ᐃᓕᓐᓂᐊᕈᓐᓇᖅᑐᑎᑦ ᖃᓄᖅ ᐅᓗᕆᐊᓇᖏᑦᑐᒥᒃ ᐆᒻᒪᖅᑯᓯᓕᕆᓂᒻᒥᒃ ᐊᑐᕈᓐᓇᖅᑕᑎᑦ ᐊᖏᕐᕋᒥ, ᐃᓕᓐᓂᐊᕝᕕᒻᒥ, ᐃᖅᑲᓇᐃᔭᕝᕕᒻᒥ ᐊᐅᓪᓚᖅᓯᒪᑎᓪᓗᑎᓪᓘᓐᓃᑦ, ᐸᓐᓇᔅᓯᒪᑦᑎᐊᕈᓐᓇᖅᑐᑎᑦ ᑲᒪᒋᐊᒥᒃ ᐆᒻᒪᖅᑯᑎᓕᕆᓂᒻᒧᑦ ᑐᐊᕕᓐᓇᖅᑐᓄᑦ ᐊᒻᒪᓗ ᓴᐳᒻᒥᕆᓇᓱᓐᓂᒻᒥᒃ ᐱᓕᕆᔨᐅᖃᑎᒋᔭᓐᓂᒃ. ᐅᑯᐊ ᐃᖅᑲᐅᒪᑦᑎᐊᖅᓯᐅᒃ ᐅᓗᕆᐊᓇᖅᑕᐃᓕᒪᔾᔪᑏᑦ ᐆᒻᒪᖅᑯᑎᓄᑦ ᐱᓂᓪᓗᖁᓇᒋᑦ ᐊᕙᑎᕕᑦ ᖃᓂᒋᔮᒍᑦ.
ᐊᖏᕐᕋᒥ ᐃᖅᑲᓇᐃᔭᕝᕕᒻᒥᓗ ᐅᓗᕆᐊᓇᖅᑕᐃᓕᒪᔾᔪᑎᔅᓴᑦ
- ᑲᑉᐳᔾᔭᐅᑎᑦ ᑕᑕᓗᐊᖃᑦᑕᖏᓪᓗᒋᑦ. ᑕᒪᓐᓇ ᐆᒻᒪᖅᑯᑎᐅᑉ ᐃᖏᕐᕋᓂᐊᓂᒃ ᑭᐱᓯᔪᓐᓇᒻᒪᑦ ᐃᑯᐊᓪᓚᒍᓐᓇᕆᓪᓗᑎᓪᓗ.
- ᐅᔾᔨᖅᓵᕆᓗᒋᑦ ᑕᒪᐃᓐᓂᒃ ᐅᐊᔭᐃᑦ ᖄᐹᖏᑦ ᓄᑦᑖᓯᒪᖏᒃᑲᓗᐊᒻᒪᖔᖏᑕ ᓴᕕᕋᔭᖓᓗ ᓯᓚᐃᓐᓇᒻᒧᑦ ᓴᖅᑭᔮᖏᒻᒪᖔᑦ. ᑕᒪᒃᑯᐊ ᖄᐹᖏᑦ ᐅᐊᔭᐃᑦ ᓴᐅᒻᒥᕆᔾᔪᑕᐅᒻᒪᑕ ᓱᑲᖁᓇᒋᑦ ᐅᐊᔭᓕᕆᔪᑦ ᓱᑲᓐᓇᓐᓂᖏᓄᑦ ᐅᐊᔭᐅᑉ ᓴᕕᕋᔭᖏᑦ.
- ᑲᑉᐳᔾᔭᐅᑎᑦ ᐱᖓᔪᖃᕈᑎᒃ ᐲᓚᐅᖅᓯᒪᔭᕆᐊᖃᖏᑦᑐᑦ. ᑖᓐᓇ ᐱᖓᔪᓐᖑᐊᖓ ᓄᓇᒨᖓᑎᑦᑎᒻᒪᑦ ᐅᒻᒪᖅᑯᑖᓂᒃ ᐊᒻᒪᓘᓐᓃᑦ ᐃᒡᓗᒥᐅᑕᑦ ᓱᓇᒃᑯᑖᖏᑦ ᓱᑲᐃᔾᔭᐃᒃᑯᑕᐅᓪᓗᓂ ᐅᓗᕆᐊᓇᖁᓇᒍ.
- ᑲᑉᐳᔾᔭᐃᑎ ᑲᑉᐳᑎᔪᓐᓇᖏᒃᑯᓂ ᓈᒻᒪᖏᒃᑯᓂᓘᓐᓃᑦ ᑲᑉᐳᑎᒥᐊᕋᓱᖃᑦᑕᖏᓪᓗᒍ.
- ᐃᓱᐊᒍᑦ ᑲᑉᐳᔾᔭᐅᑎᐊᒍᑦ ᐊᒧᖃᑦᑕᓪᓗᒋᑦ ᐅᐊᔭᖃᖅᑐᓕᒫᑦ, ᑖᓐᓇ ᐅᐊᔭᖓ ᐊᒧᒋᐊᖏᓪᓗᒍ ᑲᑉᐳᑎᓯᒪᕝᕕᐊᓂᒃ ᐅᖓᓯᒃᑐᒃᑯᑦ.
- ᐊᑐᓪᓗᒋᑦ ᐅᐊᔭᒧᑦ ᓴᐳᒻᒥᕆᔾᔪᑎᑦ ᐱᓗᐊᖅᑐᒥᒃ ᖃᕆᓴᐅᔭᑦ ᖃᕆᓴᐅᔭᖃᖅᑐᓪᓗ ᓱᓇᒃᑯᑖᑦ.
- ᑕᐃᒪᓐᖓᓕᒫᖅ ᐸᐃᑉᐹᓕᒻᒥᒃ ᐅᐊᔭᓕᕆᔨᒥᒃ ᐱᓕᕆᑎᑦᑎᖃᑦᑕᓪᓗᓯ ᐅᐊᔭᐅᑉ ᓄᑖᕈᕈᑎᖏᓄᑦ ᓴᓇᔭᐅᓂᖏᓄᓪᓗ.
- ᓂᐅᕕᖃᑦᑕᓪᓗᒋᑦ ᓴᓇᕐᕈᑏᑦ ᐃᒡᓗᒥᐅᑕᓪᓗ ᓱᓇᒃᑯᑖᑦ ᓇᓗᓇᐃᒃᑯᓯᖅᑕᐅᓯᒪᔪᑦ ᑲᓇᑕᒥ ᒪᓕᒋᐊᓕᓐᓄᑦ ᑲᑐᔾᔨᖃᑎᒌᑦ (CSA) ᐊᓯᖏᑕᓘᓐᓃᑦ ᐃᓕᓴᕆᔭᐅᓯᒪᔪᑦ ᑎᒥᖁᑖᓄᑦ.
- ᐊᑐᖃᑦᑕᖏᓪᓗᒋᑦ ᑲᑉᐳᑎᓯᒪᔪᑦ ᓱᓇᒃᑯᑖᑦ ᓴᓇᕐᕈᑏᓪᓗ ᐃᒪᐅᑉ ᖃᓂᒋᔮᒍᑦ.
- ᓯᕋᔭᒍᑏᑦ ᐳᕙᓪᓚᖅᓯᐊᓄᑦ ᑲᑉᐳᔾᔭᐃᖃᑦᑕᓪᓗᓯᐅᒃ ᐊᔪᖅᓯᓯᒪᔪᖓ ᐲᕋᓱᓚᐅᖏᓐᓂᔅᓯᓐᓂᒃ..
ᐆᒻᒪᖅᑯᑎᑐᓐᓂᒻᒧᑦ ᖃᐅᔨᓴᐅᑎᖏᑕ ᐅᓗᕆᐊᓇᖅᑕᐃᓕᒪᔾᔪᑎᖏᑦ
QEC−ᑯᑦ ᐃᖅᑲᓇᐃᔭᖅᑎᖏᑦ ᐳᓚᕋᓲᖑᒻᒪᑕ ᐊᔾᔨᒌᖏᑦᑑᔪᓂᒃ ᐱᔅᓇᓯᓂᒃ ᓄᓇᓕᐅᓪᓗ ᐃᓄᖃᕝᕕᖏᑕ ᐃᒡᓗᖁᑎᖏᓐᓂᒃ ᓇᓗᓇᐃᖅᓯᒪᔪᒃᑯᑦ ᐅᓪᓗᖏᒍᑦ. ᑕᐃᒪᓕ ᑖᒃᑯᐊ ᓱᓕᔪᒥᒃ ᓇᓗᓇᐃᖅᑕᐅᖁᓪᓗᒋᑦ ᐆᒻᒪᖅᑯᑎᒧᑦ ᐊᑐᓐᓂᒻᒧᑦ ᓇᓗᓇᐃᒃᑯᑕᖏᑦ, ᑲᒪᒋᔭᐅᔭᕆᐊᖃᓲᑦ ᐱᓕᕆᔭᐅᓂᖏᓄᑦ ᐆᒻᒪᖅᑯᑎᓕᕆᔾᔪᑎᐅᔪᓂᒃ ᐊᓯᖏᓂᓪᓗ ᐱᔨᑦᑎᕋᕈᑎᖏᑕ QEC−ᑯᑦ, ᐊᐱᕆᓲᕗᑦ ᑭᒃᑯᓕᒫᖑᔪᑦ ᐃᑲᔪᑦᑎᐊᕋᓱᖁᓪᓗᑎᒍᑦ ᐃᒡᓗᖓᑕ ᐊᕙᑎᖓᑕ ᓯᓚᑖᓂ. ᑕᐃᒪᓕ ᐃᒡᓗᕕᑦ ᐊᕙᑖᑦ ᐅᓗᕆᐊᓇᖁᓇᒍ ᑖᒃᑯᓄᖓ QEC−ᑯᑦ ᐃᖅᑲᓇᐃᔭᖅᑎᖏᓄᑦ, ᐅᓗᕆᐊᓇᖏᖃᓯᐅᑎᕗᑦ ᐃᓕᓐᓄᑦ, ᐃᓚᒋᔭᓐᓄᑦ ᐱᖃᓐᓇᕆᔭᓐᓄᓪᓗ.
- ᑕᒪᐃᓐᓂᒃ ᐊᒡᕕᐊᕈᑎᔪᑦ ᓇᓗᓇᐃᒃᑯᑕᓂᒃ ᐊᒡᕖᕋᓪᖢᒋᑦ. ᑕᒪᒃᑯᐊ ᐱᖃᓯᐅᑎᔪᑦ ᓴᓇᕐᕈᑏᑦ, ᐱᖁᑎᓯ, ᐊᐳᑎᖓ ᓂᓚᖃᓐᓂᖓᓗ ᓴᓂᕌᒍᑦ. ᑕᒪᒃᑯᐊ ᓱᑲᓐᓇᖅᓯᔪᓐᓇᖅᑐᑦ ᓱᓇᒃᑯᑖᑦ ᓴᐅᔭᐅᒍᑎᑦ ᐊᐳᑎᐅᑉ ᐃᑭᐊᖓᒍᑦ ᐅᓗᕆᐊᓇᓲᑦ ᑲᒪᒋᔭᖃᕋᓱᑦᑐᒧᑦ, ᐱᓗᐊᖅᑐᒥᒃ ᐃᑳᖅᑐᖃᐅᕈᑎᒃ ᑖᔅᓱᒧᖓ ᓇᓗᓇᐃᒃᑯᑕᐅᔪᒧᑦ.
- ᓇᓗᓇᐃᒃᑯᑎᐅᑉ ᓵᖓᒍᑦ ᐊᖅᑯᓯᐅᓪᓗᑎᑦ ᐊᒡᕕᐊᕈᑎᖃᖏᑦᑐᒥᒃ. ᐲᔭᓪᓗᒍ ᐊᐳᑎᖓ ᒪᔪᕋᐅᑎᓂᒃ ᓂᕕᖓᔪᖃᖏᓪᓗᓂ ᓂᓚᒻᒥᒃ ᖁᓛᒍᑦ. ᐃᓗᐊᓃᒃᑯᓂ ᓇᓗᓇᐃᒃᑯᑖ, ᐊᒡᕕᐊᕈᑎᖃᕆᐊᖃᖏᑦᑐᖅ ᐊᖅᑯᑖ ᕿᒥᕐᕈᔭᐅᓂᐊᓄᑦ.
- ᕿᒪᕉᑎᑎᓪᓗᒋᑦ ᕿᒻᒦᑦ. ᕿᒻᒥᓯ, ᐃᖅᓯᓇᖏᑦᑎᐊᖅᑰᔨᒐᓗᐊᕈᓂ ᐃᓄᓐᓄᑦ ᐅᓇᔪᓐᓇᓪᓗᓂ, ᑭᓯᐊᓂ ᐃᐱᖅᓯᒪᔭᕆᐊᓕᒃ, ᕿᒪᕉᑎᓯᒪᓗᓂ ᐊᓯᓕᒫᖓᒍᓪᓘᓐᓃᑦ ᓴᐴᓗᑕᖃᖅᑎᑕᐅᓗᑎᒃ ᑖᒃᑯᓇᓐᖓᑦ QEC−ᑯᑦ ᐃᖅᑲᓇᐃᔭᖅᑎᖏᑦ ᐃᒡᓗᕕᑦ ᓯᓚᑖᓃᓕᖄᖓᑕ. ᐃᖅᓯᓇᖏᑦᑑᒐᓗᐊᑦ ᕿᒻᒦᑦ ᐃᖅᓯᓇᖅᓯᓲᖑᒻᒪᑕ ᓄᓇᖁᑎᒋᓇᓱᒋᔭᖏᑦ ᐃᓵᖅᑕᐅᓇᓱᒋᓕᕌᖓᒥᔾᔪᒃ. ᐃᐱᖅᓯᒪᒍᒃ ᕿᒻᒥᖅ ᓇᓗᓇᐃᒃᑯᑖᓂᒃ QEC−ᑯᑦ ᐃᖅᑲᓇᐃᔭᖅᑎᖓ ᓯᓚᑖᓃᒃᑯᓂ ᕿᒥᕐᕈᓇᖁᓪᓗᒍ ᓇᓗᓇᐃᒃᑯᑖ. ᑖᒃᑯᐊ ᕿᒻᒥᓯ ᐃᒡᓗᕈᓯᒻᒦᑎᖃᑦᑕᓪᓗᒋᑦ ᐃᒡᓘᑉ ᐃᓗᐊᓄᑦ QEC−ᑯᑦ ᐃᖅᑲᓇᐃᔭᖅᑎᖓ ᐃᓯᕆᐊᖃᕈᓂ ᕿᒥᕐᕈᐃᓇᓱᓪᓗᓂ.
- ᕿᒻᒦᑦ ᐃᐱᖅᓯᒪᔭᕆᐊᖃᖏᑦᑐᑦ ᑕᐃᒪᓐᖓᓕᒫᖅ ᐆᒻᒪᖅᑯᑎᑦ ᐅᐊᔭᖃᕝᕕᖏᑕ ᓇᑉᐸᖅᑯᑎᖏᓄᑦ. ᐅᓗᕆᐊᓇᐅᑎᕗᑦ QEC−ᑯᑦ ᐃᖅᑲᓇᐃᔭᖅᑎᖏᓄᑦ ᐊᒃᑐᐃᔪᓐᓇᒻᒪᑦ ᐊᑯᓂᐅᓂᐊᑕ ᑐᐊᕕᓐᓇᖅᑐᒥᒃ ᐅᐸᒍᑎᓂᖏᑦ ᑲᓚᒋᔭᐅᖁᓪᓗᒋᑦ ᑐᐊᕕᓐᓇᖅᑐᑦ.
ᓴᓇᕝᕕᖕᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᑲᔫᑎᒃᓴᑦ
ᑭᒃᑯᓕᒫᑦ ᑲᒪᒋᔭᖃᕆᐊᖃᖅᐳᑦ ᐆᒻᒪᖅᑯᑎᑦ ᐅᐊᔭᖏᓐᓂᒃ ᐊᑦᑕᕐᓇᖅᑕᐃᓕᒪᑎᑦᑎᓗᑎᒃ. ᐅᓄᕐᓂᖅᓴᐃᑦ ᐅᐊᔭᓂᑦ ᐊᒃᑐᖅᓯᖃᑦᑕᖅᐳᑦ ᐃᒡᓗᓕᐅᕐᕕᐅᔪᓂᑦ ᓄᖅᑲᖅᑎᒐᒃᓴᐅᒐᔪᒃᖢᓂᓗ. ᐊᕙᑎᖕᓃᑦᑐᓂᒃ ᐅᔾᔨᖅᓱᑦᑎᐊᖅᐸᒡᓗᑎᑦ ᐊᒻᒪ ᖃᐅᔨᓴᑦᑎᐊᖅᐸᒡᓗᑎᑦ ᑐᐊᐸᒃᑕᐅᑎᒥᑦ ᓄᓇᓯᐅᑎᒥᑦ ᐊᖁᓕᕌᖓᕕᑦ ᐊᒻᒪ ᖁᑦᑎᒃᑐᓂᒃ ᑎᑭᐅᑎᓇᓱᒋᐊᓕᖕᓂᒃ ᓄᓇᓯᐅᑎᓂᒃ ᓲᕐᓗ ᑭᕕᒃᑕᐅᑎᑦ ᓄᓇᓯᐅᑎᕐᔪᐊᑦ, ᐅᕿᙱᑦᑐᓂᒃ ᑭᕕᒃᓯᔾᔪᑎᑦ ᓄᓇᓯᐅᑎᕐᔪᐊᑦ ᐊᒻᒪᓗ ᐳᐊᕐᕆᓯᓖᑦ, ᑐᓄᐊᒍᑦ ᑎᒍᓯᔾᔪᑎᓖᑦ ᓄᓇᓯᐅᑎᕐᔪᐊᑦ, ᑭᕕᒃᑕᐅᑎᓖᑦ ᓄᓇᓯᐅᑎᑦ ᐊᒻᒪ ᖁᒻᒧᒃᐸᓪᓕᐊᓲᑦ ᑭᕕᒃᓯᔾᔪᑎᓖᑦ ᓄᓇᓯᐅᑎᑦ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ ᓯᕗᓂᐊᒍᑦ ᖃᐅᔨᑎᑕᐅᕙᒌᕆᐊᓖᑦ ᐱᓕᕆᐊᕆᓂᐊᖅᑕᐃᑦ ᐱᖓᓱᑦ ᒦᑕᑦ (ᖁᓕᑦ ᐃᓯᒃᑲᑦ) ᐅᖓᑖᓅᙱᑦᑐᖅ ᐱᓕᕆᔭᕆᐊᖃᕐᓂᐊᖅᐸᑦ ᐆᒻᒪᖅᑯᑎᑦ ᐅᐊᔭᖏᓐᓂᒃ ᐱᓕᕆᐊᒃᓴᐃᓪᓗ ᐊᑦᑕᑕᖅᑎᑦᑎᔭᕆᐊᖃᕐᓂᐊᖅᐸᑦ.
- ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᓴᐅᒪᑎᑦᑎᐊᕆᐊᖃᖅᐳᑦ:
- ᐱᓕᕆᐊᒃᓴᐅᑉ ᐱᒋᐊᕐᕕᒃᓴᖓᑕ ᐃᓱᓕᕝᕕᒃᓴᖓᑕᓗ ᐅᓪᓗᖏᑦ
- ᐱᓕᕆᕝᕕᐅᓂᐊᖅᑑᑉ ᓇᓃᓐᓂᖏᑦ
- ᖃᓄᑐᐃᓐᓇᖅ ᐊᓯᔾᔨᖅᐸᑕ ᐱᓕᕆᐊᒃᓴᑦ ᐸᕐᓇᒃᑕᐅᓯᒪᔪᑦ
ᖃᕆᓴᐅᔭᒃᑯᑦ ᐱᔪᒪᒍᕕᑦ ᓴᓇᕝᕕᖕᒥ ᐊᑦᑕᕐᓇᖅᑕᐃᓕᒪᑎᑦᑎᓂᕐᒧᑦ ᐅᖃᓕᒫᒐᕐᒥᑦ, ᐅᓇ ᓇᕿᓪᓗᒍ.
ᓄᓇᓯᐅᑎᒃᑯᑦ ᐱᕐᕈᓗᐊᕿᓂᖅ ᐆᒻᒪᖅᑯᑎᑦ ᐊᖅᑯᑎᖏᓐᓄᑦ
ᐆᒻᒪᖅᑯᑎᐅᑉ ᐊᖅᑯᑎᖓᓄ ᐱᕐᕈᓗᐊᕿᓯᒪᔪᖅᓯᐊᕈᕕᑦ
ᓄᓇᓯᐅᑎᒃᑯᑦ ᐱᕐᕈᓗᐊᕿᔪᖃᖅᑎᓪᓗᒍᑦ ᐆᒻᒪᖅᑯᑎᐅᑉ ᐊᖅᑯᑎᖓᓄ ᓇᑉᐸᖅᑯᑎᒧᓪᓘᓐᓃᑦ, ᐊᑦᑕᕐᓇᖅᑐᒧᐊᖅᑕᐃᓖᓐᓇᐅᔭᕐᓗᒍᑦ ᓄᓇᓯᐅᑎᓗ ᐱᕐᕈᓗᐊᕿᓯᒪᔪᖅ ᓱᑲᓐᓇᖅᑐᖃᕋᓱᒌᓐᓇᐅᔭᕐᓗᒍᑦ. ᑲᑕᒃᓯᒪᔪᑦ ᓱᕋᒃᓯᒪᔪᓪᓘᓐᓃᑦ ᐆᒻᒪᖅᑯᑎᐅᑉ ᐊᖅᑯᑎᖏᑦ ᓱᓕ ᐆᒻᒪᖅᑯᑎᖃᕈᓐᓇᖅᐳᑦ ᐆᒻᒪᖅᑯᑎᖃᖅᑰᔨᙱᒃᑲᓗᐊᖅᑎᓪᓗᒋᑦ. ᐅᖃᓗᒡᕕᒋᓗᒍᑦ ᓄᓇᓕᖕᓃᑦᑐᖅ ᑐᐊᕕᕐᓇᖅᑐᓕᕆᔨᒃᑯᑦ ᐆᒻᒪᖅᑯᑎᒥᑦ ᑲᑕᒃᓯᒪᔪᖅᓯᐊᕈᕕᑦ.
ᓄᓇᓯᐅᑎᒥᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᒪᔭᕆᐊᓖᑦ
ᓄᓇᓯᐅᒻᒥᒃ ᐱᕐᕈᓗᐊᕿᖃᑕᐅᒍᕕᑦ ᐆᒻᒪᖅᑯᑎᐅᑉ ᐊᖅᑯᑎᖓᓄ ᓲᕐᓗ ᓇᑉᐸᖅᑯᒻᒧ ᑲᑕᒃᓯᒪᔪᒧᓪᓘᓐᓃᑦ ᐊᖅᑯᒻᒧ, ᓄᓇᓯᐅᑎ ᓱᑲᓐᓇᓕᕋᓱᒌᓐᓇᐅᔭᕐᓗᒍᑦ ᓱᑲᑦᑕᙱᒃᑲᓗᐊᖅᑎᓪᓗᒍᑦ, ᐳᔫᙱᒃᑲᓗᐊᖅᑎᓪᓗᒍᑦ ᑐᓴᖅᓴᐅᙱᒃᑲᓗᐊᖅᑎᓪᓗᒍᓘᓐᓃᑦ.
ᓄᓇᓯᐅᑎᐅᑉ ᓯᓚᑖᓃᒃᑯᕕᑦ
- 10 ᒦᑕᔅ (33 ᐃᓱᒐᓪᓘᓐᓃᑦ) ᕙᓯᐅᑉ ᑕᑭᑎᒋᓂᖓᑐᑦ ᐅᖓᓯᒋᑎᒋᓗᒍᑦ ᐱᕐᕈᓗᐊᕿᕝᕕᐅᓯᒪᔪᖅ.
- ᓄᓇᓯᐅᑎᒦᑦᑐᑦ ᐃᓂᒥᓃᖏᓐᓇᖁᓗᒋᑦ.
- ᓄᑕᖅᑲᓂᒃ ᐆᒪᔪᓪᓗ ᑎᒍᐊᕐᓂᒃ ᐱᕐᕈᓗᐊᕿᓯᒪᔪᒧᐊᖁᔨᙱᓪᓗᒍᑦ.
- ᐸᓖᓯᒃᑯᑦ ᐅᖃᓗᒡᕕᒋᓗᒍᑦ ᐊᒻᒪ ᐆᒻᒪᖅᑯᑎᓕᕆᔨᒃᑯᑦ ᖃᖓᑐᐃᓐᓇᖅ ᑐᐊᕕᕐᓇᖅᑐᓕᕆᔨᒃᑯᖏᑦ ᐅᕗᖓ 1-867-222-3807.
- ᐆᒻᒪᖅᑯᑎᓕᕆᔨᒃᑯᑦ ᐃᖅᑲᓇᐃᔭᖅᑎᖁᑎᖏᑦ ᑎᑭᒃᑯᑎᒃ, ᐊᑦᑕᕐᓇᕈᓐᓃᖅᑎᑦᑎᓂᐊᖅᑐᑦ ᐊᒡᕖᖅᑎᕆᔪᓐᓇᖅᓯᓗᑎᒃ ᓄᓇᓯᐅᑎᒥᑦ ᐃᑭᒪᔪᓂᒡᓗ.
ᓄᓇᓯᐅᑎᐅᑉ ᐃᓗᐊᓃᒃᑯᕕᑦ
ᐊᑦᑕᕐᓇᖅᑐᒧᐊᖅᑕᐃᓕᒪᓗᒍᑦ ᐃᖏᕐᕋᓗᒍᑦ ᐆᒻᒪᖅᑯᑎᐅᑉ ᐊᑖᒍᑦ ᐅᖓᓯᒌᔮᓄᓪᓘᓐᓃᑦ ᐊᔪᕐᓇᙱᒃᑯᓂ. ᓇᓗᓇᐃᕐᓗᒍᑦ ᕙᓯᑐᑦ ᑕᑭᑎᒋᔪᒥᑦ ᐅᖓᓯᖕᓂᖃᕐᓂᕐᓂᑦ (10 ᒦᑕᔅ 33 ᐃᓯᒐᓪᓘᓐᓃᑦ) ᐱᕐᕈᓗᐊᕿᓯᒪᔪᒥᑦ ᓄᖅᑲᓚᐅᙱᓐᓂᕐᓂᑦ.
ᐊᑦᑕᕐᓇᙱᑦᑐᒥᑦ ᐃᖏᕐᕋᔪᓐᓇᙱᒃᑯᕕᑦ, ᓄᖅᑲᖓᓗᑎᑦ ᐃᑲᔪᖅᑎᑦ ᑎᑭᓐᓇᓱᐊᕐᓂᖏᓐᓂᑦ.
ᖃᕆᓴᐅᔭᒃᑯᑦ ᐱᔪᒪᒍᕕᑦ ᓴᓇᕝᕕᖕᒥ ᐊᑦᑕᕐᓇᖅᑕᐃᓕᒪᑎᑦᑎᓂᕐᒧᑦ ᐅᖃᓕᒫᒐᕐᒥᑦ, ᐅᓇ ᓇᕿᓪᓗᒍ.