ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐆᒻᒪᖅᑯᑎᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᑦ

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑐᓂᓯᓯᒪᓕᖅᑐᑦ ᐆᒻᒪᖅᑯᑎᑦ ᐊᑭᖏᓐᓂᒃ ᐊᑭᑦᑐᕆᐊᖁᔨᓂᕐᒧᑦ ᑐᒃᓯᕋᐅᒻᒥᒃ ᑐᒃᓯᕋᖅᖢᑎᒃ ᐆᒻᒪᖅᑯᑎᑦ ᐊᑭᖏᓐᓂᒃ ᐊᓯᔾᔩᖁᔨᔪᓂᒃ, ᐊᐃᕆᓕ 1, 2025-ᒥ ᐱᒋᐊᕐᓗᓂ. ᐱᓇᔫᑎ ᑐᓐᓂᖅᑯᑕᐅᓚᐅᖅᐳᖅ ᐆᒻᒪᖅᑯᑎᓕᕆᔨᒃᑯᑦ ᒥᓂᔅᑕᖓᓄᑦ, ᖃᐅᔨᓇᓱᒋᐊᖃᕐᓂᐊᖅᑐᖅ ᐆᒻᒪᖅᑯᑎᑦ ᐊᑭᖏᓐᓄᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᖃᓄᐃᓕᐅᖁᔭᐅᖕᒪᖔᑕ.

ᑐᒃᓯᕋᐅᑦ ᕿᓂᖅᐳᖅ ᖃᔅᓯᑐᖅᑎᑕᐅᔪᓂᒃ ᐅᓄᖅᓯᒋᐊᖅᑕᐅᔪᓂᒃ ᐊᖑᒻᒪᑎᔪᒪᓂᕐᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᑮᓇᐅᔭᓄᑦ ᐱᔭᐅᕙᓪᓕᐊᔭᕆᐊᓕᖕᓄᑦ 2025–2026−ᒧᑦ. ᐊᔾᔨᒌᙱᓐᓂᖏᓐᓄᑦ ᐊᑭᓕᖅᓱᐃᕙᒃᑐᑦ ᓇᓗᓇᐃᖅᑕᐅᓂᖏᑦ ᐊᒻᒪ ᐃᑲᔫᓯᐊᑦ ᐊᑐᐃᓐᓇᐅᔪᑦ ᓄᓇᕗᒻᒥᐅᓄᑦ, ᐃᓛᒃᑯᑦ ᐆᒻᒪᖅᑯᑎᓄᑦ ᐊᑭᓕᒐᒃᓴᐃᑦ ᐊᒃᑐᐃᓂᖏᑦ ᐊᔾᔨᒌᔾᔮᙱᑦᑐᑦ.

ᐱᓇᔫᑎᐅᑉ ᐃᓗᓕᓪᓗᐊᑕᖏᑦ ᐅᑯᐊᖑᕗᑦ:
• ᑕᖅᑭᑕᒫᑦ ᐱᔨᑦᑎᕋᕐᓂᕐᒧᑦ ᐊᑭᓕᒐᒃᓴᓄᑦ ᐋᖅᑭᒋᐊᖅᑕᐅᔪᑦ:
o ᐊᖏᕐᕋᖃᖅᑎᐅᔪᖅ ᓂᐅᕕᖅᐸᒃᑐᖅ: ᐅᓄᖅᓯᒋᐊᖅᓯᒪᔪᑦ $18−ᒥᑦ $36-ᒧᑦ.
o ᓇᖕᒥᓂᖃᖅᑎᑦ ᓂᐅᕕᖅᐸᒃᑐᑦ: ᐅᓄᖅᓯᒋᐊᖅᓯᒪᔪᑦ $8−ᒥᑦ $16-ᒧᑦ ᑕᒪᐃᓐᓄᑦ kW−ᓄᑦ.

• ᑐᒃᓯᕋᖅᐳᑦ ᐆᒻᒪᖅᑯᑎᑦ ᐊᑭᑦᑐᕆᐊᖁᓪᓗᒋᑦ 9.5%−ᒥ.

ᑖᒃᑯᐊ ᐋᖅᑭᒋᐊᖅᑕᐅᔪᑦ ᑐᕌᒐᖃᖅᐳᑦ ᐱᐅᓯᒋᐊᕈᑕᐅᓇᓱᒃᖢᑎᒃ ᐊᑭᖏᓐᓄᑦ ᐅᑎᖅᑎᑕᐅᔾᔪᑎᓄᑦ. ᐱᒻᒪᕆᐅᖕᒥᔪᖅ, ᓄᓇᕗᒻᒥ ᐆᒻᒪᖅᑯᑎᓄᑦ ᐃᑲᔫᓯᐊᑦ ᒪᓕᒃᖢᒋᑦ, ᑖᒃᑯᐊ ᐊᑭᓕᖅᓱᐃᔨᓄᑦ ᐊᑭᓕᒐᒃᓴᙳᖅᑎᑕᐅᔪᑦ ᐊᒃᑐᐃᔾᔪᑕᐅᔾᔮᙱᑦᑐᑦ ᒐᕙᒪᒃᑯᓐᓂᙶᙱᑦᑐᓂᒃ ᐃᒡᓗᖃᖅᑎᐅᔪᓄᑦ ᐊᑭᓕᖅᓱᐃᔨᓄᑦ ᐊᑭᓕᒐᒃᓴᖏᓐᓂᒃ.
ᐊᒻᒪᓗᑦᑕᐅᖅ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑐᒃᓯᕋᖅᐳᑦ ᐆᒻᒪᖅᑯᑎᑦ ᐊᑭᑦᑐᕆᐊᖁᓪᓗᒋᑦ 9.5%−ᒥ ᓴᖅᑭᔾᔪᑎᒃᓴᓂᒃ ᑮᓇᐅᔭᖅᑖᕆᔭᐅᕙᓪᓕᐊᔪᓂᒃ ᐊᒥᒐᖅᓯᔪᓄᑦ ᐃᓱᒪᒋᓕᕈᕕᐅᒃ ᐊᑭᒋᑎᑕᐅᔪᑦ ᐊᒻᒪ ᐅᖅᓱᐊᓗᖕᒧᑦ ᐊᑭᖏᓐᓄᑦ ᓱᕐᕋᔾᔭᐃᒃᑯᑎᒧᑦ ᐊᑭᖏᓐᓄᑦ (FSR).

"ᓯᕗᓪᓕᐅᑎᔪᒪᔭᕗᑦ ᓇᓗᙱᑦᑎᐊᕈᒪᒐᑦᑎᒍᑦ ᐊᑐᖅᑕᐅᑦᑎᐊᕈᓐᓇᖅᑐᑦ ᖁᐊᖅᓵᕐᓇᙱᑦᑐᓪᓗ ᐆᒻᒪᖅᑯᑎᖃᖅᑎᑦᑎᔾᔪᓯᑦ ᓄᓇᕗᒻᒧᑦ," ᑕᐃᒪᓐᓇ ᐆᓇᔅᑦ ᑕᒡᓚᔅ ᐅᖃᖑᓚᐅᖅᐳᖅ, ᐊᖓᔪᖅᑳᖅ ᐊᐅᓚᑦᑎᔨᓪᓗᐊᑕᕐᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ. "ᑖᒃᑯᐊ ᐊᑭᖏᓐᓄᑦ ᐋᖅᑭᒋᐊᕆᐊᓖᑦ ᐱᔭᕆᐊᖃᕐᒪᑕ ᓄᑖᕈᕆᐊᕆᓂᕐᒥᑦ ᐊᓯᔾᔨᕆᐊᖃᕐᓂᖏᓐᓄᓪᓗ ᐱᑐᖃᕈᖅᐸᓪᓕᐊᔪᑦ ᐆᒻᒪᖅᑯᑎᓕᕆᓂᕐᒧᑦ ᐊᐅᓚᔪᒻᓐᓇᐅᑎᑦ ᓈᒻᒪᒃᓯᓕᕐᓂᐊᕐᓗᒍ ᓄᓇᕗᒻᒥ ᐱᕈᖅᐸᓪᓕᐊᔪᒧᑦ ᐆᒻᒪᖅᑯᑎᖃᕆᐊᖃᕐᓂᕐᒧᑦ.”

ᐆᒻᒪᖅᑯᑏᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑦ ᕿᒥᕐᕈᓂᐊᖅᑐᑦ ᑐᒃᓯᕋᐅᑎᒥᑦ ᑭᒃᑯᑐᐃᓐᓇᐃᓪᓗ ᐃᓱᒪᒋᔭᖏᓐᓂᑦ ᑐᓴᕈᒪᔪᑦ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑎᓕᐅᕆᕗᑦ ᓄᓇᕗᒻᒥᐅᓕᒫᓂᒃ ᐃᓚᐅᖁᔨᓪᓗᑎᒃ ᑐᓂᓯᓗᑎᒃ ᐅᖃᐅᓯᕆᔭᒥᓂᒃ ᐅᑯᓄᖓ URRC@gov.nu.ca 5−ᒧᐊᖅᓴᓂᖓᓄᑦ ᐅᓐᓄᒃᓴᒃᑯᑦ ᔭᓄᐊᕆ 24, 2025−ᒥ.