ᐃᖃᓗᐃᑦ, ᓄᓇᕗᑦ (ᐄᑉᐳᕉᓪ 10, 2018) − ᖁᓪᓕᖅ ᐆᒻᒪᖅᑯᓯᕆᔨᒃᑯᑦ ᐱᖃᑦᑕᐸᓪᓕᐊᓕᖅᑐᑦ ᑐᑦᓯᕋᐅᑎᓂᒃ ᓯᕿᕐᖑᔭᐅᔭᕐᒨᖓᔪᓄᑦ ᐊᓚᓂᐅᔪᓄᑦ. ᓄᑖᖅ ᐊᐅᓚᓂᐅᔪᓄᖅ ᐱᕕᖃᖅᑎᑦᓯᓂᐊᖅᑐᖅ ᐊᖏᕐᕋᖃᖅᑐᓂᒃ ᐊᒻᒪᓗ ᐊᑕᐅᓯᕐᒥᒃ ᓄᓇᓕᓐᓂ ᕼᐋᒻᒪᓚᒃᑯᑦ ᑎᒥᖁᑎᖓᓐᓃᙶᖅᑐᖅ ᐊᑎᓂᑦ ᓄᓇᓕᓐᓂ ᓇᒻᒥᓂᖅ ᐊᐅᒪᓕᐅᕈᓐᓇᕐᓗᑎᒃ ᐊᑐᕐᓗᑎᒃ ᒥᑭᔫᑎᓂᒃ ᐊᐅᒪᓕᐅᕈᑎᓂᒃ ᐊᐅᓪᓚᑎᑦᓯᓗᑎᓪᓗ ᐊᒥᐊᒃᑯᒥᓂᒃ ᐆᒻᒪᖅᑯᑎᓂᒃ ᐊᐅᓚᑦᓯᒍᑕᐅᓗᓂ ᖁᓪᓕᒃᑯᑦ ᐊᐅᒪᓕᐅᕈᑎᖏᓐᓄᑦ. ᑕᐅᖅᓰᒍᑕᐅᓗᓂ, ᓯᕿᕐᖑᔭᐅᔭᒃᑰᖅᑐᑦ ᖁᒥᐅᑎᑕᐅᕙᓐᓂᐊᖅᑐᖅ ᓯᕗᓂᑦᑎᓐᓂ ᐊᐅᒪᓂᒃ ᐊᑐᕈᑦᓴᖏᓐᓂᒃ.
“ᖁᓪᓕᖅ ᐆᒻᒪᖅᑯᓯᕆᔨᒃᑯᑦ” ᓯᕿᕐᖑᔭᐅᔭᕐᒨᖓᔪᖅ ᐊᐅᓚᓂᖓᑦ ᐊᑐᒃᑲᓐᓂᕈᓐᓇᖅᑐᓄᑦ ᐆᒻᒪᖅᑯᑎᓄᑦ ᐊᐅᓚᔾᔭᒋᐊᕈᑎ ᓄᓇᕗᒻᒧᑦ ᖃᓂᓪᓕᕚᓪᓕᕈᑕᐅᓂᐊᖅᓱᓂ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᒥᒃ ᓯᕗᓂᕐᒥ,” ᐅᖃᖅᑐᖅ ᒥᓂᔅᑐ ᔩᓂ ᐃᖃᓗᐊᒃ, ᑎᒍᒥᐊᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂᒃ. “ᓯᕿᕐᖑᔭᐅᔭᒃᑰᖅᑐᑦ ᐱᕕᖃᕈᑕᐅᔪᑦ ᓄᓇᕗᒻᒥᐅᓄᑦ ᐃᓚᐅᑎᓐᓂᕐᒧᑦ ᒥᑭᓪᓕᑎᕆᓂᕐᒧᑦ ᐳᓪᓚᒻᒥᒃ ᐊᓂᐊᑦᓯᓂᕐᒥᒃ ᓄᓇᕗᒻᒥ.”
ᐱᓇᓱᐊᕈᒪᔪᑦ ᕿᒥᕐᕈᒋᐊᓖᑦ ᖁᓪᓕᖅ ᐆᒻᒪᖅᑯᓯᕆᔨᒃᑯᑦ ᑐᑭᖏᓐᓂᒃ ᒪᓕᒐᖏᓐᓂᓪᓗ ᐱᔨᑦᓯᖅᑕᐅᓂᕐᒧᑦ ᐊᑦᑐᐊᔪᓂᓪᓗ ᓯᕿᕐᖑᔭᐅᔭᕐᒨᖓᔪᓄᑦ ᐊᐅᓚᓂᐅᔪᓄᑦ ᐃᒫᖓᐃᕈᑎᓄᑦ ᐊᒻᒪᓗ ᑐᑭᓯᐅᒪᔭᕆᐊᓕᓐᓄᑦ ᑲᓲᒪᖃᑎᒌᓐᓂᐅᒋᐊᓕᓐᓄᑦ ᑎᑎᖅᑲᓂᒃ ᐱᔭᕇᔭᓚᐅᙱᓂᕐᒥᓂ ᑐᑦᓯᕋᐅᑎᓂᒃ. ᖁᓪᓕᖅ ᐆᒻᒪᖅᑯᓯᕆᔨᒃᑯᑦ ᐃᓱᒪᓕᐅᕆᔪᑦ ᐊᐅᓚᓂᕐᒥᒃ ᐊᑐᕈᒪᑐᐃᓐᓇᕆᐊᓕᓐᓂᒃ ᓂᐅᕕᙱᑲᐃᓐᓇᖁᔭᐅᑦᓱᑎᒃ ᐊᐅᒪᓕᐅᕈᑎᓂᒃ ᑭᓯᐊᓂ ᑐᑦᓯᕋᐅᑎᖏᑦ ᕿᒥᕐᕈᔭᐅᓯᒪᓕᖅᐸᑕ ᐊᖏᖅᑕᐅᓯᒪᓗᑎᓪᓗ ᑎᒥᐅᔪᒧᑦ. ᐊᑐᓂᑦ ᐆᒻᒪᖅᑯᑎᓄᑦ ᐋᖅᑭᑦᑕᐅᔪᑦ ᐅᖓᑖᓅᕆᐊᖃᙱᑦᑐᑦ 10 ᑭᓗᕚᑦᔅ.
“ᖁᓪᓕᖅ ᐆᒻᒪᖅᑯᓯᕆᔨᒃᑯᑦ ᑲᔪᓯᓯᒪᐃᓐᓇᖅᐳᑦ ᐊᓪᓗᕆᐊᕈᑎᓂᒃ ᓴᓇᑐᓂᕐᒨᖓᔪᓂᒃ ᓴᓗᒪᓂᕐᒧᓪᓗ ᓴᖅᑮᒍᒪᓪᓗᑎᒃ ᐊᐅᒪᓕᐅᕈᑎᓂᒃ ᓄᓇᕗᒻᒥ,” ᐅᖃᖅᑐᖅ ᕗᕉᓄ ᐱᕆᐅᕋ, ᖁᓪᓕᖅ ᐆᒻᒪᖅᑯᓯᕆᔨᒃᑯᑦ ᐊᖓᔪᖅᑳᖓᑦ ᐊᐅᓚᑦᓯᔨᒻᒪᕆᖓᓪᓗ. “ᑐᓂᒪᓂᖃᖅᑐᒍᑦ ᕿᒥᕐᕆᓂᕐᒧᑦ ᐱᕕᑦᓴᖃᕐᓂᐅᔪᓄᑦ ᐊᑭᓕᖅᑐᐃᔨᑦᑎᓐᓄᑦ ᐊᑐᖁᓪᓗᒋᑦ ᐊᑐᒃᑲᓐᓂᕈᓐᓇᖅᑐᓂᒃ ᐊᐅᒪᓕᐅᕈᑎᓂᒃ, ᐅᖅᓱᐊᓗᑐᐃᓐᓇᕐᒥᒃ ᐊᑐᕈᓐᓃᐸᓪᓕᐊᒍᑕᐅᓗᓂ.”
ᐊᐅᓚᓂᐅᑉ ᐃᓗᓕᖏᑦ ᑎᑎᖅᑲᐃᓪᓗ ᑕᑯᔭᑦᓴᐃᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᑭᐊᖅᑭᕕᖓᓐᓂ ᐅᕙᓂ www.qec.nu.ca/customer-care/net-metering-program. ᑐᑭᓯᒋᐊᒃᑲᓐᓂᕈᒪᒍᑦᓯ ᓯᕿᕐᖑᔭᐅᔭᕐᒨᖓᔫᑉ ᐊᐅᓚᓂᐅᑉ ᒥᑦᓵᓄᑦ, ᑐᑭᓯᒋᐊᕆᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᑭᓕᖅᑐᐃᔪᓂᒃ ᑲᒪᕕᖓᓐᓂ ᐅᕙᓂ servicedesk@qec.nu.ca ᐅᕝᕙᓗ 1-866-710-4200.
###
ᑐᓴᕋᑦᓴᓄᑦ ᑐᑦᑕᕐᕕᒃ:
ᕋᓃ ᕘᓰ
ᐊᖓᔪᖅᑳᖅ, ᑎᒥᐅᔪᒧᑦ ᑐᓴᐅᒪᖃᑦᑕᐅᑎᓂᕐᒧᑦ
ᖁᓪᓕᖅ ᐆᒻᒪᖅᑯᓯᕆᔨᒃᑯᓐᓂ
(867) 979-7524
rboucher@qec.nu.ca