ᐃᖃᓗᐃᑦ, ᓄᓇᕗᑦ (ᓄᕕᐱᕆ 19, 2024)—ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓯᕗᒻᒧᐊᒃᐸᓪᓕᐊᕗᑦ ᐱᓕᕆᐊᖃᓪᓚᕆᒍᒪᓂᕐᒥᓄᑦ ᓴᙱᒃᑎᒋᐊᖅᑎᑦᑎᔪᒪᓪᓗᑎᒃ ᓄᑖᙳᕆᐊᖅᑎᑦᑎᔪᒪᓪᓗᑎᒡᓗ ᐆᒻᒪᖅᑯᒻᒧᑦ ᓇᑉᐸᖅᑎᖅᑕᐅᓯᒪᔪᓂᒃ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ ᑐᓂᓯᓪᓗᑎᒃ ᓴᓇᓂᕐᒧᑦ ᐊᖏᖃᑎᒌᒍᑕᐅᔪᓂᒃ ᐆᒻᒪᖅᑯᑎᖃᕐᕕᖕᓂᒃ ᐃᓇᖏᖅᓯᓂᕐᒧᑦ ᐱᓕᕆᐊᖑᔪᓂᒃ ADCO Power−ᑯᓐᓄᑦ ᐃᖃᓗᒃᑑᑦᑎᐊᒥᐅᓄᑦ ᐱᓕᑕᖅ ᓇᖕᒥᓂᕆᔭᖏᓐᓄᑦ ᐃᒡᓗᓕᖕᒥᓗ. ᐱᕙᓪᓕᐊᓂᖓ ᑖᒃᑯᐊ ᐱᓕᕆᐊᒃᓴᑦ ᓇᓗᓇᐃᖅᓯᕗᑦ ᐱᔭᕆᐊᖃᖅᑐᒥᒃ ᐊᓪᓗᕆᐊᕈᑎᒥᒃ ᐱᖁᓪᓗᒍ ᑕᑎᒋᔭᒃᓴᐅᔪᒥᒃ ᐆᒻᒪᖅᑯᑎᒥᒃ ᓄᓇᓕᑦᑎᓐᓄᑦ, ᐃᓚᓕᐅᔾᔨᓂᖅ ᐱᐅᓯᒋᐊᖅᓯᒪᔪᓂᒃ ᖃᕆᑕᐅᔭᓕᕆᔾᔪᑎᓂᒃ ᐱᐅᓯᒋᐊᕐᓗᒍ ᐊᑦᑕᕐᓇᖅᑕᐃᓕᒪᓂᖅ, ᐃᑲᔪᖅᓱᕐᓗᒋᓪᓗ ᐃᓚᓕᐅᔾᔨᓂᖅ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᓯᕗᓂᑦᑎᓐᓂ.
"ᑐᓂᓯᓂᖅ ᑖᒃᑯᓂᖓ ᓴᓇᓂᕐᒧᑦ ᐊᖏᕈᑎᓂᒃ, ᑲᒪᒋᔭᖃᖅᑐᒍᑦ ᓄᓇᓕᑦᑕ ᐱᕈᖅᐸᓪᓕᐊᔪᒥᑦ ᐆᒻᒪᖅᑯᑎᓄᑦ ᐱᔭᕆᐊᓕᖕᓂᑦ," ᐅᖃᖅᑐᖅ ᒪᓕᒐᓕᐅᖅᑎ ᔮᓐ ᒪᐃᓐ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᑦ. "ᑯᐊᐳᕇᓴᒃᑯᑦ ᐊᖏᖅᓯᒪᑦᑎᐊᖅᑐᑦ ᓴᓇᖁᓪᓗᒋᑦ ᐊᑑᑎᖃᖅᑐᓂᒃ ᐊᒻᒪ ᐊᑭᑐᓗᐊᖏᑦᑐᓂᒃ ᐋᖅᑭᒋᐊᕈᑎᒃᓴᓂᒃ ᐆᒻᒪᖅᑯᑎᑦ ᐊᑭᑐᓗᐊᖁᓇᒋᑦ ᐊᒻᒪ ᐊᑐᐃᓐᓇᐅᓗᑎᒃ ᓄᓇᕗᒥᐅᓄᑦ."
ᓄᑖᖅ ᐆᒻᒪᖅᑯᑎᖃᕐᕕᒃ ᐃᖃᓗᒃᑑᑦᑎᐊᒥ, ᐅᖅᓱᖅᑑᕐᒥ ᐃᒡᓗᓕᖕᒥᓗ ᓂᕆᐅᒋᔭᐅᕗᑦ ᓴᓇᔭᐅᓯᒋᐊᓛᕋᓱᒋᔭᐅᓪᓗᑎᒃ 2025-26 ᐅᑭᐅᖓᓂ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑮᓇᐅᔭᖅᑖᖅᓯᒪᕗᑦ ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᓂᕐᒧᑦ ᑮᓇᐅᔭᖁᑎᖏᑎᒍᑦ ᐃᑲᔫᑕᐅᓂᐊᖅᑐᓂᒃ ᐱᓕᕆᐊᒧᑦ ᐊᑭᖏᓐᓄᑦ.
"ᑖᓐᓇ ᐱᕈᖅᓴᐃᓂᖅ ᐅᓪᓗᒥᓕᓴᕐᓄᑦ ᐆᒻᒪᖅᑯᑎᓄᑦ ᒪᑭᒪᐃᓐᓇᕈᑎᒃᓴᓄᑦ ᐱᒻᒪᕆᐅᔪᖅ ᓄᓇᓕᑦᑎᓐᓄᑦ," ᐅᖃᖅᑐᖅ ᐆᕐᓂᔅ ᑕᒡᓚᔅ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐊᖓᔪᖅᑳᖓ/ᐊᐅᓚᑦᑎᔨᒻᒪᕆᒃ. "ᑖᒃᑯᐊ ᐊᐅᓚᐅᑎᖃᕐᕖᑦ ᐊᓯᔾᔨᖅᑕᐅᓂᖏᑦ ᐊᑐᕐᓂᐊᖅᐳᑦ ᓄᑖᙳᕆᐊᖅᓯᒪᔪᓂᒃ ᐱᓕᕆᔾᔪᑎᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐃᓚᓕᐅᔾᔨᔪᓐᓇᖅᓯᓗᑎᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᑐᕈᓯᕐᓂᒃ ᓄᓇᓕᖕᓂ ᐆᒻᒪᖅᑯᑎᖃᐅᑎᑦᑎᓐᓄᑦ ᓯᕗᓂᒃᓴᑦᑎᓐᓂ."
ᐱᔭᕇᖅᐸᑕ, ᑖᒃᑯᐊ ᐊᐅᓚᐅᑎᖃᕐᕖᑦ ᐃᑲᔪᖅᑐᐃᓂᐊᖅᑐᑦ ᐆᒻᒪᖅᑯᑎᓕᕆᔨᒃᑯᑦ ᐱᓇᓱᐊᖅᑕᖏᓐᓂᑦ ᐊᑦᑕᖕᓇᙱᑦᑐᒥᑦ ᓈᒻᒪᒃᑐᓂᒡᓗ ᐆᒻᒪᖅᑯᓯᐅᕐᓗᑎᒃ ᓄᓇᕗᒻᒥᑦ ᓯᕗᒧᐊᒐᓱᒃᓯᓐᓈᕐᓗᑎᒃ ᑲᔪᓰᓐᓇᕈᓐᓇᖅᑐᓂᑦ ᐆᒻᒪᖅᑯᑎᓄᑦ ᐱᒋᐊᖅᑕᐅᓯᒪᔪᓂᑦ ᐊᑑᑎᖃᖅᑐᓂᑦ ᓄᓇᕘᑉ ᐊᑯᓂᐅᔪᒧᑦ ᐱᕙᓪᓕᐊᓂᖏᓐᓂᑦ. ᑐᓴᒃᑲᓐᓂᕈᒪᒍᕕᑦ ᑖᔅᓱᒧᖓ ᐱᓇᔪᒍᑕᐅᔪᒧᑦ, ᐅᕗᖓ ᑕᑯᒋᐊᕐᓗᑎᑦ, www.qec.nu.ca.