ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖃᐃᖁᔨᕗᑦ ᐊᐅᓱᐃᑦᑐᒥᐅᓂᑦ ᖁᕕᐊᓲᑕᐅᑎᓪᓗᒍ ᐆᒻᒪᖅᑯᑎᓄᑦ ᐊᐅᓚᐅᑎᖃᕐᕕᒃᑖᓵᖅ ᐅᓪᓗᑐᐃᓐᓇᐅᓕᖅᐸᑦ ᔫᓐ 7−ᒥᑦ.
ᑭᔾᔭᖅᓯᔪᖃᓛᖕᒪᑦ ᖁᕕᐊᓲᑕᐅᓗᓂ ᐆᒻᒪᖅᑯᑎᓄᑦ ᐊᐅᓚᐅᑎᖃᕐᕕᒃᑖᓵᒥᑦ 1:00-ᒥ ᐅᓐᓄᒃᓴᒃᑯᑦ. ᓄᓇᓖᑦ ᓂᕆᕕᒡᔪᐊᖅᑎᑕᐅᓛᖅᑐᑦ ᓄᓇᓖᑦ ᕿᑎᒡᕕᐊᓂᑦ 1:30−ᒥᑦ 4−ᒧᐊᕋᓱᖕᓂᖓᓄᑦ ᐅᓐᓄᒃᓴᒃᑯᑦ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐆᒻᒪᖅᑯᑎᓄᑦ ᐊᐅᓚᐅᑎᖃᕐᕕᒃᑖᓵᒥᒃ ᓴᓇᓯᒋᐊᓚᐅᖅᓯᒪᕗᑦ ᑎᓯᐱᕆ 2018−ᒥᑦ ᖁᔭᓕᔪᒪᕗᓪᓗ ᓄᓇᓕᖕᒥᐅᓂᑦ ᐃᑲᔪᖅᑐᐃᑦᑎᐊᖏᓐᓇᓚᐅᕐᓂᖏᓐᓄᑦ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕆᓂ ᐳᓲ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ
(867) 979-7524
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ ᑐᓴᖅᑎᑦᑎᔪᒪᔪᑦ ᑲᖏᖅᖠᓂᕐᒥᐅᓂᑦ ᐸᕐᓇᒃᑕᐅᓯᒪᓪᓗᓂ ᓄᓇᓕᐅᑉ ᐃᓚᖓ ᖃᒥᙶᖅᑎᑕᐅᓚᕐᒪᑦ ᓴᓇᑦᑕᐃᓕᒥ, ᒪᐃ 26 8-ᒥ ᐅᓪᓛᒃᑯᑦ 12-ᒧᐊᕋᓱᖕᓂᖓᓂ ᐅᓪᓗᕈᒻᒥᓴᕐᓇᒥ. ᐊᒃᑐᖅᑕᐅᓯᒪᔪᑦ ᓇᓗᓇᐃᖅᓯᒪᕗᑦ ᓄᓇᙳᐊᒥᑦ ᐅᓇᓂ.
ᖃᒥᙶᖅᑎᑕᐅᔭᕆᐊᖃᕐᓂᐊᖅᐳᑦ ᓄᑖᙳᕆᐊᖅᑎᑦᑎᓂᐊᕐᓂᖏᓐᓄᑦ ᑲᒪᒋᔭᐅᓗᓂᓗ ᖃᐅᒻᒪᖅᑯᑎᖃᖅᑎᑦᑎᔾᔪᑎᖓ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ ᖁᔭᓕᔪᒪᕗᑦ ᑲᖏᖅᖠᓂᕐᒥᐅᓂᑦ ᑐᑭᓯᐅᒪᓂᖏᓐᓄᑦ ᒪᒥᐊᑉᐳᓪᓗ ᐊᑲᐃᓪᓕᐅᕈᑕᐅᓂᐊᖅᐸᑦ ᖃᒥᙶᖅᑎᓪᓗᒋᑦ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕆᓂ ᐳᓲ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ
(867) 979-7524
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑐᙵᓱᒃᑎᑦᑎᕗᑦ ᑭᙵᕐᒥᐅᓂᒃ ᖁᕕᐊᓲᑕᐅᑎᓪᓗᒍ ᐆᒻᒪᖅᑯᑎᓄᑦ ᐊᐅᓚᐅᑎᖃᕐᕕᒃᑖᓵᖅ ᐅᓪᓗᑐᐃᓐᓇᖅ, ᒪᐃ 24 ᐅᓐᓄᒃᓴᒃᑯᑦ 4:00−ᒥ ᐱᒋᐊᕐᓗᒍ 6−ᒧᐊᕋᓱᐊᕐᓂᖓᓂ.
ᑭᔾᔭᖅᑕᐅᓗᓂ ᖃᓪᓗᓈᖅᑕᑯᓗᒃ ᐊᔾᔨᓕᐅᖅᑕᐅᓐᓇᕐᓗᓂᓗ ᒪᒃᐱᖅᑕᐅᓂᐊᖅᑐᖅ ᐆᒻᒪᖅᑯᑎᓄᑦ ᐊᐅᓚᐅᑎᖃᕐᕕᒃᑖᓵᖅ 4-ᒥ ᐅᓐᓄᒃᓴᒃᑯᑦ. ᑕᒪᓗᒐᒃᓴᖃᕐᓂᐊᖅᑐᖅ ᓂᐅᖅᑲᒐᒃᓴᐃᓪᓗ ᐊᒻᒪ ᐊᒧᔭᐅᔪᓂᒃ ᓵᓚᒃᓴᐅᓯᐊᖅᑐᖃᖃᑦᑕᕐᓂᐊᖅᖢᓂ ᓵᒻ ᐳᑦᓚᑦ ᐃᓕᓐᓂᐊᕐᕕᖓᓂ 5-ᒥᑦ 6-ᒧᑦ.
ᐃᓚᐅᖃᑕᐅᒋᑦ ᓂᖅᑐᕐᓇᖅᑐᖅ ᔩᓂ ᐃᕼᐊᓗᐊᒃ, ᒥᓂᔅᑕ ᐱᓕᕆᐊᖃᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ, ᖁᔭᓕᑎᓪᓗᒍ ᓄᓇᓕᖕᒥᐅᓂᒃ ᐃᑲᔪᖃᑦᑕᐃᓐᓇᕐᓂᖏᓐᓄᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᓇ ᖃᐅᔨᒋᐊᕐᕕᐅᔪᓐᓇᖅᑐᖅ:
ᑳᑦᕆᓐ ᕕᑎᑯ
ᑐᓴᐅᒪᔪᓕᕆᔨ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7513
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑐᓴᖅᑎᑦᑎᔪᒪᕗᑦ ᓄᓇᕗᒻᒥᐅᓄ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓄᑖᖑᕆᐊᑎᑦᑎᓂᐊᕐᒪᑕ ᐋᕿᐅᒪᑎᑦᑎᓂᖅ ᐱᒋᖅᐸᓪᓕᐊᑎᓪᓗᒋᑦ.
ᓂᐅᕕᖅᐸᒃᑐᑦ ᑐᓴᐅᒪᑎᑕᐅᓂᐊᖅᑐᑦ ᐱᒋᐊᓚᐅᖏᑎᓪᓗᒋᑦ ᐅᒻᒪᖁᑏᑦ ᖃᒥᑕᐅᓂᐊᖅᑎᓪᓗᒋᑦ ᓈᓚᐅᑎᒃᑯᑦ, ᐃᑭᐊᕿᕕᒃᑯᑦ, ᐃᖐᓐᓇᒃᑯᓪᓗ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓄᑖᖑᕆᐊᖅᑎᑦᑎᓲᖑᕗᑦ ᓱᕋᒃᓯᒪᓂᑯᓂ ᓇᑉᐸᖁᑎᓂᒃ ᐱᐅᓯᕙᓪᓕᖅᑎᑦᑎᓗᑎᓗ ᐱᓕᕆᓂᕐᒧᑦ ᐋᖅᑭᐅᒪᑎᑦᑎᓂᖅ ᐅᐊᔭᓕᕆᓂᕐᓗ ᓯᓚ ᓂᒡᓚᓱᓗᐊᕈᓐᓃᕋᖓᑦ. ᑖᓐᓇ ᐱᓕᕆᐊᕆᔭᐅᔪᖅ ᓇᓗᓇᐃᖅᓯᕙᒃᐳᖅ ᓂᐅᕕᖅᐸᒃᑐᓄᑦ ᐊᑦᑕᕐᓇᖅᑐᒦᑎᑕᐃᓕᓪᓗᑎᒍᑦ ᐆᒻᒪᖁᑎᖃᑦᑎᐊᖅᑎᑦᑎᔪᒪᓪᓗᑕᓗ. ᐱᒋᐊᖃᑦᑕᖅᑕᕗᑦ ᐋᕿᐅᒪᑎᑕᐅᓯᒪᔪᑦ ᐱᖁᔭᒃᓴᐅᑉ ᐅᐃᒍᖓ ᐋᕿᐅᒪᑎᑦᑎᓂᖅ ᐱᓕᕆᐊᕆᖃᑦᑕᕐᓂᐊᖅᑕᕗᑦ ᓴᓇᓐᓇᐅᔪᓐᓃᕋᖓᓪᓘᓐᓃᑦ.
ᖁᓪᓕᒃᑯᑦ ᖁᔭᓕᕗᑦ ᓄᓇᕗᒻᒥᐅᓂᑦ ᑐᑭᓯᐅᒪᑦᑎᐊᖕᓂᖏᓐᓄᑦ.
###
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐃᖅᑲᐃᓯᒋᐊᕈᒪᕗᑦ ᓄᓇᕗᒻᒥᐅᓂᑦ ᐅᔾᔨᖅᓱᑦᑎᐊᖃᑦᑕᖁᔨᓪᓗᑎᒃ ᓇᑉᐸᖅᑯᑏᑦ ᓴᕕᒐᐅᔭᓪᓗ ᐊᑯᓐᓂᖓᒍᑦ ᐃᖏᕐᕋᓗᑎᒃ ᐊᐅᓚᐅᑎᓕᖕᓂᒃ (ᑎᓴᒪᓖᓪᓗᑦᑕᐅᖅ ᖃᒧᑕᐅᔭᓪᓗ). ᐅᑯᐊ ᒪᓕᒡᓗᒋᑦ ᖃᒥᔾᔪᔾᔨᖁᓇᒃ, ᐋᓐᓂᕐᔪᐊᖅᑐᖃᖁᓇᒃ, ᑐᖁᔪᖃᖁᓇᒡᓘᓐᓃᑦ:
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ ᓄᓇᕗᒻᒥᐅᓂᑦ ᐃᖅᑲᐃᓯᔪᒪᕗᑦ ᖃᒥᑳᓪᓚᒃᑲᔭᖅᑐᓄᑦ ᐱᕙᒌᔭᖅᓯᒪᖃᑦᑕᖁᓪᓗᒋᑦ ᑐᐊᕕᕐᓇᖅᑐᖅᓯᐅᑎᓂᒃ ᐊᑐᐃᓐᓇᐅᑎᑦᑎᕙᒡᓗᑎᒃ ᐃᑲᕐᕋᓄᑦ 72−ᓄᑦ ᐊᑐᕆᐊᓖᑦ ᓈᒻᒪᓪᓗᐊᕐᓗᒋᑦ. ᐅᑯᐊ ᑐᐊᕕᕐᓇᖅᑐᖅᓯᐅᑎᑦ ᐱᖃᓯᐅᔾᔭᐅᔪᓐᓇᖅᑐᑦ ᐃᒥᖅ, ᐸᓂᖅᓯᒪᔪᑦ ᓂᕆᔭᒃᓴᑦ, ᐃᑭᑦᑕᖅᑐᖅ ᓄᑖᓂᒃ ᕚᑕᓖᖃᕐᓗᓂ, ᐋᓐᓂᖅᑐᖅᓯᐅᑎᑦ, ᐅᖅᑰᔪᑦ ᐊᓐᓄᕌᑦ, ᐊᒻᒪ ᐃᓅᓕᓴᐅᑎᑦ.
ᐊᑭᓕᖅᓱᐃᔨᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐅᖄᓚᖃᑦᑕᖁᔭᐅᒋᕗᑦ ᖃᖓᑐᐃᓐᓇᑦᑎᐊᖅ ᐅᕗᖓ 1-867-222-3807 ᖃᒥᑳᓪᓚᒃᑳᖓᑦ ᑐᓴᖅᑎᑦᑎᓗᑎᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᖃᓄᖅ ᐱᕙᒌᔭᕈᓐᓇᕐᒪᖔᖅᐱᑦ, ᐅᕗᖓ ᑕᑯᒋᐊᕈᓐᓇᖅᐳᑎᑦ ᖃᕆᓴᐅᔭᒃᑯᑦ www.qec.nu.ca/safety-outages/outage-preparedness.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕆᓂ ᐳᓲ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓄᓇᕗᒻᒥᐅᓂᒃ ᐃᖅᑲᐃᓯᔪᒪᕗᑦ ᐊᑦᑕᕐᓇᖅᑕᐃᓕᒪᖁᓪᓗᒋᑦ ᐊᐅᓚᐅᑎᖃᕐᕖᑦ ᐊᒻᒪ ᓱᕋᒃᓯᒪᔪᑦ ᑲᑕᒃᓯᒪᔪᓪᓘᓐᓃᑦ ᐆᒻᒪᖅᑯᑎᑦ ᐅᐊᔭᖏᑦ ᓱᖁᑎᒋᖃᑦᑕᙱᓪᓗᒋᑦ. ᐊᐅᓚᐅᑎᖃᕐᕖᑦ ᐊᒻᒪ ᓱᕋᒃᓯᒪᔪᑦ ᐆᒻᒪᖅᑯᑎᑦ ᐅᐊᔭᖏᑦ ᐅᓗᕆᐊᓇᖅᐳᑦ ᐊᒻᒪ ᐋᓐᓂᖅᑐᖃᕐᔪᐊᕈᓐᓇᖅᖢᓂ ᐃᓅᔪᓐᓃᖅᑐᖃᕐᓗᓂᓘᓐᓃᑦ.
ᐆᒻᒪᖅᑯᑎᑦ ᒥᒃᓵᓄᑦ ᑐᐊᕕᕐᓇᖅᑐᒥᑦ ᐅᖃᐅᓯᖃᕈᒪᒍᕕᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐅᖃᓗᒍᓐᓇᖅᐳᑎᑦ ᖃᖓᑐᐃᓐᓇᖅ ᐅᕗᖓ 1-867-222-3807.
ᖁᓪᓕᒃᑯᑦ ᖁᔭᓕᔪᒪᕗᑦ ᓄᓇᕗᒻᒥᐅᓂᑦ ᐃᑲᔪᐃᓐᓇᖃᑦᑕᕐᓂᖏᓐᓄᑦ ᓄᑕᖅᑲᓂᑦ ᐊᐅᓚᐅᑎᖃᕐᕕᖕᒧᐊᖃᑦᑕᖁᔨᙱᖦᖢᑎᒃ ᐊᒻᒪ ᐆᒻᒪᖅᑯᑎᑦ ᐅᐊᔭᖏᓐᓂᒃ ᓱᖁᑎᒃᓴᖃᑦᑕᖁᔨᙱᖦᖢᑎᒃ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᕆᓂ ᐳᓲ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᒃᑯᓐᓄᑦ
ᖁᓪᓕᖅ ᐆᒻᒪᖅᑯᑎᓕᕆᔨᖏᑕ ᑎᒥᖁᑖ
(867) 979-7524
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᔅᓯᕋᐅᑎᓕᐅᕐᕕᔅᓴᐅᓕᕐᒥᔪᑦ ᐊᕐᕌᒍᑕᒫᖅ ᐊᑐᖅᑕᐅᖃᑦᑕᖅᑐᖅ ᑯᐊᐳᕇᓴᒃᑯᑦ ᓚᐅᕋ ᐅᓪᓗᕆᐊᒃ ᒍᓘᑎᐊᐃ ᐃᓕᓐᓂᐊᕈᑎᔅᓴᒧᑦ ᑮᓇᐅᔭᑦ.
ᓄᓇᕗᒻᒥ ᐃᓕᓐᓂᐊᖅᑏᑦ ᐃᓕᓐᓂᐊᕆᐊᒃᑲᓐᓂᖅᓯᒪᔪᑦ ᓯᓚᑦᑐᓴᕐᕕᒻᒥᑦ ᐊᕐᕌᒍᒧᑦ ᓰᑏᑉᐱᕆ 2018 ᐃᓕᓐᓂᐊᖅᑐᑦ ᐱᓇᓱᐊᖃᑕᐅᔪᓐᓇᖅᑐᑦ ᑐᔅᓯᕋᐅᑎᒃᑯᑦ. ᐱᓇᓱᐊᖃᑕᐅᔪᑦ ᓂᕈᐊᖅᑕᐅᓂᖏᑦ ᑐᙵᕕᖃᕐᓂᐊᖅᑐᑦ ᐃᓕᓐᓂᐊᖅᑎᐊᖃᑦᑕᖅᓯᒪᓂᖓ ᐊᒻᒪ ᓄᓇᓕᒻᒥᑦ ᐃᓚᒋᔭᐅᓇᓱᑦᑎᐊᖃᑦᑕᖅᓯᒪᓂᖓᓄᑦ.
ᑐᒃᓯᕋᐅᑏᑦ ᑮᓇᐅᔭᓂᑦ ᐱᔭᐅᓇᓱᑦᑐᑦ $5000 ᐃᓕᓐᓂᐊᕈᑎᔅᓴᒧᑦ ᑮᓇᐅᔭᑦ ᒪᑐᐃᖓᑎᑕᐅᔪᑦ ᔫᓂ 30, 2019ᒧᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ ᐅᕙᓗ ᑐᔅᓯᕋᐅᑎ ᖃᕆᓴᔭᐅᒃᑯᑦ ᐱᔪᒪᒍᕕᐅᒃ, ᐅᕗᙵᕐᓗᑎᑦ www.qec.nu.ca/about/community-involvement ᐅᕙᓘᓐᓃᑦ ᐅᖄᓚᓗᑎᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐅᕗᖓ 1-866-710-4200.
###
ᓂᕈᐊᖅᑕᐅᓯᒪᔪᖅ ᔩᓂ ᐃHᐊᓗᐊᒃ, ᒥᓂᔅᑕ ᑲᒪᒋᔭᖃᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᒃ, ᐱᔪᓐᓇᖅᑎᑦᑎᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑲᔪᓯᓗᓂ ᐃᒡᓗᓕᐅᕐᓂᕐᒥᒃ ᓄᑖᒥᒃ ᐊᖓᔪᖅᑲᐅᑎᖃᕐᕕᖕᒥᑦ ᖃᒪᓂ'ᑐᐊᕐᒥ. ᑎᒥᐅᔫᑉ ᖃᓄᐃᓕᐅᕈᑎᖏᑦ ᐱᔨᑦᑎᕋᐅᑕᐅᓲᑦ ᐊᖓᔪᖅᑳᖃᕐᕕᐊᑕ ᑎᑎᕋᕐᕕᐊᓂᑦ ᖃᒪᓂ'ᑐᐊᒥᑦ ᐊᖓᔪᖅᑲᐅᑎᖃᕐᕕᖕᒥᓪᓗ ᑎᑎᕋᕐᕕᐊᓂᑦ ᐃᖃᓗᖕᓂᑦ.
"ᐅᓪᓗᒥᐅᔪᖅ, 45−ᓂᒃ ᐃᖅᑲᓇᐃᔭᖅᑐᓂ ᐱᖓᓱᑦ ᐊᔾᔨᒌᖏᑦᑐᓂ ᑎᑎᕋᕐᕕᖃᖅᐳᑦ ᓄᓇᓕᖕᓂᑦ,” ᐅᖃᖅᑐᖅ ᒥᓂᔅᑕ ᐃHᐊᓗᐊᒃ. “ᓄᑖᖅ ᐊᖓᔪᖅᑲᐅᑎᖃᕐᕕᒃ ᐅᓄᖅᓯᒋᐊᖅᑎᑦᑎᓂᐊᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐊᐅᓚᓂᕐᓅᕈᓐᓇᑦᑎᐊᖅᑐᓂᒃ ᑕᒪᕐᒥᒃ ᖃᒪᓂ'ᑐᐊᖅ ᑎᑎᕋᕐᕕᖕᒥᐅᑕᓕᕆᔨᖏᑦ ᐃᓂᑖᕆᔭᐅᔪᓐᓇᕐᓂᐊᕐᒪᑕ ᐊᑕᐅᓯᕐᒥᒃ ᐃᒡᓗᕐᔪᐊᒥ ᓈᒻᒪᒃᑐᒥᒃ ᑲᑎᒪᕕᖃᕐᓗᓂ ᐱᓕᒻᒪᒃᓴᐃᕕᖕᒥᓪᓗ.”
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖃᐅᔨᒃᑲᐃᔪᒪᔪᖅ ᐊᑐᖅᑎᖁᑎᖏᓐᓂᒃ ᐱᓗᐊᙱᑦᑐᒥᒃ ᑕᒻᒪᖅᓯᒪᔪᖃᕐᓂᖓᓂᒃ ᖃᐅᒻᒪᖅᑯᑎᑦ ᐊᑮᑦᑐᓄᑦ ᐊᑮᑦᑐᓕᕆᓂᕐᓂ ᒫᑦᓯ 1−ᒥ 31−ᒧᑦ, 2019.
ᑮᓇᐅᔭᓕᐅᕋᓱᐊᕐᕕᒃ ᓄᓇᖃᖅᑎᐅᔪᓄᓪᓘᓐᓃᑦ ᐊᑭᖏᑦ ᑎᑎᕋᖅᓯᒪᔪᑦ ᐊᑭᓕᒐᒃᓴᒥᒃ ᐊᔾᔨᖃᖅᑐᑦ ᐊᒌᖅᑐᒥᒃ ᐊᑭᓄᑦ ᐊᓯᔾᔨᖅᑐᓂ ᐊᐃᕐᕆᓕ 1, 2019. ᑲᑎᖦᖢᒋᑦ ᐆᒻᒪᖅᑯᑎᓄᑦ ᐊᑭᓕᒐᒃᓴᓕᐊᓪᓚᑦᑖᖅ ᐊᑖᓂ ᑕᖅᑭᑕᒫᖅᓯᐅᑦ ᐊᑭᓕᒐᒃᓴᐅᑉ ᓈᓴᐅᓯᕆᔭᐅᓪᓗᓂ ᐊᑐᕐᖢᑎᒃ ᑕᒻᒪᖓᙱᑦᑐᓂᒃ ᐊᑭᖏᓐᓂᒃ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᒪᒥᐊᑉᐳᑦ ᖃᓄᑐᐃᓐᓇᖅ ᐊᑲᐅᙱᓕᐅᕈᑎᓄᑦ ᐊᑐᖅᑎᑦᑎᑐᐃᓐᓇᕆᐊᓕᖕᒧᑦ ᒫᓐᓇᐅᔪᖅ. ᐃᑭᐊᖅᑭᕕᒃ ᑕᒍᒋᐊᕐᓗᒍ ᑐᑭᓯᒋᐊᒃᑲᓐᓂᕈᒪᒍᕕᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᑐᖅᑎᓄᑦ ᐊᑭᖏᓐᓂwww.qec.nu.ca.