕ 50−ᐳᓴᖓᓂ ᐊᑭᓕᖅᓱᐃᓂᐊᓕᖅᐳᑦ (ᒫᓐᓇ 31 ᓴᐅᓪᓗᓂ ᑕᒪᐃᓐᓄᑦ ᑭᓗᕚᑦ ᐃᑲᕐᕋᒧᑦ) ᐆᒻᒪᖅᑯᑎᒥ ᐊᑐᖃᑦᑕᖅᑐᑦ 700 ᑭᓗᕙᑦᒧᑦ ᑎᑭᖦᖢᒍ ᐊᐃᕆᓕ 1−ᒥ ᓯᑎᐱᕆ 30−ᒧᑦ ᐊᒻᒪᓗ 1000 ᑭᓗᕚᑦ ᐃᑲᕐᕋᒧᑦ ᐅᑐᐱᕆ 1−ᒥᑦ ᒫᑦᓯ 31−ᒧᑦ. ᑕᒪᕐᒥᒃ ᐊᑐᖅᑕᐅᖃᑦᑕᖅᑐᑦ ᐃᑲᔫᓯᐊᖓᑕ ᑭᒡᓕᖓᓄᑦ ᖄᖏᐅᑎᔪᑦ ᐊᑭᓕᒐᒃᓴᙳᖅᑎᑕᐅᖃᑦᑕᕐᓂᐊᖅᐳᑦ ᐊᑕᖏᕐᓗᒍ. ᓄᓇᕗᓕᒫᒥ ᐊᑭᖓᑕ ᐋᖅᑭᒃᓯᒪᓂᖓ ᐊᑐᓗᐊᙱᑉᐹᓪᓕᕈᑕᐅᓪᓚᕆᖕᓂᐊᖅᐳᖅ ᐊᑭᓕᖅᓱᐃᕙᒃᑐᓄᑦ ᑕᖅᑭᑕᒫᑦ ᐊᑐᖃᑦᑕᖅᑕᖏᑦ ᖄᖏᐅᑎᖃᑦᑕᖅᑐᑦ ᓄᓇᕗᒻᒥ ᐃᑲᔫᓯᐊᓂ.
- ᒐᕙᒪᐅᙱᑦᑐᓂᑦ ᐱᓕᕆᕝᕕᖃᖅᑐᓄᑦ ᐊᑭᓕᖅᓱᖅᑕᐅᔪᑦ 51 ᓴᓐᔅ ᑕᒪᐃᓐᓄᑦ ᑭᓗᕚᑦ ᐃᑲᕐᕋᒧᑦ
- ᒐᕙᒪᒃᑯᓐᓂ ᐊᖏᕐᕋᖃᖅᑐᓄᑦ ᐊᑭᓕᖅᓱᖅᑕᐅᔪᑦ 93 ᓴᓐᔅ ᑕᒪᐃᓐᓄᑦ ᑭᓗᕚᑦ ᐃᑲᕐᕋᒧᑦ
- ᒐᕙᒪᒃᑯᓐᓂ ᐱᓕᕆᕝᕕᖃᖅᑐᓄᑦ ᐊᑭᓕᖅᓱᖅᑕᐅᔪᑦ 87 ᓴᓐᔅ ᑕᒪᐃᓐᓄᑦ ᑭᓗᕚᑦ ᐃᑲᕐᕋᒧᑦ
ᑭᓇᐅᔭᓕᕆᓂᕐᒧᑦ ᐊᒃᑐᖅᑕᐅᙱᓐᓂᖅᓴᐅᖁᓪᓗᒍ ᐊᓯᔾᔨᖅᑕᐅᑎᓪᓗᒍ ᐊᑭᖓ ᒐᕙᒪᐅᙱᑦᑐᓂᑦ ᐊᖏᕐᕋᖃᖅᑐᓄᑦ ᐊᒻᒪᓗ ᐱᓕᕆᕝᕕᖃᖅᑐᓄᑦ ᐊᑭᓕᖅᓱᐃᔨᓄᑦ, ᒐᕙᒪᒃᑯᓐᓂ ᐆᒻᒪᖅᑯᑎᓄᑦ ᐊᑭᒋᓂᐊᖅᑕᖏᑦ ᒐᕙᒪᐅᙱᑦᑐᓄᑦ ᐊᑭᓕᖅᓱᐃᔨᓄᑦ. ᓄᑖᖑᓪᓗᓂ ᓄᓇᓕᖕᓂ ᑖᒃᓰᔭᐃᔭᖅᑎᐅᔪᑦ ᐊᖏᖅᑕᐅᓚᐅᕆᕗᖅ ᐊᔾᔨᖓᓂ ᐊᑭᓕᖅᓱᖅᑕᐅᔪᒥᑦ ᒐᕙᒪᐅᙱᑦᑐᓄᑦ ᐊᑭᓕᖅᓱᐃᔨᓄᑦ ᐊᑲᐅᙱᑦᑐᒥ ᑮᓇᐅᔭᓕᕆᓂᕐᒧᑦ ᐊᒃᑐᖅᑕᐅᖁᓇᒋᑦ ᓄᓇᖃᖅᑐᑦ. ᐅᒻᒪᖅᑯᑎᓕᕆᔨᒃᑯᑦ ᐊᖏᖅᑕᐅᓚᐅᕆᕗᑦ ᐊᖅᑯᑎᑦ ᖃᐅᒻᒪᖅᑯᑎᖏᑦ 5−ᐳᓴᒥᑦ ᐊᑭᑦᑐᕆᐊᖅᑕᐅᖁᓪᓗᒋᑦ.
“ᑖᓐᓇ ᓄᑖᖅ ᓄᓇᕗᓕᒫᒥ ᐊᑭᖓᑕ ᐋᖅᑭᒃᓯᒪᓂᖓ ᐃᒪᐃᓕᖓᕗᖅ ᐆᒻᒪᖅᑯᑎᒥᒃ ᐊᑭᓕᖅᓱᐃᔨᓕᒫᑦ ᐊᔾᔨᖓᓂ ᑕᐃᒪᓐᓇᑦᑎᐊᖅ ᐊᑭᓕᖅᓱᐃᓂᐊᖅᐳᑦ ᓇᓂᑐᐃᓐᓇᖅ ᓄᓇᖃᕋᓗᐊᕈᑎᒃ,” ᑯᕋᐃᒡ ᓯᒪᐃᓚᒃ ᐅᖃᓚᐅᖅᐳᖅ. “ᒐᕙᒪᒃᑯᑦ ᐋᖅᑭᒃᑕᖓ ᐃᑲᔫᓯᐊᖃᒃᑲᓐᓂᖁᓪᓗᒋᑦ ᐆᒻᒪᖅᑯᑎᑦ ᐃᑲᔫᑎᖏᑦ ᐱᓕᕆᖃᑎᒌᖕᓂᖅ ᐊᒻᒪᓗ ᐃᑲᔪᖅᑎᒌᖕᓂᖅ ᐊᓯᔾᔨᖅᑕᐅᔪᑦ ᐊᑐᓕᖅᑎᑕᐅᓗᑎᒃ ᓇᓕᒧᒌᖕᓂᖅᓴᒻᒪᕆᐅᓪᓗᑎᒃ ᓄᓇᕗᒻᒥᐅᓄᑦ ᐊᑭᓕᖅᓱᐃᖃᑦᑖᓂᒃᑐᓄᑦ ᐊᑭᑐᓂᖅᐹᖑᖃᑕᐅᔪᓂᒃ ᑲᓇᑕᒥ.”
"ᐊᑭᒋᓂᐊᓕᖅᑕᖏᑦ ᐆᒻᒪᖅᑯᑎᓕᕆᔨᒃᑯᓐᓄᑦ ᑲᒪᒋᔭᐅᑦᑎᐊᕐᓂᖅᓴᐅᑎᑦᑎᓂᐊᖅᐳᖅ ᑮᓇᐅᔭᖅᑖᕆᔭᐅᕙᓪᓕᐊᔭᕆᐊᓕᖕᓂᑦ ᐊᑦᑕᕐᓇᙱᑦᑐᒥᒃ ᐊᑐᕈᓐᓇᑦᑎᐊᖅᑐᒥᓪᓗ ᐆᒻᒪᖅᑯᑎᖃᖅᑎᑦᑏᓐᓇᖁᓪᓗᒋᑦ ᓄᓇᕗᒻᒥ ᐊᑭᑐᓗᐊᙱᓐᓂᖅᓴᐅᓗᓂ ᐊᑭᓕᖅᓱᐃᕙᒃᑐᓄᑦ," ᕆᒃ ᕼᐊᓐᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳᖓ ᐊᐅᓚᑦᑎᔨᒻᒪᕆᖓᓗ ᐅᖃᖅᑐᖅ. "ᑖᓐᓇ ᐊᔪᕐᓇᕈᓐᓃᖅᑎᑕᐅᓚᐅᖅᐳᖅ ᓄᓇᕗᑦ
ᒐᕙᒪᒃᑯᓐᓂ ᑮᓇᐅᔭᓕᐅᕈᑕᐅᕐᔪᐊᖅᑐᒥᑦ ᐱᔪᒥᓇᖅᓯᑎᑦᑎᒃᑲᓐᓂᖅᖢᓂ ᑭᓇᐅᔭᓕᐅᕈᑕᐅᔪᑦ ᐱᕈᖅᐸᓪᓕᐊᒃᑲᓐᓂᕈᓐᓇᖅᑐᑦ ᓄᓇᓕᖕᓂ ᓄᓇᕗᒻᒥ."
###
ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:
ᕈᓃ ᐴᓱ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7524
rboucher@qec.nu.ca