ᐊᑭᓕᖅᑕᐅᔭᕆᐊᓕᓐᓄᑦ ᑎᑎᕋᖅᑎ

ᐱᔪᒥᓇᑦᑎᐊᖅᑐᒥᒃ ᐃᖅᑲᓇᐃᔮᖃᕆᑦ ᐅᑭᐅᖅᑕᖅᑐᒥ!

ᖃᐅᔨᒋᐊᕈᒃ ᐃᓕᖕᓄᑦ ᐱᓕᕆᐊᒃᓴᑦᑎᐊᕙᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ! ᐃᓚᐅᕝᕕᒋᒃᑭᑦ ᐱᓇᔪᒍᒪᑦᑎᐊᖅᑐᑦ ᐱᓕᕆᔨᕗᑦ ᐱᓕᕆᖃᑦᑕᖅᓯᒪᑦᑎᐊᖅᑐᑦ ᓴᓇᕝᕕᖕᒥ ᐱᓕᕆᔨᓪᓚᕇᑦ ᐊᑦᑕᕐᓇᙱᑦᑐᒥᒃ, ᑕᑎᒋᔭᒃᓴᐅᔪᒥᒃ, ᐊᑭᑐᓗᐊᙱᑦᑐᒥᒡᓗ ᐆᒻᒪᖅᑯᑎᖃᖅᑎᑦᑎᕙᒃᖢᑕ ᓄᓇᕗᓕᒫᒥ.

ᓄᓇᕗᒻᒥ ᐃᖅᑲᓇᐃᔭᕐᓂᖅ

ᓄᓇᕗᑦ ᑲᓇᑕᒥ ᓄᑖᖑᓛᖑᔪᖅ ᐊᖏᓛᖑᓪᓗᓂᓗ ᐱᕈᖅᐸᓪᓕᐊᓛᒥᓪᓗ ᑮᓇᐅᔭᓕᐅᕈᑎᖃᖅᖢᓂ ᑲᓇᑕᒥ. ᑲᔾᔮᕐᓇᖅᖢᓂ ᓄᓇᖓ ᑕᐅᑦᑐᖃᖅᖢᓂ ᐱᕕᒃᓴᑦᑎᐊᕆᒃᖢᓂᓗ, ᐊᓕᐊᓇᐃᒋᑦᑎᐊᕐᓂᐊᖅᐸᐃᑦ ᐃᖅᑲᓇᐃᔭᕐᕕᒋᔭᕐᓂᑐᐊᖑᙱᑦᑐᖅ, ᐱᓕᕆᓐᓇᐅᙱᑦᑐᒃᑯᓪᓘᓐᓃᑦ. ᕿᒧᒃᓯᕈᒪᓐᓂᕈᕕᑦ, ᓯᑭᑑᑲᑕᒡᓗᑎᑦ, ᖃᔭᖅᑐᕐᓗᑎᑦ, ᐃᖃᓪᓕᐊᕐᓗᑎᑦ, ᕿᒥᕐᕈᔪᒪᓐᓂᕈᕕᓪᓘᓐᓃᑦ ᐃᓕᖅᑯᓯᕐᒥᓂ ᐊᑐᓪᓚᕆᒃᑐᓂᑦ ᓴᓇᙳᐊᖅᑎᓂᑦ ᓂᔾᔭᐅᓯᔭᖅᑎᓂᒡᓗ, ᓄᓇᕗᑦ ᐃᓕᖕᓄᑦ ᐃᓂᒃᓴᑦᑎᐊᕙᐅᕗᖅ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᒪᒋᔭᒃᓴᖃᖅᑐᑦ ᐊᑐᐃᓐᓇᐅᑎᑦᑎᓪᓗᑎᒃ ᐊᑦᑕᕐᓇᙱᑦᑐᒥᑦ, ᑕᑎᒋᔭᒃᓴᐅᔪᒥᒃ ᐆᒻᒪᖁᑎᒥᒃ ᐊᑭᓕᖅᓱᐃᕙᒃᑐᓕᒫᓄᑦ ᓄᓇᕗᒻᒥ. ᓇᖕᒥᓂᕆᔭᐅᔪᖅ ᓄᓇᕗᑦ ᒐᕙᒪᒃᑯᓐᓂ ᐊᐅᓚᑕᐅᓪᓗᓂᓗ ᐃᓛᒃᑰᖅᖢᑎᒃ ᓄᓇᕗᒻᒥ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᑐᐃᓐᓇᐅᑎᑦᑎᓲᖑᔪᑦ ᐆᒻᒪᖁᑎᓂᒃ ᐅᖅᑰᓴᐅᑎᓂᓪᓗ ᓄᓇᕗᒻᒥ. ᐊᓯᖏᑦ ᐆᒻᒪᖅᑯᑎᖃᕐᕖᑦ ᑲᓇᑕᒥ ᑕᑯᓪᓗᒋᓪᓕ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᔾᔨᒋᔭᐅᙱᑦᑐᒥᒃ ᐊᒃᓱᕈᕐᓇᖅᑐᖅᓯᐅᖃᑦᑕᖅᐳᑦ ᐊᐅᓚᑦᑎᖃᑦᑕᕐᒪᑕ ᐊᕙᑎᓪᓗ ᑕᓪᓕᒪᓂᒃ ᐃᓛᒃᑰᖅᑐᓂᒃ ᐊᐅᓚᐅᑎᖃᕐᕕᐊᓗᓐᓂᒃ ᐆᒻᒪᖅᑯᑎᖃᖅᑎᑦᑎᓪᓗᑎᓪᓗ ᐊᑐᓂ ᓄᓇᓕᓐᓂ ᓄᓇᕗᒻᒥ.

ᐊᑭᓕᖅᑕᐅᔭᕆᐊᓕᓐᓄᑦ ᑎᑎᕋᖅᑎ (QEC -25-017) ᑭᓪᓕᖃᖅᑎᑕᖅ ᓄᓇᕗᒥᐅᓄᑐᐊᖅ

ᖃᒪᓂ'ᑐᐊᖅ, ᓄᓇᕗᑦ

ᑐᓴᖅᑎᑦᑎᕙᒡᓗᓂ ᐊᑭᓕᕆᐊᓕᖕᓄᑦ ᐊᖓᔪᖅᑳᖓᓄᑦ, ᐊᑭᓕᖅᑕᐅᔭᕆᐊᓕᖕᓄᑦ ᑎᑎᕋᖅᑎ ᑲᒪᒋᔭᒃᓴᖃᖅᐳᖅ ᑕᒻᒪᖅᑕᖅᓯᒪᙱᑦᑐᓂᒃ ᓈᒻᒪᖅᑯᑦᑎᔪᓂᒡᓗ ᐱᓕᕆᕙᒡᓗᓂ ᐊᔾᔨᒌᙱᑦᑐᓂᒃ ᐊᑭᓕᖅᓱᒐᒃᓴᓂᑦ, ᐱᖃᓯᐅᑎᓪᓗᒋᑦ ᐊᑭᓕᐅᑎᒥᓂᒃ ᐅᑎᖅᑎᑦᑎᕕᐅᔪᒪᔪᑦ, ᓂᐅᕕᕈᑕᐅᓇᓱᒃᑐᑦ, ᑳᓐᑐᓛᒋᔭᐅᔪᑦ, ᐊᓯᖏᓪᓗ. ᐊᓯᖏᑦ ᑲᒪᒋᔭᕆᐊᓕᑦ ᐅᑯᐊᖑᔪᑦ ᑭᐅᕙᒡᓗᒋᑦ ᓂᐅᕕᖅᑎᑦᑎᔨᑦ ᐊᒻᒪᓗ ᐊᑭᓕᖅᓱᐃᔨᑦ ᖃᐅᔨᒋᐊᕋᓱᒃᑐᑦ, ᐅᖃᖃᑎᒋᕙᒡᓗᒋᓪᓗ ᐱᓕᕆᕝᕕᑦ ᐱᔾᔪᑎᖃᖅᑐᓂᑦ ᐊᑭᓕᕆᐊᓕᖕᓂᑦ ᑲᒪᒋᔭᐅᔪᓂᑦ. ᐱᓕᕆᐊᒃᓴᓕᒫᑦ ᐱᐊᓂᒃᑕᐅᖃᑦᑕᕆᐊᓖᑦ ᑭᖑᕙᖅᑎᙱᓪᓗᒋᑦ ᑕᒻᒪᖅᓯᒪᙱᓪᓗᒋᓪᓗ ᐊᑭᓖᑦᑎᐊᖃᑦᑕᖁᓪᓗᒋᑦ ᐊᑭᓕᕆᐊᓕᖏᓐᓂᒃ. ᑐᓴᐅᒪᑎᑦᑎᑦᑎᐊᖃᑦᑕᕆᐊᓕᒃ ᓂᐅᕕᖅᑎᑦᑎᔨᓂᒃ ᐊᒻᒪᓗᑦᑕᐅᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᓕᕆᕝᕕᖏᓐᓂᒃ ᓴᖅᑭᑎᑦᑎᖃᑦᑕᖁᓪᓗᒍ ᓈᒻᒪᒃᑐᓂᒃ ᖃᐅᔨᓴᕈᑎᓂᒃ.

ᐱᓕᕆᐊᒃᓴᖏᑦ ᑲᒪᒋᔭᕆᐊᓕᖏᓪᓗ:

• ᑎᑎᕋᖃᑦᑕᖅᐳᖅ, ᓇᓗᓇᐃᖅᓯᕙᒃᐳᖅ, ᓴᖅᑭᑎᑦᑎᕙᒃᖢᓂᓗ ᐊᑭᓕᐅᑕᐅᔪᓂᒃ ᑮᓇᐅᔭᒃᓴᓂᒃ ᓂᐅᕕᖅᑎᑦᑎᔨᓄ.
• ᑮᓇᐅᔭᒃᓴᒥᑦ ᑐᒃᓯᕋᐅᑎᓂᑦ ᐱᑎᑕᐅᖃᑦᑕᖅᐳᖅ ᕿᒥᕐᕈᕙᒃᖢᓂᒋᓪᓗ ᐊᓯᖏᓐᓂᒡᓗ ᑎᑎᖅᑯᑎᖏᓐᓂᒃ ᐱᐊᓂᒃᓯᒪᑦᑎᐊᖁᓪᓗᒍ ᒪᓕᑦᑎᐊᕐᓗᓂᓗ ᐊᑐᐊᒐᕐᓂᒃ, ᐱᓕᕆᔾᔪᑕᐅᔪᓂᒃ, ᑳᓐᑐᓛᒃᑕᐅᔪᓪᓗ ᐱᔭᕆᐊᓕᖏᓐᓂᒃ. 
• ᐱᓕᕆᕙᓪᓕᐊᓲᑦ ᐊᖏᖅᑕᐅᓯᒪᔪᓂᒃ ᐊᑭᓕᒐᒃᓴᓂᒃ ᐊᑭᓕᐅᑎᒃᓴᓄᑦ. ᐅᑯᓂᖓᓗ ᐊᔾᔨᒌᑦ ᑲᑎᑉᐸᒡᓗᒋᑦ ᓂᐅᕕᖅᑎᑦᑎᔨᑦ ᐊᑭᓕᒐᒃᓴᖏᑦ ᓂᐅᕕᕈᓐᓇᐅᑎᖓᓄᑦ ᐊᔪᙱᑎᑕᐅᑦᑎᐊᖁᓪᓗᒋᑦ. 
• ᐊᔾᔨᒌᑦ ᑲᑎᑉᐸᒡᓗᒋᑦ ᐊᑭᓕᒐᒃᓴᑦ ᐊᒻᒪ ᐊᑭᓖᖁᔨᔾᔪᑎᑦ ᐱᓕᕆᕝᕕᖕᒥ ᓂᐅᕕᕈᓐᓇᐅᑎᑦ ᐅᕝᕙᓘᓐᓃᑦ ᑮᓇᐅᔭᒃᓴᒥᒃ ᑐᒃᓯᕋᐅᑎᑦ ᐃᓚᒋᓗᒋᑦ; ᖃᐅᔨᓴᖅᐸᒃᖢᓂ ᖃᐅᔨᓇᓱᒃᖢᓂ ᐊᑭᓕᐅᑎᑦ ᖃᖓᐅᓚᐅᕐᒪᖔᑦ ᖃᔅᓯᐅᓂᖏᓪᓗ ᐋᖅᑭᒋᐊᖅᐸᒃᖢᓂᒋᓪᓗ ᐱᔭᕆᐊᖃᖅᐸᑦ.
• ᓂᐅᕕᖅᑎᑦᑎᔪᑦ ᐊᑭᓕᒐᒃᓴᖏᓐᓂᒃ ᐱᑎᑕᐅᕙᒃᖢᓂ ᐅᓪᓗᖓᓗ ᓇᓗᓇᐃᒃᑯᑕᓕᖅᐸᒃᖢᓂᒋᑦ ᖃᐅᑕᒫ ᑎᑎᖅᑲᖅᑖᕆᔭᖏᑦ.
• ᐊᑭᓕᒃᓴᖃᐅᑎᖓᓄᑦ ᓇᓗᓇᐃᒃᑯᑕᑦ ᓂᐅᕕᖅᑎᑦᑎᔨᑦ ᐊᑭᓕᒐᒃᓴᖏᑦ ᓂᐅᕕᕈᑎᓄᑦ ᐊᒻᒪ/ᐅᕝᕙᓘᓐᓃᑦ ᐱᓕᕆᐊᓄᑦ ᐊᒃᑐᐊᓂᖃᙱᑦᑐᑦ.
• ᑲᒪᒋᕙᒃᖢᒋᑦ ᑐᖅᑯᖅᐸᒃᖢᒋᓪᓗ ᓂᐅᕕᖅᑎᑦᑎᔨᓕᒫᑦ ᐊᑭᓕᐅᑎᖏᑦ ᐊᑭᓕᒐᒃᓴᓄᓪᓗ ᐅᓂᒃᑳᑦ.
• ᕿᒥᕐᕈᕙᒡᓗᒋᑦ ᑕᒪᕐᒥᒃ ᓇᓕᖅᑲᐃᑦ ᖃᕆᑕᐅᔭᒧᐊᖅᑎᖅᑕᐅᓚᐅᙱᓐᓂᖏᓐᓂᒃ ᑕᒻᒪᖅᓯᒪᙱᑦᑐᓂᒃ ᓇᓗᓇᐃᒃᑯᑦᑎᖅᑕᐅᖁᓪᓗᒋᑦ ᐊᖏᖅᑕᐅᓗᑎᒡᓗ ᑕᒪᕐᒥᒃ ᑭᖑᕝᕕᐅᑎᓂᐊᖅᑐᑦ ᐃᓚᓕᐅᔾᔭᐅᑦᑎᐊᖁᓪᓗᒋᑦ.
• ᑎᑎᕋᕐᓗᒋᑦ ᐊᑭᓕᖅᓱᖅᑕᐅᔾᔪᑎᓂᑦ ᑲᒪᒋᔭᒃᓴᖃᖅᑎᑕᐅᓂᐊᖅᑐᑦ ᒥᒃᓵᓄᑦ ᑎᑎᕋᖅᓯᒪᔪᑦ (ᐃᖅᑲᓇᐃᔭᖅᑐᓕᕆᔨᒃᑯᓐᓂ ᑐᓂᔭᐅᔪᑦ) ᑮᓇᐅᔭᒃᓴᓕᐅᕐᓗᓂᓗ.
• ᑎᑎᕋᕐᓗᒋᑦ ᓂᐅᕕᖅᑎᑦᑎᔨᑦ ᐊᑭᓕᒐᒃᓴᖏᑦ Great Plains ᑮᓇᐅᔭᓕᕆᔾᔪᑎᒧᑦ, ᑎᑎᖅᑲᙳᖅᑎᓪᓗᒋᑦ ᐅᓂᒃᑳᑦ; ᐋᖅᑭᒃᓯᒃᑲᓐᓂᕐᓗᑎᑦ ᓇᓕᖅᑲᓂᑦ ᐅᓂᒃᑳᓕᐅᕐᓗᑎᒃ ᓂᐅᕕᖅᑎᑦᑎᔨᑦ ᐊᑭᓕᒐᒃᓴᖏᓐᓄᑦ.

ᐅᑯᐊ ᐊᔪᙱᓐᓂᕆᔭᕆᐊᓖᑦ: 

• ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᐊᓂᒍᐃᔾᔪᑎᖃᕐᓗᓂ.
• ᐊᕐᕌᒎᖕᓂᒃ ᒪᕐᕉᖕᓂᒃ ᑎᑎᕋᕐᕕᖕᒥᒃ ᐊᐅᓚᑦᑎᖃᑦᑕᖅᓯᒪᓗᓂ.

ᐃᑲᔪᕐᓂᖃᕋᔭᖅᑐᑦ:

• ᐃᓕᓐᓂᐊᒃᑲᓐᓂᖅᓯᒪᓗᓂ ᑎᑎᕋᕐᕕᖕᒥ ᐊᐅᓚᑦᑎᔨᐅᓂᕐᒧᑦ ᐃᑲᔪᕐᓂᖃᕋᔭᖅᑐᖅ.
• ᖃᐅᔨᒪᓂᖃᕐᓗᓂ ᓄᓇᕗᒻᒥ, ᓄᓇᐅᑉ ᐊᕙᑎᖓᓂᒃ, ᐅᖃᐅᓯᕐᒥᒃ ᐊᒻᒪ ᐃᓕᖅᑯᓯᖓᓂᒃ ᐃᑲᔫᑎᖃᕋᔭᖅᑐᖅ.
• ᐃᓄᒃᑐ, ᐃᓄᐃᓐᓇᖅᑐᓐ ᐅᖃᕈᓐᓇᖅᑐᑦ ᐊᒻᒪ/ᐅᕝᕙᓘᓐᓃᑦ ᐅᐃᕖᑐᑦ ᐃᑲᔪᕐᓂᖃᕋᔭᖅᑐᖅ.

ᐊᔾᔨᐸᓗᖏᓐᓂᓪᓘᓐᓃᑦ ᐃᓕᓐᓂᐊᖅᓯᒪᓗᓂ ᐊᔾᔨᒌᙱᑦᑐᓂᒃ ᐱᓕᕆᐊᖃᓚᐅᖅᓯᒪᓂᖅᑕᐅᖅ ᐃᓱᒪᒋᔭᐅᓂᐊᖅᑐᑦ. 

ᑮᓇᐅᔾᔭᒃᓴᑦᑎᐊᕋᔭᖅᑐᖅ ᐱᒋᐊᕐᓗᓂ $76,362.00−ᒥ $85,410.00-ᒧᑦ ᐅᑭᐅᖅᑕᖅᑐᒥᐅᑕᐅᓂᕐᒧᓪᓗ ᐃᑲᔫᓯᐊᖅᑖᖅᐸᒡᓗᓂ $24,281.00−ᒥ ᐊᕐᕌᒍᒥᒃ ᐊᑕᐅᓯᕐᒥᒃ. ᓈᒻᒪᑦᑎᐊᖅᑐᓂᒃ ᐃᑲᔫᓯᐊᖅᑖᖅᑎᑦᑎᕙᒃᑭᕗᒍᑦ ᑲᑎᖅᓱᖅᓯᒪᔪᓂᒃ, ᐱᖃᓯᐅᑎᓪᓗᒋᑦ ᓇᓗᓇᐃᔭᖅᓯᒪᔪᑦ−ᐃᑲᔫᑎᓄᑦ ᐃᓐᓇᖅᓯᐅᑎᑖᕈᑎᑦ. ᓱᓕᒃᑲᓐᓂᖅ, ᐃᖅᑲᓇᐃᔭᖅᑎᐅᑉ ᐃᒡᓗᒃᓴᖓᓄᑦ ᐃᑲᔪᖅᑕᐅᔾᔪᑎᖃᖅᑐᖅ ᐃᖅᑲᓇᐃᔮᒧᑦ. ᑖᓐᓇ ᐃᖅᑲᓇᐃᔮᒃᓴᖅ ᐃᓚᓕᐅᔾᔭᐅᓯᒪᕗᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ.

ᓄᓇᕗᒻᒥᐅᑉ ᐃᓄᐃᑦ ᓯᕗᓪᓕᖅᐸᐅᔾᔭᐅᓂᐊᖅᑐᑦ.  

ᐱᓇᓱᒡᓗᑎᑦ: https://qeccareers.prevueaps.ca/jobs/ 

ᑎᑎᖅᑲᑦᑯᑦ ᐱᓇᓱᐊᕐᓗᑎ ᕕᕝᕗᐊᕆ 28, 2025 ᑐᖔᓂ.

ᑖᔅᓱᒧᖓ ᐃᖅᑲᓇᐃᔮᒃᓴᒧᑦ ᐱᓇᔪᒃᑐᑦ ᐃᓱᒪᒋᔭᐅᑐᐃᓐᓇᕆᐊᓖᑦ ᓯᕗᓂᒃᓴᒥ ᐃᖅᑲᓇᐃᔭᖅᑎᒃᓴᓄᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᑦ.

ᖁᔭᓕᔭᕗᑦ ᑕᒪᕐᒥᑦᑎᐊᖅ ᐱᓇᔪᓚᐅᖅᑐᑦ. ᑭᓯᐊᓂ, ᐱᓇᔪᒃᑐᓂᑦ ᓂᕈᐊᖅᑕᐅᔪᑐᐊᑦ ᖃᐅᔨᒋᐊᕐᕕᐅᓂᐊᖅᑐᑦ.