ᐆᒻᒪᖅᑯᑎᐅᔅᓴᐅᔪᓐᓇᖅᑐᖅ ᓯᕿᓂᕐᒦᖔᖅᑐᖅ ᓄᓇᕐᔪᐊᕐᒧᑦ ᑎᑭᐅᑎᕙᑦᑐᖅ ᓲᕐᓗ ᓂᐱᖅᑲᓐᓇᐅᔮᖅᑐᑎᑐᑦ (ᖃᐅᔨᒪᔭᐅᕙᒻᒥᔪᖅ ᓯᕿᓂᐅᑉ ᐆᓇᕐᓂᖓ). ᖃᐅᒪᓂᖓ ᑕᕙ ᑕᑯᔅᓴᐅᔪᖅ ᐃᓅᑉ ᐃᔨᖏᑎᒍᑦ ᖃᐅᔨᔭᔅᓴᐅᔪᓐᓇᖅᑐᖅ ᐆᑕᕐᓇᕐᓂᖓ, ᑭᓯᐊᓂ ᓯᕿᓂᕐᒦᖔᖓᔪᖅᑕᖃᕐᒥᔪᖅ ᑕᑯᔪᓐᓇᙱᑕᑦᑎᓐᓂᑦ ᐃᔨᑦᑎᓐᓄᑦ, ᓯᕿᓂᐅᑉ ᐆᑎᕆᔪᓐᓇᕐᓂᖓ, ᐆᓐᓇᕐᓂᖅ, ᐆᑕᓐᓇᖅᑐᖅ ᐊᒻᒪ ᐆᓇᖅᑐᖅ ᐃᖏᕐᕋᔪᖅ ᓯᕿᓂᕐᒦᖔᖓᔪᖅ. ᐆᒻᒪᖅᑯᑎᔅᓴᐅᔪᓐᓇᖅᑐᑦ ᓯᕿᓂᕐᒥᐅᑉ ᐆᓇᕐᓂᖓᒍᑦ ᐆᒻᒪᖅᑯᑎᔅᓴᕈᖅᑎᑕᐅᔪᓐᓇᕐᖓᑦ ᒪᕐᕈᐃᓕᖅᑲᖓᔪᒃᑯᑦ. ᓯᕿᓂᕐᒥᑦ ᐆᒻᒪᖅᑯᑎᖃᐅᑎ ᓲᕐᓗ ᐊᔾᔨᓕᐅᕆᔾᔪᑎᑎᑐᑦ ᑕᕙᓐᖓᑦ ᓯᕿᓂᕐᒦᖔᖅᑐᒥᑦ ᐆᒻᒪᖅᑯᑎᔅᓴᕈᑐᓂ ᐊᔾᔨᓕᐅᕈᑎᒃᑯᑦ ᓱᑲᓐᓇᑦᑐ ᑕᕘᓈᖅᑐᓂ. ᓯᕿᓂᕐᒥᑦ ᐆᓐᓇᕐᓂᖓᓂᒃ ᐅᖅᑰᓴᐅᑏ ᓯᕿᓂᕐᒥᑦ ᐆᒻᒪᖅᑯᑎᒋᓪᓗᒍ ᐅᖅᑰᓴᐅᑎᕈᑎᑕᐅᓪᓗᓂ ᐆᓇᖅᓯᑎᑕᐅᒐᒥ ᓯᕿᓂᕐᒥᑦ ᐆᒻᒪᖅᑯᑎᖃᐅᑎᖓᒍᑦ.
ᓯᕿᓂᕐᒥᑦ ᐆᒻᒪᖅᑯᑎᔅᓴᖃᕈᓐᓇᕐᓂᖅ ᓄᓇᕗᒻᒥᑦ ᐊᑐᖅᑕᐅᒐᔪᓐᖏᓂᖅᓴᖅ, ᑕᓯᐅᔭᕐᔪᒦᐸᓯᑦᑐᑦ ᓯᕿᓂᕐᒥᑦ ᐆᒻᒪᖅᑯᑎᖃᕈᓐᓇᖅᑐᖅ ᐊᔾᔨᐅᔪᕆᑎᑕᐅᔪᓐᓇᖅᑐᑦ ᑯᐸᐃᒃ ᓂᒋᐊᓃᑐᑦ ᓯᕿᓂᕐᒥᑦ ᐆᒻᒪᖅᑯᑎᖃᕈᓐᓇᓂᖏᓐᓂᑦ, ᐋᓐᑎᐅᕆᔫᒥᑦ ᐊᒻᒪᓗ ᑲᓇᑕᐅᑉ ᑲᓇᓐᓂᕐᐸᓯᐊᓃᑐᑦ ᓂᒋᐊᑕ ᐃᒪᖅᐸᓯᑦᑐᓂᑦ, ᑕᐃᒪᐃᓕᖓᒐᓗᐊᖅᑎᓪᓗᒍ ᓯᕿᓂᕐᒥᑦ ᐆᒻᒪᖅᑯᑎᖃᕈᓐᓇᖅᑐᑦ ᓄᓇᕗᑦ ᐊᕙᓪᓗᐊᐸᓗᐊᒎᖓᔪᑦ ᐱᖃᑕᐅᔪᓐᓇᖅᑐᑦ ᑲᓇᑕᒥᐅᓂᑦ. ᐊᔅᓱᕈᓐᓇᕈᑎᒋᒻᒪᒍ ᓯᕿᓂᕐᒥᑦ ᐆᒻᒪᖅᑯᑎᖃᕋᓱᐊᕐᓗᓂ ᐅᐱᕐᖔᒃᑯᑦ ᐊᐅᔭᑎᓪᓗᒍᓗ ᑭᓯᐊᓂ ᐊᑐᕋᓱᐊᕐᓗᓂ ᐊᑲᐅᒻᒪᑦ ᐅᑭᐅᖑᑎᓪᓗᒍ ᖃᐅᒪᖏᓗᐊᖃᑦᑕᕐᓂᖓᓄᑦ. ᑕᐃᒪᐃᓕᖓᒐᓗᐊᖅᑎᓪᓗᒍ, ᓱᓕ ᐱᕕᔅᓴᖅᑕᖃᖅᑐᖅ ᓯᕿᓂᕐᒥᑦ ᐆᒻᒪᖁᑎᖃᓂᕐᒥᑦ, ᐱᓗᐊᖅᑐᒥᑦ ᓄᓇᕗᑦ ᓂᒋᖅᐸᓯᐊᓃᑦᑐᓄᑦ.
ᐆᒻᒪᖅᑯᑎᖃᕐᓂᕐᒧᑦ ᐆᑦᑐᕋᐅᑕᐅᔪᒥᑦ ᐱᓕᕆᐊᔅᓴᖃᕐᖓᑕ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ 11ᓂᑦ ᓯᕿᓂᕐᒥᑦ ᐆᒻᒪᖅᑯᑎᖃᐅᑎᓂᑦ ᐋᖅᑭᔅᓱᐃᓯᒪᔪᑦ ᐃᖃᓗᐃᑦ ᐆᒻᒪᖅᑯᑎᖃᕐᕕᖓᓐᓂᑦ ᐊᒻᒪ ᑖᒃᑯᐊ ᒫᑦᓯ 2016ᖑᑎᓪᓗᒍ ᐊᑐᖅᑕᐅᔪᓐᓇᓕᓚᐅᖅᑐᑦ. 3 ᑭᓗᐋᓐᓂᑦ ᓴᓐᖏᓂᓕᒻᒥᑦ ᐆᒻᒪᖅᑯᑎᖃᖅᑎᑦᑎᔪᓐᓇᖅᓯᓯᒪᔪᑦ, ᑖᓐᓇ ᐆᒻᒪᖅᑯᑎᔅᓴᑦ ᓯᓚᒥᑦ ᐱᓯᒪᔪᖅ ᐆᒻᒪᖅᑯᑎᖃᖅᑎᑦᑎᖃᑕᐅᓕᖅᑐᑦ ᓄᓇᓕᐸᐅᔭᒻᒥᑦ. ᑖᔅᓱᒥᖓ ᐱᓕᕆᐊᔅᓴᒥᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᖃᐅᔨᓴᕈᓐᓇᖃᑦᑕᖅᑐᑦ ᐊᓯᔾᔨᑕᕐᓂᖓ ᒪᓕᓪᓗᒍ ᓯᕿᓐᓂᑎᓪᓗᒍ ᐆᒻᒪᖅᑯᑎᖃᖅᑎᑦᑎᖃᑦᑕᕐᓂᖓ ᑭᓪᓕᓯᓂᐊᖅᑕᐅᓪᓗᓂᓗ. ᐆᒻᒪᖅᑯᑎ ᓯᓚᒦᖓᖓᔪᑦ ᐊᑐᖅᑎᑕᐅᓚᐅᖅᓯᒪᓐᖏᑦᑐᑦ ᓄᓇᕗᒻᒥ ᐆᒻᒪᖅᑯᑎᔅᓴᕆᔭᐅᓂᐊᕐᓗᓂ ᑕᕙᓐᖓᑦ ᖃᐅᔨᔭᐅᔪᑦ ᐱᓕᕆᐊᕆᔭᐅᔪᒥᑦ ᖃᐅᔨᓴᖅᑎᓪᓗᒋᑦ ᐆᑦᑐᕈᑎᒋᔭᐅᓂᐊᖅᑐᑦ ᐃᓪᓗᓄᑦ ᐆᒻᒪᖅᑯᑎᖃᐅᑎᔅᓴᖅᑖᕆᔭᐅᓗᑎᑦ, ᐱᔨᔅᓯᖅᑕᐅᕗᑦ ᓇᓪᓕᐊᑐᐃᓐᓇᖅ ᐋᖅᑭᔅᓯᔪᓐᓇᖅᓯᓗᑎᑦ ᐃᓪᓗᖏᓐᓄᑦ ᓯᕿᓂᕐᒥᑦ ᐆᒻᒪᖅᑯᑎᖃᐅᑎᔅᓴᒥᑦ ᑕᕙᓐᖓᑦ ᐆᒻᒪᖁᑎᖃᕈᓐᓇᖁᓪᓗᒋᑦ ᖄᒃᑲᓐᓂᐊᒍᑦ ᐊᑐᖅᑕᖏᑕ.