ᐃᖃᓗᐃᑦ, ᓄᓇᕗᑦ (ᐅᑐᐱᕆ 18, 2024) – ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ (QEC) ᐱᓇᔪᓚᐅᖅᐳᑦ ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎᒥᑦ 1.35−¢/kWh−ᒥᑦ ᐅᑐᐱᕆ 1, 2024−ᒥᑦ, ᒫᑦᓯ 31, 2025−ᒧᑦ. ᐱᓇᔫᑎ ᑐᓐᓂᖅᑯᑕᐅᓚᐅᖅᐳᖅ ᔮᓐ ᒪᐃᓐᒧᑦ, ᐆᒻᒪᖅᑯᑎᓕᕆᔨᒃᑯᑦ ᒥᓂᔅᑕᖓᓄᑦ, ᐊᑐᓕᖁᔭᐅᔪᓂᒃ ᖃᐅᔨᓇᓱᒋᐊᖃᕐᓂᐊᖅᑐᖅ ᐆᒻᒪᖅᑯᑎᑦ ᐊᑭᖏᓐᓄᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ.
"ᐊᑲᐅᑦᑎᐊᖅᐳᖅ ᑕᑯᓪᓗᓂ ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎ ᐊᑐᖅᑕᐅᓚᐅᖅᑐᖅ ᓯᑎᐱᕆ 30−ᒧᑦ ᑎᑭᖦᖢᒍ ᑲᑕᒋᐊᖅᓯᒪᖕᒪᑦ 3.70−¢−ᒥᑦ/kWh 2024−ᒥᑦ 1.35−¢−ᒧᑦ/kWh," ᒥᓂᔅᑕ ᒪᐃᓐ ᐅᖃᖅᐳᖅ. "ᐅᑭᐅᙳᖅᐸᓪᓕᐊᓕᖅᑎᓪᓗᒍ, ᑖᓐᓇ ᒥᒃᖠᒋᐊᖅᑐᖅ ᐃᑲᔪᕐᓂᐊᖅᐳᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᑭᓕᖅᓱᐃᕙᒃᑐᓄᑦ."
ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎ ᐊᑭᓕᒃᑲᓐᓂᕆᐊᖃᓲᖑᕗᖅ ᐅᕝᕙᓘᓐᓃᑦ ᐅᑎᖅᑎᑕᐅᔪᓐᓇᖅᖢᓂ ᐊᑭᓕᖅᓱᐃᔨᑦ ᐊᑭᓕᒐᒃᓴᖏᓐᓂ ᓴᖅᑭᔮᖅᑎᑦᑎᔭᕆᐊᖃᖅᖢᓂ ᐅᖅᓱᐊᓘᑉ ᐊᑭᖓᑕ ᐊᔾᔨᒌᙱᓐᓂᖏᓐᓂ ᐊᑐᖅᑕᐅᔪᒥᒃ ᐆᒻᒪᖅᑯᑎᑦ ᐊᑭᖏᓐᓂᒃ ᐋᖅᑭᒃᑕᐅᓯᒪᔪᒥᒃ ᐅᖅᓱᐊᓘᓪᓗ ᐊᑭᓪᓚᑦᑖᖓᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᐊᑭᓕᖅᑕᐅᔪᒥᒃ.
"ᐃᒡᓗᓕᕆᔨᒃᑯᓐᓂ ᐊᑐᖅᑐᐊᖅᑎᑦ ᑭᑭᑕᐅᓪᓗᑎᒃ ᐃᑲᔫᓯᐊᖅᑖᖅᐸᒃᑐᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑎᒍᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᐊᑭᓕᖅᓱᐃᕙᒃᑐᑦ ᓂᕆᐅᒍᓐᓇᕐᓂᐊᖅᑐᑦ ᒥᒃᖠᒋᐊᖅᓯᒪᔪᒥᒃ ᐃᓕᓯᒪᑲᐅᑎᒋᓗᓂ ᑕᖅᑭᑕᒫ ᐊᑭᓕᒃᓴᖅᑖᕆᕙᒃᑕᖓᓄᑦ, ᐱᒋᐊᕐᓗᓂ ᐅᑐᐱᕆᒥ ᐊᑭᓕᒐᒃᓴᖅᑖᕆᔭᖓᓂ," ᐅᕐᓇᔅ ᑕᒡᓚᔅ ᐅᖃᖅᑐᖅ, ᐆᒻᒪᖅᑯᑎᓕᕆᔨᒃᑯᑦ ᐊᖓᔪᖅᑳᖓ ᐊᒻᒪ ᐊᐅᓚᑦᑎᔨᒻᒪᕆᖓ.
ᓂᕆᐅᒋᔭᐅᔪᖅ ᐊᒃᑐᐃᓂᐊᕐᓂᖓ ᐋᖅᑭᒋᐊᖅᓯᒪᔫᑉ ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎ ᑕᖅᑭᑕᒫ ᐊᑭᓕᒐᒃᓴᖅᑖᕆᔭᐅᕙᒃᑐᖅ $12.34 −ᒥᑦ ᒥᒃᖠᒋᐊᕐᓂᐊᖅᐳᖅ (GST−ᖓᓗ) ᒐᕙᒪᒃᑯᓐᓂᙶᙱᑦᑐᓄᑦ ᐃᒡᓗᖃᖅᑎᓄᑦ 500 kWh/ ᐊᑐᖅᑐᓄᑦ ᑕᖅᑭᑕᒫᑦ.
ᑐᑭᓯᒋᐊᒃᑲᓐᓂᕈᒪᔪᑦ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᖕᒧᑦ ᓱᕐᕋᔾᔭᐃᒃᑯᑎᒧᑦ ᐅᕙᓂ ᑕᑯᔭᐅᔪᓐᓇᖅᑐᑦ www.qec.nu.ca.
ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:
ᐱᐱ ᐱᓗᑑ
ᑐᓴᐅᒪᔪᓕᕆᔨ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ
(867) 979-7520
bbilodeau@qec.nu.ca