ᓯᑎᐱᕆ 24, ᑲᖏᖅᖠᓂᖅ, ᓄᓇᕗᑦ − ᓄᑭᒃ ᑯᐊᐳᕇᓴᓐ ᐊᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᓕᐊᓇᐃᒍᓱᒃᐴᒃ ᑐᓴᖅᑎᑦᑎᔪᓐᓇᕐᒪᑕ ᐊᑎᓕᐅᖅᑕᐅᓂᖓᓂᒃ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ (MOU) ᑲᒻᐸᓂᐅᔫᒃ ᐱᓕᕆᖃᑎᒌᖕᓂᐊᖅᖢᑎᒃ ᓯᕗᒻᒧᐊᒃᑎᑦᑎᓗᑎᒃ ᐸᕐᓇᐅᑎᓂᒃ ᐊᒻᒪ ᓴᖅᑭᑕᐅᕙᓪᓕᐊᔪᓂᒃ ᑕᑎᒋᔭᒃᓴᐅᔪᓂᒃ, ᓱᕈᖅᑎᕆᓗᐊᙱᑦᑐᓂᒃ ᐆᒻᒪᖅᑯᑎᑐᓗᐊᕐᓇᙱᑦᑐᓂᒃ ᑭᕙᓪᓕᕐᒥ ᓄᓇᕗᒻᒥ. ᐅᓇ ᐊᖏᕈᑎ ᑭᒡᒐᖅᑐᐃᕗᖅ ᐱᒻᒪᕆᐊᒃᑯᑦ ᓄᓇᓕᖕᓂᑦ ᓯᕗᓕᖅᑎᑦ ᑲᑎᑉᐸᓪᓕᐊᓂᖏᓐᓂᒃ ᓴᙱᓂᖅᓴᒥᒃ ᓯᕗᓂᒃᓴᓕᐅᕈᒪᓪᓗᑎᒃ ᑭᕙᓪᓕᕐᒧᑦ.
"ᐅᓪᓗᒥ ᓇᓗᓇᐃᒃᑯᑕᐅᕐᔪᐊᖅᐳᖅ ᑭᕙᓪᓕᕐᒥᐅᓄᑦ ᐊᒻᒪ ᐊᖏᕈᑎᒋᓯᒪᔭᕗᑦ ᓯᕗᓂᒃᓴᑦᑎᓐᓂ ᑲᔪᓯᑎᑦᑎᓂᕐᒧᑦ," ᔮᓐ ᒪᐃᓐ ᐅᖃᖅᑐᖅ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒥᓂᔅᑕ. "ᑖᓐᓇ ᐊᑎᓕᐅᖅᑕᐅᓂᖓ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᓄᑭᒃ ᐊᐅᓚᑦᑎᔨᑦ ᐊᒻᒪᓗ QEC−ᑯᑦ ᓯᕗᒻᒧᐊᖅᐸᓪᓕᐊᓂᑐᐃᓐᓇᐅᙱᓚᖅ ᐆᒻᒪᖅᑯᒻᒥᒃ ᓇᒧᙵᖅᑎᑦᑎᕙᓪᓕᐊᓂᕐᒥᒃ, ᑭᓯᐊᓂᓗᑦᑕᐅᖅ ᑕᑯᑎᑦᑎᕗᖅ ᐱᓕᕆᐊᖃᓪᓚᕆᒍᒪᓂᑦᑎᓐᓂᒃ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒥᒃ. ᓄᓇᕗᑦ ᒐᕙᒪᒃᑯᑦ ᐅᐱᒍᓱᒃᐳᑦ ᐃᑲᔪᖅᑐᐃᔪᓐᓇᕐᒪᑕ ᑖᔅᓱᒥᖓ ᐱᓕᕆᐊᖑᕙᓪᓕᐊᔪᒪᔪᒥᒃ, ᒪᓕᒃᖢᑎᒃ ᑲᓇᑕᒥ ᒐᕙᒪᒃᑯᑦ ᓴᓗᒪᔪᒥᒃ ᐆᒻᒪᖅᑯᑎᓄᑦ ᐊᖏᕈᑎᒋᓯᒪᔭᖏᓐᓂᒃ ᐊᒻᒪ ᐊᑐᑦᑎᐊᕐᓂᖅᓴᐅᓕᕐᓗᑎᒃ, ᖃᐅᒃᐸᑦ ᓱᕈᖅᑎᕆᙱᓐᓂᖅᓴᐅᓗᑎᒃ ᓄᓇᑦᑎᓐᓂ."
“ᓴᓗᒪᔪᒥ ᐊᑐᐃᓐᓇᕈᓐᓇᕐᑐᒥᒃᓗ ᐆᒻᒪᖁᑎᖃᕐᓂᖅ ᐱᒻᒪᕆᐅᕗᖅ ᐱᕙᓪᓕᐊᓂᖕᒧᑦ, ᐆᒻᒪᖅᑯᑎᑦ ᐊᑦᑕᕐᓇᖅᑐᒦᑎᑦᑕᐃᓕᓂᖅ ᐊᒻᒪᓗ ᐱᓗᐊᕐᑕᐃᓕᑎᓪᓗᒍ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᑭᕙᓪᓕᕐᒥᐅᓄᑦ ᒫᓐᓇ ᐊᒻᒪᓗ ᑭᖑᕙᒃᓴᓄᑦ ᐊᒡᒋᖅᑐᓄᑦ. ᑖᓐᓇ ᓄᑖᖅ ᐊᖏᖃᑎᒌᒍᑎ ᐃᑲᔪᕐᓂᐊᖅᑐᖅ ᓯᕗᕙᕆᐊᕐᓗᒍ ᐱᔭᕆᐊᖃᒻᒪᕆᒃᑐᖅ ᐱᓕᕆᐊᒃᓴᖅ, ᐱᑎᑦᑎᓗᓂ ᐱᒻᒪᕆᐅᔪᓂᒃ ᑕᐅᑐᒃᑕᐅᔪᓂᒃ, ᐃᑲᔪᕐᓗᒋᓪᓗ ᐃᓄᐃᑦ ᐱᔪᓐᓇᕐᓗᑎᒃ ᐊᔾᔨᖓᓂᒃ ᐱᕕᒃᓴᓂᑦ ᐊᑐᒐᔪᒃᑐᓂ ᖃᓪᓗᓈᑦ ᓄᓇᖓᓐᓂ ᑲᓇᑕᒥ," ᐅᖃᖅᑐᖅ ᑯᓄ ᑕᑦᑐᐃᓂ, ᐃᓱᒪᑕᖅ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐃᓚᒋᔭᐅᓪᓗᓂᓗ ᑲᑎᒪᔨᓄᑦ ᓄᑭᒃ ᐊᐅᓚᑦᑎᔨᓄᑦ.
ᓄᑭᒃ ᐊᐅᓚᑦᑎᔨᑦ ᐃᑲᔪᖅᑐᐃᕗᖅ ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ (KHFL), ᖃᓄᖅᑑᕈᑎᑦ ᐊᒥᓱᓂᑦ−ᐱᔾᔪᑎᓕᖕᓂᒃ ᐊᐅᓚᔪᓐᓇᐅᑎᓄᑦ ᐱᓕᕆᐊᖅ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᑐᕈᓯᕐᓂᒃ ᐊᒻᒪ ᖃᕆᑕᐅᔭᓕᕆᔪᓐᓇᐅᑎᓂᒃ ᓄᑭᓪᓚᐅᑎᓂᒃ ᒫᓂᑑᐸᒥ ᑕᓪᓕᒪᓄᑦ ᓄᓇᓕᖕᓄᑦ ᑭᕙᓪᓕᕐᒥ ᐊᒻᒪ ᓯᕗᓂᒃᓴᒥ ᐅᔭᕋᖕᓂᐊᖅᑐᓕᕆᓂᕐᒧᑦ ᐊᐅᓚᓂᕆᔭᐅᔪᓄᑦ. ᐅᓇ ᐱᓕᕆᐊᖅ ᓄᓇᕗᒻᒥᑦ ᓯᕗᓪᓕᕐᐸᐅᓂᐊᕐᑐᖅ ᒪᑭᒪᔾᔪᑎᑦ ᑲᓱᕐᕕᖓ ᓂᒋᖅᐸᓯᖕᒥᑦ ᑲᓇᑕᒥ ᐊᒻᒪᓗ ᐃᑲᔪᖅᑐᐃᓂᐊᕐᖢᓂ ᐆᒻᒪᖁᑎᒋᔭᐅᔭᕆᐊᓕᖕᒥ ᑭᕙᓪᓕᕐᒥᐅᓄᑦ ᑭᖑᕚᒃᓴᓄᑦ ᐊᒡᒋᖅᑐᓄᑦ.
ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ ᐱᕙᓪᓕᐊᑎᑕᐅᔪᖅ ᑐᕌᒐᖃᖅᖢᑎᒡᓗ ᐊᕙᑎᒧᑦ ᓚᐃᓴᓐᓯᑖᖅᑎᑦᑎᔪᒪᓪᓗᑎᒃ 2026−ᒥ, ᓴᓇᔭᐅᓛᖅᖢᓂ 2028−ᒥ, ᐊᑐᓕᖅᑎᑕᐅᓛᖅᖢᓂᓗ 2032−ᒥ.
ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᒪᓕᒃᖢᒍ, ᑲᑐᔾᔨᖃᑎᒌᑦ ᐱᓕᕆᖃᑎᒌᖕᓂᐊᖅᑐᑦ ᒪᕐᕉᖕᓄᑦ ᐱᓕᕆᐊᒃᓴᓪᓗᐊᑕᕐᓄᑦ:
- ᑭᕙᓪᓕᕐᒥ ᐊᕕᒃᑐᖅᓯᒪᔪᓂ ᐆᒻᒪᖅᑯᑎᓄᑦ ᐸᕐᓇᐅᑎᑦ: ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᒻᒪ ᓄᑭᒃᑯᑦ ᓴᖅᑭᑦᑎᓛᖅᑐᑦ ᐊᑯᓂᐅᔪᒃᑯᑦ ᐆᒻᒪᖅᑯᑎᓄᑦ ᐸᕐᓇᐅᑎᒥᒃ ᑭᕙᓪᓕᕐᒧᑦ ᐃᓚᓕᐅᔾᔨᓯᒪᔪᓂᒃ ᐅᖃᐅᓯᐅᔪᓂᒃ ᓄᓇᓕᖕᓂ ᐱᑖᖃᑕᐅᓯᒪᔪᓂᒃ ᐊᑲᐅᓛᖑᓪᓗᓂᓗ ᐆᒻᒪᖅᑯᑎᑐᖅᑎᓄᑦ. ᑖᓐᓇ ᐸᕐᓇᐅᑎ ᐃᓱᒪᒋᔭᖃᕐᓂᐊᖅᑐᖅ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ ᐆᒻᒪᖅᑯᑎᓄᑦ ᐱᕈᖅᐸᓪᓕᐊᓂᕐᒥᒃ, ᖁᓪᓕᒃᑯᑦ ᐅᖅᓱᐊᓗᖕᒨᖅᑐᓄᑦ ᐊᐅᓚᐅᑎᖃᕐᕕᖏᑕ ᐱᔭᕆᐊᓕᖏᑦ, ᓴᓇᕝᕖᑦ ᐱᔭᕆᐊᓕᖏᑦ, ᓄᓇᓕᖕᓂ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᓄᑦ ᐊᐅᓚᐅᑎᑦ, ᐃᖅᑲᓇᐃᔮᖑᑐᐃᓐᓇᕆᐊᖃᖅᑐᓪᓗ ᐆᒻᒪᖅᑯᑎᓄᑦ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ. ᐱᓕᕆᐊᖅ ᐊᐅᓚᑕᐅᓂᐊᖅᑐᖅ ᐃᒻᒥᒃᑰᖅᑐᒧᑦ ᖃᐅᔨᒪᔨᑕᒻᒪᕆᒻᒧᑦ ᑐᑭᒧᐊᑦᑎᑕᐅᓗᓂ ᓄᑭᒃᑯᓐᓄᑦ ᐆᒻᒪᖅᑯᑎᓕᕆᔨᒃᑯᓐᓄᓪᓗ.
- ᑎᑎᕋᖅᑕᐅᒋᐊᖓᖅᑐᖅ ᐆᒻᒪᖅᑯᑎᓄᑦ ᓂᐅᕕᕐᓂᕐᒧᑦ ᐱᓕᕆᔾᔪᑕᐅᓂᐊᖅᑐᑦ ᐊᖏᖃᑎᒌᒍᑎ: ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᒻᒪ ᓄᑭᒃᑯᑦ ᐱᓕᕆᖃᑎᒌᖕᓂᐊᖅᐳᑦ ᐋᖅᑭᒃᓯᓇᓱᒡᓗᑎᒃ ᑎᑎᕋᖅᑕᐅᒋᐊᕐᖓᖅᑐᒥᒃ ᐆᒻᒪᖅᑯᑎᑖᕐᓂᕐᒧᑦ ᐱᓕᕆᔾᔪᑕᐅᓂᐊᖅᑐᒥᒃ ᐊᖏᖃᑎᒌᒍᑎᒥᒃ ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ. ᑖᓐᓇ ᑎᑎᕋᖅᑕᐅᙵᖅᑐᖅ ᐆᒻᒪᖅᑯᑎᓄᑦ ᓂᐅᕕᕐᓂᕐᒧᑦ ᐱᓕᕆᔾᔪᑕᐅᓂᐊᖅᑐᑦ ᐊᖏᖃᑎᒌᒍᑎ ᓇᓗᓇᐃᔭᐃᓂᐊᖅᑐᖅ ᐊᑐᕆᐊᓖᑦ ᒪᓕᒋᐊᓖᓪᓗ ᑖᒃᑯᐊ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓂᐅᕕᕈᓐᓇᖕᓂᖏᓐᓂᑦ ᐆᒻᒪᖅᑯᑎᓂᑦ ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ.
"ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᓕᐊᓇᐃᒍᓱᒃᑐᑦ ᐊᓪᓗᕆᐊᒃᑲᓐᓂᕆᐊᒃᓴᖅ ᐃᓚᓕᐅᔾᔨᓂᖕᓂᑦ ᐊᑐᒃᑲᓐᓂᕈᓐᓇᖅᑐᓂᑦ ᐆᒻᒪᖅᑯᑎᓂᑦ ᓄᓇᕘᑉ ᐆᒻᒪᖅᑯᑎᖏᓐᓄᑦ ᐊᔾᔨᒌᙱᑦᑑᑎᓄᑦ," ᐅᖃᖅᑐᕕᓂᖅ ᐆᕐᓂᔅ ᑕᒡᓚᔅ, ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳᖓ ᐊᐅᓚᑦᑎᔨᒻᒪᕆᒡᓗ. "ᐱᓕᕆᐊᖃᓪᓚᕆᒍᒪᕗᒍᑦ ᑕᒪᑐᒧᖓ ᐱᓕᕆᖃᑎᒌᖕᓂᕐᒧᑦ ᓄᑮᒃᑯᓐᓂᒃ ᐱᑎᑦᑎᓂᐊᖅᖢᑕᓗ ᐱᔭᐅᔭᕆᐊᓕᖕᓂᒃ ᐃᑲᔪᖅᑐᐃᓂᕐᒥᒃ ᓇᓗᙱᑦᑎᐊᕈᒪᓂᕐᒧᑦ ᑕᒪᓐᓇ ᐱᓕᕆᐊᖑᔪᖅ ᑲᔪᓯᓂᖃᑦᑎᐊᕋᓗᐊᕐᒪᖔᑦ. ᓂᕆᐅᑦᑎᐊᖅᐳᒍᑦ ᐊᑯᓂᐅᔪᒥ ᐊᑭᓕᖅᓱᐃᖃᑦᑕᓛᕐᓂᑎᓐᓂᒃ ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ, ᑕᒪᓐᓇ ᓴᓗᒪᔪᒥᒃ ᐆᒻᒪᖅᑯᑎᖃᕈᑕᐅᓂᐊᖅᑐᖅ ᑭᕙᓪᓕᕐᒥᐅᓄᑦ."
"ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ ᐱᕐᔪᐊᖑᓪᓗᓂ ᐊᐅᓚᔪᓐᓇᐅᑎᒋᔭᐅᕗᖅ ᓄᓇᑦᑎᓐᓂ ᓯᕗᓂᒃᓴᑦᑎᓐᓂ ᐱᓕᕆᐊᖑᑦᑎᐊᓛᖅᑐᓄᑦ,"" ᐅᖃᓚᐅᖅᐳᖅ ᑕᐃᕕᑦ ᖃᑯᒃᑎᓂᖅ, ᐊᖓᔪᖅᑳᖅ ᓄᑭᒃᑯᓐᓄᑦ ᐊᒻᒪ ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ ᓴᒃᑰᑉ ᐱᕈᐃᔭᖏᓐᓂ ᐊᐅᓚᑦᑎᔩᑦ. “ᑕᐃᒪᐃᒻᒪᑦ ᐊᓕᐊᓇᐃᒍᓱᒃᐳᒍᑦ ᐱᓕᕆᖃᑎᒋᔭᕆᐊᒃᓴᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓯᕗᒧᐊᒃᑲᓐᓂᖁᓪᓗᒍ ᑕᒪᓐᓇ ᐱᔭᕆᐊᖃᓪᓚᕆᑦᑐᖅ ᐸᖕᓇᐃᓂᖕᒧᑦ ᐱᓕᕆᐊᖅ. ᐊᑕᐅᑦᑎᒃᑯᑦ, ᑲᑎᑦᑐᓐᓇᓕᑕᐃᓐᓇᖅᑕᕗᑦ ᓄᓇᕗᑦ ᑲᓇᑕᒥᐅᑕᐅᖃᑎᑦᑎᓐᓄᑦ ᓴᖅᑭᑦᑎᓗᑕᓗ ᑭᖑᕚᕇᖕᓂᒃ ᐃᖅᑲᓇᐃᔮᒃᓴᓂᒃ ᐊᒻᒪ ᓇᖕᒥᓂᖃᕐᕕᖕᓂᒃ ᐱᕕᒃᓴᐅᔪᓐᓇᖅᑐᓂᒃ."
ᑖᓐᓇ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᓇᓗᓇᐃᖅᓯᖕᒪᑦ ᐅᔾᔨᕐᓇᖅᑐᒥᒃ ᓯᕗᒧᐊᖕᓂᕐᒥ ᓱᕈᖅᑎᕆᓗᐊᙱᑦᑐᒧᑦ ᐊᒻᒪ ᑲᔪᓰᓐᓇᕈᓐᓇᕐᓂᖅᓴᐅᔪᒧᑦ ᓯᕗᓂᒃᓴᒥ ᑭᕙᓪᓕᕐᒥᐅᓄᑦ. ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ ᕿᓂᖅᐳᑦ ᓴᖅᑭᑦᑎᔪᒪᓪᓗᑎᒃ ᐅᔾᔨᕐᓇᖅᑐᓂᒃ ᐱᕐᔪᐊᖑᓪᓗᑎᒃ ᐊᐅᓚᔪᓐᓇᐅᑎᓄᑦ ᐱᑕᖃᙱᓐᓂᐅᔪᓂᒃ ᒫᓂᑑᐸ ᐅᐊᖕᓇᖓᓂ ᐊᒻᒪ ᓄᓇᕗᒻᒥ ᐱᕕᖃᕈᑕᐅᓪᓗᓂᓗ ᐊᕕᒃᑐᖅᓯᒪᔪᓂ ᐱᓕᕆᔪᓐᓇᖁᓪᓗᒋᑦ ᐃᓄᖕᓄᑦ−ᒪᑭᒪᓇᓱᐊᕐᓂᕐᒧᑦ ᐱᕙᓪᓕᐊᓂᐅᔪᓂᒃ, ᐋᖅᑭᒋᐊᕈᑎᓄᑦ, ᐊᒻᒪ ᐃᖏᕐᕋᐃᓐᓇᕈᑎᓄᑦ ᑎᑭᑕᐅᓇᓱᒃᑐᓄᑦ. ᐱᓕᕆᖃᑎᒌᒡᓗᑎᒃ, ᓄᑭᒃ ᐊᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓴᖅᑭᑦᑎᔪᒪᓪᓚᑦᑖᖅᐳᑦ ᐊᕕᒃᑐᖅᓯᒪᔪᓂ ᐆᒻᒪᖅᑯᑎᓕᕆᓂᕐᒧᑦ ᖃᓄᐃᓕᐅᕈᑕᐅᔪᒪᔪᓂᒃ ᓄᓇᓕᖕᓄᑦ ᐃᑲᔫᑕᐅᓂᐊᖅᑐᒥᒃ ᐃᑲᔪᖅᑐᐃᔪᓂᒡᓗ ᐊᑯᓂᐅᔪᒃᑯᑦ ᑮᓇᐅᔭᓕᐅᕋᓱᖕᓂᕐᒧᑦ ᐱᕈᖅᐸᓪᓕᐊᔪᓄᑦ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᒥᒃᓵᓄᑦ
ᐆᒻᒪᖅᑯᑎᓕᕆᔨᒃᑯᑦ ᐆᒻᒪᖅᑯᑎᖃᖅᑎᑦᑎᓲᑦ 15,500 ᐊᑭᓕᕐᓱᐃᕙᒃᑐᓄᑦ ᓄᓇᕗᒻᒥᑦ. ᐊᐅᓚᑦᑎᕙᒃᑐᒍᑦ ᐆᒻᒪᖅᑯᑎᖃᖅᑎᑦᑎᕙᒃᖢᑕᓗ ᓄᓇᕗᒻᒥᐅᓂᑦ ᐊᐅᓚᑦᑎᓂᒃᑯᑦ 25-ᖑᔪᓂ ᐃᓛᒃᑰᖅᑐᓂ ᐅᖅᓱᐊᓗᖕᒧᑦ ᐊᐅᓚᔪᓐᓇᐅᑎᓂᒃ 25-ᖑᔪᓂ ᓄᓇᓕᖕᓂ, ᑲᑎᓕᒫᖅᖢᒍ ᐃᓕᐅᖅᑲᖅᑕᐅᓯᒪᔪᑦ ᐃᒻᒪᖄ 84,000 kW−ᖑᔪᑦ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᐅᓚᐅᓯᕆᖃᑦᑕᖅᑐᑎᑦ, ᐅᐊᔭᓕᕆᓪᓗᑎᑦ ᐊᒻᒪᓗ ᑲᒪᖃᑦᑕᖅᑐᑎᑦ ᐊᐅᓚᐅᑎᓂᑦ ᐱᖓᓱᓄᑦ ᐊᕕᑦᑐᖅᓯᒪᔪᓄᑦ ᐅᑭᐅᖅᑕᖅᑐᒥ: ᐃᖃᓗᖕᓂ, ᑲᖏᖅᖠᓂᕐᒥ, ᐊᒻᒪᓗ ᐃᖃᓗᒃᑑᑦᑎᐊᒥ. ᑎᒥᐅᔫᑉ ᓇᖕᒥᓂᖃᕐᓂᕐᒧᑦ ᖃᓄᐃᓕᐅᕈᑎᖏᑦ ᐋᖅᑭᒃᑕᐅᓯᒪᐃᓐᓇᖅᑐᑦ ᑐᑦᑕᕐᕕᖓᑕ ᑎᑎᕋᕐᕕᖓᓂ ᖃᒪᓂ'ᑐᐊᕐᒥ ᑎᒥᐅᔫᓪᓗ ᑎᑎᕋᕐᕕᖏᓐᓂ ᐃᖃᓗᖕᓂ. ᖁᒧᓪᓕᒃᑯᑦ 232-ᓂᒃ ᐃᖅᑲᓇᐃᔭᖅᑎᖃᖅᐳᑦ ᓄᓇᕗᓕᒫᒥᑦ.
ᓄᑭᒃ ᑯᐊᐳᕇᓴᒃᑯᑦ ᐊᐅᓚᑦᑎᔩᑦ ᒥᒃᓵᓄᑦ
ᓄᑭᒃ ᐃᓄᖕᓄᑦ−ᓇᖕᒥᓂᕆᔭᐅᕗᖅ ᐊᐅᓚᑦᑎᔩᑦ ᓴᖅᑭᑕᐅᓚᐅᖅᓯᒪᓪᓗᓂ ᓯᕗᓕᖅᑎᐅᓂᐊᕐᓗᓂ ᐱᕐᔪᐊᓂᒃ ᐊᐅᓚᔪᓐᓇᐅᑎᓄᑦ ᐱᓕᕆᐊᓂᒃ ᑭᕙᓪᓕᕐᒥ ᓄᓇᕗᒻᒥ. ᓄᑭᒃ 100%−ᓂᒃ ᐃᓄᖕᓄᑦ ᓇᖕᒥᓂᕆᔭᐅᕗᖅ ᓇᖕᒥᓂᕆᔭᐅᓪᓗᓂ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪ ᓴᒃᑯ ᑮᓇᐅᔭᓕᐅᕈᑕᐅᓇᓱᒃᑐᑦ ᑯᐊᐳᕇᓴᒃᑯᓐᓄᑦ. ᓄᑭᒃ ᑕᐅᑐᓪᓗᐊᑕᖅᑕᖓ ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ (KHFL), ᑲᓇᑕᒥ−ᐱᕈᖅᓴᐃᓂᖅ ᓴᓗᒪᔪᒥᒃ ᐆᒻᒪᖅᑯᑎᒥᒃ ᐊᒻᒪ ᐊᓕᒎᔭᕐᓂᒃ ᓴᕕᒐᐅᔭᕐᓂᒃ ᐱᓕᕆᐊᖅ ᐊᒃᑐᐊᔪᖅ ᓄᓇᕗᒻᒥ ᒫᓂᑑᐸᒧᑦ. ᑭᕙᓪᓕᕐᒥ ᐆᒻᒪᖅᑯᑎᓕᕆᔨᒃᑯᑦ−ᐃᒐᓯᐅᑎᒧᑦ ᐊᑦᑕᑕᕐᕕᐅᓲᒥᒃ ᐱᑎᑦᑎᕙᒃᐳᑦ ᓈᒻᒪᒃᑐᓂᒃ ᐊᓯᔾᔨᒋᐊᒐᒃᓴᐅᔪᒥᒃ ᐆᒻᒪᖅᑯᒻᒥᒃ ᐊᓕᒎᓪᓗ ᐃᑭᐊᖅᑭᕕᒃᑰᕈᓐᓇᐅᑎᒥᒃ ᐊᔪᙱᓐᓂᕆᔭᐅᔪᒥᒃ ᑭᕙᓪᓕᕐᒥᐅᓄᑦ ᑯᖑᕚᒃᓴᓄ ᐊᒡᒋᖅᑐᓄᑦ.
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑖᒻ ᒋᐅᕋᑦ
ᓄᑭᒃᑯᓐᓄᑦ ᐅᖃᐅᔾᔨᒋᐊᖅᑎᒻᒪᕆᒃ
204.806.3670
tom@chadwickconsulting.ca
ᑏᓇ ᒪᓐᑕᐃᔭ
ᑐᑭᒧᐊᑦᑎᑦᓯᔨ, ᐊᐅᓚᑦᓯᕕᒻᒥᑦ
867-979-7534
tmandeya@qec.nu.ca