ᐃᖃᓗᐃᑦ, ᓄᓇᕗᑦ (ᒫᔾᔨ 3, 2023) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᓴᖅᑎᑦᑎᕗᑦ ᑕᑎ ᑳᓇᓕ−ᑲᓛᒃ ᑲᖏᖅᖠᓂᕐᒥᐅᑕᖅ 2022−ᒥ ᓘᕋ ᐅᓪᓗᕆᐊᖅ ᒎᑦᑎᐊᐃ ᐃᓕᓐᓂᐊᕈᓯᐊᕐᒥᒃ ᐅᑭᐅᖑᔪᖅ ᑐᓂᔭᐅᓂᖓᓂᒃ. ᓂᕈᐊᖅᑕᐅᓚᐅᖅᑐᖅ ᐊᒃᓱᕉᑎᖃᕐᓂᖓᓄᑦ ᓂᕿᖃᐃᓐᓇᖅᑎᑦᑎᓂᕐᒥᒃ ᐊᒻᒪ ᓄᓇᓕᓐᓂᑦ ᐊᑭᓕᖅᓱᖅᑕᐅᓇᓂ ᐱᓕᕆᖃᑦᑕᕐᓂᖓᓄᑦ ᓄᓇᕗᒻᒥ. ᒥᔅ ᑳᓇᓕ-ᒃᓛᒃ ᒫᓐᓇᐅᔪᖅ ᐃᓄᓕᕆᔨᐅᓂᕐᒧᑦ ᐃᓕᓐᓂᐊᖅᑐᖅ ᓅᕙ ᓯᑰᓴᒥ ᓄᓇᓕᓐᓂ ᓯᓚᑦᑐᓴᕐᕕᖓᓂ ᐃᓄᓕᕆᔨᙳᕆᐅᖅᓴᓪᓗᓂ. ᐅᑎᓛᕈᒪᔪᖅ ᓄᓇᕗᒻᒧᑦ ᐱᓕᕇᓐᓇᕐᓗᓂᓗ ᓄᓇᓕᖕᓂ ᖃᓄᐃᙱᑦᑎᐊᕐᑐᓕᕆᓂᕐᒧᑦ.
"ᐃᓕᓐᓂᐊᕈᑎᒃᓴᓂᒃ ᓂᕈᐊᖅᑕᐅᕙᓪᓕᐊᑎᓪᓗᒋᑦ, ᐱᔪᒃᓯᑎᑕᐅᖏᓐᓇᖃᑦᑕᖅᐳᖓ ᐃᓕᓐᓂᐊᕐᓂᓕᕆᓂᕐᒧᑦ ᐊᓂᒍᖅᑎᖃᑦᑕᖅᓯᒪᔭᖏᓐᓂᒃ ᓄᓇᕗᒻᒥᐅᑦ," ᒪᓕᒐᓕᐅᖅᑎ ᑯᕋᐃᒡ ᓯᒪᐃᓚᒃ ᐅᖃᖅᑐᖅ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕ. "ᐅᐱᒋᕙᕋ ᒥᔅ ᑳᓇᓕ−ᑲᓚᒃ ᖁᕕᐊᒋᔭᖃᕐᓂᖓ ᐱᐅᓯᒋᐊᖅᑎᑦᑎᓂᕐᒥᒃ ᐃᓅᓯᑦᑎᐊᕙᖕᒥᒃ ᐃᓄᖕᓄᑦ, ᐱᕙᓪᓕᐊᑎᓪᓗᒍᓗ ᓯᓚᑐᓂᕐᒥᒃ ᑲᔪᓯᑦᑎᐊᕐᓂᕐᒥᒡᓗ."
ᓴᖅᑭᑕᐅᓚᐅᖅᓯᒪᔪᖅ 2001-ᒥ, ᑯᐊᐳᕇᓴᒃᑯᑦ ᑐᓂᓯᖃᑦᑕᖅᑐᑦ $5,000-ᓂᒃ ᐃᓕᓐᓂᐊᖅᑎᓄᑦ ᐊᕐᕌᒍᑕᒫᑦ ᓄᓇᕗᒻᒥ ᐃᓕᓐᓂᐊᖅᑎᒧᑦ ᑕᑯᒃᓴᐅᑎᑦᑎᔪᒧᑦ ᐃᓕᓐᓂᐊᑎᐊᖅᓯᒪᓂᕐᒥᒃ ᐊᒻᒪᓗ ᓄᓇᓕᓐᓂ ᓯᕗᓕᖅᑎᐅᓂᕐᒥᒃ. ᑖᓐᓇ ᐃᓕᓐᓂᐊᕈᑎᒃᓴᖅ ᐃᖅᑲᐅᒪᔾᔪᑕᐅᒋᕗᖅ ᓗᐊᕋ ᐅᓪᓗᕆᐊᖅ ᒎᑦᑎᐊᐃ, ᓯᕗᓕᖅᑎᐅᓚᐅᖅᑐᖅ ᓴᖅᑭᑕᐅᕙᓪᓕᐊᑎᓪᓗᒍ ᓄᓇᕗᒻᒥᑦ ᓇᖕᒥᓂᖅ ᐆᒻᒪᖅᑯᑎᑖᕈᑎᖏᓐᓂᒃ.
"ᐊᓕᐊᓇᐃᒍᓱᒃᑐᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐃᑲᔪᕈᓐᓇᕐᒪᑕ ᑕᑎᐅᑉ ᐃᓕᓐᓂᐊᕈᑎᖏᓐᓂᑦ," ᐅᖃᖅᑐᖅ ᕆᒃ ᕼᐊᓐᑦ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᖓᔪᖅᑳᖓ ᐊᐅᓚᑦᓯᔨᒻᒪᕆᖓᓗ. "ᐱᓕᕆᖃᑦᑕᖅᓯᒪᓂᑯᖏᑦ ᓄᓇᒥᓂ ᐃᖅᑲᓇᐃᔭᖅᖢᓂ, ᐱᔪᒪᓂᖃᕐᓂᖓᓗ ᐅᖃᐅᓯᖃᕐᓂᕐᒥᒃ ᐊᔪᙱᓐᓂᕆᔭᒥᓂᒃ ᐃᓕᖅᑯᓯᑐᖃᕐᓄᓪᓗ ᖃᐅᔨᒪᔭᖏᓐᓂᒃ ᐃᑲᔪᕈᒪᓪᓗᓂ ᐊᓯᒥᓂᒃ, ᐱᐅᕗᖅ."
###
ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:
ᐱᐱ ᐱᓗᑎᐅ
ᑐᓴᐅᒪᔪᓕᕆᔨ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 222-2075
bbilodeau@qec.nu.ca